Lluis de Turiellos

Y un poeta orixinal, que ye una categoría a parte que dexa güelga propia nel camín de les lletres, que yá ye abondo. (Munches gracies, Lluis)

miércoles, 31 de octubre de 2018

60 años y milenta canes dempués


     Les nueses vieyes cases en renta dixebraben de les Cases Nueves per un resbalizu desbentíu de sable prieto y per un regatu ensuchu qu’al llover acarretaba agües del cielu de la faza coles que llevantábemos un escomunal banzáu. En realidá, aquella colonia la cristianaron como de la Virxe de les Victories poles que s’algamaron escontra los marroquinos; de les derrotes, naide festexaba nada. Nella, vivíen families de policíes armaos y xentes amestaes al antiguu réxime. Alcuérdome como escuclamos dende enriba los cuetos como sacaben la caxa d’un home que dicíen perteneciera a la Xunta de la Ofensiva Nacional Sindicalista, qu'abondo sabíamos nós que coime yera eso. La mentada llinde escurría dende la fonte afitada na cruz con Rosa de Silva, que se caltuviera ellí bien d’años, fasta la xuntura con San Felipe. Nós, dende l'altor, gociábamos –talamente como en Cuadonga– d'una posición privilexada pa llanzar morrillos a los invasores; por embargu, estos cuntaben cola bien valoratible aida d'un vixilante plenipotenciariu qu'en casu d'apuru chivaba l'apiertu a la entóncenes gris policía. Si la so brigada aportaba, la nuesa escorribanda yera xeneralizada. A pocu qu'escuchéis con un plizcu de procuru, sol asfaltu de la güei afamada cai de la Infanta Mercedes de Madrid, vais sentir los glayíos d'aquelles emponderaes trifulques.




lunes, 29 de octubre de 2018

Un tiempu que resalvamos



(Que seya a perdoname l’amu por garray la semeya de les Cases Nueves, yá que nós nun teníamos cámara daquella)



     Yera un tiempu de tardes qu’espurríen a rollones sobro los bombardiaos escampleros, de programes dobles nel ranciu cine del barriu, d'infinitos xuegos d’escurrimientu y de cai; de llimes, chaples y banzones, d’amarraces colos foriatos de les Cases Nueves, d’escursiones fasta la llinde’l mundiu na mesma raya de la barriada. Foi una dómina de pan con chicolate, de pastilles de lleche de pollina, de partíos de pelota con pantalones arremendaos, de semeyes de la cámara del pá de Bertu el de la falanxe que camudaba a blancu y ñegru una realidá yá abondo escolorida. Foron unos años nos qu’escaecíes davezu los llibros mientres qu’escribíes la to propia y doliente historia pente una montonera refugayos. Malapenes trescurriera una ventena d’años d’una guerra de la qu’enxamás te falaben, magar qu'una afogadiza murnia se caltenía nel ambiente y s’ablayaba uniformada sobre nós; sicasí, naide foi quien a llevanos les alcordances d’aquel escuru tiempu que resalvamos.

jueves, 25 de octubre de 2018

¡Canta Lita!



¡Canta, Lita!, ¡Lita Canta!
quey prestaría al to güelu
sentir de la to garganta
esi afalagu del cielu.

Debaxo un rebollu curcu,
como l’arbolín del cerru,
va a ser a escuchalu’l Turcu,
nesi airín qu’espurre’l sierru.

Que si vió cantar al vientu
baxo un desmayu llorón,
te va a ver a ti al momentu
ya allegrará’l corazón.

Nun digas perdón o adiós
ya endúlzanos la mañana,
col café de caricós,
al son de la Resolana.

Aportanos la bayura
de la to voz tan candial,
namái t’ufierto tenrura
y delles flores d’urcial.

Tando amestaos nel cantar,
naide francerá l’enclín,
nin dixebranos la mar,
que te va emponderar Pin.

¡Lita Canta!, ¡Canta Lita!,
si la to voz s’espardiera,
el ciñu a La Cumparsita,
Gardel, quiciás lu perdiera.

