María de les Mierdedes

(Mexu y mierdina ruines al envís de nun firir sensibilidaes).

En Madrid, con bigote y lentilles,

pasiaba un perru, un madrilañu,

que soltó llastre peles Vistilles,

seique ciscando-y el so calcañu.

Pela acera de la cagalera,

una neña la bulla pisó,

porque’l perru pasó a la so vera,

y en metá de la cera cagó.

Como cascu d’una gurrafina,

golía’l zapatu a pura marrana,

y la color de la so carina

foi bacinilla de porzolana.

Y a la moza en cuestión se-y ocurrió un bon ardiz,

con un gárabu la suela llimpió y darréu caleya per too Madrid.

“tatachán, tatachán, tatachán, tatachán”

María de les Mierdedes,

restalles como mochica,

nun pienses que yá nun fiedes,

pos triasti una moñica.

Adiós mocina fermosa,

xamueza de primavera,

nun güeles como una rosa,

por culpa’l perru la cera.

De gafu son les firíes,

de mal tastu'l desengañu,

más te val que nun porfíes

y cuerre a tomar un bañu.

Anda rapacina escucha,

ve a camudar el calzáu

y aína pega una ducha,

que nun s’aguanta’l to llau.

Muyer del Añu 2015

MARÍA ELENA SIERRA, MUYER DEL AÑU DE TINÉU 2015

¡Viva María Elena Sierra

—que ye la Muyer del Añu,

onde la oveya aínda verra—

por caltener el raigañu!

¡Viva’l Cuartu la Riera

y que viva Maria Elena,

esi suañu y esa xera,

que bien mereció la pena!

FORMIENTU

     Esta semeya, que nun sé si l’asoleyaren los de l’Asociación Rixu, préstame pola vida. Tanto, que darréu voi llantar una basa:

¿Dime maestru qu’escribo?,

¿dime qu’escribo na fueya?,

¿del neñu que ta al to estribo

o del orbayu que mueya?

¿De los ríos de la España?,

¿de los montes y cordales

o del nome d’esta braña,

dende estos xaratales?

¿D’animales o de plantes?,

¿de la bayurosa historia?,

¿de Cuadonga o de santes?,

¿del maxín o la memoria?

¿De les cuentes de la casa

pa mercar en cualquier feria?,

¿del celemín, de la masa

o de la nuesa llaceria?

¿O vas dictame un dictáu,

d’esos de conseyes vieyes?,

“la neña que ta al mio llau,

me ta faciendo cosquielles”.

Préstenme tolos poemes,

esos de la enciclopedia,

aborrezo teoremes

y el mandu que nos asedia.

Que nos torga de falar

na nuesa llingua melguera,

de que seya a espoxigar

como brotu en primavera.

Porque nós gastamos boina,

que lu sepan nel futuru,

andechando nesa toina,

pente esti carbón escuru.

Deprienda d’aquel formientu,

aquel qu'a la escontra berra

al aviesu'l surdimientu,

o que marche d’esta Tierra.

Mi "villina" de Tineo

     Davezu, escribo en asturianu normativu en “Pimpiruladas” y de mou más occidental en “Figos en Courias”; sicasí, hai bien de xente qu’aporfia en que llante más entraes en castellán. Como sabéis nun ye esi l’envís d’esos dos blogues; nin siquier el de la páxina de “Las Vaqueiras”. Magar que, como nun quiero que naide enfocique conmigo y menos la mio prima Palmira de Tinéu, a la que quiero munchu/muitu —y que tamién anda a la tema con esi procuru—, voi entrepolar, más de xemes en cuando, dalguna poesía o cuentu nesa otra llingua. D’acordies a ello, prestaríame qu’ella nun arrenegara nin s’escaeciera de falar na so melguera llingua materna, que lu sabe faer abondo bien.

MI  VILLINA  DE   TINEO

Vivo alejado de ti,
si bien, en sueños, te veo,

siempre estás dentro de mí,

mi “villina” de Tineo.

Memorable fue el cantar,

que aludiéndote  por braña,

la quiso calificar

como la  mejor de España.

Cuna de recios linajes,

que evocan pétreos escudos.

Muy egregios personajes,

unos nobles, otros rudos.

Campomanes, Maldonado,

Garci Fernández de Plaza,

Tronco y Riego, infortunado,

y otros mil de nuestra raza.

Fuiste un tiempo amurallada

y en las Campas, tu castillo

con torre fortificada,

   disuadía a algún caudillo.

Bella iglesia parroquial,

palacio de los García,

de Merás, el principal.

San Roque es la romería.

Feria de muestras de abril,

parque de hechura galana

donde además del Cabril

podrás vislumbrar La Fana.

Quizá alguno no lo crea,

mofarme no es mi deseo,

aunque sean de Narcea,

fueron Cangas de Tineo.

Concluyendo con el cuento,

que se refirió a esta villa,

refrendo en este momento

que Tineo es maravilla.

