Lluis de Turiellos

Y un poeta orixinal, que ye una categoría a parte que dexa güelga propia nel camín de les lletres, que yá ye abondo. (Munches gracies, Lluis)

jueves, 31 de mayo de 2018

¡Sandiez!

Agora tol mundiu canta. Anguaño tol mundiu ye poeta. Güei’l mundiu ta llenu de farsantes. Años de carrera musical, estudios eternos, ensayos permanentes como este pa vivir a la solombra de xente afamao qu’abondes veces malapenes berra. Vuelvo a citar a Max Estrella, camudando España pol mundiu: “Nel mundiu'l méritu nun se premia. Prémiase'l robar ya'l ser sinvergüenza. Nel mundiu se premia tolo malo.” ¡Sandiez!

martes, 29 de mayo de 2018

¡Bon Viaxe!



     Colos sos cantares, añeraba Alvarín hai trenta años. Agoray espera por cabera vez el so cocheru mayor: ¡Bon viaxe!


Vamos amarradinos los dos,
esplumes y terciopelu,
yo con fumos como un caricós
y tu ensin cortar un pelu.

La xente escucla con pelusa per tol valle,
marmullen los vecinos al alcalde que nos calle.

Dicen que nun s'estila yá más
nin el mio pasador nin el pañolón,
dicen que nun s'estila quiciás,
nin el to chalecu nin el cinturón.

Yo sé que s'estilen los tos güeyos y el mio arguyu,
cuando voi del to brazu per tol sol y de sutrullu.

Nos espera’l nuesu cocheru escontra la ilesia mayor,
ya al trote seliquín allegamos fasta’l puelu,
tu saludes col deu en ala del to sombreru meyor,
y yo ximielgo con serenden el pañuelu.

Nun s’estila,
yá sé que nun s’estila,
que pongas pa cenar
xazminos si van cafiar.

En conciencia, nun son trebeyos,
pero nada pa los anduelos
como ser un señor d'aquellos
que vieron los mios güelos.

Nos espera’l nuesu cocheru escontra la ilesia mayor,
ya al trote seliquín allegamos fasta’l puelu,
tu saludes col deu en ala del to sombreru meyor,
y yo ximielgo con serenden el pañuelu.

Nun s’estila,
 yá sé que nun s’estila,
que pongas pa cenar
 xazminos si van cafiar.

En conciencia, nun son trebeyos,
pero nada pa los anduelos
como ser un señor d'aquellos
que vieron los mios güelos.

jueves, 24 de mayo de 2018

Ente malos y peores


Ente malos y peores,
voi arrequexando’l votu,
ente murnies y mugores,
va cayendo en sacu rotu.

Quien tea llibre de fallu,
que tire’l primer morriyu,
cuento que fasta’l más payu
paez honráu y ye pillu.

Que’l dineru ye llambión,
que presta la propiedá
qu’aporta la corrupción
ya aquel que paña nun da.

Queyos gusten los xalés
y tamién el deportivu;
nun llegaba a fin de mes,
güei ye fíu putativu.

Si la política fiede,
nun hai que ser estremista,
muncha coria tras la Rede
ya abondo manguán na llista.

Nun val riñir col vecín
y menos colos parientes,
qu’ellos garren el puestín
y tu a cebar disidentes.

Tol mundiu vien al reclamu:
casa y sanidá pal llistu,
mientres el so ricu hermanu
t’arruina al xubir l’esquistu.

Hai más probes, diz la prensa,
y van a siguir entrando,
dellos llenen la despensa
y tu a un tiempu aforfugando.

miércoles, 23 de mayo de 2018

ESTRELLÁU



Hailos que ñacen con estrella ya hailos que ñacen estrellaos.

MAX ESTRELLA ñaciera estrelláu.

