Cancusa

     Piensa qu’esa ruta o esa romería podríen ser les caberes pos nun sabemos la nuesa data de caducidá, nin siquiera si vamos ser quien a repetir esa hestoria y dempués se tresforme namái que n’alcordanza d’una murnia foto. Ye por ello qu’animo a tolos mios amigos a esfrutar del presente y a refugar too aquello que-yos pueda fadiar. Tamién a respetar la forma de cavilgar de caún, magar que nun teas d’alcuerdo con él. No que toca a la política, yo caltengo amigos de dereches y de manzorgues yá que caún razona lu que piensa condicionáu peles sos circunstancies y non col envís de cafiar. Yá sabéis: dos nun s’amarren si uno nun quier y la cancusa val enforma más que l’aborrecimientu.

Tonada d’Asturies

Soi la tonada d’Asturies,

nacida ente la sidra del mazanal,

a la solombra les muries,

l’arume la vallina, rosa y bardial.

Llevo per sangre, llapada

de rosada qu'arrama l'amanecer

y na mio gaita furada

se sienten alcordances remanecer.

El vientu lleva la mio voz

y l’ecu darréu l’esparderá

dende Pimiango a Pesoz,

esbariando sones pela ciudá.

Con mios hermanes vaqueiras,

a añaes y saltones amestaré;

xotes, floreos, muñeiras,

xiraldilles y otres dances, tocaré.

Alma d'una tierra verde,

de cumes, praos y valles, ríos y mar

con un valtar que nun pierde,

corazón y xeitu del nuesu cantar.

La trona nun calla mio voz,

la gaita-y acompañará,

per aires de forcáu y foz,

en monte, n’aldea o ciudá.

¿TAMOS PERDIENDO L’ALDU?

     Sí, na mio muria’l Feisbuc tamién colingaron el videu gochu (con perdón, —con perdón pal gochu—). De resultes, como nun toi avezáu a llimpiar cubiles, al tiempu d’esfarrapar el videu, a poco desaniciu al paisanu de Grau al que fixeron cargar col muertu. Tamién me decatara qu’Alicina Polledo yá-y dio estopa al que fixera la fechoría. Por embargu, me prestaría faer dalguna reflexón: ¿tamos perdiendo l’aldu?, ¿de quien ye la culpa? Enantes, de la qu’había una cadena namái de televisión, ufiertaba programación infantil; de la que sabíes lleer, te regalaben 20.000 llegües de viaxe somarín, El caberu mohicanu o cualesquier llibru d’esa triba; les máquines del metru aportaben chicles o llambionaes. Güei, delles cadenes nun asoleyen más que repunancia; los guah.es igual te lleen el Xergónsutra [sic] y nel metru sólo espanden preservativos. Ye como si quixeren aventar el criteriu. Como si nun fora posible’l términu mediu. Como si daquién, nes altures, tuviera la comenencia de que toos perdamos l’aldu y nos amarremos.

     Amodo, esclariar talamente que si dalgún amigu o collaciu recibe un videu gochu nel mio nome, que sepa que yo nun se lu apurrí; magar que se m’abulta que cualquiera de los mios amigos o collacios lu saben ensembre, ensin necesidá d’amestar la más ruina esplicación. 

María Ánxeles

(Asentador de paleta y muséu que me regalara Carmen)

