Aneciando cola casa

Magar gran casa,

siendo otra cosa,

sobro la rasa,

el versu escosa.

Ayeri en vida,

güei yá ta muerta,

sin una xida,

tanca la puerta.

Vendese entera,

con alcordances

d’enredadera,

zarros y bances.

Morrió Vicente,

como Pidal,

cola obra ausente

bien menos val.

Nun hai poesía,

foi pa Bousoño,

un cedru había,

nengún peroñu.

Pantasmal casa

de Velintonia,

pasa de tasa,

dende peronia.

Yo tamién sé de besos ya escaezu, Vicente…

Si la memoria d'un home ta nos besos,

ta la cai Velintonia en to memoria.

Pero nunca ye verdá si ye de coria.

Cuntar la vida polos besos encesos

nun ye allegre, entá más murniu de clausura. 

Que se viende la to casa y me da pena.

Que valta nel so teyáu tiempu ya antena.

Y refungo que quien muerre vive y dura.

Faer ye vivir más, pueque vivir mal,

porque nun ye de razón morrer inxente,

porque siempre l’escaezu anda latente.

 Polo qu'un paisanu fixo esistir val.

Na cruz d'Abantos

Aire y cruz,

nel mesmu cuetu,

nun esmuz

el pericuetu.

Si por marzu,

esi mes marcia,

vara en zarzu,

mayu nun arcia.

Nun pon torga

al esguilar,

la bandorga

ensin pesar.

Namái cielu

afaya enriba,

das asuelu,

nala la griba.

Nun hai pena,

mentanto sume,

tas de vena,

bendita cume.

Cuatro torres

tres del banzáu,

destes morres

tou alloñáu.

Se me vuela,

la mio peluca,

rolar, ruela,

la mar trabuca.

Si te peta

ven, t’espero,

nun m’enceta

el mal agüeru.

Cuatro y cinco,

amuesa’l versu,

fino y finco

esti universu.

El día l'atrasu

Güei foi’l día del atrasu,

del atrasu del reló,

a nós nun nos faen nin casu,

namái al que lu inventó.

Ye por culpa del que manda,

pa qu’aforre l’habitual:

el ricu, el pudiente, el randa;

anque a ti te venga mal.

Con ello maten el día,

al nun espurrir la tarde,

tarde más ñegra y más fría,

la nueche enfusa de farde.

Vas a camudar l'humor

con esti horariu d’iviernu,

la malura ya’l dolor

aporten llocura en ciernu.

Falla la concentración,

porque produz ansiedá,

hai quien garra depresión,

ye un cambéu pura maldá.

Esto ye lo que nos pasa,

mentanto a mover maniya,

toles maniyes de casa

ya al salir dir pela villa.

Si se te xinga un reló,

reclama al maestru armeru,

al ser el reló de to,

merca otru con dineru.

Martín

Había un neñu non mui llistu

que se llamaba Martín,

ya'l so pá seique Varistu,

que s’afayaba en batín.

La so casa foi de renta

−nun sabíamos que yera−,

al nun espurrir la cuenta,

aventaron la portera.

Vivía en Bravo Murillo,

vieya carretera a Francia,

esti guah.e pocu pillu,

de manera un plizcu rancia.

Magar nun ser bisarueñu,

sí yera agudu de cazu;

davezu arrugaba’l ceñu,

si doblaba l’espinazu.

Siendo de los escoyíos

pal sotripar del maestru,

cantaben−y los oyíos,

por culpa d’esi cabestru.

Un día sumió na historia,

yá nun s’allegó al colexu,

güei me vieno a la memoria

esi collaciu tatexu.

El so pisu se vendía,

lo mesmu que tol inmueble,

quiciás remaneza un día,

aquel guilopu tan feble.

