Españando termómetros.

     Llegara la fresca a Madrid; sicasí nos entamos d’esti mes de setiembre españaben los termómetros… Aquella tarde, de la que me llevantara del pigazu diariu, alvertí a la mio familia: “nun salgáis pa la solanera que seique hai más de 50 graos”. Quixi comprobar lu aseguráu y llanté un termómetru al sol. Trescurríos cuatro minutos, l’azogue algamara’l tope del cristal esgonciando l’aparatu. De secute, afité otru termómetru ximielgu del anterior cola fin d’acotar l’esperimentu. Esta vegada lu retiré nun par de minutos nun fuera a esfardanar tamién. Pa entós yá superara los mentaos 50 graos, como podéis ver na semeya, ya ye qu’en Madrid, de la que fai calor, escachen fasta los mesmos mididores.

¡REZÁI!

 

Ensin escaecer Carlés en Salas que reabre y Salave, qu'anden a la griesca.

¡ENTAINEN!

       Una noticia na prensa xeló’l mio sangre y foi a empapizar el mio gargüelu de la que taba almorzando habrá un mes en Grau. Esto ye daqué de lu que m’alcuerdo:

 

·        ORVANA va a inyeutar más perres en El Valle.

·        Reapertura de CARLES (Salas).

·        EMERITA anicia furadures en Tinéu.

·        ASTUR GOLD tien previstu rellanzar el plan de SALAVE.

 

     Abultábaseme que too fora una velea, yá que naide reburdiaba, pero desgraciadamente ye la pura realidá: más balses y entá más metales pesaos qu’enceten ya arruinen la natura. La llaceria ta sirvida.

La puerta'l Cubia

     Tuviera cuasi un mes en Grau y a diario pudi almirar dende la ponte’l Cubia la puerta máxica qu’afayada nel mediu’l ríu daba accesu a la cubil del gochu que la tiró ya al mesmu serviciu de la casa conceyu encargáu de la so retirada. Fartu d’acolumbrar la fechoría, un día decidí baxar ya acarretala pala basoria; sicasí, la muyer ya’l fíu me torgaron d’enfusar nel ríu nun fora a esbariar en dalgún regodón. Ye lu que tien la perentela, que mira munchu por ti. Ye lu que tienen los porcozonos, que nun miren por naide.

Pezcaligrama

 

Peza la rama,

pezcaligrama,

como l’azogue,

ver nel mio blogue.



Aniellos

     Enantes d’esta dómina del “Señor de los aniellos”, onde yá nadie los amuesa nos deos sinón en oreyes, embelicu,  ceyes y nel mesmu focicu, hubo otra na que se llucíen a mou de promesa. Yera como na publicidá de los trebeyos, de la qu'a una moza-y prestaba un mozu cavilgaba “me lu pido”, entós s’afayaben los aniellos y ¡alón!, amarraos pa tola vida. Agora, que s’empareya y desempareya con facilidá, yá nun se gasten eses sortíes y de resultes se torga’l peligru de firíes si acaso frayen, como m’asocediera a min que pegué contra una papelera cuando corría pa coyer la llinia y tuvieron qu’espetame cuatro puntos de sutura ente’l furabollos ya'l mayor de toos. Si, abúltaseme que dende aquella ya nun se regalen aniellos.

La guerra de les escopetes

(Palombu firíu asitiáu fora del algame de los gatos)

     En dómina de caza, españa la redolada de la urbanización y llueve muerte sobro los terrenes qu’arrodien los xalés en forma de palombos. A vegaes, la parca s’amaruta de tórtola o falpayar y caye como’l mesmu plomu qu’agospia cada cadabre. Otres, namái fiende en forma de firíes y la llaceria entá nun fina. El sangre y les plumes s’esparden pela sabla y los sobrevivientes fuyen espavoridamente. Ye la guerra de les escopetes que cuspen proyeutiles sobro un enemigu inocente, feble y desarmáu que nun cuenta más que cola so propia vida que-y ye arrampuñada. La mio faza ye hospital o campusantu y yo, enfermeru o soterrador. Unos maten ya otros aiden como pueden; talamente como en les otres guerres, les d’humanos contra los sos mesmos hermanos.

