Cuentu d'Añu Nuevu

Esti nun ye'l Cuentu de Navidá de Charles Dickens, sinón el Cuentu d'Añu Nuevu, resumíu, de Pindesierra.

El día 2 de xineru, xubiendo per una cera l'avenida, crucié con un fox terrier que llevaba abasnando un cachu de la correa d'amarre, preba evidente del so fuximientu. Miré alredor por si columbraba al propietariu; pero nun había nin rastru d'él. El perru diba escontra la muria de la M-30 y el so futuru se presentaba so les ruedes de dalgún vehículu. Nesi momentu, decidí cruciame tamién nel so fatal destín y, ensin dexar de cucar al animal, busqué dalgún reyu col que fora quien a lu prender. Una caxona de borrafes d'un comerciu d'artículos de segunda mano aportóme una petrina blanca de kárate. Llogré ensobia-y cola cincha y dempués visité a un veterinariu, empecipiando la gueta de los amos. Orbayara nel riscar y la repla de les sos pates amosaba que la fuga entamárase, siquier na viéspera, el día d'Añu Nuevu.

La llectura del chip desveló que'l can venía de Valencia. Na clínica veterinaria esclariáronme qu'en dicha ciudá'l día calteníase festivu y yera'l RIVIA'l que centralizaba les identificaciones, qu'en dicha comunidá nun yeren d’espardimientu públicu. Quedaron colos mios datos y esperé una novedá qu’enxamás empobinaren. Afité al perru na mio casa y, viendo que nun comía lo que-y ufiertaba, merqué una llata grande de croquetes que tamién refugó. Saquélu a pasiar un par de vegaes nes que l'animal non yá nun m'estrañaba sinón qu’acompangaba los mios pasos como si camináramos xuntos tola vida.

La mio mañana siguiente trescurrió procurando'l contautu telefónicu col mentáu organismu ensin algamalu. Entendíme col Conceyu de Valencia, el Colexu de Veterinarios y dos proteutores d'esa provincia, anque empecipiaron la so conversación en valencianu, y lo únicu que pudi sacar en claro ye que'l perru aportara, agora, d'Alicante. L'asuntu enredábase, aldericando eses entidaes que tampoco elles podíen brindar la identificación del referíu dueñu. Dempués parolé con otra sociedá protectora y col Abellugu, dambos de Madrid, narrándo-yos lo socedío. Afayadízamente, dos moces devolviéronme la llamada; amás, esclariáronme que llograren falar col RIVIA, sicasí ésti nun topaba’l dueñu l’animal. Amestaron que siguiríen intentando l’alcuentru y que me llamaríen de la que se produxera.

La tarde del día 3 saqué al perru fasta'l parque más averáu y ellí, enantes de les dieciocho hores, decidí aína que díbemos caleyar por si los propietarios decidieren enllargar la so estancia ante'l tresmanamientu del animal y colingaren dalgún cartelu pela contorna. Apenes percorriera un kilómetru, cucando árboles, valles y faroles, cuando restalló la casualidá. Esi mesmu día, a esa mesma hora, nesi mesmu momentu y nesi mesmu llugar —que nun yera'l de la so residencia—, dos críes apegaben la so súplica per aquellos requexos: “Fox terrier blancu con pintes, respuende al nome de Tintín, sumió de casa y les sos dueñes, unes neñes de 3 y 9 años tan alloriaes...”

El casual alcuentru finara col meyor regalu de reyes que seique les rapacines suañaren, la torna del so queríu Tintín.

Navídá con gaseosa

Navidá d'un mal quinqueniu,
tres casi un llustru de crisis,
emprobecen el conveniu,
desanicien l'alcoholisis.

Colinguen menos adornos,
mentanto apaguen bombilles,
desatápense sobornos,
dexándonos en toquilles.

Estrúyese’l nacimientu,
los reyes traen enguedeyos,
y aventen, hasta al xumentu,
carambelos a los güeyos.

Nun se canten villancicos,
yá que naide abre les puertes,
avézanse, los focicos,
a perspeutives inciertes.

Chisba ensin mercar regalos,
tola xente na caleya,
condiciónennos, los galos,
y la Merkel, taramiella.