Pindesierra

A la vera nós

 

Nesa flor de la zrezal
que prende la primavera,

prendió la to voz candial,

nesta Tierrina melguera. 

El cantar de los carbayos
y esi vientu que lu lleva,

aínda ximen los ablayos,

d’Ibias a Ribadedeva. 

N´ellos poso’l mio procuru,
n´ellos pongo la esperanza,
caltendránse nel futuru,
al envís de l'acordanza.

Nel agua de los regueros,
del borrín y de la prúa,
de la to voz, prisioneros,
que fiende como una púa. 

Nos altos picos qu’esnalen,

l’utre y ferre pel so aire,

y nes viesques que nos falen

del esbardu y del algaire.

Cola mesma voz del monte,

nesi nidio agua que bebes,

esfrecío de la fonte,
nes tierres de mofu y sebes.

Nel ciernu de la memoria,

nes cuerdes la to guitarra,
nesi collacio qu’alloria,

por nun dir xuntos de farra. 

N’andecha a la vera nós,

afítase’l to candor,

en Felpeyu, como entós,

toos sentimos a Igor.

 

¿UTHLEPÍA?

     Sieglu tres sieglu, llaceria tres llaceria, la ilesia San Antón de Bilbao foi perdiendo'l so patrimoniu. La ponte del mesmo nome, que t’afitada a la so vera, camudara delles vegaes fasta qu’en 1937 foi volada y sustituyida pola actual. Dambos son mui emblemáticos y asoleyen garbosos nos escudos d’esta ciudá y del Athletic Club. Por embargu, esti club fundáu en 1.898 se caltién dende siempres fiel a unos vezos que como desplica l'afamáu periódicu deportivu francés L'Equipe: " –y faen un casu únicu na hestoria del fútbol mundial". Por culpa d’ello, l'Athletic nun ye namái un club que compite en clara desventaxa nel mundiu del futbol, ye una manera dixebrada d’apreciar el deporte, ye una filosofía de vida, arriendes d’un sentimientu imposible de definir, pero bramente prestosu de vivir.

     Caleyando per Bilbao, aliéndase’l fútbol, la so hestoria y esi sentimientu tan abegosu de concretar que cautivara tamién a bien d’aficionaos d’otros llugares.

L’avisu’l Nuberu

¡LOS CABOS XUNEN!

Syriza algama un alcuerdu cola derecha nacionalista p’afayar Gobiernu (Na prensa de güei).

De sópitu, nos alcontramos con esta noticia dempués de la representación eleutoral de Grecia.

No qu'a min toca, nun me pilla de sorpresa nenguna comedia. Yo, por respetu al mou de pensar de los mios collacios, seyan de manzorga o de derecha, enxamás llanto un comentariu políticu. Sicasí, imaxinái qu’en pasando les nueses eleiciones la casta pauta cola Susana y nos monten la Verbena’l Palombu, pagando la folixa los pardiellos de siempres. 

El baille

      Allá una vezona que pintaba daqué, pero agora yá nun pinto nada. Hai bien de tiempu de la que baillaba dalgo, magar qu'agora yá tampoco baillo nin siquier a lo bolero. Anguaño, bien de xente depriende a danzar nos cursos de bailles de sala na casa conceyu o nesos centros que llantaron cada cuatro cases; sicasí, enantes nun los había y naide t’enseñaba. Alcuérdome una vegada que saqué a baillar a una moza mui curiosa nuna fiesta prau y, namái alvertir como espernexaba, de secute m’entrugó que si sabía baillar. Darréu-y retruqué que non. Aina, la guah.a, que yera mui atrevida —les moces curioses siempres fueron mui atrevíes—, aldericó qu’entós pa que baillaba y, como a min enxamás me prestó contar troles, -y espeté que por arimame a ella. D’otra miente, yá hai unos años que la mio mesma muyer y la mio cuñada s’apuntaron a un cursu d’esos tan granibles. Caltuviéronse n’activu unes selmanes, anque dempués colaron por culpa de  que’l maestru aneciaba a farto col chachachá. Eso me valió bramente p’anda-ys fadiando de contino col cuentu de que marcharen por mor de que nun toparon de pareya a nengún mozu que pagara la pena.

Rindo

     Son les 11 de la nueche de cualesquier nueche; magar qu’aportara na de güei. Fino de tornar pa casa de caleyar col envís de baxar la cena y foi’l casu qu’al torcer una esquina d'otra cualesquier cera m'atopo col cuerpu d'un home tiráu nel pisu y dellos cuerpos argutos qu'arrodien pela calzada pa nun pasar a la vera'l valtáu. -Y entrugo por lu que-y pasa y por si necesita que-y eche un gabitu. Me retruca que non y malapenes algama a ponese de rodíes. –Y ufierto llamar a una ambulancia y anecia cola negativa. Marcho, de la que cola a tatás, y los otros cuquen dende lloñe encarpazaos perbaxo la ringlera de lluces aforcaes. Reseño ablucáu lu que m'asocediera qu’aporfia en ser repunantemente habitual, mentanto —de nuevu— alcuérdome de lu qu’espetaba Kafka al respeutu:

