Analis

 

Resultaos DE LLABORATORIU                                                                            Analis del sangre

Estraición: 31.5.2021 

Paciente: Xosé Rodríguez Pérez (Pindesierra)

 

N    Arume concentráu                                          6,07

N    Emulxentes                                                     E-471

N    Destrosa                                                          2,1

N    Estabilizante                                                   E-412

N    Enzimes                                                         21 mg

N    Gasificante                                                     E-500

P+  Sidrófilos                                                        50/dl

N    Colorantes                                                      Annato 16.0 U/ml

N     Acidulantes                                                   4.3 mg/dl

N     Ciclamatu sódicu                                          9.6 mg/dl

N     Antiferruñosu                                                E-300

N     Conservador                                                  E-202

N     Edulcorante                                                   E-950

N     Ácidu cítricu                                                 1,20 %

P+   Sulfitu cangués                                              37 mg/dl

P+   Plaquetas                                                       231 con microplásticos

P+   Bilirrubina                                                    2,6 cuando te miro y nun me mires

P+   Fierro                                                           14 ug/dl (abondo baxo)

N     Peneráu Glomerular estimáu                       > 60 ml/min.

P+   SO2                                                             40 mcg

P+   NO                                                              80 mcg

P+   CO2                                                            980 ppms

 

 

(Pa consultar col so mélicu de cabecera aguarde unos meses a que descolinguemos el teléfanu nel so centru de salú)

Los Trenes De Tozeur (Spanish Version / Remastered)

 

  

Nos pueblos de la llende miren entá'l pasu los trenes

peles rutes ermes ensin pabia.

Dende un vieyu corredor la to madre ve si vienes

y alcuérdase de min escardando la so rabia.

Y nel intre torna'l mio pruyimientu de la edá

a aquella velocidá.

 

Güei circulen más adulces los trenes de Pravia.

 

Xunto a ilesies vacíes yá valtaron los ablugos

de trenes qu’acarretaben carbón pente conceyos.

Dende mines escaecíes, escombreres y refugos

cola alcordanza de mio, pura vieyura de vieyos.  

Y nel intre torna'l mio pruyimientu pola edá

a tala velocidá.

 

Circulen tovía más adulces los trenes de Pravia,

cuasi tan lentos como ese Nalón que los agravia.

ÚN DE GRAO - Quítate Neña - Ún de Grao (2016)

A los árboles altos llévalos l’aire,

a la moza que quiero llevóla un flaire.

Hai que tener curiáu colos amores,

porque dacuando muerres de los fervores.

 

Quitate neña de la ventana,

que si nun te retires, neña guapina,

xubiré pela yedra de l’antoxana

y bien seguru qu’urnia la to vecina.

 

Quitate neña del corredor,

nun fienda la baranda, m’entra’l remor.

Nun quiero que te vayas sin que me lleves,

nin que me dexes solu si entá te quedes.

 

A los árboles altos ximielga’l vientu,

a la moza que quiero nin la podrella,

que’l flaire bendixera yá’l casamientu,

y si daquién s’arima chinco−y la oreya.

 

¡Andamos aviaos!

 Hai diez díes que tuviéremos na incineración de la madre de Taresa, una paisana de Trasmonte que morriera tres algamar el sieglu de vida. Dempués falé cola fía per teléfanu y cuntóme qu’andaba alloriada pola montonera xente cola que se crucia pela cai que nun llanta la mazcarita. De resultes, fai lu que yo: sal pa la calzada davezu col envís de torgar tantu pabardu. Foi’l casu que finaben de reprendela los municipales pa que caleyara pela cera. Enantes d’acatar la orde−yos retrucó que porqué nun reñíen tamién a los que nun tapaben el focicu cola mascarita. Aína, l’axente−y aldericó: “¡Cómo tuviéramos que llamar l’atención a tolos que nun la ponen…!” Ello fixérame recordar cuando di parte nun par de centros d’esa policía, a traviés del corréu eleutrónicu, de la renta illegal de cuartos nel pisu d’enriba mientres el zarru (confinamiento), que nun foron nin siquiera a contéstame. ¡Andamos aviaos!