Les malaventurances

(Semeya: F. Osu Pardu)

 

L’asesín disparó y l’osu remanez muertu nel pisu como cualesquier paisanu. Ver el so cadabre na semeya…

 

Malaventuráu’l que mata

a too bichu viviente,

por valise o non de chata,

muerra nun infiernu ardiente.

 

Malaventuráu’l que quema

la vallina, viesca o monte,

qu’a fueu povisa sema,

que xamusque pol so pronte.

 

Tamién el que contamina

pela tierra, mar o aire,

avéntelu la Santina,

nuberu, serena y flaire.

 

Amás al intolerante,

qu’esparde la intolerancia,

que refuga amor amante,

que fai nuesa vida rancia.

 

Malaventuráu’l sangrín,

al que-y presta la tortura

del humanu o del bovín,

o cualesquier criatura.

 

Malaventuráu’l que roba,

dende arriba o pende’l baxu,

xustificando con coba,

mentanto llena’l refaxu.

 

Malditu’l que mató al osu,

qu’espurrió como un paisanu,

que lu espeñe’l busgosu

per cualquier monte asturianu.



Alcordances

     L’alcordanza ye una semeya escura solmenada nel papel del tiempu. Rematáremos les vacaciones con una selmana n’Almuñecar, onde facía 32 años que nun tuviéramos. Na foto d’aquella s’alcontraben Olga Manzano y Mel Picón, a los que tuviéramos el gustu de sentí-yos cantar nel Parque del Mayuelu. D’esta, l’animación del hotel baillaba y cantaba “La Yenka” y trespandábate al añu 64 del pasáu sieglu, cuando la mio prima Mari y les otres moces de la parroquia San Fliz facíen otro tantu na fiesta del Sacramentu. Sí, el nuesu celebru ye l’álbum nel que queden rexistraes toles alcordances, au s’apieguen como llámpares; sicasí, ye nel banduyu onde acaso fienden.

La cabaña

Si quies topar la cabaña,

la cabaña de los neños,

ve al pinar que nun t’engaña,

suaña suaños nos tos sueños.

Les muries son de tarucos,

de tarucos de los pinos,

más grandes que pequeñucos,

d’ablugu de rapacinos.

La teya ye de cortezu,

la traviesa ye de vara,

si acaso entrares davezu,

dibes camudar la cara.

Nun te lo tomes a mal,

yá que sé que por ensalmu,

saldríes como un chaval

y col to xeitu más calmu.

Quiciás por arte de maxa,

pol guah.e que lleves dientro,

per aciu de la carcaxa…,

la rempuesta ta a l’alcuentro.

De la que salgas al monte

o camines la devesa,

de la que crucies la ponte,

de la que l’airín te besa.

Si nun la yes a atopar,

ye que yes abondo ranciu,

a Pin tienes que llamar

y cantar con él un canciu.

Él t’enseñará’l camín,

el camín de la cabaña;

el cuentu algama a la fin,

cuenta que Pin nun t’engaña.

¡Viva Grau!

Viva Grau porque para

el FEVE na so estación

y porque Santa Ana ampara

pente’l Cubia ya’l Nalón.

Viven les guapes moscones,

por elles muerres d’amor

y viven los guapos sones

de la fiesta de la Flor.

Formosa villa de Grau,

la villa más gayaspera,

viva’l so afamáu mercáu,

el so parque y la panera.

Viva Grau pola so historia

y por ser cruz de caminos,

porque’l que caleya amoria

y faen col cielu tocinos.

Per Grau pasara un día,

per Grau pasé y pasé,

y viera tanta allegría,

que yá en Grau me quedé.

Dende entós equí m’afayo

encantáu nesta vallina,

a la vera de San Playu,

no meyor de la Tierrina.

