La piedra pataca

Un día cualesquiera, en cualesquier requexu d’una tierra de llabor asturiana, alcontré la piedra pataca.

                        La piedra pataca

nin fiende nin purga

nin mete na saca

nin te da la murga.

Nin podrez na tierra

nin precisa d’agua

nin al rustir berra

nin en sartén nagua.

Nin esfrez col fríu

nin cuez col calor,

nin val pa un avíu

nin tastia’l sabor.

Nun la llambe’l xatu

nin pica la pita,

quicias el más fatu

cuente que ta frita.

Ayena a la fame,

si en dalgún peligru

s’amuesa al algame,

tasca l’embeligru.

Nun será la monda,

magar ye de traca,

nun lleva la tronda,

la piedra pataca.

Nes sableres del Llevante

     Na cabera selmana de vacaciones, la muyer ya’l fíu empobináronme a remolera a les sableres del Llevante. Ablugamos nun hotel abondo estrelláu; sicasí’l so estén nun−y valió pa torgar les tambascaes que cayeron nesos díes. L’arenal yera de morriyu ya a pocu muerro apedriáu por culpa’l folaxe. Magar qu’andaba un plizcu enfarxopetáu de xente, pel guapu monte de la redolada nun atopabes a naide. Un día, nun “gastro buffet” del pueblu, garré una gastroenteritis. El personal d’animación se m’abultaba d’inmigración y, al respeutive, sí calteníen un animador en chigre que retiraba aína los vasos animándote a chumar más. La escuridá de la nueche paecióme'l momentu más aparente pa estrenar la camiseta que'l mio fíu mercara en Bilbao hai dellos años y que’l noxu me refugaba poner al ser yá un paisanu vieyu. Tornamos con atascu, siete díes menos, ya’l que soscribe cola napia collorada ya otra montonera de cuentos ensin rexistrar.

Frente de Llevante

Frente, frente de Llevante,

ensin dar un pasu al frente,

la muerte s’afaya en plante

pa que la vida s’ausente.

L’enemigu nesos mares

dispara a los sos deleres,

viniendo de Baleares,

fierro de calamiyeres.

Nial d’ametralladores

que remanez del pasáu,

defenden trabayadores,

soldaos nel otru llau.

De la faza de calume,

el fieru cañón rescampla,

la bomba estopa ente llume,

restalla cementu y champla.

Sangre moza collorada

mez col verde de la mar,

la corada estrapallada

espárdese pel llugar.

Un destín con ruin futuru,

la derrota como meta,

condergáu ensin procuru

o cola güesa en cuneta.

Nesa España que yá arrumba,

la ilusión caye en prisión,

el búnker ye catacumba

ya espeyu de la nación. 

Ensembre too dañino,

como foi pal mio pariente,

sumió'l teniente Benino

naquel branu nesi frente.

Tres selmanes n'Asturies

      Tuviera trés selmanes bien granibles n'Asturies que me paecieron namái una. Dempués otra peles sableres del Llevante y yá, de nuevu, tornamos a la calor d’esta Villa y Corte. Como comento siempres, davos por felicitaos los que cumplistis años nesi periodu, porque yá sabéis qu'en vacaciones ando dafechamente desconectáu. De la nuesa estancia n’Asturies, destacar l'alcuentru con tolos ánxeles de la corte celestial -la mio hermanina- y la so fía Adriana (que seique llibró d'Artumisa pol so anagrama). Tamién, les dos xuntances de fala, café y churros que Cady tuvo la xentileza d'entamar, onde asistieron delles persones que yá conocía ya otres a les que nun conocía personalmente, amigues del Feisbuc. D’igual miente, más que s’averaron a conceyu, como la señora con venceyos aristócrates qu’aportara un par de llibros sobro la nuesa tierra o'l xuez exconseyeru de la Xunta de la Galiza que quería conoceme.  Arriendes, los parientes d’Alicina que s’afayaben nuna mesa cercana, a los que tuvi'l gustu de saludar. Por embargo, nada qu’amestar del otru paisanu que-yos acompañaba, que m’espetó que mui pronto yo cobraría pola mio xera col asturianu, al que-y alderiqué que por cuenta la nuesa llingua yo enxamás cobré nada y sí gasté abondo tiempu y dineru. D’otres histories yá vos narraré, en versu o en prosa, más adelantre.