Medra la prima de riesgu,
munchos prindaos pelos boches,
la bolsa decantia’l sesgu,
inmovilicen los coches.

Nun faltando quien te time
cualquier moneda aforrada,
los d'antes de la subprime,
agora nun nos tornen nada.

Aporfien en que xuguemos,
toos a la llotería,
sicasí, nun trabuquemos,
que nun ye ludopatía.

Nós pagamos el coríu,
nun dexen nin pal turrón,
vamos torgar el rutíu,
pero non la depresión.

Nun s’escaldiará’l mariscu,
vamos comer cacagüeses,
mientres se llibra nel riscu,
nos van papar les careses.

Mas, gociái, polos pequeños,
d'una Navidá prestosa,
nun espardáis los sos sueños,
y brindái con gaseosa.

¡Qu'amarguriu!

Son les 5 la tarde, tres rapazos con pelo tortiella francesa pañen un collar del pescuezu una vieya. Los magüetos tienen otres carauterístiques, sicasí ta mal vistu falar d'ello. Naide de la contorna-y defende, y la paisana marcha alloriada. Voi cargáu como un burru y toi dalgo lloñe pa terciar no que pasó; amás, la muyer me reñe por tar de contino implicáu en engarradielles. Dalgo asemeyáu se repite davezu y los caminantes escuquen encarpazaos. Tornu pa casa ablucáu polo que yá ye una repunante costume; mentanto, alcuérdome de lu que dicía Franz Kafka al respeutu:

“Cuando unu sale a caminar de nueche per una cai, y un home, visible dende bien lloñe —porque la cai ye pindia y hai lluna llena—, cuerre escontra nós, nun lu detenemos, nin siquier si ye ruin y andrayáu, nin siquier si daquién cuerre detrás d'él glayando, dexámos-y pasar.

Porque ye de nueche, y nun ye culpa nuesa que la cai sía empinada y la lluna llena; amás, seique esos dos entamaron una cacería pa enredar, seique fuxen d'un terceru, seique'l primeru ye escorríu a pesar de la so inorancia, seique'l segundu quier matalu, y nun vamos ser cómplices del crime, seique nengunu de los dos sabe nada del otru, y diríxense corriendo cada unu pola so cuenta escontra la cama, seique son nocherniegos, seique'l primeru lleva armes...”

¡La cuenta!, cavilgo que siempres foi asina, que naide quier saber nada, que llueu fanfarriamos... ¡Qu’amarguriu!

Namás que 7 ingresaos na proyeición de “Lu que'l vientu se llevó”

Esta tarde, y por mor del desaniciu de la publicidá en TVE, nun tuvieron qu’ingresar nos hospitales namái que 7 persones mientres la proyeición de “Lu que'l vientu se llevó”. D’esta mena, anguaño, foi quien a ver finar la película más xente que'l pasáu añu, nel qu’ingresaron una decena d’espectadores (7 homes y 3 femes) de los selce qu’acarretaren a urxencies.

La tonada y las vaqueiras, Patrimoniu de la Universalidá

Tola prensa de güei espubliza que, dende ayeri, los mariachis y los fados son Patrimoniu de la Humanidá. De la mesma mena que nel añu 2010 asocediera col flamencu, a la UNESCO-y plaz qu’agora los sones de raigañu de México y Portugal seyan declaraos talamente.

Nesti sen, y col enfotu de que muncha xente s’amieste a esta andecha, güei, 28 de payares de 2011, porque asina me peta, amueso y declaro a la tonada asturiana y a las vaqueiras, “Patrimoniu de la Universalidá”. Yá ta. ¡Alón!

Robláu: Pindesierra

Enredando na Voz

Enredando na Voz / Güei, 22 de payares

“La derecha perdería peso si los comicios fuesen autonómicos...”

¡Miániques!, a los que tean más gordos-yos vendría munchu bien.


“Fuentes de la Casa del Rey han explicado que Don Juan Carlos se ha golpeado esta mañana accidentalmente con una puerta que él iba a abrir cuando, desde el otro lado, un ayudante ha abierto para franquearle el paso...”

¡Coime!, entós ¿qué ye?, ¿qué l' ayudante, en llugar d'echa-y un gabitu, metió-ylu pel güeyu?


