Valir

       Daquella, vendiérennos el tocadiscos. Dempués asoleyaron les cintes y mercamos el casete. De secute foi’l CD y darréu’l pendrive. Coles televisiones, los videos, decodificadores y fasta coles mesmes antenes pa sintonizar asocediera otru tantu; sicasí, el dineru que-yos pagues siempres-yos va a valir porque les perres nun camuden. Los electrodomésticos dexen de furrular cuando manda’l programa. Too ye una engañifa pa que consumas y pa que nada te valga de la que pase un tiempu. Fasta nós tamos tamién comercializaos, el nuesu códigu de barres engurria nel focicu, y, si nun te pues valir y nun tienes naide que t’agabite, t’empobinen a un asilu onde pagues seis veces más que lu que ganabes cola fin de quedase fasta cola to propia alma; total, tu nun lu vas llevar ya ellos van poder siguir especulando. 

Hai ku chu o nun hai ku chu.

 

Toa mañana

amanez con café,

zucre y  galbana.

 

Nada se ve,

cuando la niebla tapa,

el propiu pie.

 

Pueque la capa

nun ablugue la to alma,

si pues, escapa.

 

Too ta en calma,

la mesma soledá

de sola ensalma.

 

Cola piedá,

algames a ser fuerte,

por caridá.

 

Quiciás acierte,

si asomes pel ventanu,

sinón, la muerte.

 

Seique ye en vanu,

a la pámpana rota,

l’amor llonxanu.

 

Nin una gota,

nin clin me pinta bien,

porque m’enfota.

 

Nun cuco’l zen

si’l 17 ama,

fino n’ayén.

 

Per Yokohama,

nun vos quedar conmigo,

la Oka (nun) yama.



¿Palmira? Non, Madrid.

 

 

D’esta guisa,

yá nun atropa povisa.

D’esta miente,

se mira pol mediu ambiente.

 

(Mirái pal cartelu)

¡Vaya detalle!

   

        ¡Vaya detalle! Un mellón de gracies, Ángeles. ¡Cómo me prestó! Seique nun fora que Correos furrule mal (10 díes en llegar d’Uviéu a Madrid, un sobre verde certificáu), bien seguru que ye que lu quixeron apurrir el mesmu Día Européu de les Llingües. D’otra miente, paez que l’Academia-y refugó esti diccionariu al autor y de resultes lu espublizó pola so cuenta. Dices-y que nun esmoleza, qu’hai unos años, siendo sociu del Centru Asturianu de Madrid —con 35 años d’antigüedá—, participé nun concursu de relatos na nuesa llingua, qu’entamaba'l mentáu muérganu, que nun gané porque se m’abultaba qu’otra persona compunxera meyor el suyu. Foi’l casu que pasaos unos meses m’enteré que’l premiu lu llevara una maestra venceyada a l’Academia la Llingua, que conformaba’l xuráu. Dende entós, decidí nun preséntame a más xuegos florales pa nun dir de capullu. Anecio ya aporfio, agora públicamente, coles gracies.

BAHAMAS

 

 

Voi nun Alsa a Les Bahames,

pel fondu los siete mares,

nin me mires nin m’algames,

y, si me ves, nun declares.

 

Partiera dende la China,

au s’afita la parada,

hai parada, fonda y mina,

a sociedá venceyada.

 

Teo un fierro a la mio vera,

d'orixe en Hong Kong y Suiza,

pa reponer na tartera,

vamos pidir una pizza

 

a un que se cambió a Jazztel,

vendiendo a otra compañía,

de resultes, el pastel,

camudó a pastelería.

 

Venimos del paraísu,

qu’a naide-y paeza mal,

que naide nos faiga visu

de paraísu fiscal.

 

Vamos bañar nes sableres,

nes sableres del Caribe,

ye meyor que nun t’enteres,

qu’aquel qu’aporta recibe.

 

¡Bahames tierra querida,

Santander de mios amores,

onde inverten de por vida,

bonos alministradores!



Españando termómetros.

     Llegara la fresca a Madrid; sicasí nos entamos d’esti mes de setiembre españaben los termómetros… Aquella tarde, de la que me llevantara del pigazu diariu, alvertí a la mio familia: “nun salgáis pa la solanera que seique hai más de 50 graos”. Quixi comprobar lu aseguráu y llanté un termómetru al sol. Trescurríos cuatro minutos, l’azogue algamara’l tope del cristal esgonciando l’aparatu. De secute, afité otru termómetru ximielgu del anterior cola fin d’acotar l’esperimentu. Esta vegada lu retiré nun par de minutos nun fuera a esfardanar tamién. Pa entós yá superara los mentaos 50 graos, como podéis ver na semeya, ya ye qu’en Madrid, de la que fai calor, escachen fasta los mesmos mididores.

¡REZÁI!

 

Ensin escaecer Carlés en Salas que reabre y Salave, qu'anden a la griesca.

¡ENTAINEN!

       Una noticia na prensa xeló’l mio sangre y foi a empapizar el mio gargüelu de la que taba almorzando habrá un mes en Grau. Esto ye daqué de lu que m’alcuerdo:

 

·        ORVANA va a inyeutar más perres en El Valle.

·        Reapertura de CARLES (Salas).

·        EMERITA anicia furadures en Tinéu.

·        ASTUR GOLD tien previstu rellanzar el plan de SALAVE.

 

     Abultábaseme que too fora una velea, yá que naide reburdiaba, pero desgraciadamente ye la pura realidá: más balses y entá más metales pesaos qu’enceten ya arruinen la natura. La llaceria ta sirvida.

