Ello yera una vez

      La ruina casa na que medré nun yera mía. Los llugares a los que diba de vacaciones, tampoco. El viaxe a Asturies lu facíamos na tercera división d’un tren fumeru al que−y llamaben corréu. Cuntaba que−y apellidaben d’esa miente porque tardaba en llegar cuasi que como les mesmes cartes. Acarretábemos tantos bultos y maletos que doblé l’espinazu bien ceo. Deprendí de los mios pas a aforrar miseries p’algamar a tener dalgo pa que dempués te lo pañen. Naide nos dio nunca nada y sí se nos obligó a apurrir a los demás. Albidré a les clares que nesta vida nunca te falta’l que te chingue o te faiga calecer. Dempués de tantu tiempu trescurríu, abúltaseme qu’asina tien que ser la vida de los míseres, tean los que tean nel poder, por aciu de qu’hai munchos bisarueños a los que cebar. Faigas lu que faigas seique nun te va valir pa nada. De la qu’entames a alendar, te sotierren. Nes escures sepultures de los inoraos inorantes entemecen cadarmes y suaños na más repunante murnia. Mentanto, hai que siguir careciendo ya esmuciendo la pallabra...

Tercera: Resolvimientu y recursu del espatuxu.

PA SUELTOS/ES, ABLANQUIADORES, LLIBRES, MEDIOCRES, REPOLLUDOS YA AVISADORES.

     Entama un a tar mui fartu. Pasáramos, a tolos niveles, del tou controláu al tou val mientres aceutes delles pautes. Amás, nun se pue competir contra la fama nin l'apadrinamientu, véase l'ésitu del llibru de Belén Esteban. D’otra miente, yá sabéis el casu de que se me pidiera nun par d'ocasiones, a traviés d'un terceru, apurrir poemes pa una bibliografía d'autores asturianos na que nun se m'incluyó porque yo nun espublizaba llibros, lo que constitúi na actualidá otru patrón de calidá. Por embargo, nun voi dexar de versionar de secute y a los mios deleres una poesía de la escritora nomada al Christian Andersen −mentada n’anterior entrada− cola mesma fondura qu'ella encamienta (o seya, nenguna). El que nun quiera lleer que nun llea ya'l que quiera focicar que focique, qu’esto ye de baldre y por aciu d’ello nun val pa nada.

Pela to pexera,

d’uno, dos y tres,

vese escandalera,

cristal a traviés,

que montan los pexes

¿de lluna o papel?

que nun vi más veces

nin n’agua con sel.

Dos peces saluden,

pero solo a usté,

nun sé que pescuden,

sólo usté lo ve.

Un pez d’empanada,

cunto que ye’l cuatro,

tampoco diz nada,

¡Coime, qué teatru!

Se zarra’l telón

de franela fina,

rise un tiburón,

mexa sal marina.

Capital mundial, tamién del drama.

(Semeya de El Comerciu)

Ye l’Asturies qu’afuega día a día,

ye l’Asturies que prenden na calor,

la Capital Mundial de la Poesía,

la Capital Mundial del Quemador.

Ye l’Asturies qu’al otru nun respeta,

qu’ambura monte, viesca ya animal,

de besties que camuden d’escoyeta

paraísu n’infiernu ermu actual.

Esa Asturies que quier matar al osu,

esa Asturies qu’acaba col turismu,

esa Asturies qu’amaña solo noxu,

la Capital Mundial del Egoísmu.

Esa Asturies que siempre dicen qu’arde,

l’Asturies que dirixen unos pocos,

l’Asturies d’una mano bien cobarde,

d’aquellos qu’azorronen tar mui llocos.

N’Asturies que furrulen los amaños,

que por llibrar culpables garren fama,

repite l’escenariu tolos años,

la Capital Mundial, tamién del drama.

Día de los Namoraos

Cada día ye’l día d’una cosa,

seique festexen güei los namoraos,

felicito a solteros y casaos

que caltienen l’amor, cosa fermosa.

Yo, aporté a la muyer, con una rosa,

un perfume qu’anuncien en toos llaos,

que finara como otros descambiaos,

descambiáu a cambéu d’otra cosa.

Tres cuarenta y cuatro años nun m’entero

de lo que pue gustar más a una fema,

cuando torna’l regalu por dineru.

Prestar o nun prestar ye equí’l dilema,

magar felicitar y nunca sero,

meyor con diamante que con xema.

Qué nun muerra la radio

    Amestar, al respeutive del Día de la Radio, que la de casa yera más vieya que la qu’asoleyara nesa cabera foto de güei y que seique vos l'amosé fai cuantayá. Tamién, que’l sentir aquellos cuentos, cantares, concursos o’l mesmu parte nun salía de baldre, yá que como podéis apreciar nesta otra semeya yera de pagu. Dempués, enantes de que caparen los aparatos tresformándolos en transistores, desaniciaron les tases; pero aquelles histories paecieron perder l'encantu qu’empobinaba’l receutor de madera o de baquelita. Anguaño, a pesar de los televisores ya Interné, la radio aguanta a morrer y sigue cumpliendo años. ¡Felicidaes!

