Ambás

Hai un puebliquín en Grau

qu’esbaria l’asturianía,

como en nengún otru llau,

como en nenguna lloría.

Surde inxente de Ca Sanchu,

en Ca Sanchu surde inxente,

inxente pero da l’anchu,

bien lu sabe tola xente.

L’aniciu fora Bulita,

quien entamara’l cantar,

Xosé Antón foi la gabita,

fáennos a toos suañar.

Día a día, añu tres añu,

col repartu calabaces,

colos sones de raigañu,

col llugar onde tu naces.

Col camín de la to tierra,

esi Camín de Cantares,

per onde la vida berra

pente praos y rebollares.

Col refugu al escaezu,

qu’un día aportó Sanchín,

cola sestaferia y vezu,

aneciando con Camín.

Entrugando a la paisana,

asoleyando con Tuenda,

per toa faza asturiana,

ensin carecer la güenda.

Ca Sanchu ye la folixa,

ca Sanchu, siempres la feria,

ca Sanchu muerre de risa,

anque enxamás de llaceria.

Ca Sanchu ye Afuega’l pitu,

xeitu, tradición y más,

d’esa asturianía, un fitu,

y esi puebliquín, Ambás.

Mamina

Ye que muerre la nueche, naz el día,

como que muerre’l vieyu y naz el neñu,

como anecia ya escaria’l mesmu empeñu,

como espoxiga’l granu na lloría.

Asina naz agora esta poesía,

del caberu poema quedó un señu,

como bolina vilba del salgüeñu,

malapenes el puntu ñegru sía

sobre la fumia blanca de nublina,

qu’esguilando pel monte xube al cielu,

a un tiempu, del malvís, la sonatina.

Nun sé si llega a Dios o a la Santina.

Si d’esti paraísu crucia’l velu,

qu’algame col mio ciñu a mio mamina.



En Nuviana II

    

     Poca xente sabe d'esta hestoria, meyor asina. Al enfotu de que la so parentela nun vendiera entá’l terrén ya aínda seyan a descansar en paz, xuntos sobro’l cantil, a la vera’l mar…

 Aquella rancia mañana,
soterraron a Prudencio,
mui bien cerca de Nuviana,
a la vera del Silencio.

Onde taba la muyer,
o meyor, la so cadarma,
onde la quixo querer,
au naide pisa la garma.

La Fornón y Palominas,
agüeyaron el so fin,
espardiendo llariminas,
peles foles del Airín.

El so llamentu de sal
ye malapenes un rastru,
n’alcordanza de postal,
escontra la peña’l Castru.

Ensin tentar la paciencia,
nada-yos pue dixebrar,
per enriba de Saliencia
ya acolumbrando la mar.



La rempuesta ta "in the wind"

    
     A Dylan-y resulta “desafortunadamente imposible” allegase a recoyer el premiu Nobel; sicasí-y ye afortunadamente posible garrar el mellón d’euros. Enantes, el miembru de l'Academia y escritor Per Wästberg aldericaba al cantador por nun retrucar a les llamaes nin dase por aludíu ya espetó na televisión pública sueca SVT: “Creo que ye xusto dicir que la so reacción hasta'l momentu ye descortés y soberbiosa”. 
 

     Ye la mesma condición humana, amosamos munchos ideales pero, cuando se trata de dineru, davezu escaecemos esos principios. Arriendes, somos mui caritatibles coles perres ayenes, anque non coles nueses. Amás, hai bien de muertos de fame qu'al algamar la gloria yá nun s’alcuerden de naide. Conozo collacios que, de la qu’estudiaben, pidiguñaben cola tuna o colo que se terciaba y cuando s’afitaron nun bon puestu nun daben un perru nin a la so parentela. De los políticos de dambes manes, ¿pa que camentar más nada? ¿Por qué somos asina…? La rempuesta, my friend, ta xiblando “in the wind”.

¡PASALAPASTA!

                        “Facienda me pañó más de 700.000€ del mio premiu en Pasapalabra”

Paz Herrera ganó 1.300.000€ nel concursu y se caltuvo en 87 programes. 

   Facienda va asoleyar de la solombra y patrocinar, por primer vez, un nuevo programa televisivu que s'emitirá darréu d’aquellos “PASAPALABRA” nos que s'abone’l premiu al concursante qu’aventen. “PASALAPASTA” algamará les sos pantalles la selmana qu’entra. La novedá ye que será presentáu pol señor ministru que va prindar en nome de toos. Con ello, se pretende dar baramentu a delles actuaciones recaldatories ya a un tiempu partir, tamién ente toos, la folixa del mentáu pasatiempu.