     De la qu’escribo dalgún cuentu o poema, entamo y anecio ensin saber como voi finar. D’esa miente desendolco sobre la marcha y asina sal la comedia o l’encople menos previsible. Los rellatos siempres son curtios pa nun aburrir a naide, nin siquiera a min mesmu. Hai por cierto una montonera torgues per aciu les mios goteres de les que nun paga la pena falar. Esta entrada, como asina se llamen nel feisbuc, la voi dedicar a María pol so procuru y polos sos afalagos. A María-y llantaron los ánxeles na pila bautismu y dende entós los acarreta. Amás, María vivió un tiempu na casa los sos güelos nel cielu de Calleras y aínda caltién dalgún requexu perbaxu esi cielu, pero bien apegáu a él. María quixera tornar ellí; sicasí, el tiempu nun da pa más de lu qu’espurre. María vivió tamién a la vera’l Mercáu de Maravíes —sí, el de la entrada anterior— y d’unos Cuatro Caminos perafamaos madrilaños. Entá, la so caí se caltién tan bien coneutada que cuasique se pue baxar al metru pela so escalera. Lo que bien seguru nun sabe María ye que na siguiente cai, María de Guzmán, vivió Carmen. Carmen yera de Valmouriscu (Tinéu). Carmen nun tresportaba ánxeles; magar que yera una santa. Lo que si acarretaba yera una montonera alcordances de les llaceries que careció na guerra por culpa la gandaya humana. Carmen yera pariente llonxana de nós y una gran amiga de la mio ma. Carmen nos quería muncho y nós, a la escontra, de manera tala. De Carmen yá vos contaré si cuadra más alantre, qu’esta que fina ye de María Ánxeles.

Per San Pedru

     Mal se llevantara San Pedru, güei, y yo aínda nun lu sabía. ¡Bastante lu diba a saber! La llinia me basculó adulces na parada del mercáu de Maravíes, un de los venceyos qu’entá me xunen col feble pasáu del distritu de Tetuán, onde viviera bien d’años cola mio ma. Malapenes se caltienen entá unos cuantos. Les solares onde xugábamos foron, un tres otru, tarazaos polos nuevos edificios y seique Xicu yera’l caberu amarre a una montonera d’alcordances. Torné solmenando nel metru fasta la raya’l presente. Tuviera escribiendo dalguna caxigalina, de la que llegué a casa, fasta que’l teléfanu aporfió en cafiar. Yera la so hermana: —“Pin, ¿cómo tais? Nós, mal. Morriera Xicu”. El silenciu entumió los mios llabios y tardé un bon pedazu en reaicionar. —“Yera previsible”. Sí, too ye previsible nesta imprevisible vida, pero hai que ver cuantu chinguen les sos maldites previsiones. Mañana, de la que l’autobús me pose n’acera, a la vera del mercáu de Maravíes, enantes de dir al entierru, ¿qué-y voi dicir? Cuando torne, como tolos díes, restolando ente les miraes de los caminantes queriendo reconocer a dalgún conocíu que yá nun esiste, diré a espidir a Xicu o si acaso a la so cadarma y entós, les últimes acordances van soterrar con él, como esos escampleros que tarmiaren los lladriyos. En reduñes, ¿qué voi topar nel día qu’entra sinón la mesma nada? Mal se llevantara San Pedru güei…

Pa vós...

Ofrezo la rosa blanca

en xunu como en xineru

al bon amigu sinceru

que tiende la mano franca.

Y pal castrón que m’arranca

el corazón del mio pechu,

escayu ni espín dafechu;

-y ofrezo otra rosa blanca.

Atiendo los estallones,

qu’españaba la mio ma,

-yos riego con oraciones,

dende fai yá cuantayá.

Planto a esgaya la hortolana

porque me presta’l so arume,

arume de la mañana,

de la que la nueche sume.

Semo la faba de mayu,

que ta perbona en tortiella,

pero siempre algún mazcayu

la chapa y quedo ensin ella.

Tamién recueyo’l cenoyu,

aporta golor d’anís,

nun me val nin pa redoyu,

pero-y gusta al malvís.

Semento la ganzabera,

rosa canina o montés,

asina na primavera,

floria siempres nos tos pies.

Al romeru y al tomillu,

seique nun-ys mando nada,

ye caún a cual más pillu,

pos beben de la roxada.

Collecho mui bien de roses

y plantes de mil colores,

pa les muyeres prestoses,

que sollivien los dolores.

250 tanques a la escontra

      Espublicen güei per ehí que los Estaos Xuníos, p’aselar a los países de la OTAN cola tema de Rusia, van esparder 250 carros de combate a lo llargu d'Estonia, Letonia, Lituania, Polonia, Alemaña, Rumanía y Bulgaria. De resultes, nun sé si quedarán tranquiles eses naciones, pero lu que se m’abulta ye que los tanques sí que van quedar abondo espardíos.