Nun echen pan a la oveya

Nun echái pan a la oveya,

que−y manca, que−y afuega,

porque paz tras de la reya,

que nun la echen pan, se ruega.

Que la oveya paz en paz,

que naide venga a fadiala,

porque−y cafia’l rapaz

ya’l qu’intenta afalagala.

Porque tien blanca la llana

y dalguna mano puerca

pue emporcar de mala gana,

magar tea tres la cerca.

Porque nun carga de ñeve,

como esi fatu afatáu,

qu’entá carga cuando llueve,

ensin cuayar nesi llau.

Nesi otru llau de la llende,

careciendo llibertá,

que de zarraos nun entiende

nin esplicaciones da.

Estímase’l cumplimientu

que s’encamienta en cartelu,

sobro l'avesíu llentu,

si melendrín traes al pelu.

Nun eches pan a la oveya,

namái come pan de casa,

si de berza come fueya,

caga la berza’l que pasa.

Mientres febreru almendrea

Anda entamando a almendrar

la flor blanca pela sienda,

antes de la cirolar,

pel camín o pela llenda.

Per Castiella o per Llevante,

anunciando primavera

ya amor del galán amante

que nun afuega n’agüera.

Dempués vendrán más colores

qu’ufierta la madre tierra,

sofitando esos amores,

magar que la rosa muerra.

Ye ciclu que se repite,

la vida en pintar anecia,

adulces, de fite en fite,

calteniendo’l partu recia.

Semando cola semiente,

d’esa vida, la esistencia,

renaciendo col ausente,

sofitando la presencia.

Y pa nun facer de menos,

sonrosa la poesía,

que reciten desde nenos

si l’amorín escribía.

Xube escontra l’infinitu,

nun torga la ñube etérea,

namái la siente’l benditu,

mientres febreru almendrea.

Nun me cuenten cuentos

El trespandar a la casta

namái ye cuestión de pasta.

Mentanto’l dineru ruede:

sí se puede, sí se puede.

La razón ye convincente

col Falcon, Porsche y xalé

pal vice o'l presidente,

como la sería pa usté.

Tampoco la dean con quesu:

con cuartos llegará’l día

qu’un guedeya nel Congresu

aplauda a la monarquía.

Cola Casta y la Susana

sofítase la zarzuela

nesta España tan ufana

onde’l que nun cuerre, vuela.

Respeto cualquier bandera,

seya de Rusia o de Ponga,

que nun monte escandalera

y qu’enxamás se m'imponga.

Qu’a naide−y paeza mal,

nun retrucaré alderique

del ranciu o del radical,

nun coma ayos quien se pique.

Traten otros del gobiernu

mientres el pan siga en ciernu,

pero nun me cuenten cuentos

que busquen enfrentamientos.

La fonte del Batán

  

       Aquel día’l tiempu detúvose a la so puerta, a la vera la fonte del Batán qu’ente bardayos anecia en regar escaezos. Mientres, homes y muyeres siguíen camudando na so propia dimensión, talamente como los flaires del pisón qu’otru mal día dexaron d’esistir hai cuantayá. Anguaño, col restorán zarráu, la so verde capota se caltién ayena a lo qu’asocede pela contorna ensin degomán de lo anubrir. El mesmu regatu tampoco paez querer saber nada ya esmuzse inxeme pel llugar; sicasí, el prodixosu silenciu barbusábame histories d’otra dómina. Güei, atopé una postal qu’asoleya Tou Coleición de cuando entovía nun furrulaba esi establecimientu ya aína una entruga asaltara’l mio maxín: ¿Marcharía yá colos monxos el guah.e que s’afitaba sobro’l pedestal falando col paisanu que montaba'l pollín?

Petricor

¿Nun conoces petricor?,

mira pal terrén ensucho,

güel cuando llueve’l golor

qu’aventa’l golor a cuchu.

Que nun ye golor, ye arume

de lluvia fresco que caye,

qu’aporta dende la cume

ya esbanda’l dolor pel valle.

Arume que vien del monte

de romeru ya abeyera,

qu’asela al paisanu’l pronte,

que trai tastu a primavera.

Sofitu del nuesu verde,

esencia de la to tierra,

recuerdu pal que recuerde,

caxellu de miel en cuerra.

Alcordanza del corral,

talamente de la güerta,

qu’arrequexa enforma’l mal

sol verdín de la cubierta.

Refugu del soleyeru,

desaniciu de l’andancia,

afalagu gayasperu,

gloria que la ñube escancia.

Golor nidiu a mugorizu.

De lloría, la color.

La xinesta ya’l gorbizu

afayen col petricor.

