La brúxula

     D’ente tol ferruñu nel que se tresformaren los oxetos d’aquel llentu garaxe asitiáu nun pueblu nel monte mientres cuasi que cuarenta años, daqué circular y pequeñu rescamplaba pente aquella refugaya por aciu del sol qu'adientraba adulces pelos resquicios del únicu ventanu. Yera una brúxula d’aceru inoxidable amarrada a los farrapos d’un morral cuya carcasa se caltenía apeguñada y yá había cuantayá que perdiera’l so norte. Arriendes, el llimbu móvil s’afitaba estable como acutáu definitivamente en llugar talo. Foi precisu abondo procuru pa somorguiar nel aparatu ya algamar a que furrulase. Resultara abegosu recuperar la dirección, magar qu’imposible'l tiempu trescurríu nin la vida que sotripara.

¡PROBINA!

     45 años xuntos (6 de cortexu y 39 de casaos), dende aquel 15M de 1974, ¡PROBINA! Tienes que me perdonar Miss 61. Lo que nun sé ye como coime s’enterara la prensa…

     “Cómo'l 15-M te camudó la vida (anque nun te lo paeza) | Públicu”

Los mozos de Rufina

Son los mozos de Rufina,

dos caretos ya unu prietu,

Rufina saliera fina

ya nengunu–y pon vetu.

El casu ye que la casa

paez una casa cites,

esto ye lo que me pasa

por aceutar les visites.

Magar que seyan de gates

a les que cebes por pena,

yá qu’en cuanto te decates

s’apunten más a la cena.

A la cena ya’l cortexu,

de la que Rufina encela,

l'ambiente lu pon encesu

ya a tolos gatos en vela.

Falta’l gris nesta semeya,

que pasa’l día berrando,

por Rufina, la más bella,

la más bella d’esti pandu.

Vien dacuando la so madre,

pero nunca s’entemete

na so festecona padre

ya anda ayén al trepelete.

La mio muyer los escuerre

hasta casa la vecina,

de nada val, erre qu’erre

tornen toos con Rufina.

¡VALIÓ YÁ!

(Semeya, El Comerciu)

     Nun hai tres selmanes qu'esfruté de la sierra de Sollera, cuntaba con volver… Tamién l’afararon. ¡MALDITOS SEYAN! Llueu, estes mesmes besties xavaces quexicarán de que los inocentes animales baxen al ablugu de les villes. ¿PA CUANDO UN CASTIGU EXEMPLAR PA TOA ESTA GANDAYADA?

SEÑORES DEL PRINCIPÁU:

                                            NUN AMBUREN LOS PARAÍSOS, ARDEN LOS INFIERNOS. ¡VALIÓ YÁ D’HIPOCRESÍA, DESANICIEN LA PUBLICIDÁ DE “ASTURIES PARAÍSU NATURAL” MIENTRES NUN SEYAN A TORGAR ESTES LLACERIES! La viesca ye padremuñu de toos. Otra vez tuvo que ser la lluvia la qu'impidiera que la quema s’espardiera aínda más: ¡QUÉ PENA, QU’ANOXU Y QUÉ VERGOÑA!      

Muerre Junquera

     Morriera Junquera, el gran porteru asturianu que militará nel Real Madrid nueve temporaes. Hai tiempu que nun se sabía d’él; la vida ye asina, se pasa de la fama al escaezu nun tris. El casu ye que la muerte siempre ye noticia. Daquella, Junquera yera veceru del restorán Txistu del mio bon amigu Pedru Ábrego, tamién fináu. Yo vivía na mesma cai a escasos 100 metros d’esi establecimientu y vía davezu al nuesu paisanu pela faza; sicasí, l’alcordanza más célebre que me vien al maxín ye la de qu’esfardanó un 600 nun accidente ensin qu’él malapenes se mancara. Descansa en paz, Andrés.

Oreyeres

     Instrucciones pa iguar unes oreyeres pal to neñu col envís que'l nun vaya quedar con oreyes de soplín como'l to home.

El neñu d’oreya llarga

–oreyón onde los haya–

nun ñació con esa carga,

que por mal procuru afaya.

Por nun llantar la oreyera,

nin siquier l’esparadrapu,

separtara de so vera,

faciéndolu menos guapu.

Pa que nun doble la oreya,

ya–y quede de soplín,

nunca t’escaezas d’ella

pal to apreciáu neñín.

La oreyera indispensable

remanecerá otra vez,

en pie fitu tan fiable,

va entonar cola so tiez.

Mira como na revista

t’amuesen les instrucciones,

cola semeya a la vista,

pa que tu l’acondiciones.

Torna la moda d’enantes

de neños con oreyeres,

sin oreyes d’elefantes,

nun te rías, ye daveres.