martes, 23 de octubre de 2018

Racismu

    
    Lu de Ryanair nun ye un casu aisláu. Tolos díes hai xente que sufre ataques xenófobos. Abúltaseme qu’esti otru episodiu asocediera’l mesmu día nel metru de Madrid. La persona de la semeya s’afayaba mediu tumbada nun asientu coles botes y los calcetos quitaos. Nel vagón golía talamente como nuna cubil de gochos. Munchos entamaron a reburdiar col remate del tan cacarexáu: “Tenemos lu que nos merecemos”. ¿Ye refugu, defensa de lo propiu o racismu? L’antoxana de los caxeros de les entidaes bancaries, los bancos públicos, les entraes de los comercios y portales, arriendes de cualesquier requexu al abellugu, entamen a alcontrase enfarxopetaos. N’Africa, magar que baxara l’índiz de natalidá, cada muyer traye al mundiu de media a 4,5 neños y d’esta miente nun van poder torgar el doblar la so población d'equí a 2050 (https://umoya.org/2017/12/04/el-descenso-de-la-fecundidad-en-africa-es-mas-lento-de-lo-esperado/). ¿Tendrán tamién los proxenitores dalguna culpa? 

lunes, 22 de octubre de 2018

Contracita

  “Nun hai peor perru qu’aquel que manca a los perros” (Kan Perrault).  

Sí, Ángeles, Omar Faisán bien podría ser Omar Khayyám o cualesquier otru –¡cómo lo sabes!–. Al rodiu d’ello, esclariar qu’hai una montonera recursos colos qu’arriquecer la espresión escrita y dellos más que se podríen albidrar –yo toi nello–. Tamién hai sentencies llatines, dichos históricos, encoples célebres, máximes xurídiques… y no que toca a esta esplicación: cites. Les cites tamién arriquecen el conteníu de la obra o del discursu y dacuando en vez agabiten pa ilustrar meyor les idees; magar qu’haya dalgunos enchipaos que davezu abusen d’eses cites cuando tienen pocu que dicir. Escontra tal enclín escurrí “la contracita” cola qu’asoleyo una cita que m'invento y l’atribuyo a un autor que nun esiste: namái un plizcu de comedia nel sen opuestu a la “ostentación” lliteraria. 

jueves, 18 de octubre de 2018

Reflexón murnia



     Como dicía Omar Faisán: “la muerte nos aguarda per ende o nel mesmu finxu’l cielu”. Nesi futuru circunstancial imperativu onde amiesten el pasáu ya’l presente, de la que la nueva inesistencia nos vaya tresformando namái qu’en povisa. Cuando los allegaos ensuchen les llárimes a la vera del espurríu cadabre que se caltién de ti. Trabucamos dafechamente la vida y dacuando l’amarutamos d’uniforme o corbata. Camudamos de la escursión del colexu a la xira del IMSERSO nun tris. Engañámosnos a caldía cuntando que folgaremos nun mañana eternu mientres qu’escosamos de sópitu nuna metamorfosis malapenes etérea. El desenllaz feliz nun esiste  más qu’en dalgunos cuentos. Nada de lo que puedes imaxinar ye real, nin siquiera la propia esistencia, al aviesu de lo que cavilgaba Picasso.

jueves, 11 de octubre de 2018

Paraísu infernal



Otra noche más que se dispara la contaminación un 400% en Gijón
(Econoticias, 10 oct. 2018)

Fumu nel cielu,
mierda nel mar,
nun dan asuelu,
fueu a quemar.

Ye un paraísu,
¡qué caradura!,
ensin avisu,
la viesca ambura.

Col oru agafen
regatu y ríu,
la llingua safen,
muerre’l coríu.

Igual que l’osu,
rei del turismu,
casu abegosu,
sobra egoísmu.

País melgueru,
paga pol Güerna
y, n’Adaneru,
llena la duerna.

L’AVE…, a La Meca,
lleven los cuartos
tou ye carueca,
¡yá tamos fartos!

Toman el pelo,
mientres sotripen,
¡qué desconsuelu!,
amás, enchipen.

martes, 9 de octubre de 2018

Cuestionariu



Sr. Repunante-radical que mete’l focicu nes publicaciones de los demás nes que nun ve más que política, magar que l’autor seya dafechamente apolíticu:

      Vamos ver si somos quien a ayuday. D'entamu, nun esmoleza, asele.
      Darréu, retruque a estes entrugues pa que seyamos quien a decatanos de la bayura de la so faza afeutada.

1)      ¿Dende cuando cree vusté que sey persigue?
2)      ¿Dende cuando alderica onde nuny manden?
3)      ¿El so caberu electroencefalograma surtiera planu?
4)      ¿Y sotripaben munchu los sos collacios nel colexu?
5)      ¿Cúntenos otros cien episodios quey traumatizaron de neñu?
6)      ¿Rinde vusté si nun restola?
7)      ¿Respeta otres llingües minoritaries que nun seyan l’asturiana?
8)      ¿Y presta la crítica lliteraria?
9)      ¿Qué coses pasen pol so celebru cuando nun duerme bien?
10)   ¿Qué piensa sobre la madalena de Proust?
11)   ¿Esa bolla sey amuesa peligrosa?
12)   ¿Y la empanada de tocín?
13)   ¿Llee a Kafka?
14)   ¿Ve esperteyos nel so cuartu?
15)   ¿Sey abulten importantes les tresaminases?