–Maestru, preséntese usté a un sillón de l'Academia.
–Nun lo digas en burlla, fatu. ¡Sóbrenme méritos! Pero esa prensa ruin boicótiame. Odien la mio rebeldía ya odien el mio talentu…

“N'España'l méritu nun se premia. Prémiase'l robar ya'l ser sinvergüenza. N'España se premia tolo malo.”
“N'España'l trabayu y l'intelixencia siempres se ficieron de menos…”
 “N'España va poder faltar el pan, pero l'inxeniu ya'l bon humor nun s'acaben.”
 “El comerciu honráu nun zuca'l sangre de naide.”

DE RESULTES: “Deformemos la espresión nel mesmu espeyu que nos deforma les cares y tola vida ruin d'España.”

martes, 22 de mayo de 2018

El tabacu relaxa


La cadarma fumadora
yera pantasma viviente,
fumó entós y fuma agora,
mientres la muerte presiente.

Ye engurria ente les engurries,
pol fumu quedó engurriáu,
cai al pisu si lu emburries,
ye solombra d’un ñubláu.

Cuntaba que distinguía
y fixérase veceru
de tres paquetes al día,
cuatro, si s’echaba sero.

Distinguía y estremaba
y gastábase les perres,
el dineru se fumaba,
la salú y les achiperres.

Entretuvo'l tiempu asina,
un mal entretenimientu,
que nun val la melecina,
cuando nun hai sanamientu.

Si ye verdá que relaxa,
seique te relaxa abondo,
te relaxa pala caxa,
onde relaxes fediondo.

Nun ye tema d’inorancia,
ye un asuntu d’inorante,
rebundia la redundancia,
como inorante pasante.

Nun ye que nun se decata,
que la semeya asoleya:
“esti tabacu te mata”,
afumáu como en Pompeya.

lunes, 21 de mayo de 2018

El perru d'atrás del coche


A la solombra un farol,
lu fui a ver aquella nueche,
yera ñegru de charol,
el perru d’atrás del coche.

Aquel que mira pa ti,
cuando vas na carretera,
aquel que nunca se ri,
el de mirada melguera.

Qu’acompaña nel camín,
que dacuando t’adelanta,
sobro esi asfaltu rasín,
cafiáu por dalguna planta.

Quedara ellí escaecíu,
te decatabes al velu,
al albentestate fríu,
perbaxo del so cartelu.

Una crónica anunciada,
malapenes, un reclamu,
un gurníu, una boquiada,
un alderique pal amu.

Esi amu indiferente
que marchó col equipaxe,
esmuciendo ente la xente,
y, del so can, el fustaxe.

Escuclando pel cristal,
azorronando la pena,
lladrando a dalgún chaval,
rique l’infeliz la cena.

Asina’l que mercó’l bar,
llantó’l so nome de broche,
que naide seya a olvidar,
al perru d’atrás del coche.



domingo, 20 de mayo de 2018

Mariquita, catasol


Mariquita, coccinella,
échame un bon badagüeyu
p’andar a la vera d’ella
xuncíos anque ensin reyu.

Mariquita de la suerte,
yá tando los dos xuntinos,
caltennos hasta la muerte
colos nuesos rapacinos.

Mariquita collorada
qu’aportas meyor destín,
que nada nos torgue, nada,
pel abegosu camín.

Llévate la mio malura
d’esi percorríu yermu,
per onde l’andancia ambura
cuando te pones enfermu.

D’igual miente a la mio amada,
posa adulces na so mano,
pa que de recién casada,
el so fíu venga sanu.

Mariquita, catasol,
por acio les pintes prietes,
tan nidies como’l charol,
nin m’apures ni m’encetes.

Resalva la mio collecha,
qu’espurra col mio llabor
y la vida a costafecha
seya fartura d’amor.



sábado, 19 de mayo de 2018

NADA



     Na década de los 60 ya entamos de la de los 70 del pasáu sieglu, Miguel ya yo cantábemos a dúu cantares de la década de los 60 y d'entamos de la de los 70 del pasáu sieglu. Arriendes, Miguel tocaba la guitarra porque tenía los deos más llargos que yo y porque tenía guitarra. Por embargu, yo nun tocaba la guitarra porque tenía los deos más curtios ya amás nun tenía guitarra. Sicasí, a les moces-yos gustaba como cantábemos y dicíen que yo cantaba meyor. A lo cabero, el que Miguel tocara la guitarra y que yo entonara meyor valiónos pa lo mesmo, o seya pa NADA.

jueves, 17 de mayo de 2018

L'amor ye caprichosu


Nun por dir a rodapiellu,
cortexara yo a una fea,
nunca fui tenral de reyu
nin marín de la salea.