N'otra realidá

     Nuevamente m’alcontraba na mio casa materna. Nuevamente repetíase aquella realidá. De nuevu decatéme de que m’atopaba na so sala cuantayá de tornar les llaves al caseru. De nuevu, l’escenariu abultábaseme estravagante. Foi entós cuando cavilgué en que les llaves fueren entregaes porque la mio madre finara. Nesi momentu asaltóme la esmoledera dulda, ¿taría suañando? Non, nun podía ser cuidao que tou yera dafechu real; sicasí, pa comprobalu, traté de desamarrar d'aquella situación como'l que quier sotripar dalguna triba d'atadura física solmenando la cabeza ya’l propiu llombu. De sópitu, apaeció la mio ma y al instante reparé en qu'entá nun frayara’l cadril, episodiu que constituyó l'empiezu de la so alloriante llaceria. Alcuérdome de que de siguío tatarexé una entruga incompleta: “¿ma, entá nun te rompisti…?” Ella, pal mio plasmu, asintió ya aína cayí na cuenta de que n'otru contestu yá morriera. Darréu, la mio proxenitora entamó a esmucir de la que yo esconsoñaba d’esa otra realidá. Medité sobre'l que si esi espertar nun fuera tan inmediatu de xuru que lo narrao nun se caltuviera na mio memoria. Arriendes, al rodiu de la mio aporfiadora visita al mio antiguu llar −zarráu dende va faer una década− al alcuentru cola mio madre. Tamién escurrí al respeutu de si nun sería esa la verdadera realidá o si quiciabes tou nun sedrá más qu’una pura engañifa...

¡Féliz Año de la Rata!

Feliz Añu de la Rata

al que roba ya’l que quema,

al qu’abusa ya’l que mata,

ya’l que tantos odios sema.

A aquel que vive del cuentu,

al Fomentu la Variante,

al que camuda col vientu,

al traidor ya’l repunante.

Al radical de los cabos

que nos busca otra amarraza,

a quien impón dende Davos,

al qu’arruina ya amenaza.

Al que’l mundiu contamina,

al qu’esparde les borrafes,

al qu’escuende na borrina,

a los necios y piltrafes.

Al manguán, al xantaxeru

que siempre saca procuru

a costa del compañeru,

iguando un futuru escuru.

Al que l’arma na so tierra,

que nos suyos nun pescuda,

colando cuando la guerra,

viviendo equí de l’ayuda.

Al qu’en pescuezu echa’l cable

mangando tases na Plata

ya a la brigada antibable,

feliz Añu de la Rata.

De colores

(Semeya, Javi Martínez)

De colores, de colores se visten los bancos pela primavera.

De colores, de colores son los paxarucos de la Escandalera.

De colores, de colores ye l’arcu la vieya del cielu uvieín.

Y por eso los grandes amores de munchos colores me gusten a min. (bis)

De colores, de colores brillosos y guapos vístise l'aurora.

De colores, de colores son los mil reflexos qu’Uviéu atesora.

De colores, de colores vístise la ñube que vemos fuxir

Y por eso vemos eses ñubes de munchu colores cuando va escurir. (bis)

De colores, de colores voten los paisanos peles eleiciones.

De colores, de colores xuren los sos cargos ante los borbones.

De colores, de colores son tolos partíos que vemos gruñir.

Y por eso vemos diputaos de tantos colores que van esmucir. (bis)

El planeta los gochos

     

     Hai cuantayá que lu venía alvirtiendo: la tolerancia pa colos pirómanos va desendolcar en que morramos toos afogaos. Güei’l fueu arrasa Australia, como ayeri afaró Brasil y como de contino, Asturies. Si los qu’aneciaron n’Oceanía tuvieren ente rexes nun morrieren anguaño cientos de millones de seres vivos. La quema de la viesca debe de ser considerada como un crime de lesa humanidá por pura razón de sobrevivencia. D’otra miente, el planeta los simios aforfuga por culpa de que los gochos ensin procuru son mayoría. Arriendes, habrá venti años que los ecoloxistes avisaben n’Europa de los riesgos de la sobrepoblación; agora, con al rodio de mil quinientos millones más d’habitantes, paez que nun los hai. Se conoz que los de los otros continentes más fecundos nun cuenten pa ellos y callen miserablemente mentanto se favorez una crecedera esponencial. El mundiu se mueve por intereses y dexará de facelu por aciu d’ellos. El ser humanu ye tan neciu que se dirixe al so propiu desaniciu. Nun intentar poner torga a esa fechoría te convierte en cómpliz d'esa llaceria.

Nuevos

Mozos, yéramos tan mozos,

soñábemos pero ensin galbana,

y fue esa la razón de los gozos

na mio vida, esi suañu ensin medrana.

Los mozos quieren siempre amar,

los mozos busquen l'amistá

y a la fin son de la vida'l llugar

que yo escueyo porque aporta la verdá.

Relluma nos tos güeyos la felicidá

de veme equí a la vera ti,

qu'allegría siento en mi.

Nuevos, somos entá nuevos,

el tiempu posa ensin remor

y son besos y alcordances cebos,

gabitos que caltienen esi amor.

Relluma nos tos güeyos la felicidá

de veme equí, a la vera ti,

qu'allegría siento en mi.

Mozos, somos entá nuevos,

el tiempu sigue ensin pasar

y son renombrances de mancebos

les qu’anecien el ciñu a sofitar.