De toxu a gorbizu

Esa neña, mamina,

cara de boxu,

magar seya guapina

ye como’l toxu.

Que, de la que t’arimes,

guiyu t’espeta

y les sos llarimines

van pela cueta.

Nun voi regala−y flores,

val bien el ganzu,

porque los sos amores

déxante banzu.

L’espinazu fundíu,

xeitu valtáu,

quedes pol amoríu

munchu alloriáu.

En lu altu del cuetu

fadré un conxuru

escritu en papel prietu,

baxo’l carburu.

Qu’esa rosa cuchiella,

prenda del monte,

s’afite a la mio oriella

ensin el pronte.

Güei yá ta a la mio vera,

valió’l fechizu,

que’l ganzu en primavera

trocó a gorbizu.

Réquiem pola caparina

Afogó la caparina,

yo nun pudi facer nada,

que cayó pa la piscina,

seique por culpa l’airada.

Yera bien grande y melguera,

volaba de flor en flor,

 avezada a la mio vera,

nun carecía’l remor.

Como tantes qu’esnalaben,

esfrutando llibertá,

que veníen y colaben,

como tol que vien y va.

Como palombu y malvís,

como tórtola y raitán…,

pero cola tarde gris

llegó’l so valtu rampián.

Nun valió la to guapura

nin te valiera esnalar,

naide cavó sepultura

nin naide te va llorar.

“Quietem, quietem”, mariposa

del to mui curtiu trayeutu,

vilba remanez la rosa,

sin roblar el pautu reutu.

Réquiem pola caparina,

que nun m’esclarió so triba,

que finara bien aína,

magar qu’afayó perriba.

Rindiera'l farol

     Los faroles viven nes nueche y muerren cola claridá de caldía; sicasí, rindiera’l de la casa centenaria de les cortes enantes qu’ésta. Hai cuantayá que la so ferrial cadarma va separtando adulces de la blanca parede. La rellumada de la so bombilla esclaria agora a la escurecida requexos que se calteníen ensin lluz, mientres que l’acera ye a algamar el poéticu ángulu escuru. Asina va asocediendo a tolos vieyos de la localidá que valten selemente por aciu irremediable de la repunante edá, qu’enxamás va de farol.

Pintu, pintu...

Pintu, pintu, gorgolitu,

pintu, pintu, gorgolín,

nun trabaya’l señoritu,

sí trabaya’l más ruin.

¿Ónde va esi tan curiosu?

A l’acera verdadera,

onde paga’l más mañosu

lo que produz la so xera.

¿Ónde va esi mozu guapu

que nunca rozó la roza?

Per ende a vivir de papu

y a cortexar cualquier moza.

Serenden, ¡vaya arremangu!,

¡vaya mou de vivir!,

ensin empuñar un mangu,

mira que pue producir.

Sin pintar, pinto la rama,

coles penques na so piel,

pasa más tiempu na cama

que’l fardelu del fardel.

Pintu, pintu, vaya arte,

nin siquier mueve’l rabil,

sin tener arte nin parte,

esgadaña ensin estil.

Nel Retiru

De la que yo me retire,

me retiraré al Retiru,

mire per onde se mire,

aselaré como un tiru.

De la que seya a aselar,

m’afayaré en cualquier bancu,

sintiendo’l tiempu pasar,

pero col maxín en blanco.

Col maxín a los deleres

escaeceré’l trabayu,

el deber y los deberes

ya obligaciones del tayu.

Qu'ensin apreciar la empresa,

siempres foi mui repunante,

cola serenidá encesa,

produciendo pa un marchante.

Cuando tea retiráu

quedaré escuclando’l cielu,

magar que mediu alloriáu,

refugaré tou aruelu.

Namái pente soledá,

nes biqueres (“surtidores”),

so l’umeru y la humedá,

au se torguen los calores.

Arrequexáu nun requexu,

perbaxo de la rociada,

y, mientres qu’asoria’l sesu,

suañaré como si nada.

Guapa Tierrina

¡Dame Xixón el to mar!,

¡déxame Uviéu’l to centru!,

plaz al carbayón saliar,

pero nun pue tierra adientro.