“Carla Nash sufrió en 2009 el ataque de un chimpancé que le desfiguró la cara...”
Hai que tener munchu cudiáu colos monos por culpa de que son los animales más asemeyaos a nós.

¿Sabes el cuentu la Bona Pipa?

—¿Sabes el cuentu la Bona Pipa?
—¡Non!
—Yo nun te digo nin sí, nin non, dígote ¿qué si sabes el cuentu la Bona Pipa?
—¡Sí!
—Yo nun te digo nin sí, nin non, dígote ¿qué si sabes el cuentu la Bona Pipa?...

—¿Sabes el cuentu les Eleiciones?
—¡Non!
—Yo nun te digo nin sí, nin non, dígote ¿qué si sabes el cuentu les Eleiciones?, ¿y el de Belén Esteban?
—¡Si, ve a tomar pel culu!

NA PRENSA DE GÜEI

FAZA 20 / 20 MINUTOS
VIENRES 11 DE PAYARES DE 2011

¿Bien d'Interés Cultural?

Ayeri, día 10 de payares, lleo con
plasmu nel so diariu:

«(...) Rajoy dixo ayeri n'Antena 3
que va faer tou lo posible pa intentar
qu'haya toros n'España. Abarcada Cataluña».

Créanme que razono la necesidá d'un cambéu
(cavilgo que l’esfrecimientu
de les pensiones y otres midíes
supunxeron l’enterramientu eleutoral del PSOE);
sicasí, nun voi votar a un partíu nel que'l so
máximu dirixente fai estes declaraciones y
nel que la presidenta de la Comunidá de Madrid
llantó a esi repunante espectáculu
la calificación de Bien d'Interés Cultural.

La tortura nun ye arte nin cultura, nun se sofita,
nin siquier s’alderica –por inmoral–;
desaníciase, de la mesma qu'Italia estremó otros
sanguíneos entretenimientos, que tamién
yeren de raigañu, como l’amarrada de
gladiadores o'l refundiar cristianos a los lleones.
Esta torga tendrá de fincase ensin esceiciones:
el Toru la Vega, los gües “embolaos” y,
talamente, los “correbous”; nun caltengamos
la demagoxa col martiriu los animales.

Xosé Rodríguez

¡VAN CAMUDAR EL NOME A FRENANDO ALONSO!

Fontes averaes a Ferrari camienten que, por culpa de nun atopar daqué que faiga furrular meyor el so bólidu, l'añu qu’entra van camudar el nome de Frenando Alonso a Celerando Alonso.

Nesa escudería cavilguen que pol efeutu sicolóxicu van ser quien a ganar cuasique mediu segundu per vuelta.

ARDIÓ VALLEDOR

El fuego abrasador es provocado,
es la llama que arrasa el occidente,
el miedo que se instala en tanta gente,
un drama cada año reiterado.

Calcinan Valledor y su legado,
soporta el campesino diligente:
secuela y egoísmo del demente
que en bruno torna el verde Principado.

Queman casa y escuela en San Martín,
arruina el etnográfico museo,
las flamas se vislumbran en Morcín,

en Cangas, en Miranda y en Tineo.
Castigo al responsable y pronto fin,
que nunca se repita es mi deseo.

¿A QUIEN CREYER?

“El viaje en tren Madrid-Asturias, de tres horas desde finales de 2012, asegura Blanco (LNE, 24.10.2011)”

LA VARIANTE PAYARES RETRASA’L RAMU FASTA 2014

...la Direición Xeneral de Grandes Proyeutos del ADIF preve que la Variante entre en serviciu en 2014, cuando fasta agora embaraxábase qu'esto asocedería a lo caberu de 2012 o, a más tardar, nel primer semestre de 2013. Otres fontes ferroviaries cavilgen que 2014 ye una previsión enforma optimista y que fasta 2015, como pocu, nun va tar rematáu tol trayeutu dende Madrid fasta La Pola L.lena.