El Batán

     Esti casar del Batán t’arrequexáu na  parte alta del ríu Aulencia na faza de San Llorenzu del Escorial. Ente la tupía vexetación remanez esta recia construcción hidráulica del sieglu XVI. Asitiada nun afayadizu llugar a la vera d’un regatu onde esquitaba una fonte, construyéronla p'abatanar y llavar la ropa y la llana que vendíen los monxos xeromos del conventu, qu’amas iguaben los sos propios hábitos. La xera consistía en bater o cutir el pañu ya amacigar el pelo. Pa desendolcar esi llabor na so planta baxa esistieron delles piles y chimenees, arriendes d’un banzáu colos sos arbañales y canales cubiertes por lloses que podíen retirase cuando la llavadura. Anguaño, l’edificiu que ye propiedá del Patrimoniu Nacional ta valtando y desque peslló como chigre, restorán y merenderu ye’l mesmu verde’l que paez que lu va tarmiar a él. A min, préstame pola vida caminar per esa ruina ya acotada carretera onde los díes non santos pues atopate cola nunca abondo bien estimada soledá y, si yes quien a astraete un res nel silenciu dominante, pue qu’algames a sentir el ruxerrux sele y llonxanu d’aquel pisón.

Turismu

     Pasáu un mes de la tambascada qu’entafarrara los baxos de la casa, entá nun tornó a furrular l’acutada oficina de turismu d’Asturies que Pindesierra tien abierta na provincia de Madrid, por culpa que la práutica totalidá de los folletos quedaron estropiaos pol mugor. De la que seya a atropar nuevu material, voi siguir apurriendo información –como siempres− a cazurros, coreanos, carpetovetónicos y toa triba de turistes en xeneral que quieran visitar cualesquier faza de la nuesa Tierrina.

Alluendi del baturizu

Mui adulces, bien despacio,

al tornar de los Madriles,

van reformando un palaciu

onde pasen los abriles.

Tienen corredor y sala,

lu mesmu que nel cantar,

blasón de manera tala

y terraza pa folgar.

Dos plantes y l’antoxana,

dientro de la corralada,

prodúcenme envidia sana,

viven na Tierrina amada.

A la vera un castañal,

nun llugar cerca de Grau,

como la cosa anda mal,

nun digo au ta asitiáu.

Alluendi del baturizu

s’afitara la pareya,

pente’l xuiciu ya’l berizu,

quien pueda escoyer qu’escueya.

Master and Commander

https://www.youtube.com/watch?v=4tSq1P5pels

     Non, esta música nun la compunxo nengún Master and Commander, nin siquiera Ennio Morricone. Esti son d’esa célebre película garráronlu de la Música Nocherniega del maestru  Boccherini qu’asomaba dende la so balconada allugada a la vera de l’antigua plaza de Progresu pa sentir esi ambiente castizu del centru la capital que nada tien que ver col de güei. Anguaño al pabardu inorante que caleya pela faza d’esi Madrid de la percha (https://pindesierra.blogspot.com/search?q=Percha), si ye quien a llevantar la cabeza y decatase de la esistencia de la placa, el so nome nun−y suena más qu’a boquerón. La gran boquera ye la que carez él pola que derrama les sos contaes neurones. Nun dexéis de sentir tola composición del vidéu; sobre manera, a partir del minutu cuatro.

Rede de San Lluís

    

     La Rede de San Lluis. Munches vegaes teo baxao a la estación de metro Gran Vía −naquella dómina llamada de “José Antonio”− nel so ascensor, acompañáu de mio madre, los al rodio de 20 metros de fondura dende mediaos de los años 50 del pasáu sieglu. Creo recordar que cobraben 5 céntimos de peseta por paisanu y t'espachaben el correspondiente billete d'ascensor. El so templín, con marquesina de fierro y cristal, yera obra del afamáu arquiteutu gallegu Antón Palacios y foi valtáu en 1970. Polo qu'a min respeuta, la mayor sorpresa que llevé con esta instalación foi atopámela bien d’años más sero nun parque d'O Porriño (Pontevedra) cuando fui a visitar a un bon amigu que fixi mientres el serviciu militar n'aviación.

Laa vida ye llocada

     “Ai d'aquel que na nueite nun ve más qu'escuridá ya nella nun ye quien nin siquier a suañar”(Pinón el d’Ounón).

El probe ye de manzorga,

mientres el ricu de drecha,

l’egoísmu a costa fecha

que’l bon enclín nunca torga.