La puerta'l Cubia

     Tuviera cuasi un mes en Grau y a diario pudi almirar dende la ponte’l Cubia la puerta máxica qu’afayada nel mediu’l ríu daba accesu a la cubil del gochu que la tiró ya al mesmu serviciu de la casa conceyu encargáu de la so retirada. Fartu d’acolumbrar la fechoría, un día decidí baxar ya acarretala pala basoria; sicasí, la muyer ya’l fíu me torgaron d’enfusar nel ríu nun fora a esbariar en dalgún regodón. Ye lu que tien la perentela, que mira munchu por ti. Ye lu que tienen los porcozonos, que nun miren por naide.

Pezcaligrama

 

Peza la rama,

pezcaligrama,

como l’azogue,

ver nel mio blogue.



Aniellos

     Enantes d’esta dómina del “Señor de los aniellos”, onde yá nadie los amuesa nos deos sinón en oreyes, embelicu,  ceyes y nel mesmu focicu, hubo otra na que se llucíen a mou de promesa. Yera como na publicidá de los trebeyos, de la qu'a una moza-y prestaba un mozu cavilgaba “me lu pido”, entós s’afayaben los aniellos y ¡alón!, amarraos pa tola vida. Agora, que s’empareya y desempareya con facilidá, yá nun se gasten eses sortíes y de resultes se torga’l peligru de firíes si acaso frayen, como m’asocediera a min que pegué contra una papelera cuando corría pa coyer la llinia y tuvieron qu’espetame cuatro puntos de sutura ente’l furabollos ya'l mayor de toos. Si, abúltaseme que dende aquella ya nun se regalen aniellos.

La guerra de les escopetes

(Palombu firíu asitiáu fora del algame de los gatos)

     En dómina de caza, españa la redolada de la urbanización y llueve muerte sobro los terrenes qu’arrodien los xalés en forma de palombos. A vegaes, la parca s’amaruta de tórtola o falpayar y caye como’l mesmu plomu qu’agospia cada cadabre. Otres, namái fiende en forma de firíes y la llaceria entá nun fina. El sangre y les plumes s’esparden pela sabla y los sobrevivientes fuyen espavoridamente. Ye la guerra de les escopetes que cuspen proyeutiles sobro un enemigu inocente, feble y desarmáu que nun cuenta más que cola so propia vida que-y ye arrampuñada. La mio faza ye hospital o campusantu y yo, enfermeru o soterrador. Unos maten ya otros aiden como pueden; talamente como en les otres guerres, les d’humanos contra los sos mesmos hermanos.

Les malaventurances

(Semeya: F. Osu Pardu)

 

L’asesín disparó y l’osu remanez muertu nel pisu como cualesquier paisanu. Ver el so cadabre na semeya…

 

Malaventuráu’l que mata

a too bichu viviente,

por valise o non de chata,

muerra nun infiernu ardiente.

 

Malaventuráu’l que quema

la vallina, viesca o monte,

qu’a fueu povisa sema,

que xamusque pol so pronte.

 

Tamién el que contamina

pela tierra, mar o aire,

avéntelu la Santina,

nuberu, serena y flaire.

 

Amás al intolerante,

qu’esparde la intolerancia,

que refuga amor amante,

que fai nuesa vida rancia.

 

Malaventuráu’l sangrín,

al que-y presta la tortura

del humanu o del bovín,

o cualesquier criatura.

 

Malaventuráu’l que roba,

dende arriba o pende’l baxu,

xustificando con coba,

mentanto llena’l refaxu.

 

Malditu’l que mató al osu,

qu’espurrió como un paisanu,

que lu espeñe’l busgosu

per cualquier monte asturianu.



Alcordances

     L’alcordanza ye una semeya escura solmenada nel papel del tiempu. Rematáremos les vacaciones con una selmana n’Almuñecar, onde facía 32 años que nun tuviéramos. Na foto d’aquella s’alcontraben Olga Manzano y Mel Picón, a los que tuviéramos el gustu de sentí-yos cantar nel Parque del Mayuelu. D’esta, l’animación del hotel baillaba y cantaba “La Yenka” y trespandábate al añu 64 del pasáu sieglu, cuando la mio prima Mari y les otres moces de la parroquia San Fliz facíen otro tantu na fiesta del Sacramentu. Sí, el nuesu celebru ye l’álbum nel que queden rexistraes toles alcordances, au s’apieguen como llámpares; sicasí, ye nel banduyu onde acaso fienden.

La cabaña

Si quies topar la cabaña,

la cabaña de los neños,

ve al pinar que nun t’engaña,

suaña suaños nos tos sueños.

Les muries son de tarucos,

de tarucos de los pinos,

más grandes que pequeñucos,

d’ablugu de rapacinos.

La teya ye de cortezu,

la traviesa ye de vara,

si acaso entrares davezu,

dibes camudar la cara.

Nun te lo tomes a mal,

yá que sé que por ensalmu,

saldríes como un chaval

y col to xeitu más calmu.

Quiciás por arte de maxa,

pol guah.e que lleves dientro,

per aciu de la carcaxa…,

la rempuesta ta a l’alcuentro.

De la que salgas al monte

o camines la devesa,

de la que crucies la ponte,

de la que l’airín te besa.

Si nun la yes a atopar,

ye que yes abondo ranciu,

a Pin tienes que llamar

y cantar con él un canciu.

Él t’enseñará’l camín,

el camín de la cabaña;

el cuentu algama a la fin,

cuenta que Pin nun t’engaña.