Día de la Madre nel Tayu Inglés

     Va pa 30 años qu’a una madre d’un neñu pequeñu que trabayaba nel Corte Inglés–y pegó un ictus. Nos 17 años que se caltuviera nesa xera nun faltó un solo día al so puestu, siendo daquella mui bien considerada por tolos xefes yá qu’arriendes yera la que más vendía de la so planta, o seya 100 por 100 entregada y 0 por 100 d’egoísmu. Lo que fixo'l Corte Inglés cuando careció esi grave episodiu que la imposibilitó pa la so actividá foi arrampla–y de mano la tarxeta de compres cola que tenía derechu a un ruin descuentu nos sos comercios ensin que tampoco valiera de nada que’l so home tuviera mui venceyáu a Asturies ya’l propiu conceyu Grau.

     Por culpa d’ello, tolos años, esi 5 de mayo, dambos festexen el día de la madre que los echó a los desapegaos cabezaleros del Corte Inglés.

¡MALDITOS!

       Enantes de les eleiciones, los mios amigos y collacios de mandrecha  espotrexaben de los mios amigos y collacios de manzorga. Enantes de les eleiciones, los mios amigos y collacios de manzorga reburdiaben de los mios amigos y collacios de mandrecha. Dambos s’enfotaben en llevar la razón según la so circunstancia orteguiana. Foi’l casu que, como aínda hai xente que s’enfocica con daquién cuando nun cavilga como él, decidí nun fadiar a naide y dar voz a los inocentes que muerren careciendo les sangrines fiestes d'esti país y que de nada-yos val aldericar porque los míseres nun quieren entender nin los sos bramíos. Talamente, como n’otres facetes de la mio vida, fuime a estrellar amestáu a los otros más de 326.000 votantes que nun algamaron representación dalguna pa ellos, mientres qu’EH Bildu con menos de 260.000 votos consiguió 4 escaños. La fin de la llaceria animal va tener qu’esperar, precisando necesariamente tantu del nuesu sofitu como’l de toles cases conceyu onde s’amañen estos sádicos y retrógados espectáculos a la vista de los propios neños.

Conmigo mesmu

        Voi semando apuntes pel camín como’l que sema pataques nun riegu siempre ensuchu. Anotaciones qu’esnalen a mercé del vientu de caín. Cuentos qu’enxamas se van a contar a neños que nun los van sentir. Relatos que nunca se van rellatar y de los que nun se va saber. Poemes que nun se van recitar porque la distraición y la costume triaren el recursu y la métrica. Fueyes que trespapelen ente la publicidá o la prensa finando de ceba pal contenedor del papel. Alcordances, allegríes, murnies, ilusiones y sobre manera sofitos a la nuesa llingua. Caleyo ente repunantes que nun s’enteren nin de lo que falen, metanes d’otros que sabríen falar magar que nun–yos peta. Pente miraes inorantes de refugu, ayén a una xente que m’arrodia d’insensibilidá. El mesmu ordenador xuniera al despreciu desaniciando bien d’escritos de la so memoria de ferralla. La mio xera va soterrando inxente d’anoxu mientres espoxiga abonda refugaya. Los medios de comunicación inoren lo nun axustao y namái’l mio silenciu remanez de la llaceria. El mio propiu fíu me riñe por escaecer un castellán que nun precisa de naide que lu defenda. La mio mano escribe con tinta d'escura inconveniencia. Adulces, la mio pallabra se tresforma puramente en aforfugu y refunfuñu. Mentanto’l vecín celebra la to valtada, el mio maxín algama la bipolaridá convenida. Mientres, anecio en falar n’asturianu fasta a les mios coraes ensin conocer siquier cuando voi rindir d’esa mala zuna.

Lluz de cultura

(Semeya de Mary Canto)

Como la farola alluma,

el llibru siempre illumina,

como resplandez la lluna

dende’l finxu’l cielu, nina.

Nesta vida hai bien de lluces

y murnia ñegru acebache,

pues topales en Per!!uces

o nel llugar d’El Bailache.

Esa lluz nos val de guía

pa refugar l’amargura,

como guía la poesía

pel camín de la cultura.

La cultura del palaciu

Miranda Valdecarzana,

adulces, sele, despacio,

s’esparde na so antoxana.

Nel biblioárbol de Grau

o na biblioteca lleo,

xunto a la placa d’al llau

que nos recuerda a Eliseo.

Lise ye como otra lluz

que remanez na contorna,

onde la sabencia esmuz

ya’l so acebache l’adorna.

Arriendes el Cubia espeya

pela faza los rayinos

d’esa lluna y de la estrella

mientres sientes cantarinos.

Les estrelles col so mantu

aporten más lluminaria

na foto de Mary Canto,

que ye de Grau emisaria.

Pente cortines de fumu

Chemtrailín, chemtrailán,

fumerinos de San Xuan,

los del rei afumen bien,

los de la reina, tamién.

Piden pan y nun-yos dan,

piden quexu, dan-yos güesu,

tol día vienen y van,

afumando monte y fuexu.

Que nun ye combalechar,

que nun quieren fumigar,

que ye agua condensao

ya un plizcu sarriu arroxao.

Que van d’equí p’acullá,

pa gastar en querosenu,

que naide aforfugue yá,

que salga a alendar el nenu.

