Plastificaos

Tábemos controlaos, numberaos, fumigaos ya agora, plastificaos.

https://cnnespanol.cnn.com/2019/06/05/si-bebes-agua-embotellada-podrias-duplicar-la-cantidad-de-microplastico-que-ingieres-segun-estudio/

Dicen que tienes velenu na piel

y que tas fecha de plásticu fino.

Dicen que tienes un tautu divino

y quien te toca se vuelve fardel.

Y si esta nueche quies dir a baillar

vete poniendo‘l disfraz depuradora,

pero tendrás que peñerar en media hora

porque si non nun te paso a filtriar.

Pero de mano quies dir a cenar

y m’espetes que te lleve a un sitio caru,

que vas vistir de pexiglás ensin reparu, 

porque si non nos van a retayar.

Crees que yes una bruxa ya avezada

y lo que pasa ye que tas intoxicada;

y eso que dices que yá nun papas nada,

pero me dicen por ahí: "Que sí, que sí,

que sí, que vas plastificada per ehí.

Dicen que tienes velenu na piel

y que tas fecha de plásticu fino.

Dicen que tienes un tautu divino

y quien te toca se vuelve fardel.

Dices que yo no soi’l to home ideal,

mientres que forres tresparente una revista

y yo m’entrugo si tendrás dalguna pista

o dalguna foto en botella de cristal.

Casualidá

     Acabo de contestar a un comentariu de la mio mui estimada hermanina con una frase que finaba con “cantar, soñar ya rir”, por esti mesmu orde. Ye’l casu que, per casualidá, alcuéntrome con qu’esa secuencia tamién la emplegara Cyrano de Bergerac, ta perclaru qu’ensin posibilidá de que me la copiara.

     Pero “cantar… soñar… rir…” vivir… tar solu…

ser llibre, tener el güeyu abiertu, la voz que cimble,

llantame por sombreru l'universu,

por un sí o por un non,

bateme, o faer un versu…

Refugar con valor la gloria y la fortuna,

viaxar cola imaxinación ¡a la lluna!

Namái al que val reconoce-y los méritos,

nun pagar enxamás por favores pretéritos.

Arrenunciar pa siempres a cadenes y protocolos.

Posiblemente nun esnalar mui altu, pero solu.

Si vienes a la mio vera

Si m’alcuentres pel camín,

nun dexes de saludame,

ando a llombu del maxín,

soi poeta muertu fame.

Acarreto mil poemes

ya achiperres na mochila,

rinse davezu les femes,

atropo iviernos en fila.

Escapo de la ciudá,

voi refugando la bulla,

per onde’l silenciu va,

préstame dir a garulla.

Nel monte siempre m’afayo,

carezo de la qu’ambura,

nun me pincha nin l’escayu,

respiro y como verdura.

Aforfugo pela napia,

nun atopo solución

cola sal de mar de Tapia

o la mesma de Xixón.

Charro abondo col paisanu,

col paisanu de raigañu,

paezme un vezu mui sanu,

como apigazar n’escañu.

Nunca me fadiara’l rozu,

pero sí’l tantarantán,

magar que yá nun soi mozu,

correspuendo si me dan.

Si vienes a la mio vera,

esguilaremos suañando

pente la fueya la llera,

la cordelera o’l pandu.

Ayudes y mapes

     Fino de tornar de la Conseyería de Tresportes y Vivienda de la Comunidá de Madrid onde fui a mercar unos mapes pa ser a atopar caminos pel monte y nun terminar escayáu pente los bardayos. Al entrar, a manzorga, escuclo cuatro funcionarios tres d'un mostrador que miren pa min. A lo fonderu, otros tantos dende dientro d'una cuerra estampen pegatos nel arca a los que lleguen. A mandrecha, vixilantes y la Benemérita. Per delantre, un home ya una muyer entruguen a los que pasen: ¿P'ayudes?, ¿p'ayudes?... Llega'l mio turnu ya anecien conmigo: ¿Vien vusté p'ayudes? De secute-yos alderico: ¡Sandiez!, a min enxamás diéronme ayudes. Valme abondo bien con que nun metan la mano na caxa de les contributives y nos dexen cobrar aquello a lo que tenemos derechu polo que cotizamos (tol funcionariáu que folgaba en silenciu echa la risada como si dixera daqué graciosu).

Chorizu de pueblu

El pueblu tien una ilesia,

la ilesia, los feligreses,

los feligreses, Alexia

que te come les careses.

Nel so centru hai una plaza

au ta la casa conceyu

ya un bancu con mala traza

onde rispia dalgún vieyu.