 

 

 

 

 

 

 

 

 

 

 

 

 

 

 

 

 

 

 

 

 

 

    

 

 

L’anunciu la llotería

     Dempués de que toos vierais l’anunciu, espardierais la so publicidá de baldre ya echarais la llarimina, voi cuntavos lu peor del casu: hai una segunda parte del vidéu que nun van asoleyar por nun ser conveniente onde’l día qu’entra-y toca la llotería de verdá a la paisana; sicasí, tres desconta-y les nueves tases amestaes que llantaron a los premios gordos y l’impuestu de donaciones a los sos fíos, -y sal la declaración de Facienda a ingresar aínda más del netu que nun-y mangaron. De resultes, a la so familia-y entra la ventolera y darréu entamen a prender fueu a les toles alministraciones de llotería qu’atopen.

La estafa los sellos

     En xuliu pasáu foron condergaos los responsables d'Afinsa pola estafa los sellos. L'Audiencia Nacional llantaba penes d'hasta 12 años de prisión a los cabezaleros de la rede. ¿Pero que pasa cola sociedá estatal de Correos que ye l'orixe de la emisión de los sellos n'España al traviés del so Serviciu Filatélicu? Cientos de millones d'euros neses fueyines de franquéu fueron vendíos dende peronia a los coleicionistes. Sicasí, el día que-ys petó entamaron a camudalos por apegatines en desterciu de los antiguos sellos, asina como de toa esta xente. Agora, esa cantidá escomunal de dineru quedó embrivida por esa sibilina maniobra ¿—Yos va salir de baldre la fechoría a Correos y per ende a l’Alministración? Güei naide paez reburdiar escontra la falcatrúa. Nos amarramos por culpa de coses que nun paguen la pena, mientres que nos engurriamos cuando l'Estáu manca dafechamente los nuesos intereses. ¡Nun tenemos igua! Asina nos va.

Esparabanes

 

Anque menos Dios, más amos,

más tiempu de trabayar,

más partíos a papar

que los de siempre aguantamos.

 

Amenorgaron salarios

y trabayes como un potru,

sinón contraten a otru

y fai servicios precarios.

 

Vendiéronnos bien la burra,

artículu y axetivu,

pos l'esclavu comprensivu

sintió la voz: ¡churra!, ¡churra!

 

Conxelaes les pensiones,

s’echa mano de los vieyos,

davezu, sofiten ellos,

al son de los mesmos sones.

 

Que si inflación, que si crisis…

Entrugái a Esparabanes,

cien mil euros nes sos manes

a diariu y nós con tisis.

 

Ye lu que saquen diez mil

y la xente los anima,

alzámoslos a la cima

dende perbaxo’l cantil.

 

Naide se mete con eso,

que nos presten les pataes,

mientres cobren burricaes,

a nós nos la dan con quesu.

 



101 años kafkianos

     Hai más de 101 años qu’una mañana, tres un suañu intranquilu, Goyu Samsa espertara convertíu nun monstruosu inseutu. Taba echáu de llombu sobre un duru cascu y, al alzar la tiesta, vio'l so banduyu convexu ya escuru, derrotu por narquiaes dureces, sobre'l que cuasi nun s'aguantaba’l cobertor, que taba a puntu d'esmucir fasta’l pisu…

 

     Lloñe de la estinción, naide foi a finar con ellos nin sulfatando. Los bichos de Kafka se multiplicaron a trompa talega ya arriendes espoxigaron, magar que l’inseutu en si nun pueda ser dibuxáu. Nesti añu cúmplese un sieglu ya un añu de que s’espublizara “La metamorfosis”. ¡Felicidaes a tolos repunantes!

Arroxando

     ¿Andara, güei, mediu mundiu “al tran tran”(Trump-tran xilium)? Nun lu sé, lu que sí sé ye que’l nuesu mundiu se radicaliza bramente y que vamos per mal camín. Yo qu’andaba desconectáu, según esclario darréu, d’entamu conté que ganara’l coríu Donald…

 

     Abultábaseme que les termes nes que nos asitiamos sedríen romanes; sicasí, nun viera romanos nin cartaxineses per nengún llau. De la qu' arimé’l focicu  a la sauna finlandesa, tampoco acolumbré finlandesa dalguna. Al camudar al bañu turcu, entrugué a un paisanu que salía: “¿hai dalgún turcu dientro?”. Foi’l casu que miróme torcio en dexando’l cuartu arroxando, anque vacíu. D’esa miente, cuando cubrí la fueya pa emponderar l’hotel, alderiqué que magar que yera mui afayadizu nun me prestaba un res que me mintieren colos servicios d’estranxería.

Alcordances de Cafrune

  
     Hai unos díes que nun entro nel Feisbuc y güei al abrilu m’atopé cola alcordanza y la ufierta del regalu d’un par d’ayalgues de Xurde Cafrune que Lita, dende l’otra oriella l’océanu, llantara na mio muria. ¡Munches gracies, Lita. Los tos discos tan en bones manes! Voi amestame tamién al to recuerdu con esta entrada. Al Turcu se-y vía davezu caleyando’l xaréu de la Gran Vía madrilana; sicasí, aquel repunante 1978 tuvo l’enclín de cruciar L’Arxentina col so caballu y foi la muerte la que se crució nel so camín…  

Nel camín a Yapeyú,

un mal día de febreru,

ellí fuisti a valtar tu,

Xurde, Turcu, compañeru.