Nun hubo envís de mancar,
que’l procuru foi sinceru,
que tien tol derechu a amar,
a soñar ya iguar el ñeru.

Que la que nun ye engraciada
tien tamién los sos motivos
pa ser bien considerada
por galanes y xeribos.

Igual paga más la pena
benditu’l que se decata,
pasar con ella la truena,
qu’al llau d’una guapa fata.

Que l’amor ye caprichosu,
que seique nada ta escrito,
que nun ye asuntu de noxu,
que naide s’abulte quitu.

Que dientro hai tamién guapura,
que nun ye too apariencia,
qu’aporta más la tenrura
que’l reclamu de la esencia.

Nun espolletó la cosa,
nun voi dicir que lo siento,
m’arimé a otra más curiosa
ya agora vivo del cuentu.

Pueque hubiera desengaños,
bien seguru, culpa mía,
en cuarenta y cuatro años,
yá que me riñe tol día.



martes, 15 de mayo de 2018

Indiana Jones per Asturies


¿Qué camín fairá’l paisanu
cuando toa sienda asfalten?,
quedó’l caminar llonxanu,
¿aú caleyen los que falten?

Carreteres sin arcenes,
triando pente los matos,
resalvando malapenes
con madreñes o zapatos.

¿Ónde roza’l camineru
queyos caltenía curioses
y por bien pocu dineru?,
¿ónde la gadaña poses?

¿Ya aquella reciella moces
que pasiaba en díes santos?
El que manda mete voces
que sumen ente adelantos.

Güei los nuevos, señoritos,
siempre la cuerren col coche
yyos ponen como pitos
a tolos qu’anden de nueche.

Fasta nes fiestes de prau
aparca nel escenariu
delantre, detrás ya’l llau
cualesquier magüetu fariu.

Nin el camín xacobéu
se llibra de la llaceria,
pueque al santu vea ceo,
el pelerín nuna güeria.

Asina que’l llabrador,
esi llabrador benditu,
reburdiará, pero en vanu,
contra’l bardayu malditu.

Que ye como Indiana Jones,
pue morrer en cualquier pista
ye una tema de co…
y d’espabilar la vista.

domingo, 13 de mayo de 2018

Fala col to burru


Fala col to burru,
él nun t’alderica,
él nun ye cazurru,
con nada fai pica.

Cuéntay al to pullu,
aquello que sientes,
dilu de sutrullu,
nun val siy mientes.

Mermura al pollín
que te prestaría,
confiesa’l to enclín,
que seya’l to guía.

Esclaria al burricu
tolo que fadríes,
si güei foras ricu,
les tos enganíes.

Escribe al xumentu
con llápiz de suañu,
de cielu fumientu,
too taragañu.

Nun retruca’l ruciu,
porquey paez bien,
ye de maxín cuciu,
mil virtúes tien.

Nun ríes por ello,
nun tomes a chancia
el calláu conseyu
contra la inorancia.

viernes, 11 de mayo de 2018

Proxémica



     La que toca en castellán seya una alcordanza de la mio seición nuna revista comercial de la provincia de Madrid –güei sumida–  con 45.000.- exemplares de tirada onde asoleyé los mios poemes mientres más de siete años (ta perclaru que de baldre, nun valen pa bibliografíes).

jueves, 10 de mayo de 2018

Planificación familiar



     Güei tuvi en Planificación Familiar por culpa que Rufina, la gata’l vecín, pariera una montonera fíos. Ye’l casu qu’onde come, fuelga, xinga, abulta y pare ye na nuesa campa. De resultes, m’averé a esi serviciu pa pidir una ayuda como tol mundiu y a pocu m’escuerren.  

lunes, 7 de mayo de 2018

¡TOCA HINCHIR LA BURBUYA!