Despreciu pola Variante

 

Casi dos décadas de retrasos en la Variante de Pajares, por los elementos y los hombres

Desde la puesta de la primera piedra en el año 2004 diversos gobiernos de colores distintos han ido postergando la apertura de los túneles (La Voz de Asturias)

     Alemaña ya Austria torgan el pasu a los británicos por culpa del espoxigue de la variante india. Esos mesmos ciudadanos puen entrar dende’l pasáu llunes día 24 en España, ensin presentar siquier les resultancies d'una prueba PCR, por aciu de qu’hai bien d’años qu’equí andamos avezaos a que se desprecie la Variante.

Sobro dellos comentarios nel Fesbuc

 

Finaron con bien de vezos, Marcial, pero enxamás van ser esqueicíos mientras los recordemos. Llegaríemos enantes de les postales, Blanca; sicasí, bien d’ellas se caltienen nel tiempu. Siempres vas tener esa coleición nel cantu la memoria, Berta. Desaniciaron el corréu, les cartes, les propies postales… Robáronnos fasta los mesmos sellos, magar que nun van ser quien a torganos de suañar, Marga. Nesa caxa remanez la maxa y les alcordances d’otra dómina que nun va desapaecer mentanto vivas, Ninfa. Tienes que recuperala, Alicia, ye parte del to país de les maravíes. Camudánonlas pol aborrecible “guasap” −que nun tien guasa nenguna−, anque nun van terminar con nós, hermanina Ángeles. Munchas gracias, Mili y muitas gracias, Josefina. Pa remate voi asoleyar otra partida d’eses ayalgues, qu’acorico nun llugar secretu mui bien cerca del mio maxín, pa fadiar entá más a los que quieren acabar coles bones costumes y qu'arriendes perdamos l’aldu.

Un candial abrazu pa toos, amigos.

 

La coleición de postales

 

Tanto tienes,

tanto vales,

canta onde te detienes,

la coleición de postales

 

¿Ye presente?

non, pasáu,

magar caltiénse llatente,

neses estampes, posáu.

 

L’alcordanza

te tresllada

a aquel tiempu, n’alloñanza,

n'otra vida yá pasada.

 

Hai dalgunes

que te fienden,

espeten como les brunes,

mientres que los años llenden.

 

Familiares

que colaron,

dellos montes y llugares,

mocines que nos amaron.

 

Con respetu,

ta perclaru,

porque al amor poníen vetu

y el pecáu salía mui caru.

 

Nun requexu

s’acoriquen

recuerdos, papel encesu,

que t’allegren o enfociquen.

 

Güei ñublará

los de Xelu,

l’andanciu lu soterrara,

cunten que xubió pal cielu.

 

Tanto tienes,

tanto vales,

histories que nun son bienes,

son coleición de postales.

 

La Variante pega'l "cante"

 ¡Los túneles ferroviarios de Guadarrama tienen un llargor de 28,4 km y tardaron namái que 32 meses en llantar el ramu!

Muncha xente se figura

 que la copla ye mui vieya,

mientres dura la fartura,

nada siente na so oreya,

pero cuidao que lo vivo

voi finar coles pamplines

ya esi espiatoriu chivu

qu’allugaron yá nel Ginness,

y por nun llorar me río

 cuando diz doña Anxelines

que’l cantar ta escaecío.

 

Anda y vete col to cuentu

 de que se perdiera’l cante,

yo lo siento a pasu lentu,

más lentu que la Variante.

Enredaron el duviellu

col retrasu y el cairel,

ye como’l cantu un cuquiellu

de querer y nun poder.

Hai pelgares ensin tientu

nesa copla tan cafiante

d’otru mal procedimientu,

conque vete yá col cuentu,

col cuentu de la Variante.

 

Enredaron el duviellu

col retrasu y el cairel,

ye como’l cantu un cuquiellu

d'un AVE que va al Musel.

Hai pelgares ensin tientu

nesa copla tan cafiante

d’otru mal entendimientu,

conque vete yá col cuentu,

el cuentu de la Variante.

Corazón de tango. Dr. Deseo - Euskadiko Orkestra - Fernando Velázquez

 

Tuvisti que dicime adiós,

cais fundíes so pies de magüetos,

pa echate en falta hasta la muerte

y yo baillando al ritmu de los mios zapatos prietos,

como veleta al vientu fuerte.

Corazón de tangu, tengo'l cuerpu de xota y soi

un aprendiz d’estrañu,

qu’en brazos de la soledá, toi

vendiendo l’alma al diañu

ya equí tu y yo brindando entá, ¡rediós!