Nesa plaza, nuna esquina,

hai una pastelería,

con pastelera guapina,

bombones y bollería.

Na bollería preñada,

siempre hai dalgún chorizu,

ensin una bolla honrada,

s’arma abondo baturizu.

El chorizu yá repite

y se conoz pol fedor,

de fite…, de fite en fite,

ya arriendes pela color.

La color según caún

y caún según la mano,

de cada cabra, cabrún,

de cada mano, manguano.

Y por culpa de les manes,

el pueblu anda dixebráu,

ansí que’l que tea ganes

que marche al pueblu d’al llau.

Verde ye'l nuesu talante

Bebe’l prau la so verdura

de los ríos y regatos,

mientres que’l sol sal ya ambura,

enoxen d’espín los matos.

Vien el ñublu a sofitar,

que nun–y gusta la ensuga,

la ñube entama a llorar

ya amiesten na mesma muga.

Mestura de bendición

na nuesa tierra bendita,

que trabayara a estazón

ya acarriara la marmita.

Nuna dómina pasada

que nun se pue escaecer,

si remanez la tonada

y la sidra pa beber.

Bebe’l verde como’l prau,

esi verde de mazana,

sestaferia col d’al llau,

fala la llingua asturiana.

Riega de verde’l raigañu,

sofita l’asturianía,

qu’espoxigue’l buragañu,

qu’esnale siempre la guía.

Verde de la tierra verde

que pon verde al repunante,

quien nun andecha se pierde,

verde ye’l nuesu talante.

Albores de la mañana

Albores de la mañana

to casa van descubriendo,

desanicia la galbana,

sí aínda sigues dormiendo.

Adiós col mio corazón,

qu’en alma tras de ti cuerro,

al despidime esti son

te diz que de pena muerro.

Tu vas ser el bien de mio vida,

tu serás el bien de mio alma,

el raitán qu’a l'amanecida

cantando sele la murnia ensalma.

Al alborecer se marcha’l tren,

se va’l mio amor, yo me voi con ella,

de la qu’amanez, sábeslu bien,

que nun soi quien a aselar l’arella.

Si tu quies cortexar a les moces d’equí,

has de ser a sentir: tararí, tararí.

Tararí, tarará, tarará, tararí,

si tu quies cortexar a les moces d’equí.

Nun se tría, nun se tría,

a la vera’l ríu Nora,

magar que llegara’l día,

nun vas poder por agora.

Na sidrería de Llovio

     Los que nun vivimos n’Asturies y nos gusta’l monte esguilamos per onde cuadra. Sicasí, yá sabéis qu’hai dellos meses qu’ando xubiendo y baxando per tolos cuetos, viesques y pandos de la redolada de El Escorial. A esti enfotu contribúi’l que dempués de rindir cola mañana per esta guapa faza nos averamos a la Sidrería de Llovio y xintamos talamente como en ca’l güelu. Güei mesmamente podéis escuclar na semeya lo que me llanto Xuan Carlos de primer platu. Arriendes, como ye perdifícil visitar Madrid y non el monasteriu de San Llorienzu, anecio en recomendavos qu’al mediudía paséis pela sidrería que s’alluga na cai Xaquín Costa, 8 a malapenes 300 metros de la octava maraviya del mundiu pa tastiar la so sabrosa comida casera. Ellí vais comer como na vuesa casa y ta perclaru que tolos mios miles d’amigos y collacios podéis esclariar que vais de la mio parte.

La brúxula

     D’ente tol ferruñu nel que se tresformaren los oxetos d’aquel llentu garaxe asitiáu nun pueblu nel monte mientres cuasi que cuarenta años, daqué circular y pequeñu rescamplaba pente aquella refugaya por aciu del sol qu'adientraba adulces pelos resquicios del únicu ventanu. Yera una brúxula d’aceru inoxidable amarrada a los farrapos d’un morral cuya carcasa se caltenía apeguñada y yá había cuantayá que perdiera’l so norte. Arriendes, el llimbu móvil s’afitaba estable como acutáu definitivamente en llugar talo. Foi precisu abondo procuru pa somorguiar nel aparatu ya algamar a que furrulase. Resultara abegosu recuperar la dirección, magar qu’imposible'l tiempu trescurríu nin la vida que sotripara.

¡PROBINA!

     45 años xuntos (6 de cortexu y 39 de casaos), dende aquel 15M de 1974, ¡PROBINA! Tienes que me perdonar Miss 61. Lo que nun sé ye como coime s’enterara la prensa…

     “Cómo'l 15-M te camudó la vida (anque nun te lo paeza) | Públicu”

Los mozos de Rufina

Son los mozos de Rufina,

dos caretos ya unu prietu,

Rufina saliera fina

ya nengunu–y pon vetu.