Nun hai peor inorante qu’aquel que nin sabe nin quier saber de lo que fala (Pinón el d’Ounón)

La ruta del Barriu Azul

     Remanez nel aniciu la ruta esi Barriu Azul que s’escuende tres d’un contenedor de borrafes entrín y non tu vas avieyando. Darréu, atopes una Morana qu’escucla pal ruidosu prau de la fiesta que paez escaecer el rebulliciu. Castañéu llora fileres de cebolles sobro’l camín de xubida nel que Xiquín defende la so faza asoleyando los caniles. Roi lladra d’allegría pola to presencia y Grau emprincipia a allugase a los tos pies mientres qu’El Tarreiru bailla con La Matiega. A mandrecha, un horru acambáu narquia por culpa del so par de sieglos ensin querer valtar. Agora ye Rex el que se t’avera con gayola mentanto llanta les sos patones na to arca. Va entamando la baxada pente la solombra d’ablanos, castañales ya ocalitos. El fresquín afalaga la to cara ya’l llento’l terrén pon abegosu’l nun esbariar. Davezu, atopes dalguna paisana que va percorriendo l’encamientu del mélicu pela redolada. Nel altor, un escomunal xalé amuesa la so prepotencia. De secute, la ilesia te recibe impasible tres les primeres cases del cabu la parroquia. Perdayures surde pente’l rozu la máxica cirigüeña que ye a curar tolos males, como los esgatuñaos de los muxos d’Ánxeles, la mio hermanina. A manzorga, el miercedes d’escolta d'un afamáu caudiellu caltiénse al albentestate burllándose d’un tiempu que trescurre ensin piedá. De siguíu, la muria de los vieyos palacios azorrona arguta la rellumanza d’otra dómina. A lo cabero, el perru del tendal apurre la tristura de la so cruz amarráu xunto a la mesma cruz de caminos qu’aporten la fin ya'l puntu y siguíu a esti cuentu.

De toxu a gorbizu

Esa neña, mamina,

cara de boxu,

magar seya guapina

ye como’l toxu.

Que, de la que t’arimes,

guiyu t’espeta

y les sos llarimines

van pela cueta.

Nun voi regala−y flores,

val bien el ganzu,

porque los sos amores

déxante banzu.

L’espinazu fundíu,

xeitu valtáu,

quedes pol amoríu

munchu alloriáu.

En lu altu del cuetu

fadré un conxuru

escritu en papel prietu,

baxo’l carburu.

Qu’esa rosa cuchiella,

prenda del monte,

s’afite a la mio oriella

ensin el pronte.

Güei yá ta a la mio vera,

valió’l fechizu,

que’l ganzu en primavera

trocó a gorbizu.

Réquiem pola caparina

Afogó la caparina,

yo nun pudi facer nada,

que cayó pa la piscina,

seique por culpa l’airada.

Yera bien grande y melguera,

volaba de flor en flor,

 avezada a la mio vera,

nun carecía’l remor.

Como tantes qu’esnalaben,

esfrutando llibertá,

que veníen y colaben,

como tol que vien y va.

Como palombu y malvís,

como tórtola y raitán…,

pero cola tarde gris

llegó’l so valtu rampián.

Nun valió la to guapura

nin te valiera esnalar,

naide cavó sepultura

nin naide te va llorar.

“Quietem, quietem”, mariposa

del to mui curtiu trayeutu,

vilba remanez la rosa,

sin roblar el pautu reutu.

Réquiem pola caparina,

que nun m’esclarió so triba,

que finara bien aína,

magar qu’afayó perriba.

Rindiera'l farol

     Los faroles viven nes nueche y muerren cola claridá de caldía; sicasí, rindiera’l de la casa centenaria de les cortes enantes qu’ésta. Hai cuantayá que la so ferrial cadarma va separtando adulces de la blanca parede. La rellumada de la so bombilla esclaria agora a la escurecida requexos que se calteníen ensin lluz, mientres que l’acera ye a algamar el poéticu ángulu escuru. Asina va asocediendo a tolos vieyos de la localidá que valten selemente por aciu irremediable de la repunante edá, qu’enxamás va de farol.

Pintu, pintu...

Pintu, pintu, gorgolitu,

pintu, pintu, gorgolín,

nun trabaya’l señoritu,

sí trabaya’l más ruin.

¿Ónde va esi tan curiosu?

A l’acera verdadera,

onde paga’l más mañosu

lo que produz la so xera.

¿Ónde va esi mozu guapu

que nunca rozó la roza?

Per ende a vivir de papu

y a cortexar cualquier moza.

Serenden, ¡vaya arremangu!,

¡vaya mou de vivir!,

ensin empuñar un mangu,

mira que pue producir.

Sin pintar, pinto la rama,

coles penques na so piel,

pasa más tiempu na cama

que’l fardelu del fardel.

Pintu, pintu, vaya arte,

nin siquier mueve’l rabil,

sin tener arte nin parte,

esgadaña ensin estil.

Nel Retiru

De la que yo me retire,

me retiraré al Retiru,

mire per onde se mire,

aselaré como un tiru.

De la que seya a aselar,

m’afayaré en cualquier bancu,

sintiendo’l tiempu pasar,

pero col maxín en blanco.

Col maxín a los deleres

escaeceré’l trabayu,

el deber y los deberes

ya obligaciones del tayu.

Qu'ensin apreciar la empresa,

siempres foi mui repunante,

cola serenidá encesa,

produciendo pa un marchante.

Cuando tea retiráu

quedaré escuclando’l cielu,

magar que mediu alloriáu,

refugaré tou aruelu.