El casu Seve

     Como a fuerza de ser abegosu’l casu de les mines d’oru de la mio cabera entrada paez que nun-y mandastis nada, voi contavos lu que-y asocediera a Seve enantes de que morráis toos encetaos por culpa los metales pesaos.

Voi referir lu de Seve,

que baxó de los escobios

y llevó la moza en FEVE,

cuando’l viaxe de novios.

Dempués tornaron pa casa,

bien a tiempu de dormir,

agora ye lu que pasa,

nun se pue yá nin salir.

La llacuada celebraron

nel chigre del so vecín,

de mano, arbeyos xintaron,

segundu: güevu y tocín.

De postre punxeron tarta,

un cachu tarta contesa,

que muncha comida farta,

esclarió dende so mesa.

Hubo tamién café puro,

un amiestu de tizón,

nun se repartiera puru,

por ser malu pal pulmón.

Darréu folixa a esgaya,

con un acordioneru

y la so fema, mui paya,

axustaos dende xineru.

Y a l’otru día a la xera,

l'acarretó’l desalmáu,

pa esfrutar la primavera

con tol trabayu atrasáu.

Duró dos meses l’enllaz,

asina son les muyeres,

foi colar con un rapaz,

pémeque yera de Mieres.

¿QUO VADIS?

"...En Quintana y La Brueva, a dos y a siete kilómetros de la mina, hay buenas perspectivas. Y la tercera forma de crecer es encontrar nuevas zonas en Asturias..." 

DANIELLA DIMITROV, presidenta y consejera delegada de Orvana Minerals Corporation. 

     Yá qu’anecien col so envís, convién que nos entruguemos si daquién tien derechu a autorizar el que s’esfardane mediu país. Asturies nun ye propiedá del gobiernu de turnu. Asturies ye patrimoniu de tolos asturianos que moren nella na actualidá y de los que van ñacer nel futuru. De que viendan l’oru d’esi padremuñu a foriatos a cambéu de tres centenares de puestos de trabayu mientres que fine esa xera, caún pue opinar lu que-y pete; sicasí’l qu’amás toles faces oxetu de la estraición vayan ser encetaes con metales pesaos, eso nun tien xustificación dalguna; arriendes de qu’esisten otros procedimientos d’estraición menos dañibles, magar que más costosos. Si nun se pon torga a estes actuaciones: paisaxe, terrén, fauna, flora, fontes, ríos y per ende la salú de munchos paisanos van sufrir les consecuencies; bien de xente tendrá que colar y finarán los beneficios del turismu a la cuenta del Paraísu Natural que camudará en Folleru Mineral. Pan pa güei pa unos pocos, fame pa mañana pa tol occidente por culpa d’esa llaceria. ¿Cuándo se decatarán dalgunos de que’l dineru y l’oru nun se comen, y que'l cianuru y el mercuriu nun se beben sinón qu’envelenen?

NEGRU

     De la que yo yera guah.e, nun se víen ñegros (con perdón) per Madrid y menos per Asturies, como yá me decatara pelos branos. Nes películes, tampoco, por culpa que d’aquella cuasi nun echaben más qu’españoles, magar que fueren en blancu y ñegru (con perdón). Quixera esclariar de mano que n’asturianu pue dicise negro, si ye neutro, ñegru o negru (d’equí p’alantre, negru, porque ansí me peta). Foi’l casu qu’una vegada díbemos caleyando una montonera mocosos pela entós Avda. del Xeneralísimu, cuando nos atopamos con un negru mui grandón (con perdonón). Vais poder suponer lu qu’entós nos topetara, ensin maldá nenguna. Darréu, yo que lu vi primeru esclamé almiráu: ¡Mirái, mirái, chavales, un negru! Aína'l negru (con perdón), que lu sintiera —per acio qu'había menos bulla peles cais al runfar menos coches—, retrucó: ¡Oyi chaval, el negru lu será’l to padre! Nin que dicir tien que yo quedara ablucáu por mor de que’l mio pá nin siquiera yera mineru, sinón inspeutor de tranvíes.

Del mio llaboratoriu

            (Mecedures y potingues del mio llaboratoriu per aciu de los que fui quien a inventar l'asturianu).

