Xabalinos

(bashny.net)

     Vanse viendo davezu delles semeyes de xabalinos a la vera les vaques. El d’esta foto pue tar maquinando daqué con elles y constituyir un verdaderu peligru pa la nuesa civilización. Por culpa d’ello vos ruego nun fiar de les apariencies ya andar sollertes. Sobre manera los arqueros ya escopeteros, asina como toa triba de peñes armaes. Arriendes, a l’Alministración–y pidiría un plan especial d'ayudes pa camudar los 4x4 por vehículos blindaos. Si nos caltenemos xuníos nada podrán amañar contra nós.  

Nun lu creyéis,

¡cago en mi mantu!,

nada sabéis

del d’Erimantu.

Comía paisanos

y a les muyeres,

a los troyanos

y a los de Mieres.

Si lu diz Pin,

nun ye de risa,

créyelu, nin,

tou va a misa.

Una odisea

     Anguaño, cada día ye’l día de dalgo. Güei ye’l día de la radio. Yá vos falé d’ella otros años, asina qu’esti nun voi aneciar nello. Sí vos voi camentar que de neñu oyía cuentos na vieya radio de madera de casa. Agora, siéntolos na radio y sobre manera na televisión. Cada cadena de televisión te cuenta'l mesmu cuentu, pero a la so manera. Esos cuentos son tan creyibles como puedan ser los de mio, ansí que pa remate vos voi contar unu, tamién a los mios deleres. Titúlase “Una odisea”...

    Ulises Umeru contratara un viaxe a Troya, a traviés d’un mayorista, dexando a la muyer tan enganchada a la Rede qu'enantes de colar tuvieron un teleco.  El cruceru resultó tan enrevesáu que’l tornar foi una verdadera odisea yá qu’echó venti años nello. Foi’l casu que mercara un bolsu de piel marrón pa la so pariente, Penélope, pero nun se lu regaló  por culpa de que la pilló enredando pel Feisbuc con una montonera pretendientes. Arriendes, nun foi quien nin a reconocelu siquiera por causa de que vieno mui gochu. Namái’l so perru, Argos, –al que la Pene tenía arrequexáu con tantu viciu– s’alcordó d’él y por culpa d’ello se diz que’l perru –y nun la muyer– ye’l meyor amigu del home. Enantes de reaniciar la epopeya Ulises–y esgonció l’ordenador, non sin enantes eliminar a tolos amigos de la la so fema chingando–y la propia biografía.

Poema de les 4 la mañana

A les cuatro la mañana,

camudó la mio persona,

ya‘l cuartetu, na so nana,

na velea del Corona.

Siendo les cuatro, especulo,

aneciaba esa velea

–el que quiera que me crea–,

qu’acarreté dende Angulo.

Mientres que pel Albaicín

nel vientu'l recuerdu sople,

con sangre escribe’l mio encople,

que ye al empar: Lorca y Pin.

Esa brisa amorosiega,

con notes d’una romanza,

canta sele l’alcordanza

col son que la vega riega.

Que nun tien caseru o dueñu,

como l’agua Lanxarón,

magar qu’en Pedro Alarcón

fora a torgar el mio sueñu.

Cuando’l tiempu perdió’l ser,

taba Granada ximiendo,

Pin de Sierra componiendo

ya espertando la muyer.

Desanicióse’l preséu,

aventando la mio pena

ya’l tastu de berenxena

que m’aportara’l muséu.

Algamó l’agua l’albada,

fixóme apagar la lluz;

mentanto’l mio versu esmuz,

espardíase en Granada.

Naide valtará en so valle,

nin en toa Andalucía,

mio asturiana poesía,

sacante mio mano calle.

Más finos

     Vivimos col asturianu nuna dómina llingüística na que’l preparáu trata de recuperar ya aporta lo que ye a ello, mientres que l’inorante reburdia escontra él porque lu que nun sintió cavilga que ye un inventu. Nun tiempu y país nos que ye poeta tou aquel al que–y sal de la bragueta. Nun presente nel que camudamos piedra por lladriyu y calma sele por baturizu. Nuna actualidá vocinglera na que se sustituyó’l llibru pol móvil y nun vemos más allá de la nuesa mirada virola. Nunos años onde yá nun se gasta boina magar que se calca gorra cola visera por detrás pa que dea solombra al espinazu. Nun periodu onde se refuguen los purinos de la casería mentanto se mexa pelos requexos de les villes ya entá contamos que somos más finos.

