Qué viva'l baille

Viva’l baille ya’l que toca,

vivan los que tan baillando,

el que canta ya’l qu’aboca,

ya’l zapatu zapatiando.

Viva’l cuerdu, viva’l llocu,

que mui llocu tien que tar

pa dedicase al barrocu

y bien de fame pasar.

Viva la sorrisa d’ella,

qué viva’l plumeru d’él,

la tarrañuela en tropiella

ya’l so cuerpu de pincel.

Viva tou aquel qu’escuche,

viva tou aquel que sienta,

la xibla ya’l sacabuche,

la vigüela ya’l que cuenta.

Viva’l laúd y la tiorba,

qué viva, viva la danza,

el que blinca y nun encorva,

y tol que mueve la panza.

Viva quien te fai suañar

vivan los sones del arpa

y tamién los del llugar

qu’esfrutamos baxo carpa.

Sonetu en chancia

Sonetu que t’espeto a ti, Anicetu,

asela la espinela, la de Nela,

sabe de seguidilla, la Sabela,

tercetu que te meto tres cuartetu.

Que naide a ese sonetu ponga vetu,

que si con Nela esnala esa espinela,

que cante la Sabela cantinela

y d’esti pericuetu acote’l retu.

Entrastio colos tres, nun ye estribillu,

balancia so la bancia, nun ye estancia,

llantar al tresbolillu ye de pillu,

encoplo cola copla de la infancia,

qu’alluma la parola ensin dar brillu,

sumiendo esti sonetu sólo en chancia.

Semeya del futuru

Güei viera na Puerta’l Sol

como un grupu antisistema

taba raptando a una fema

col so bolsu de charol.

Al tar la xente avezada,

naide−y aportara auxiliu,

unos porque tan d’exiliu,

otros porque nun faen nada.

Uno mira pa otru llau,

otra curia les maletes,

nun−yos fadia que−yos guetes,

porque’l robu t’afitáu.

El que nun te roba, pide,

el que nun pide, maquina,

apostáu en cualquier esquina,

como’l tueru d’una vide.

Colo que pañen d’impuestos,

monten un árbol p’avientu,

de Navidá, como’l cuentu,

con perendengues bien puestos.

Pela cai d’atrás, los bancos,

presumen de torrexones,

a cuenta les comisiones,

nunca se van quedar mancos.

Ayén ta Carlos III,

montáu sobro’l so caballu,

ensin reparar aballu,

mientres lleven el dineru.

Ye una foto del futuru,

equí nengunu trabaya,

el que nun te quita, calla,

y too se torna escuru.

¿Qu'andaremos faciendo mal?

    El día dempués la güerta d’Europa amaneció facciosa. Seique los furtos abondaron mientres una montonera d’años. Pémeque qu’esa ye la rexón más castigada polos robos ya’l  riesgu ye un 44% superior al del conxuntu del país. Les muyeres tarrecen que les monten los de les menaes. Centenares d'okupes asalten cases y xalés de branéu d’esti territoriu. Arriendes, los gabitos siempres s’echaben a los mesmos. Les agües del Segura baxen de revuelta. El día del aniciu los pimientos colloraos camudaron la color. Fadiaben les coles de Bruxeles. Les cebolles taben yá fartes de lloricar. Los pepinos amargaben per toles sos coraes. De la flor vieno'l golor y de la fruta'l mal sabor. Aína hai qu’empobinar a esta xente pel bon camín; pero, que si quies arroz del Mar Menor, Catalina. Pa finar, una calabaza se m’amosara kafkiana y m'aldericó: Munches vegaes ye más seguru tar encadenáu que ser llibre. ¡Qué pena! –Y digo yo a usté, señor guardia: ¿Qu’andaremos faciendo mal?

Babayu ya antibable

     El castellán fai 1100 cambeos y diez nueves incorporaciones d'una vegada ensin que reburdiaren nin aldericaren un res los de los inventos y de la llingua de llaboratoriu. Por culpa d’ello, voi poneme en contautu cola RAE pa que na so siguiente edición del so Diccionariu de la Llingua Española amiesten “babayu” y “antibable”.