     Acabante de m’espetar en chapurréu: 

“…pero yo en el Facebook, por respetu a los demás falollos en castellano, pero mi lengua de andar por casa no ye de laboratoriu porque nunca estudié llingua, conformome con el que nos entendemos en casa y entre los amigos.No me reñas...fai el favor…”

     De resultes, nun reñí a naide nin a naide voi mentar y menos a daquién qu’anda encamáu; sicasí, entama ún a rindir de ser un de los aparentes inventores d’una fala escorrida fasta’l cantu l’escaezu, que paradóxicamente ye anterior al castellán, y arriendes de ser acusáu d'una supuesta falta de respetu escontra aquellos qu’al aviesu nun saben bien de lu que tán falando nuna tierra na que desconocen la so propia llingua.

     Mentanto los inorantes, los comenenciosos y los rancios nos sotripen davezu a los infelices, los muérganos que teníen qu’aldericar daqué guarden silenciu.

  

Una d'elefantes.

Un elefante ximelgó un día

sobre la tela d'una araña

 y como vía que nun se cayía

llamara darréu a otru elefante.

Dos elefantes al empar banciaben

sobre la tela d'una araña,

 y como víen que nun se valtaben

fueron a llamar a otru elefante.

Tres elefantes taramingaron

sobre la tela d’una araña,

y al decatase que nun esbariaron,

afitaron otru de cabaña.

Cuatro elefantes se van cañicar

sobre la tela d’una araña

y de la sapada que se van pegar,

seique mancarán con bien de saña.

Una ambulancia con cuatro elefantes,

-yos acarreta fasta l'HUCA,

lu mesmu-ys pasa a munchos mangantes,

a los qu’arriesgase-yos abluca. 

Tralará col remate a lo Alborán.

Agora que vamos despacio,

agora que vamos despacio,

vamos cuntar caxigalines,

tralará que tralará.

Pela mar cuerren coneyos,

pel monte esnalen sardines,

 tralará que tralará.

cuando son ricos los vieyos,

yos-refuguen les viudines.

Salí un día del mio llar,

con fame de tres selmanes,

y atopé una cirolar

a reventar de mazanes;

entamara a sotripar

y cayeron mil ablanes.

Col cascar d’un cestu nueces,

vieno l'amu de Contrueces.

—Nun tiréis cantos a esgaya,

nun ye míu’l castañar,

ye d’una muyer mui paya

que me lu mandó curiar.

Dempués de les eleiciones,

van pagar sin trabayar,

de foriatos, mil millones,

van averase a cobrar.

Agora que me quedara solo,

veo que te debo tantu y lu siento tantu, nina

que xubí la Cuesta’l Cholo,

y esmoleciera ensin ti fasta Santa Catalina.

Marqués de Mirayu

     "James-Stuart" ye agora “Marqués de Mirayu”. Abúltaseme que la novedá ta un plizcu trabucada porque esi perbon artista de cine yá morriera en xunetu de 1997; sicasí, equí comparto la noticia qu’asoleya José Ramón Feito. Arriendes, cunto que l'afamáu señoríu anda yá tou marafundiáu. Amestar que la mio ma fora de San Fliz de Mirayu y qu'enxamás tuvo de marquesa.

Otra dómina

     Alcuérdome d’una dómina na que’l tiempu trescurría adulces, na que’l sol sustituyía al reló, na que la voz de la to ma, al altu la lleva, mandaba tornar pa casa. Sí, daquella’l tiempu pasaba tan sele que cuasi yeres quien a velu. Foi una dómina na qu'enxamás aforfugaba, por culpa de que decidíen por ti y malapenes teníes qu’escurrir por dalgo. A pesar de too, los años foron asocediendo; los vieyos, sumiendo y los esmolecimientos, atropando. Na actualidá, los mesmos años escapen a carrenderes, el reló s’aceleró desaxeradamente y la voz de la to ma namái se caltién en maxín. Si, agora’l tiempu cuerre mui apriesa y afuega al empar de la contaminación. Amás, siempres tienes qu’andar trabucando celerín por cuenta de lo rápido que debes discurrir. Ye como si la vida tuviera afitada talamente pa que si nun morrieres te mataren.