Neñu de la guerra

Escribe sol vientu,

neñu de la guerra,

el to sentimientu

col sangre na tierra.

Traza nesa ñube,

neñu prisioneru,

el mensax que xube

el xaciu melgueru.

Pinta nesi cielu

la lletra qu’esnala,

que camuda en xelu,

qu’asela la bala.

Respiga nel fríu

un cuentu qu’afuega,

qu’afuega’l glayíu

del que siempre anueda.

Compón el to versu,

seya ñegru o blancu,

nesi llibre inversu

que tranquen col trancu.

Que sepa la xente:

quien ye aquel que mata,

quien ye aquel que miente.

Robla y pon la data.

El babayu

"Es muy fácil vivir haciendo el tonto. De haberlo sabido antes me habría declarado idiota desde mi juventud, y puede que a estas fechas hasta fuera más inteligente. Pero quise tener ingenio demasiado pronto, y heme aquí ahora hecho un imbécil."

"El idiota", Fiodor Dostoievski.

    Asina siguimos: Los más fatos del mundiu viviendo a cuenta de los más preparaos; los que fuelguen, a cuenta de los que trabayen; la xente guapo, a cuenta del refugayu; los lladronos, a cuenta de los que desocupen. Les puertes xiratories entá voltien como turbines mientres los padrinos emponderen al afiáu y los cabezaleros miren pa otru llau.

      Si vuelvo a ñacer, yo tamién seré entuvía más babayu, Fiedor.

     “N'España'l méritu y la cultura nun se premien. El vividor apremia y vive del eméritu colo que nun paga la pena estudiar” (Pin Estrella).

La boda de Milia

Hai unos díes que recibí la invitación pa la boda de Milia

La moza más fea

del nuesu llugar

vive na mio aldea

y se quier casar.

La menos galana

de tola parroquia

nun sal por galbana,

fala con un Nokia.

La menos curiosa

del nuesu conceyu,

arriendes ye sosa

y cortexa a un vieyu

qu’atropa millones

y nun tien familia.

Dende Reis los dones

apurren a Milia.

Al tar afitada

la fecha’l casoriu,

se verá casada,

anque ensin amoriu.

Vistirá de blancu,

él con tarabica

y cuenta nel bancu

que la fairá rica.

Cola fanegada

va ser atrayente,

ella va ensin nada,

él ensin un diente.

Seduz el dineru,

qu’aporta guapura,

al finar xineru,

–yos bendiz el cura.

AVISU

ESTI YE UN AVISU P’AVIADOR DRO:

• Si nun se desanicia aína’l peaxe’l Güerna como prometistis.

• Si nun furrula l’AVE d’equí a 5 meses pela Variante Payares.

• Si nun s’oldea l’impuestu de socesiones col de Madrid.

• Si nun s’obliga a la retirada inmediata de cualesquier contaminante de balses o escombreres de les mines d’oru.

• Si d’equí a un añu nun ta en funcionamientu la totalidá de l’autovía Uviéu – La Espina.

• Si a tol que se garre atizando na viesca nun se–y meten diez años replantando.

• Si l’asturianu nun ye cooficial yá...

Me voi proclamar presidente d’Asturies pal añu qu’entra y pueque al to Xabel–y dea una amnistía.

En El Peligru, a 28 díes andaos de xineru de 2019

Prioridá

A la vera’l ríu Nora,

contárame’l Pataricu,

diendo camín de La Puela,

que cuerre más priesa agora

andar metiendo’l focicu

en comuña en Venezuela.

D'oca a oca

¡D'oca a oca

y tiro porque me toca!,

voi pasiando pel paséu,

pos llevantéme bien ceo

al ser la murnia preséu,

que pon la cabeza lloca.

¡D’oca a oca

y tiro porque me toca!,

que me toca a min la carga,

por ser la tristura amarga,

mala cubierta de sarga,

cola que tapar la boca.

¡D’oca a oca

y tiro porque me toca!

Cielos de maraña

Cielos de maraña,

sol a esconderite,

xelu pela braña,

na vega, convite.

Xuega cola tiza,

el que pinta’l cielu,

azul d’engañifa,

finxu a carambelu.

Ñubes d’algodón,

rastros de farapos,

povisa y cotón,

axuntando trapos.

Nublina al riscar,

ralu al mediudía,

si entama a orbazar,

posa en casería.

El monte con capa,

nun aguardes más,

cola tuya escapa,

mira a onde vas.