Namái pente soledá,

nes biqueres (“surtidores”),

so l’umeru y la humedá,

au se torguen los calores.

Arrequexáu nun requexu,

perbaxo de la rociada,

y, mientres qu’asoria’l sesu,

suañaré como si nada.

Guapa Tierrina

¡Dame Xixón el to mar!,

¡déxame Uviéu’l to centru!,

plaz al carbayón saliar,

pero nun pue tierra adientro.

Quier Xixón la capital,

nun lo quixo’l rei d’Asturies,

porque refugara’l sal

p’afitar a les sos curies.

Avilés, cai de Ribero,

Avilés, cai de Galiana,

veo un Abillés melgueru

ya'l Niemeyer, na ventana.

Soi de Mieres del Camín,

la mio ma foi de Llangréu,

el mio pá de Samartín

ya’l mio güelu de Tinéu.

Viva’l conceyu de Llanes,

afamáu peles sableres,

magar qu’apigazo en Panes,

voi a cortexar a Lieres.

Nun cruciaré Ribeseya,

ellí voi remanecer,

nunca m’escaezo d’ella,

mientres m’afayo n’Ayer.

Abluca Cangas pol monte,

tamién Teberga y Quirós,

igual que Ponga y Balmonte,

¡guapa Tierrina, rediós!

Villaviciosa, fermosa,

La Puela una maraviya,

L.lubarca una blanca rosa

y Tapia una guapa villa.

Si marcho, muerro de pena

por Bual o por Cabrales,

adiós conceyu de L.lena

y les sos guapes chavales.

¿Guerra biolóxica?

La Vespa velutina

quiciás, por lóxica,

aporte de la China

guerra biolóxica.

Llegáranos l’asiática

ente xarrones,

por cuenta esa antipática,

lleven xamones.

Col asuntu del miel,

vese’l plumeru

de La Pampa o Montiel

o del dineru.

Emigre o nun emigre,

yá ta equí’l dengue,

esi mosquitu tigre

pica ensin rengue.

El Chikungunya y Zika

puen ser mortales,

si dalgunu te pica

−casos puntuales−.

Paludismu o malaria,

fiebre mariella,

la O’nyong-nyong precaria,

anque esperteya.

Traxeron el coipú

y gambusía,

nun los traxisti tu

nin la mio tía.

Cámbaru colloráu,

col moxón cebra,

el mio vecín d’al llau

quier la dixebra.

La cotorra arxentina

ya’l gran siluru

son la nueva vecina

ya un pexe escuru.

Acarriaron mapaches

y l’ambrosía,

pueque vengan apaches,

más d’Oceanía.

Regueru claru

Regueru claru,

fonte serena,

au llava con descaru

la mio morena.

Xunto a la fragua,

esa serrana

esclaria n’agua

pela mañana.

Una que llava,

otra que tiende,

a un mozu-y cai la baba,

naide lu entiende.

La tendalada

yá ta dispuesta,

la menos preparada

lleva la cesta*.

Regueru claru,

fonte selina,

qué Dios te dea amparu

d’esa mocina.

Claru regatu,

neña a la gueta,

onde inspira’l so versu dalgún poeta.

*Llevar la cesta, fam. tar de más acompañando a una pareya mozos mientres cortexen.

Pindesierra ©

Hipocresía

       El cenciellu poema de la entrada anterior con namái que selce versos agrupaos en cuatro estrofes ye una de les poesíes más curties qu’asoleyara. Sicasí, sigue les normes de la métrica, rima en consonante, amuesa dellos recursos lliterarios ya inclúi la novedá d’amestar la llingua asturiana ya’l francés nel so desendolcu. Esa pequeña xera algamara sólo 25 “me gusta” y 7 “m’encanta” nel Feisbuc por culpa de que ye d’un autor ensin consagrar. Si fuera de cualesquier afamáu   –magar que nun tuviera nin puta idea de poesía−, los afalagos se multiplicaríen, cuidao que l’aprobación xeneral precisa del consentimientu de la fama qu’afita la calidá d’anguaño. Como anecio n’espublizar na Rede por aciu de sofitar l’asturianu, resalvaré la llaceria y la cafiante hipocresía ya aporfiaré col envís.

El delegáu

     Llegara l’asoria del desiertu y la Villa y Corte algamara los 44 graos. Si cavilgabes un plizcu nun salíes, asina qu’ensin lu pensar dos vegaes colé güei pal monte de la faza oeste de Madrid acarretando’l pan qu’atropara mientres la selmana pal mio amigu’l burru que nun yera, que yá vos presenté’l xueves pasáu. Foi’l casu que llegara al xaratal onde vieno al mio alcuentru hai siete díes ya’l pollín nun taba; sicasí, como tolos burros preparaos tienen representante, el de so s’averó al mio llau pa facese cargu del almuerzu que foi mazcayando de la mio mano con abondo procuru. Pa la vuesa conocencia, equí asoleyo una semeya del delegáu pa que toos sepáis que caretu gasta.