(Los pisos curiosos nun baxaron nin en plena crisis)

     Toca hinchir de nuevu la burbuya inmobiliaria. Quiciabes lo decidieren los que manden pa recaldar más por tresmisiones, IBI ya otres tases. De resultes, los mediadores asoleyen, espoxiguen, s’esparden y monten el so chiringu perdayures. Los medios de comunicación s’encarguen de la publicidá de baldre. Pruyen porque'l preciu de la vivienda recupere en dellos meses lo que valtara en toa una década. Dempués vendrá otra sapada, pero enantes ellos venderán los sos pisos de luxu y namái pringarán los de siempre. Aquel día, la contribución va quedar afitada nel altor y yá nun la van baxar. El mercáu carecerá ximielgos cíclicos, como la bolsa, que pa eso ye un mercáu. Van ganar los de tola vida: la casa, los sos collacios, los mercaderos –que van sumir de nuevu de la que caiga otra vegada–, los notarios, los bancos y los "okupes" al ablugu d'unes lleis qu’entá–yos protexen en desterciu de los malparaos propietarios que trabayaron tola vida p’adquirir el so ñeru. Yá se sabe que l'arramplar o retener cosa ayena escontra la voluntá del so amu entama a ser el vezu a tolos niveles. Perderán los inocentes que se vean emburriaos a vender por culpa de la necesidá y los que vaigan a la cárcele por defender lo suyu. 

sábado, 5 de mayo de 2018

PIDIMIENTU


        Sí, yá sé que d’otra colingara esta semeya. Sí, yá sé que falé d’un Barriu Azul que s’escuende tres d’un contenedor de basoria. Tamién sé que davezu anecio en xubir pela pista que ta asitiada a manzorga d’esti cartelu fasta Picarosu o fasta onde cuadre y torno pela que parte a la so derecha. Lo que pruyo porque sepáis vós ye qu’al volver, y xusto enantes d’algamar esta señal, vos vais topar col perru del tendal enriba d’una muria. A esi can llámolu asina por aciu que t’amarráu a los alambres d’un tendal pelos que trescurre la so vida. De mano, esti animal estraña, pero s’avera y quier enredar contigo de la que te conoz. Foi’l casu que–y fixi una foto col envís de qu’ilustrara un poema que–y cuntaba encoplar. Agora que finé la ocurrencia, fui a echar mano de la semeya, pero decatéme con perplexidá que sumiera nun sé per onde. Cavilgando sobre la tema, escurrí que bien seguru que nun saliera por culpa  que quedara ellí prindáu y nin siquier la cámara foi a lu treslladar. De resultes, nun pueo espublizar los versos fasta que daquién de Grao, o d’onde seya, que pase per ellí m’apurra una foto del perrín col so indixebrable tendal a traviés del corréu interior. Prometo aportar el nome del collaborador y pueque’l perru del tendal comparta con él uno de los sos tarucos de pan.

jueves, 3 de mayo de 2018

QUINTILLA


Desendolco la quintilla,
pero endolco l’ovilleyu,
envolubro en redondilla,
un versu de puru vieyu
qu’escribo dende la villa.

Nun reparo nel tercetu,
nin siquier nel pareáu,
iguo davezu’l cuartetu
y dacuando esi importáu,
al quey llamen sonetu.

Nun gasto silva ya estancia,
soi yá mayor pal romance,
la décima anicia andancia,
con fiebre nun llanto’l bance
nin la octava real rancia.

Escurro de nueche y día,
nun sigo un programa rexu,
sí me sumo en poesía,
a vegaes, en serventesiu
y nunca en cuaterna vía.

La, la, la llira, la llira
suena a canción italiana,
presta enforma al que la mira,
la rima s’amuesa ufana
y col maxín van de xira.

Y fino como entamara,
enguedeyáu nesta villa,
encoplando pola cara
seis estrofes de quintilla
que la musa m’aportara.