Tayu en avesíu,

mocu en solanera,

malva pal sufríu,

miel pa la mormera.

Ñeve n’antoxana,

nun salgas de casa,

si puedes, mañana,

carga cola rasa.

Cielos de maraña,

café y marañueles,

bollos per Cuaña,

preñaos en Quintueles.

¡Qué naide me mande!

Daqué de frixuelu,

seique abondo d’horru,

fadio y doi asuelu,

ensin el mio aforru.

Peñero farina,

zucre, sólo un plizcu,

¡echa–y güevos nina!,

de llimón, un mizcu.

Soi amás beleñu,

arriendes d’argaña,

magar como un neñu

al que nun s’engaña.

Soi cuetu, boroña,

güelga ya abeduriu,

nun trago la goña,

nin me torga’l muriu.

Nun pido gabitu

nin detién el matu,

nun como cabritu,

me repuna’l fatu.

Asoleyo brenga,

anque seya vieyu,

nun farto de penga

y sí del arreyu.

Enllordio col barru,

avezo al pigazu;

pero para’l carru,

si garro l’angazu.

Qué naide me mande

d’un llugar llonxanu,

porque–y monto’l tande

falando asturianu.

Esparates

     Echéme cavilgando en que, si los vehículos diésel contaminen, que torgaren de vendelos y non primeru vendelos y dempués llantar una burricada tases a los probes (los coches de gran cilindrada de los ricos gasten gasolina). Foi’l casu que darréu soñé que falaba con Kafka y conviniéramos en que nos traten talamente como a los sos propios inseutos. Espetárame qu’España tenía qu’españar per dalgún llau al imponenos l’esparate de sovencionar tanta ayuda a foriatos qu’enxamás cotizaron –munchos de países de los que nos aventaron– mientres conxelaben dellos años les pensiones amenorgando’l so poder adquisitivu y faen trabayar a los d’equí como verdaderos esclavos.  Prevía un futuru ensin identidá aneyáu de trabayu y de perda derechos nel que los vieyos amorrentaben na mesma xera. De la que m’esperté, comentárame’l fíu que quieren retresmitir los partíos de fútbol de segunda división n’abiertu pa tol mundiu mundial y qu’equí los van caltener de pagu.

D'horros y frixuelos

Pablo Casado, sobre el asturiano: «Quiero una educación de calidad en la que los niños asturianos no estudien solo los hórreos y los frixuelos» (El Comercio, 12.1.2109)

Amás d’horros y frixuelos,

educación calidable,

falando como los güelos,

porque falamos en bable.

Como faló Xovellanos,

ensin un enfrentamientu,

nun vengáis los castellanos

a lleldar ensin formientu.

L’asturianu nun ta en riesgu,

nin apurre beneficiu,

a los güeyos d’un biliesgu

de la que fala de viciu.

Lleva años aforfugando,

yá que tuvo prohibíu,

que lu prohibiera un bandu,

¿o nun lu tenéis sentíu?

Vos lo cuenta un apolíticu:

ye meyor documentase,

anque los del paleolíticu

aínda tuvieren pase.

Col asuntu la variante,

el reclamar güei’l ramu

nun queda mui elegante,

porque tabais vós d’entamu.

Ave, horros ya’l frixuelu,

col peaxe l’autovía,

nos tomáis toos el pelo

y nos amargáis el día.

La caxa gatos

Mercara una caxa gatos,

nun m’entraren más que tres,

ún más llistu, dos más fatos,

y nengunu siamés.

Siamés, que nun ximielgu,

pos l’asturianu ye asina,

rescatara otru d’un pielgu

y yá acuartia la caxina.

Nun son coses nin mascotes,

que son cuatro seres vivos,

nun lu garren los más zotes,

nin tampoco los furtivos.

Nin el que mata na plaza

cuntando que ye cultura,

nin el que–y presta la caza,

nin daquién que–yos tortura.

Tienen derechu a vivir,

como lu tien el paisanu,

naide saque a rellucir:

civil, penal o romanu.

Que los redautara l’home,

ensin consideración

pal ser qu’esclaviza o come,

la tema ye de caxón.

Son animales amigos,

compañeros de miseries,

sienten, como nós, respigos

y carecen les llaceries.

Ronronien, enxamás bufen,

miaguen cuando pidigañen,

mexen en sable, nun tufen,

nin esgatuñen si bañen.

Mercara una caxa gatos,

paecerá esparate

qu’arriendes de ser sensatos,

coman conmigo tomate.