Si aceutes un bon conseyu,

ven a vivir a esta villa,

o si acaso, al so conceyu,

la novena maraviya.

La gata más guapa

La gata más guapa

del nuesu llugar

nin cuerre ni escapa,

que vien a folgar.

Tien los güeyos verdes,

collarín azul,

la cuques, la pierdes,

pol pintu de tul.

Dexáime miagar

nel vuesu llugar.

Marcha la vecina,

-y da por colar,

queda la mixina

sola nel solar.

Cola so tristura,

procura la xida,

pos la creatura

pídenos comida.

Dexáime miagar

nel vuesu llugar.

Si llorar pudiera,

se pondría a llorar,

a la nuesa vera,

algama a fartar.

De nueche cortexa

con un gatu prietu,

que blinca la rexa,

y salta’l respetu.

Dexáime miagar

nel vuesu llugar.

Nun me pongáis frenu,

nun me pongáis galga,

que’l vecín d’esmenu

sotripa la nalga.

Que’l mui burru tien

envís de nozal;

si me queréis bien,

nun me faigáis mal.

Camín aniciáticu

Tomé un camín aniciáticu

pa ser a entender el mundiu

y topéme un antipáticu

que m’armó un bon tracamundiu.

Trespandé pal de “Santiagu”,

“lixeriño”, caminando,

y al coincidir con un vagu,

tuvi tol día folgando.

Echáramos mediu añu

en llegar a Compostela,

nun m’aguardó y, con un mañu,

se foi mio neña Carmela.

Entós, camudé de vida,

merqué muebles nel Ikea

y un día, de mala xida,

chisquélos con una tea.

Pa serenar la mio alma,

retiréme d’aislamientu,

nun recuperé la calma

nin siquier l’aselamientu.

Entruguéme por quien soi,

pa dir tomando conciencia,

busqué a Merlín nel Leroy,

busquélu por conveniencia

pa ver si m’asesoraba.

Nun taba na so seición,

na seición que cavilgaba,

o seya “illuminación”.

Nun alcontré les rempuestes,

pero a la fin, sí a Merlín,

que me vendiera dos puertes

y un puntu lluz pal camín.

Sonatina

 



Ye prestosa, Rubén,

la Sonatina,

pero sábeslu bien,

magar qu’atina,

 

esbariando guapura,

como poema,

arriendes de frescura,

la d’esa fema,

 

el que tea tan triste,

esa princesa,

que de fresa reviste,

nun m’interesa.

 

Nun m’aporta dolor

que yá nun ría,

o qu’ensuche la flor,

 caldia caldía.

 

Si-y fadia l’ensame,

nel so palaciu,

más fadiará la fame,

que tien más maciu.

 

Na so boca de rosa,

dientes en rales.

Esa princesa sosa,

quier tener ales.

 

El so príncipe vien,

va da-y un chuchu,

callará si-y convién,

ye como un truchu.

 

Anda y marcha fatina,

col pretendiente,

que la to Sonatina

dormi a la xente.

 

Manolo Santarrúa

Si vos falo del mio amigu Manolín, si vos asoleyo’l so nome completu: Manuel Jesus Rodriguez Rodriguez, quiciabes nun vos esclarie nada; pero si amiesto qu’él tien una de les voces más guapes qu’enxamás cantó n’Asturies, qu’él ye de Candás, qu’él ye Alborada…, seique yá vos decataréis de qu’él ye “Manolo Santarrúa”. Manolín anda davezu calcando nel deu del “me presta”, camentando y afalagando pela mio muria. Manolín un mal día dexara de grabar discos y coló pa otra tierra tamién mui guapa. Los detalles correspuenden al terrén de lu personal; sicasí, seique un día tornará pa Candás —yá que sigue siendo un namoráu d’Asturies—, y lu que nun merez ye que naide lu escaeza. Al envís de remanecer la so alcordanza, vamos sentir esi cantar tan guapu, que colingara Pedro Hernández, al que me refiriera enantes y qu’aínda se pue mercar en dellos comercios.