Quier Xixón la capital,

nun lo quixo’l rei d’Asturies,

porque refugara’l sal

p’afitar a les sos curies.

Avilés, cai de Ribero,

Avilés, cai de Galiana,

veo un Abillés melgueru

ya'l Niemeyer, na ventana.

Soi de Mieres del Camín,

la mio ma foi de Llangréu,

el mio pá de Samartín

ya’l mio güelu de Tinéu.

Viva’l conceyu de Llanes,

afamáu peles sableres,

magar qu’apigazo en Panes,

voi a cortexar a Lieres.

Nun cruciaré Ribeseya,

ellí voi remanecer,

nunca m’escaezo d’ella,

mientres m’afayo n’Ayer.

Abluca Cangas pol monte,

tamién Teberga y Quirós,

igual que Ponga y Balmonte,

¡guapa Tierrina, rediós!

Villaviciosa, fermosa,

La Puela una maraviya,

L.lubarca una blanca rosa

y Tapia una guapa villa.

Si marcho, muerro de pena

por Bual o por Cabrales,

adiós conceyu de L.lena

y les sos guapes chavales.

¿Guerra biolóxica?

La Vespa velutina

quiciás, por lóxica,

aporte de la China

guerra biolóxica.

Llegáranos l’asiática

ente xarrones,

por cuenta esa antipática,

lleven xamones.

Col asuntu del miel,

vese’l plumeru

de La Pampa o Montiel

o del dineru.

Emigre o nun emigre,

yá ta equí’l dengue,

esi mosquitu tigre

pica ensin rengue.

El Chikungunya y Zika

puen ser mortales,

si dalgunu te pica

−casos puntuales−.

Paludismu o malaria,

fiebre mariella,

la O’nyong-nyong precaria,

anque esperteya.

Traxeron el coipú

y gambusía,

nun los traxisti tu

nin la mio tía.

Cámbaru colloráu,

col moxón cebra,

el mio vecín d’al llau

quier la dixebra.

La cotorra arxentina

ya’l gran siluru

son la nueva vecina

ya un pexe escuru.

Acarriaron mapaches

y l’ambrosía,

pueque vengan apaches,

más d’Oceanía.

Regueru claru

Regueru claru,

fonte serena,

au llava con descaru

la mio morena.

Xunto a la fragua,

esa serrana

esclaria n’agua

pela mañana.

Una que llava,

otra que tiende,

a un mozu-y cai la baba,

naide lu entiende.

La tendalada

yá ta dispuesta,

la menos preparada

lleva la cesta*.

Regueru claru,

fonte selina,

qué Dios te dea amparu

d’esa mocina.

Claru regatu,

neña a la gueta,

onde inspira’l so versu dalgún poeta.

*Llevar la cesta, fam. tar de más acompañando a una pareya mozos mientres cortexen.

Pindesierra ©

Hipocresía

       El cenciellu poema de la entrada anterior con namái que selce versos agrupaos en cuatro estrofes ye una de les poesíes más curties qu’asoleyara. Sicasí, sigue les normes de la métrica, rima en consonante, amuesa dellos recursos lliterarios ya inclúi la novedá d’amestar la llingua asturiana ya’l francés nel so desendolcu. Esa pequeña xera algamara sólo 25 “me gusta” y 7 “m’encanta” nel Feisbuc por culpa de que ye d’un autor ensin consagrar. Si fuera de cualesquier afamáu   –magar que nun tuviera nin puta idea de poesía−, los afalagos se multiplicaríen, cuidao que l’aprobación xeneral precisa del consentimientu de la fama qu’afita la calidá d’anguaño. Como anecio n’espublizar na Rede por aciu de sofitar l’asturianu, resalvaré la llaceria y la cafiante hipocresía ya aporfiaré col envís.

El delegáu

     Llegara l’asoria del desiertu y la Villa y Corte algamara los 44 graos. Si cavilgabes un plizcu nun salíes, asina qu’ensin lu pensar dos vegaes colé güei pal monte de la faza oeste de Madrid acarretando’l pan qu’atropara mientres la selmana pal mio amigu’l burru que nun yera, que yá vos presenté’l xueves pasáu. Foi’l casu que llegara al xaratal onde vieno al mio alcuentru hai siete díes ya’l pollín nun taba; sicasí, como tolos burros preparaos tienen representante, el de so s’averó al mio llau pa facese cargu del almuerzu que foi mazcayando de la mio mano con abondo procuru. Pa la vuesa conocencia, equí asoleyo una semeya del delegáu pa que toos sepáis que caretu gasta.