El casu ye que la casa

paez una casa cites,

esto ye lo que me pasa

por aceutar les visites.

Magar que seyan de gates

a les que cebes por pena,

yá qu’en cuanto te decates

s’apunten más a la cena.

A la cena ya’l cortexu,

de la que Rufina encela,

l'ambiente lu pon encesu

ya a tolos gatos en vela.

Falta’l gris nesta semeya,

que pasa’l día berrando,

por Rufina, la más bella,

la más bella d’esti pandu.

Vien dacuando la so madre,

pero nunca s’entemete

na so festecona padre

ya anda ayén al trepelete.

La mio muyer los escuerre

hasta casa la vecina,

de nada val, erre qu’erre

tornen toos con Rufina.

¡VALIÓ YÁ!

(Semeya, El Comerciu)

     Nun hai tres selmanes qu'esfruté de la sierra de Sollera, cuntaba con volver… Tamién l’afararon. ¡MALDITOS SEYAN! Llueu, estes mesmes besties xavaces quexicarán de que los inocentes animales baxen al ablugu de les villes. ¿PA CUANDO UN CASTIGU EXEMPLAR PA TOA ESTA GANDAYADA?

SEÑORES DEL PRINCIPÁU:

                                            NUN AMBUREN LOS PARAÍSOS, ARDEN LOS INFIERNOS. ¡VALIÓ YÁ D’HIPOCRESÍA, DESANICIEN LA PUBLICIDÁ DE “ASTURIES PARAÍSU NATURAL” MIENTRES NUN SEYAN A TORGAR ESTES LLACERIES! La viesca ye padremuñu de toos. Otra vez tuvo que ser la lluvia la qu'impidiera que la quema s’espardiera aínda más: ¡QUÉ PENA, QU’ANOXU Y QUÉ VERGOÑA!      

Muerre Junquera

     Morriera Junquera, el gran porteru asturianu que militará nel Real Madrid nueve temporaes. Hai tiempu que nun se sabía d’él; la vida ye asina, se pasa de la fama al escaezu nun tris. El casu ye que la muerte siempre ye noticia. Daquella, Junquera yera veceru del restorán Txistu del mio bon amigu Pedru Ábrego, tamién fináu. Yo vivía na mesma cai a escasos 100 metros d’esi establecimientu y vía davezu al nuesu paisanu pela faza; sicasí, l’alcordanza más célebre que me vien al maxín ye la de qu’esfardanó un 600 nun accidente ensin qu’él malapenes se mancara. Descansa en paz, Andrés.

Oreyeres

     Instrucciones pa iguar unes oreyeres pal to neñu col envís que'l nun vaya quedar con oreyes de soplín como'l to home.

El neñu d’oreya llarga

–oreyón onde los haya–

nun ñació con esa carga,

que por mal procuru afaya.

Por nun llantar la oreyera,

nin siquier l’esparadrapu,

separtara de so vera,

faciéndolu menos guapu.

Pa que nun doble la oreya,

ya–y quede de soplín,

nunca t’escaezas d’ella

pal to apreciáu neñín.

La oreyera indispensable

remanecerá otra vez,

en pie fitu tan fiable,

va entonar cola so tiez.

Mira como na revista

t’amuesen les instrucciones,

cola semeya a la vista,

pa que tu l’acondiciones.

Torna la moda d’enantes

de neños con oreyeres,

sin oreyes d’elefantes,

nun te rías, ye daveres.

Día de la Madre nel Tayu Inglés

     Va pa 30 años qu’a una madre d’un neñu pequeñu que trabayaba nel Corte Inglés–y pegó un ictus. Nos 17 años que se caltuviera nesa xera nun faltó un solo día al so puestu, siendo daquella mui bien considerada por tolos xefes yá qu’arriendes yera la que más vendía de la so planta, o seya 100 por 100 entregada y 0 por 100 d’egoísmu. Lo que fixo'l Corte Inglés cuando careció esi grave episodiu que la imposibilitó pa la so actividá foi arrampla–y de mano la tarxeta de compres cola que tenía derechu a un ruin descuentu nos sos comercios ensin que tampoco valiera de nada que’l so home tuviera mui venceyáu a Asturies ya’l propiu conceyu Grau.

     Por culpa d’ello, tolos años, esi 5 de mayo, dambos festexen el día de la madre que los echó a los desapegaos cabezaleros del Corte Inglés.