“Cuando unu sale a caminar de nueche per una cai, y un home, visible dende bien lloñe —porque la cai ye pindia y hai lluna llena—, cuerre escontra nós, nun lu detenemos, nin siquier si ye ruin y andrayáu, nin siquier si daquién cuerre detrás d'él glayando, dexámos-y pasar. Porque ye de nueche, y nun ye culpa nuesa que la cai sía empinada y tea la lluna llena; amás, seique esos dos entamaron una cacería pa enredar, seique fuxen d'un terceru, seique'l primeru ye escorríu a pesar de la so inorancia, seique'l segundu quier matalu, y nun vamos ser cómplices del crime, seique nengunu de los dos sabe nada del otru, y diríxense corriendo cada unu pola so cuenta escontra la cama, seique son nocherniegos, seique'l primeru lleva armes...”

     Y, al tiempu que vomito les voltures sobre’l tecláu, cavilgo que siempres foi asina, que naide quier saber nada, que nun ye culpa nuesa. ¡Gandaya de pantasmes andariegues!, ¡refugaya de cadarmes ensin espíritu! Arriendes, empiezu a tar mui cansáu, mui cansáu d'esta especie humana y amodo, mui adulces, voi rindiendo.

L'ENEMIGU EN CASA

     Güei,  l’enemigu en casa reburdió a los sos deleres nos comentarios de LNE. Mentaben a l’Academia y a los que cobren a cuenta l’asturianu; sicasí, naide aldericó nada. Yo diba colingar esta poesía retrucando-ys nel nome de la nuesa llingua, magar que m’alcordé de que sal espublizáu malcurioso y con un cuadrín nel llugar del apóstrofu —nun sé si arrémente— y refugué la xera.  Toi yá mui cansáu d’esta refugaya; por embargo, esta ye la mio rempuesta a la so repunancia:

Reburdia, reburdiador,

anecies cola actitú,

llimpia, fixa y da esplendor,

y a lo tuyu, probitú.

A tol mundiu presta Asturies,

la so historia y so cultura,

y  tu esbarrumbando muries,

y falando con debura.

Tu yes el peor enemigu,

tu yes el ranciu y cafiante,

el que refuga’l so nigu,

un duviesu repunante.

Presumes del castellán

y fales en chapurriáu,

nunca respetó’l manguán,

lu qu’espoxiga al so llau.

Si la nuesa llingua muerre,

va ser pola mala zuna,

qu’equí esnala’l que nun cuerre,

y ambura la vuesa bruna.

Apátrida qu’arreniegues,

asturianu de cachopu,

abre los güeyos, nun ciegues,

que valtes de puro popu.

Farfulles que nun esisti,

ves menos que’l Pataricu,

neso que nun deprendisti,

nun metas el to focicu.

¡Norabona!

     Norabona a tolos que tengan un rebañu neños. Na Comunidá de Madrid, van poder viaxar de baldre nel tresporte públicu lu que-ys pete tolos guah.es que tengan menos de 7 años. Los que tengan más, que se colen, tamién. D’otra miente, tolos vieyos y frayaos pueden recargar les sos tarxetes ensin contautu cualesquier día nes máquines habilidaes pa ello.

Faltosos

(Faltosos-logo)

     Tengo dellos collacios de los qu’andechen na mio xera  qu’escriben abondo bien y a los que davezu-yos reburdia dalgún pabardu encumáu. Nun esmolezáis y decatavos que:

     La inorancia la sufren los probes inorantes; pero namái l’amuesen los faltosos.

Amos

Nel fútbol, naide reburdia escontra los xefes, que faen lu que-ys peta; amás, se-yos paga una burricada. Malu un ricu aprobetáu, peor un probe arriquecíu.

¡Fala!

Nun sé que coime tien que ver la llingua asturiana con un vasu papel y non, con un cachu; sicasí, andecha y...

¡Fala!

Falen, falo, fala Falu,

pero aquellos que nun falen,

reburdien y dan col palu,

reburdien porque nun saben.

Nun son cuentos, nun son cancios,

la llengua d’esti País,

ta llaceriada por rancios,

por rancios de mal envís.

Reburdia reburdiaor,

¿por reburdiar que ficisti?,

dir escontra del llabor,

de lu que nun deprendisti.

Voltures tendrá’l to güelu,

voltures nel campusantu,

voltures quiciás nel cielu,

por neciu, cago en mio mantu.

Nun te val el tar calláu,

vas refugando lo tuyu,

además de renegáu,

yes repunante y capullu.

Que nun ye prioridá,

qu'a los sos deleres cuerra,

fechu una calamidá:

¿vas esperar a que muerra?

Otros que reciben más,

s'alcuentren toos xuníos,

mentanto al aviesu  vas,

asina tamos perdíos.

Nun seyas fatu y andecha,

que la xera ye bien dura,

nun ye manzorga o derecha,

mirar pola to cultura.