Pol reparador

    A Xovín yá−y dicía’l so maestru cuando rapacín que tenía madera. El docente atolenara acordies por culpa que’l so pá siempres fora carpinteru ya él mesmu finara trabayando colos de la forestal. Tan apuráu andaba Xovín cola so xera que nun−y quedó tiempu nin pa cortexar; sicasí, yá cumplíos los 50 conociera una moza venti años más nueva que yera ebanista y que ría de les sos engurries. Foi’l casu que por deformación profesional mercara reparador pa la madera y bebiólu d’un solu tragu. Anguaño, hai tres selmanes que se caltién ingresáu nel llaboratoriu de calidá del IKEA.

"NAUSEA"

Furaquen el banduyu de les vaques pa que seyan más granibles… (Semeya de la Sesta)

Lo que refuga Sartre, lo que produz la estomagada, son los homes que namái cumplen una rutina ya anecien en desendolcar ensin más cavilgar les sos llabores, xente qu'al esforciase por demostrar la so esistencia escaecen lo qu'ésta pue significar en realidá y l'azorronen con apariencies, busca d'una hipotética superioridá ya actos discutiblemente heroicos. 

Lo qu’a min me repuna nun son los homes que trabayen como máquines, nin los qu’escaecen lo que pue significar una vida a la que pueque nun s'atope esplicación y nin siquier los que namás esmolecen por aparentar. A min, la xente que realmente me fadia ye aquella a la que nun−y val con esplotar al restu de los seres vivos sinón qu’arriendes los tienen que torturar. Sí, a min lo que bramente me chinga ye esa gandayada humana mísere. Esos degorrios d’esti paraísu que caldía camudamos en infiernu que se dediquen a condergar inocentes. ¡MALDITOS SEYAN!

El burru que nun yera

Yera un burru que nun yera

y mil que nun siendo son,

namái quiero a la mio vera

al que pastia en pradascón.

Platero bien podía ser,

pero enxamás Rocinante;

porque se dexa querer,

seique nunca repunante.

Cuando llego pel camín,

cuerre aína al barganal,

esti célebre pollín

que m’aventa cualquier mal

aportáu de la ciudá

con pan duru na mochila,

que m’agradez de verdá

con blincos en retafila.

Al marchar dambos sentimos

que s’alloña un bon collaciu,

mientres reclama más mimos,

voime diendo mui despacio.

Otru día traerá’l tren

al so amigu col tarucu,

nesi tiempu que va y vien,

apaecerá de sutrucu.

Por partida doble

     Aquel vieyu contable, de la que llegaba la nueche, siempres finaba apigazando sobro los asientos qu'afayaba perriba la so mesa. A causa d’ello, peles mañanes espertábase abondo bien descansáu yá que reposaba por partida doble.

Baxa

     Dime de baxa d’una compañía telefónica qu’amuesa un nome con entamu mui sonoru porque m’anduvieron chingando mientres quince años. Nos postreros meses−yos tuvi alvirtiendo abondes vegaes de que nun me xubieran un solo céntimu’l so paquete yá que nun taba dispuestu a pagar más pol so pésimu serviciu. Foi’l casu que nin siquiera se molestaron en retrucame. Dempués, cargáronme’l siguiente recibu con un incrementu d’al rodiu del 40 %. Coles mesmes, pedí’l treslláu de portabilidá a otra compañía ya aína apaecieron aneciando colos correos y llamaes. A lo cabero, espétenme que m’ufierten fasta 200 euros p’atender la penalización de la compañía nueva ya arriendes me van baxar la cuota a la tercera parte por un periodu d’un añu. Darréu m’entruguen que si me decato de la montonera perres que voi aforrar. De secute−yos alderico que sí, pero que yá diera la mio pallabra al otru provisor ya eso bien seguru que nun lu van a garrar  Vdes.