 

¿Quién rentó la carroceta?,

¿quién-y propunxo truñar?,

¿quién la faza Tigre enceta?,

¿quién te mandara callar?

 

Foi mal añu pal degorriu,

esi del setenta y ocho,

fuesti gauchu, fuisti engorriu

y, a lo cabero, “sancocho”.

 

Celebrando a San Martín,

nel segundu centenariu,

lu algamares de vecín,

por culpa dalgún sectariu.

 

Más vencisti esi “socaire”,

nun-ys valiera la trampa,

pos te caltienes nel aire,

en monte, n’estrada y pampa.

 

Yes zamba, yes chacarera,

yes milonga y yes copla,

yes cantar de primavera

y yes el vientu que sopla.

 

Yo vi cantar esi vientu,

“serenatero del arenal”

encoplando col llamentu

pol so “payador” candial.

 

 

 

 

 

 

 

 

 

 

 

 

 

 

El Va!!e

 

El Va!!e que yá nun esiste (sem. Pañeda)

 

 

      El VAL.LE» Conceyu de MIRANDA» Parroquia de BIXEGA.

 

     El Va!!e ye una localidá del conceyu de Miranda que pertenez a la parroquia de Bixega. Ta asitiáu a una altitú de 560m. Na actualidá cunta con una población de 0 persones, bien de pantasmes, una balsona llavaza metales pesaos y nenguna vivienda. El Va!!e foi esbarrumbáu pola pala y la cobicia, llevaron l’oru, engafaron el terrén y agora nel Feisbuc-y cantamos unos “Sones d’Arriba” que son del otru Va!!e, de Somiedu, pero que valir, valen igual; mentanto, echemos la llarimina y xiblemos al tueru. El Va!!e amuesa’l camín del desaniciu robláu del nuesu Occidente ensin que naide faiga nada. ¡Qué Dios y Taranis nos perdonen!

 

Si t’averes a Balmonte,

a Balmonte de “miranda”,

mira como quedó’l monte,

valta, llevántate y anda.

 





¿Conozo?

 

     Conozo un país “onde o mundo non se chama Celanova”, nin prau de Xabel, nin faza de Xicón y nin siquier ca’l Tíu Vicente. Onde’l mundiu llámase Balmonte, Carlés, Ayende, Bual, Catropol, Eliao, El Franco, Salave… Occidente d’un país qu'aventara a romanos, moros y franceses, pero que foi vendíu al pesu como Troya a canadienses. Un país onde les agües tresparentes van camudar en balses atarraquitaes de seleniu, cianuru, arsénicu, azogue, fluoruros, cinc, níquel y cobre. Conozo un ríu Narcea d’orielles d’oru al que van a echar a perder dafechu. Conozo una ponte del Infiernu que quiciabes llueu se cruce. Sé d’un país au la xente calla mentanto los cabezaleros roblen la so ruina. U se come cachopu, se chuma sidra, se xuega al tute, se sabe de fútbol y malapenes más nada. Onde la gafa xaceda va quedar pa siempres y nos fairá colar ya escaecer fasta la memoria ya’l propiu raigañu y, de resultes, dexar de conocer.

     ¡Mirái si nun va ser un presaxu!: el relieve de la semeya de la “2” paez la figura d'un escomanáu colibrí que valtara envelenáu en bebiendo de la balsa.

 



Al rodiu'l Congresu

Una semeya’l PP

asoleyo pal pasante,

perru y planta: P y P,

de probes qu’anden de plante.

Seique’l tiestu nun se mueve

y el can nun lladra siquier,

ye una foto que conmueve,

más bonos nun pueden ser.

Atópelos nuna cera,

pela faza de Les Cortes,

quedé quietu na so vera,

al cruciar pa la cai Güertes.

El perru nun m’estrañara,

entá quiciás m’inoró,

arreyada na so vara,

la planta solombra dio.

Paecíen diputaos,

asentaos nel Parlamentu,

yo al tar enforma asentaos,

nun importaba un pimientu.

Anque yo nun diba a eso,

como torgaben el pasu,

arrodiara esi congresu

y nun ficieron nin casu.



Los tréboles de Pindesierra

    Los tréboles de Pindesierra son toos de cuatro fueyes. Non, nun ye un trébole namái, ye tola mata. Nunca viera cosa tala: de salú, ando frayáu; de xeitu, cuasi n’ayén; si faigo una primitiva, nun atoleno nengún númberu: la llotería nun me tocara na vida y dexé de picar por culpa d’ello; si xuego a les cartes, nun garro una mala brisca… Sicasí, los mios tréboles asoleyaron toos de cuatro fueyes. Lo peor del casu foi que nun m’alcordara d’eses ayalgues y al finar el branu debí d’arrincalos col restu los bardayos. Ta perclaru: ¿pa que me va a tocar daqué si nun pue unu tener nada?