Yo nun sé que coime pasa,

dime tu como lo ves,

sobro’l cielu la mio casa,

sobre Cueiru ya Avilés.

Chemtrailín, chemtrailán,

fumerinos de San Xuan,

los del rei chinguen bien,

los de la reina, tamién.

Los de Duque, truque, truque,

que dexara’l ministeriu,

quien lo ruque que lo muque,

que pa min ye un gran misteriu.

Pachín

    Como siempres, tenéis que me perdonar los que cumplistis años nestos caberos diez díes por nun felicitavos, pero yá sabéis que cuando marcho ando desconectáu dafechu yá que nin siquiera gasto móvil. De resultes, perdonái y davos por felicitaos.

     Foi’l casu qu’esnalé pal Vietnam y merqué esti gorín de la semeya col envís d’algamar dalguna triba d’ayuda, pero esclarióme la fema de los servicios sociales que pa los animalinos nun había nada. Yo–y alderiqué que desque nun soi probe de solemnidá nun dexan de cobrame fasta por alendar y que daquella naide nos agabitaba de nengún país del mundiu. Ella amestóme que ta axustáu asina y que les aides son pa paisanos. Despidiérame de la mentada moza non ensin enantes prometela que de la que salga otra vez me traeré dalgún disidente. Pa remate, la muyer nun quier al gochín pol arume qu’esparde, asina que –por si daquién tuviera interesáu– póngolo a la venta por 900 euros. Llámase “Pachín”, o seya “Pa Chinh” en vietnamita.

Dime paxarín parleru

Díme paxarín parleru,

díme qué fales,

col to piar melgueru,

mientres esnales.

Tienes unos ñegros güeyos,

plumes castañes,

y guapos badagüeyos

con qué m’engañes.

Dicen que’l Presi morriera,

yo nun lu creo,

miráilu a la mio vera

siempre lu teo.

Díme paxarín parleru:

¿con quién charrabes?

De la llingua, voceru,

mui bien lo sabes.

Dicen que s'inventa’l bable,

xente inorante,

eso nun ye fiable,

yo soi falante.

Díme paxarín paisanu

que nun s'inventa,

que cumplió l’asturianu,

d’años, milenta.

FALANDO

(Semeya de ROCA)

       Atopara bien de veceros de los qu’esbarrien de contino escontra la nuesa llingua reburdiando nos comentarios de LNE al respeutive de la manifestación d’ayeri en Xixón. Voi falar con “f” y namái que con “f” mentando a dellos –non toos– nos que fui a reparar anueche: Fachendosos, fadiosos, faladeros, falambaldres, falanciosos, falancieros, faldetes, faldoteros, fálicos, falifos, faligotes, falsos, faltones, faltosos, fallaos, fallicos, fallíos, falseros, fanáticos, fandangueros, fandosques, fanegueros, faniegones, fantasiosos, fañagüetos, faragayos, fardeles, farfantones, farfayes, farfullones, fargatientos, fargatones, fargayos, fariellones, fariñones, faroleros, farramplinos, farrapios, farrucos, fartones, farxoletes, farxolos, fatos, faxineros, fayaos, fechiceros, fediondos, figures, felpeyos, feltrones, ferieros, ferraos, ferres, ferretes, ferrones, ferruñentos, ferruñosos, festeros, fexes, fiascos, fiastros, filanderos, filtrayes, finos, fisgones, fiadores, fiyascos, fiastros, flexes, floxos d'aguyes, flonderos, focetos, focicones, focicudos, fogardines, fuinos, folgazanes, folgones, folguetes, folixeros, fongosos, fónicos, foniles, foranos, foriatos, forfugues, forgaxes, foriones, forres, foscos, fosqueros, francíos, frangüesos, fresqueros, frixuelos, fueyes, fuinos, fuleros, fumiacos, fungones, fuñones, furones y futes.

     Ente dichos comentarios, como siempres, nun vi nengunu nel que retrucara dalgunu de los más aludíos.

Boni, Bonita

       Cuando nos muerre dalgún pariente non afamáu cuasi naide s’entera, como nel casu de la mio ma que nun asoleyó nin les necrolóxiques de la prensa. Nesta selmana finara Albertu Cortez y toos calcamos na carina qu’esbaria llarimines del Feisbuc y foi de mou sinceru por aciu de que Bertu yera una persona mui quería. Agora que tol mundiu paez qu’ensugara’l so lloru, voi llanta–y yo tamién el mio particular homenaxe. Allá pelos entamos de los años 60 del pasáu sieglu, Bertu emprincipiaba a iguar cantares con menos conteníu que los sos postreros. Esti que vos comparto aneciaba en sonar na radio y gustaba a los rapacinos y ye qu’a los guah.es–yos presta cualesquier cosa cenciella y dannos siempres lleiciones de como nun tenemos de complicanos la vida. D’esta miente, Albertu Cortez sigue vivu nos mios oyíos de guah.e con “Boni Bonita” o “Bonita mía”.