Lluis de Turiellos

Y un poeta orixinal, que ye una categoría a parte que dexa güelga propia nel camín de les lletres, que yá ye abondo. (Munches gracies, Lluis)

viernes, 30 de mayo de 2014

BONES NOTICIES PALA ECONOMÍA ESPAÑOLA


El PIB xube un 0,4 % fasta marzu gracies al mayor consumu…
  
     Yá sabía yo que’l consumir afartu a la población diba a ser bonu pa daquién. Arriendes, la CEOE paez ser que taría dispuesta a contratar de baldre a tolos paraos y a la emigración qu'anecia n'entrar n’España. D’esa miente, diba a ser quien a iguar dos problemes abegosos pal país d’una sola vegada. Mentanto, tolos egoístes que nun piensen más que nel dineru y qu'ésti traye la felicidá van poder siguir colando pala Alemaña ensin nengún tipu de torga.


martes, 27 de mayo de 2014

Dende peronia


Rescamplu na fala mía,
sol versu del mio maxín,
riegu de la mio poesía,
qu’afata como un tarín.

Lluvia de la mio llocura,
sol calce de la mio estrofa,
como’l mar de l’amargura,
qu’escuco dende la cofa.

Milenta pallabres rales,
qu’espoxiguen nesa fala,
milenta suaños candiales,
poemes d'estaya tala.

Que rimen na primavera,
polen de sema pal branu,
grano llingua na fastera,
mueyo na seronda, ufanu.

Acoxo’l camín d’iviernu,
por malures de la edá,
nun me va rindir l’infiernu,
tatexo na floxedá.

Porfio n’amosar al mundu,
la llingua d’esti país,
fasta’l caberu segundu,
aneciaré nesi envís.

Repostio, sele, con xaciu.
magar qu’ensin cabildéu,
alderico a esi batraciu,
qu’anecia n’ayén, d’abéu.

Nun ye de llaboratoriu,
mamé esa llingua del tetu,
sinón foras talandoriu,
caltendríes más respetu.

Se fala dende peronia,
la faló’l buelu’l to güelu,
asina que calla, ¡conia!
que das voltures al cielu.

sábado, 24 de mayo de 2014

Añada del caballu grande


Añada, neñu, l’añada
del caballu grande y roxu,
que nun quixo agua xelada,
l'agua xelada del toxu,
qu’esbaria pente les cañes,
fasta qu’algama la ponte,
que vien de faer les brañes,
que vien mio neñu del monte.
Lo que tien esi agua pura
de llarga cola montera,
pela verde sala ambura
restallos de primavera.

Duérmite’l mio neñu.
duérmete clavel,
que nun quier nin señu,
del cañu’l cairel.

Dormi sanxuanín,
que'l caballu llora,
qu’espetó un espín
d’un bardial de mora.
Xelaron les clines,
na vera los güeyos,
delles llarimines
ensuchen nos fueyos.

¡Ai, cómo baxaben!
El sangre corría,
suaños qu’esnalaben,
mentanto dormía…

jueves, 22 de mayo de 2014

Escaezu


     ¡Pin, hai que comer pa medrar!, ¡Pin, hai que comer pa medrar! Asina m’aporfiaben de pequeñu. Güei, tamién hai que comer pa medrar; magar que, si dalgún nun tien pa comer, malamente va poder medrar. Ensin embargo, hailos que comen a bogayu en cuenta de qu'otros nun lu faen y, per ende, espolleten a goxa enllena pola mor d’ellos. Tamién hai políticos qu’amparen a los fartones y qu'a nós namái nos estimen dos selmanes enantes de les eleiciones, y de siguío nos escaecen. De la que nos quieren, nos cunten toa clas de troles, como aquella de que les pensiones nun se van tocar y dempués-yos xuben perbaxo l’IPC, que ye cenciellamente baxales. Asina que, dexavos de falcatrúes y de querer engañar a los vieyos, qu’igual agora vos paguen con ese mesmo escaezu.