... Si nun se retrasara l’alcuerdu de la catenaria, la Variante podría tar finada con toles sos instalaciones a lo llargo de 2013. Pero nun taría dafechu operativa fasta 2014 ó 2015 por culpa de qu'enantes de la so entrada en serviciu ye precisu realizar prebes de velocidá, d'homologación, de desocupación y otres relatives a la seguridá. Un procesu que nel casu de los furacos de Guadarrama, na llinia de Madrid, algamó l’añu.
(LNE 31.7.2011)

¿A quien creyer...?

BENDITU AVELINO

Recién espublizáu “Aventaos” ya’l rodiu colo ei!!í tratáu, surtiera la selmana pasada en CAMÍN http://www.rtpa.es/video:Camín%20_551318117532.html, dempués de Xosé ya los sos güeis de las Llongas, Avelino del Faedal (el pá de la mio amiga Carulina), que, tras mediu sieglu nos Madriles, tornara a la sua braña —a la qu’enxamás escaeciera—. ¡Sollertes al cuentu de la Brañina!

Avelino y Carolina
dexanon la capital,
e!!a foi pala marina
ya él tornó pal Faedal.

Asina, cuando y-pete,
nos requexos de la braña,
la gaita ou’l clarinete
va tocar con bona maña.

Anguañu sintiera Ambás,
d’esti paisanu tan tienru,
entós, coló pa Muñás,
yá que tamién toca’l xenru.

De la que vieno al Boláu,
seique pa grabar Camín,
dexó-y abondo ablucáu,
la capie!!a’l Carbayín.

Las soleyas de pecá
ya esos sones tan candiales
amuesen na TPA
estos verdes andurbiales.

¡Viva esa guapa fasteira
y Avelino por mundial!,
¡puxa la xente vaqueira
ya’l pueblín del Faedal!

AVENTAOS

¿Nun vos decatarais qu'hai xente qu’anda tresvolada caleyando peles villes y ciudaes? Son paisanos que surtieron abenayá de la so aldega col enfotu d’espoxigar o por cenciella necesidá. Dempués, toparon un amu o un comerciu y trabayaron pa él; mentanto, afogaben nel fumu de la nueva redolada. Asina, escoyeron una esclavitú en crisis na qu'amurnien los díes, atropen los años y avieyen la cadarma. De la que se retiren, canoxos y engurriaos, tornen a la casería de la so parentela y, de secute, agüeyen que yá son estraños nel so ñeru. Ceo, muerren entrugándose si mereció la pena camudar la vida nel so terrén pol garapiellu d’euros que caltiénense na cuenta'l bancu. Aina, el cartelu de la funeraria espeta y amiesta otru par de grapes ferruñoses. Nel intre, los regatos esbarien llárimes de los cuetos y brañes pelos papiellos de les vallines.

EN APOYO DE BÁRCENA Y OBONA

S.O.S. BÁRCENA y OBONA

Aunque en Madrid se reclama
y en Asturias se pregona,
ignoran esta proclama
por Bárcena y por Obona.

Apuramos la paciencia,
rogándole al Principado,
una solución de urgencia,
colaborando el Estado.

Son sendos dramas muy serios,
¡qué convoquen un Concilio!,
se hunden los monasterios,
y no apuntala el auxilio.

¡Qué interceda San Miguel
y también Santa María!,
si es que patrocina él,
ella lo hará cualquier día.

Los claustros benedictinos
no son enclaves malditos,
concluyan los desatinos
y atiendan a nuestros gritos.

Lo exponemos a la cara,
tanto Camino Interior,
como Pindesierra y Sara:
¡Emprendan “ya” la labor!

La cultura secular,
en ruina por la desidia,
venga un proyecto ejemplar,
arrinconad la perfidia.

El que suscribe lo exige,
todo Tineo lo entona,
un mensaje a aquel que rige:
“Salvad Bárcena y Obona”

El CERN PON EN DULDA LA TEORÍA DE LA RELATIVIDÁ

“Un esperimentu del Gran Colisionador d'Hadrones (LHC), denomináu 'OPERA', onde participen 160 investigadores de 11 países, punxo en dulda la Teoría de la Relatividá d'Einstein, qu'establez que nun hai namás rápida que la lluz...” (LNE 23.9)

Yá cuntaba yo fai cuantayá que mio muyer garrábameles enantes que furrula la mesma fuercia llétrica.