Enxamás, escontra forga,

por culpa d’un egoísmu

que raya nel fanatismu

del ruino na so llocura

por algamar la bayura,

esbariando nel abismu.

Ye verdá, pos: reprimamos

de la vida la cobicia,

la roxura n’avaricia,

por si dacuando suañamos.

Y sí fairemos, pos tamos

en mundiu tan singular,

que'l vivir va ser suañar;

y l'esperiencia m’enseña,

 que l'home que vive, sueña

lo que ye, hasta espertar.

Suaña'l rei de rei, y vive

cola engañifa mandando,

disponiendo y gobernando;

ya esi aplausu, que recibe

emprestáu, nel vientu escribe

ya en povises lu convierte

 la muerte (¡llaceria fuerte!):

¡qu'hai quien intente reinar

viendo que va esperezar

nesi suañu de la muerte!

Suaña'l ricu na riqueza,

que más curiaos−y ufierta

suaña'l probe fai en puerta

cola miseria y probeza;

suaña'l qu'a medrar empieza,

suaña'l qu'enfota y pretende,

 suaña'l que cafia ya ofiende,

y nel mundu, a última hora,

suañen lo que son agora,

magar que nengún lu entiende.

Yo suaño que toi n’arbada,

 destes cárceles cargáu;

y suañé que n'otru estáu

torgaba la tambascada.

¿Qué ye la vida? Llocada.

¿Qué ye la vida? Ilusión,

una solombra, ficción,

 ya'l mayor bien ye pequeñu;

que tola vida ye suañu,

y los suaños, suaños son.

La maletina

     Güei, la maletina de mio ma finó con toles alcordances entafarraes nel contenedor de borrafes. Nin siquiera fui quien a atopar la semeya que fixi d’ella hai dellos años. El pasáu día 15 la tambascada anubrió'l chigre, el garaxe, el trasteru ya el bañu de los baxos de la casa. Ente los tres nos encargamos d'achicar l'agua. Nun pidimos aida a naide. Siguimos baldiando y tirando toa triba d'oxetos. Como dicía Labordeta: somos xente que nun pide −namái nos pañen− y a los que tampoco-yos dan.

Nun viaxe, la mio ma,

nun garró la maletina,

¿ónde te fuisti, mamá?

¡mamá del alma, mamina!

Quedara col to remite

y col caberu equipaxe,

sobresaliendo un rebite,

yá nun dirá de bagaxe.

Seique vieno de Tinéu

ya arrequexó nel trasteru,

como insensible preséu;

na mio alma, no fonderu.

Nada vale acarretar

nin el caltenese esclavu,

nada pudisti llevar,

nada tien valir al cabu.

Fuisti probe tola vida

ya aforrasti pa los fíos,

la Comunidá ensin sida

t’arruinó en dos rescamplíos.

Al empar del sufrimientu,

que remaneció bien d’años,

que sentí como lo siento,

que siento ente desengaños.

Mamá del alma, mamina,

al to llau pa que me curies,

con xeitu y la maletina,

en suaños torno p’Asturies.

El movimientu Yé-yé

     

     Al rodio de la entrada anterior sobro la llingua francesa, los asturianos debiéramos reivindicar que’l movimientu Yé-yé d’aquella dómina nun tuvo’l so orixe en Francia o Luxemburgo, como a abonda xente se−y abulta, sinón nes nueses cuenques y de la mano de Francisca Gayarda de Mieres del Camín. Foi’l casu qu’a esta moza−y silenciaron años dempués d’igualo’l so melgueru cantar “Moñeca de cera, moñeca de son” por culpa qu’a los productores−yos sonaba mal el títulu y por aciu de que la rapaza tatexaba un plizcu al querer desplicar el significáu de la so canción: Ye..., ye… Foi por ello que plaxaron la lletra del cantar al tornala al francés y camudaron fasta’l nome de la interprete por ún asemeyáu, emburriando más sero a la nueva al propiu Festival d’Eurovisión de 1965, que ganó gracies a la xera de la nuesa paisana.