martes, 20 de mayo de 2014

En pilancu


     Yá sé que la perrina Marilyn yera abondo fata. Tamién que daquella la televisión yera en blancu y ñegru. D’igual mena, que nun había namái que dos canales, cuntando de la qu’entamó a furrular la 2ª. Seique proyeutaben los telediarios, los dibuxos animaos, “Estudiu 1”, “Un mellón pal meyor” y pocu más; pero nun empobinaben burricaes y se falaba con una correición qu’agora nun se siente. Tampoco t’espetaben programes bocayones nel horariu infantil nin en nengún otru. Güei, too camudara y lo repunante ta a la orde del día. De resultes, a la cuenta d’unos y otros, tamos nel mesmu pilancu al rau d’Europa en educación y eso que los neños d’entós nun gociaben de los medios d’agora, arriendes qu’andábamos xugando tol día nesa cai qu’anguaño nos llenen de gandaya ensin que naide reburdie.

jueves, 15 de mayo de 2014

40 años


Ocho apellíos asturianos, non, ochenta; sicasí, de nada me valió comer formigos.

Güei fai yá cuarenta años
qu’a aquella neña galana,
con falcatrúes y engaños,
y-fixi la mio paisana.

Cuarenta años qu’aguanta,
conmigo, ente cuatro muries,
fai falta ser una santa,
en pagu-y amosé Asturies.

martes, 13 de mayo de 2014

Pal xefe


Hai bien de xente que nun algama a ser “mileurista”.

Hai muncha xente a la que nun-y valen pa nada los estudios.

Hai bien de xente a la que contraten de práutiques pa paga-yos una llimosna.

Hai muncha xente que trabaya’l doblu d’hores de les roblaes.

Hai bien de xente a la que los derechos se-yos llantaron torcíos.

Hai muncha xente que nin siquiera trabaya y vive de les pensiones conxelaes de los sos güelos.

Sí, hai bien de xente cada vegada más esclavo qu’escaeció’l pasáu, esnidia nel presente, nun tien futuru y xinta la llavaza del circunstancial.

Ente toa esa llaceria, hailos a los que-yos amenorguen les vacaciones y-yos emburrien a garrales de la que-y peta al xefe. Destos caberos, inda  dalgún-y apurre una postal al so amu…


lunes, 12 de mayo de 2014

La conocencia


     Trescurríos un par díes d’operar a la muyer del triple fendíu maleolar, pasara la revista mañanera otru ciruxanu cola recua aprendices. Abúltaseme que yera un mélicu afamáu, pos llevaba munchos bolígrafos nel bolsu la bata. Foi’l casu que-y espetó a la paisana: “Eses muletines, qu’hai que rumbar yá con elles”. A lu que la parienta-y retrucó: “Arriendes que me dixera’l so collaciu que m’intervieno que nun voi ser quien a triar fasta pasar tres meses siquier, nel informe-y despliquen qu'a dreches tengo una contraición del trapeciu y a manzorga, mala estabilidá por cuenta una embolia que sufrí fai más de 15 años. A lu que l’eminente, ensin alteriase un plizcu, aldericó: “Pos reposu absolutu, reposu absolutu”.

     Güei, dempués de malpenes 5 selmanes, estraxeron dalgún torniellu y tamién una enfermera-y pegó a la infusa: “Hai qu’entamar a andar yá, guapina”.

     Si nun morremos, anque la sanidá seya pública, ye porque nun ta de Dios o porque nun pierdes la conocencia.


sábado, 10 de mayo de 2014

Más de lo mesmu


     El Boletín Oficial del Estado (BOE) publicó ayer la licitación de las obras de construcción y mantenimiento de las instalaciones de protección civil y de seguridad en los túneles de la Variante por 98,5 millones y 14 meses de plazo. (LNE, güei, 10.5.2014)

     Las obras de construcción de la 
Variante de Pajares revivirán en 2013 y la infraestructura estará lista para funcionar en 2014, según anunció la ministra de Fomento Ana Pastor durante una sesión de control al Gobierno realizada en el Congreso el pasado miércoles. (23-9-2012)