        Nun dexe d’unviar les sos rempuestes a la mio direición de “Esto colmo”. Si’l so casu nun tien igua na dómina presentey vamos derivar al nuesu departamentu d’investigación agropecuaria por si nel futuruy pudiéramos echar un gabitu. Si acaso ta vusté peor de lo que cavilgamosy vamos desconeutar aína pa que nun s’esparda’l so andanciu y la so mala educación pela Rede.

lunes, 8 de octubre de 2018

¡Qué guapín ye Castru!



Qué guapu ye Castru,
más son las castreñas,
quien pudiera dir,
quien pudiera dir
a baillar con ella.

A baillar con ella,
a baillar con ella,
qué guapu ye Castru,
qué guapu ye Castru,
ye como una estrella.

Agua menudina
ye la que fai barru,
por eso nun voi,
por eso nun voi,
porque m’entafarro.

A baillar a Castru,
a baillar a Castru,
agua menudina,
agua menudina
siempre dexa rastru.

Castiellu del faru,
lluz de lluna llena,
nada alluma más,
nada alluma más,
que los güeyos d’ella.

Que los güeyos d’ella,
de la mio morena,
castiellu del faru,
castiellu del faru,
lluz de lluna llena.

Qué guapu ye Castru,
metíu ente peñas,
quien pudiera dir,
quien pudiera dir
pa ver las castreñas.

domingo, 7 de octubre de 2018

El mio armariu


Teo un armariu apináu
de trastos, cuentos ya encoples,
tamién ropa escolingao,
como del xugu les doples.

Nun voi ser llantar curiosu
lu escribayáu neses fueyes,
por aciu de perezosu,
magar tengan como trueyes.

Dos estorios, tres caxones,
delles lentes pa nun ver,
alcordances ya ilusiones,
unos billetes del TER.

Llibros que lloren l’autor,
caxes, pastilles, preseos,
un requexu de mugor,
munchos cromos y tebeos.

Semeyes, rises, postales
coles nueves ya allegríes,
estampes de funerales,
un reyu ya un par d’arbíes.

Soldaos de plomu y de guerres,
una escudiella perrones,
medayes pente achiperres,
bien de discos, dos mil sones.

A lo fondero una furnia,
enriba, nada na carra,
al abrir fiende la murnia,
da un gañíu cuando zarra.

Si acaso, nun día fríu,
marcho sepa Dios per ende,
que daquién diga’l mio fíu
qu’asoleye lu qu’escuende.


viernes, 5 de octubre de 2018

MALA PINTA


Píntase con mala pinta,
trázase con mala traza,
cualquiera ruste la xinta
y tol mundiu saca baza.

Compón quien nun conoz son,
otru escribe ensin recursu,
San Antón, la pita pon,
ya entá te gana un concursu.

El poeta, ensin xareta,
el políticu ensin nada,
fai caún lu quey peta,
desentona la tonada.

Siempres sabe’l que más manda,
tres del qu’acarreta l’arma,
el que nun zárrase en banda
t’emburria al fondu la garma.

Equí’l que nun ye ilustráu
de númberu tien carrera,
se trabaya esclavizáu
mientres se ceba al de fuera.

Esti país se regala,
l’ayuda ye universal,
magar falo nesta fala,
davezu te miren mal.

Les alcaldes populistes
ganen más que los demás,
¡demoru!, serán más llistes,
el gas xube a tou gas.

La lluz yá te lletrocuta,
sal xepa de tanta carga,
esnala’l preciu la fruta
y la to vida s’amarga.

Ansí pasa lu que pasa
y peor que pasará,
si’l golfón nun paga casa,
esto nun tien igua yá.

miércoles, 3 de octubre de 2018

Agües coloraes


Fagamos lo que nos peta,
ensin reparu nin dubia,
disparando la escopeta,
llenemos de sangre’l Cubia.

De muerte, llaceria fuerte,
del inocente que pastia,
que pastia con mala suerte,
la pena quedará en raspia.

Mieu produzme esa xente,
esa reciella que mata,
a cualquier vida inocente
y malapenes decata.

Baxen agües coloraes,
coloraes de sangrina,
de voltures y coraes,
y de la redeña ruina.