¡MALDITU SEYA!

Aporta la mio boca eses pallabres

sutiles que s’esparden na to vera,

valtarán en lloría y cuando llabres,

 vas sentiles grumar na primavera.

Falará la mio mano de llugares,

de mui bien más allá del finxu’l cielu,

onde entá se caltienen balagares,

onde aínda’l molín aventa’l muelu.

Au vas a debalar allá pel branu,

u vas a requexar pela seronda,

au vas oyer falar esi asturianu

a los que tantos güei lleven la tronda.

Ellí vas escuclar cola to alma,

el burbús d’esa fala soterrada,

que bien al so pesar caltién la calma,

qu’encoplo nel entrín pela rimada.

Malditu seya aquel neciu inorante,

que runfa ensin saber lo que nun sabe,

que namái ye a gusmiar con mal talante

y piesllu restolar baxo la trabe.

El que nun ye a tastiar más que’l dineru,

el que fora a escaecer la pegarata,

que nun ye a esconsoñar dexando’l ñeru

por culpa una bilurdia ruina y fata.

L'amor como clixé

Será nóbel o nobel

y nun será de recibu

qu’aprecie más lo qu’escribo

que lu qu’escribía él.

Faltando a la hipocresía

ya a lo que diga la xente,

siéntolo munchu, Vicente,

nun me gusta esa poesía.

Ye que tantu amor yá rinde,

cuando tresforma en clixé,

nun sé qué pensaría usté

de que’l nuesu maxín prinde.

Azocando n'amar tantu,

encadenáu nesa idea,

careciendo la velea,

somorguiando nel so mantu.

Sicasí’l mayor respetu,

xunto cola norabona,

porque una persona bona

fora a algamar esi retu.

Per aciu del so recursu,

por causa de so sabencia,

qu’aquel tribunal sentencia

pa ganar esi concursu.

Seya nóbel o nobel,

usté amaba la so xera,

nesi amor de primavera,

duce y neciu como’l miel.

Aneciando cola casa

Magar gran casa,

siendo otra cosa,

sobro la rasa,

el versu escosa.

Ayeri en vida,

güei yá ta muerta,

sin una xida,

tanca la puerta.

Vendese entera,

con alcordances

d’enredadera,

zarros y bances.

Morrió Vicente,

como Pidal,

cola obra ausente

bien menos val.

Nun hai poesía,

foi pa Bousoño,

un cedru había,

nengún peroñu.

Pantasmal casa

de Velintonia,

pasa de tasa,

dende peronia.

Yo tamién sé de besos ya escaezu, Vicente…

Si la memoria d'un home ta nos besos,

ta la cai Velintonia en to memoria.

Pero nunca ye verdá si ye de coria.

Cuntar la vida polos besos encesos

nun ye allegre, entá más murniu de clausura. 

Que se viende la to casa y me da pena.

Que valta nel so teyáu tiempu ya antena.

Y refungo que quien muerre vive y dura.

Faer ye vivir más, pueque vivir mal,

porque nun ye de razón morrer inxente,

porque siempre l’escaezu anda latente.

 Polo qu'un paisanu fixo esistir val.

Na cruz d'Abantos

Aire y cruz,

nel mesmu cuetu,

nun esmuz

el pericuetu.

Si por marzu,

esi mes marcia,

vara en zarzu,

mayu nun arcia.

Nun pon torga

al esguilar,

la bandorga

ensin pesar.

Namái cielu

afaya enriba,

das asuelu,

nala la griba.

Nun hai pena,

mentanto sume,

tas de vena,

bendita cume.

Cuatro torres

tres del banzáu,

destes morres

tou alloñáu.

Se me vuela,

la mio peluca,

rolar, ruela,

la mar trabuca.

Si te peta

ven, t’espero,

nun m’enceta

el mal agüeru.

Cuatro y cinco,

amuesa’l versu,

fino y finco

esti universu.

El día l'atrasu

Güei foi’l día del atrasu,

del atrasu del reló,

a nós nun nos faen nin casu,

namái al que lu inventó.