    Más de lo mesmu. Otros 14 meses de plazu a amestar, amás d’otros 98,5 millones pa construcción, caltenimientu, proteición y seguridá nos furacos de la Variante. El nuesu Ave ye’l más seguru d’España y seique’l tren más seguru del mundu. Nun tien más qu’una pega, amiguinos, que nun furrula; arriendes que, cada noticia trai un nuevu retrasu y per ende una nueva tomadura de pelo a los asturianos. Lo peor del casu ye que nun pasa nada porque equí naide reburdia.

jueves, 8 de mayo de 2014

En la Dehesa de la Villa


     Esta foto de Fernando Barrero en el magnífico sitio web de mi amiga Bea Burgos,
El blog de Tetuán – Madrid, me da pie a consignar esta entrada para los lectores exclusivamente castellano parlantes...

     Durante algunos años anteriores y posteriores a nuestra guerra civil era muy frecuente observar como familias enteras, generalmente humildes, se desplazaban hasta la Dehesa de la Villa de Madrid para comer y merendar. En aquel entonces, no se estilaban ni las mesas ni las sillas plegables, y las viandas, así como el asiento de los comensales, solían acomodarse sobre unas raídas mantas militares muy típicas de la época. Algo cuento al respecto en alguno de mis micro relatos; no obstante, aquí recapitularé parte de una anécdota en la que me vi implicado: “Yo, en los años 50 del pasado siglo, era un niño exactamente igual que los que podéis observar en la fotografía. Un día de verano, mis familiares me trasladaron a uno de aquellos “picnic”, con la desventura de que en la sobremesa mi tío Manuel descuidó a mi alcance su recio mechero de metal. Mi ocurrencia fue la de tomar dicho encendedor y comenzar a prender todos los cardos secos que abundaban en la zona, sin que entre todos los presentes en el lugar fueran capaces de sofocar el incendio producido. A causa de ello, tuvieron que personarse los bomberos y escapar el indiferente responsable entre los atribulados domingueros”.

     No fue aquella la más sonada de mis desafortunadas peripecias; sin embargo, su desglose y narración escapan a esta breve reseña.

martes, 6 de mayo de 2014

Veyures y preseos


     ¿Nun vos decatarais de que los homes, de la que merquen dalguna ferramienta nel comerciu, ponen xestu interesante y echen mano a la caxada? Yo tuvi faciendo un estudiu de cómo repercuten los preseos sobre’l cazu humanu pala Universidá d'Harvard y la mio estaya foi mui bien emponderada, tanto que m’apurrieron una Mención d’Honor. De resultes, m’espublizaren el llibru “Desendolcu de les veyures al rabu de les xeres agrícoles”. D’él, me vais permitir que nun vos esclarie nada, a causa de que pa un llibru que m'invitaron a espublizar nun puedo torgar ventes, yá que dempués la muyer me riñe porque diz que nun me val pa nada tolo qu’escribo. Al envís, la obra, asoleyada pola editorial “Paisanos Escoyíos”, ta a la vuesa disposición nes llibreríes especializaes.

domingo, 4 de mayo de 2014

La meyor paisana


La muyer de la cocina,
la que fai tola colada,
la que-y llames mamina,
la fema que ye una fada.

La que trabaya a pescuezu,
la que t’empunxo a tatás,
la que nunca mete’l cuezu,
la que ta onde tu tas.

La que te cebo de neñu,
la que te vistió tamién,
la que nun rindía al sueñu,
la que fuerte se caltién.

La que te cuntaba cuentos,
curiando na to malura,
la de reblagos a cientos,
pela cai de l’amargura.

La que llevanta darréu,
esa que s’echa dempués,
la que siempres ta d’abéu,
pa que tu contentu tes.

Ye la qu'abastez de tou,
anque nun-y quede un rispiu,
nun pue ser d’otro mou,
por ti vence tol arispiu.

La que da meyor conseyu,
la que t'ufierta la vida,
nun mirando’l so porgüeyu,
la que-y val la to xida.

La to ma, güei y mañana,
magar que colara al cielu,
seique, la meyor paisana,
a estazón, como’l to güelu.

Asina, el versu encoplando,
adulces algama’l fin,
a la mio ma recordando,
qu’enxamás la escaez, Pin.