Ye por culpa del que manda,

pa qu’aforre l’habitual:

el ricu, el pudiente, el randa;

anque a ti te venga mal.

Con ello maten el día,

al nun espurrir la tarde,

tarde más ñegra y más fría,

la nueche enfusa de farde.

Vas a camudar l'humor

con esti horariu d’iviernu,

la malura ya’l dolor

aporten llocura en ciernu.

Falla la concentración,

porque produz ansiedá,

hai quien garra depresión,

ye un cambéu pura maldá.

Esto ye lo que nos pasa,

mentanto a mover maniya,

toles maniyes de casa

ya al salir dir pela villa.

Si se te xinga un reló,

reclama al maestru armeru,

al ser el reló de to,

merca otru con dineru.

Martín

Había un neñu non mui llistu

que se llamaba Martín,

ya'l so pá seique Varistu,

que s’afayaba en batín.

La so casa foi de renta

−nun sabíamos que yera−,

al nun espurrir la cuenta,

aventaron la portera.

Vivía en Bravo Murillo,

vieya carretera a Francia,

esti guah.e pocu pillu,

de manera un plizcu rancia.

Magar nun ser bisarueñu,

sí yera agudu de cazu;

davezu arrugaba’l ceñu,

si doblaba l’espinazu.

Siendo de los escoyíos

pal sotripar del maestru,

cantaben−y los oyíos,

por culpa d’esi cabestru.

Un día sumió na historia,

yá nun s’allegó al colexu,

güei me vieno a la memoria

esi collaciu tatexu.

El so pisu se vendía,

lo mesmu que tol inmueble,

quiciás remaneza un día,

aquel guilopu tan feble.

El Batán

     Esti casar del Batán t’arrequexáu na  parte alta del ríu Aulencia na faza de San Llorenzu del Escorial. Ente la tupía vexetación remanez esta recia construcción hidráulica del sieglu XVI. Asitiada nun afayadizu llugar a la vera d’un regatu onde esquitaba una fonte, construyéronla p'abatanar y llavar la ropa y la llana que vendíen los monxos xeromos del conventu, qu’amas iguaben los sos propios hábitos. La xera consistía en bater o cutir el pañu ya amacigar el pelo. Pa desendolcar esi llabor na so planta baxa esistieron delles piles y chimenees, arriendes d’un banzáu colos sos arbañales y canales cubiertes por lloses que podíen retirase cuando la llavadura. Anguaño, l’edificiu que ye propiedá del Patrimoniu Nacional ta valtando y desque peslló como chigre, restorán y merenderu ye’l mesmu verde’l que paez que lu va tarmiar a él. A min, préstame pola vida caminar per esa ruina ya acotada carretera onde los díes non santos pues atopate cola nunca abondo bien estimada soledá y, si yes quien a astraete un res nel silenciu dominante, pue qu’algames a sentir el ruxerrux sele y llonxanu d’aquel pisón.

Turismu

     Pasáu un mes de la tambascada qu’entafarrara los baxos de la casa, entá nun tornó a furrular l’acutada oficina de turismu d’Asturies que Pindesierra tien abierta na provincia de Madrid, por culpa que la práutica totalidá de los folletos quedaron estropiaos pol mugor. De la que seya a atropar nuevu material, voi siguir apurriendo información –como siempres− a cazurros, coreanos, carpetovetónicos y toa triba de turistes en xeneral que quieran visitar cualesquier faza de la nuesa Tierrina.

Alluendi del baturizu

Mui adulces, bien despacio,

al tornar de los Madriles,

van reformando un palaciu

onde pasen los abriles.

Tienen corredor y sala,

lu mesmu que nel cantar,

blasón de manera tala

y terraza pa folgar.

Dos plantes y l’antoxana,

dientro de la corralada,

prodúcenme envidia sana,

viven na Tierrina amada.

A la vera un castañal,

nun llugar cerca de Grau,

como la cosa anda mal,

nun digo au ta asitiáu.

Alluendi del baturizu

s’afitara la pareya,

pente’l xuiciu ya’l berizu,

quien pueda escoyer qu’escueya.