Vamos engañanos y dime’l mio cielu qu'esto va durar siempres.

Perdeme nos tos brazos, duce llocura,

tu, la mio droga más dura.

Vamos engañanos y dime’l mio cielu qu'esto va durar siempres.

Perdeme nos tos brazos, duce llocura,

tu, la mio droga más dura.

Corazón de tangu, tengo'l cuerpu de xota y soi

un aprendiz d’estrañu,

qu’en brazos de la soledá, toi

vendiendo l’alma al diañu

ya equí tu y yo brindando entá, ¡rediós!

Vamos engañanos y dime’l mio cielu…

El Día de la Madre

  

Nun nos valió que Galeríes Preciaos camudara’l Día de la Madre al mes de mayu aportiando vezos foriatos. Pa nós caltiénse nesi 8 d’avientu, afitáu en 1854, nel qu’axuntábemos tola familia, festexando arriendes el so santu y el so cumpleaños. Esta foi la primera estampa que−y dediqué esi día del añu 1959, con 6 años cumplíos, col que foi bien seguru tamién el mio primer mal encople. ¡Enxamás t’escaeceré, mamina, seya’l día que seya!

Cróniques del Kepler

 

Fino de tornar a la nuesa realidá virtual dende’l Kepler-186f, onde pasara unos díes, a traviés d’un furacu de cocu. Nun vayáis cavilgar que pa los humanos ello seya tan abegosu pola mor de que pa munchos treslladase o portase como un guxán ye bramente cenciellu. Foi’l casu que los keplerinos andaben camentando que delles besties asesinaren a dos periodistes españoles que denunciaben a otres besties de la mesma triba que coles mesmes mataben a otros inocentes animales terrícoles nel África africana. Ablúca−yos a estos planetarios foranos que los que cunten na nuesa tierra que son más civilizaos seyan los más burros y los más inorantes, cuidao que nun son nin siquier a considerar l’elemental drechu a la vida que tamién tienen los nuesos vecinos más febles.

Un país

 

Sé d’un país au la casería valta,

sé d’un país au tamién cayera l’horru,

sé d’un país onde yá’l paisanu falta,

sé d’un país qu’arriquez al más ceporru.

 

Aquel reinu onde reina la desidia,

un principáu que perdiera los principios,

un paraísu al qu’empuerquen la piel nidia

ya escaecen los pabardos nos sos ripios.

 

Ellí onde amburen montes y animales,

onde remanez pa siempres el cartuchu

sobro vallines con centros comerciales

que foron camudando en borrafa’l cuchu.

 

Onde’l fumu foi algamando a la nublina

pente’l que’l foriatu escapa col nuesu oru,

quien terrén, ríu y regatu contamina,

mientres que l'aldeanu se−y abulta xoru.

Au coles variantes tómennos el pelo

ya una llingua milenaria nun esiste,

mentanto que t’afalaguen: Lelo, lelo…,

los páxaros que mazcayen tol alpiste.

 

Esi país qu’hai cuantayá que desanicia,

un país nel que se merca’l so silenciu,

un país nel qu’espoxiga l’avaricia

y el xacíu va eslliendo nel vertenciu.

 

El fíu de Xuacu

 Hai bien de paisanos a los qu’esto del andanciu nun−yos pintó nada mal. Mesmamente’l mio collaciu Xuacu, que nun ve a la moza dende hai más d’un añu por culpa’l zarru perimetral, tuvo de recién un fíu con ella por teleconferencia. Pa remate, un vecín d’ella (amigu íntimu de dambos) que ye xinete de carreres −según unos− o especialista en monta −según otros−, −yos va a pagar la convidada’l bautizu. ¡Munches felicidaes, Xuacu!

Efeméride

 

Caldía ye’l día d’una patochada que nos llanten; por embargu, güei paez que nun ye’l día de nenguna fatada. Diba a asoleyar esti poema, cuando aína cayí na cuenta que la repunante efeméride podría ser la del 47º cabudañu del mio pá; sicasí, nun voi recular…

 

Nel cortexu del entierru,

que ye un cortexu diariu,

sientes lloros, dalgún berru

y cualesquier comentariu.

 

El muertu siempre foi bonu,

menos cuando taba vivu,

tenía un caráuter tronu,

cafiante y mui impulsivu.

 

Fálase de tou un pocu,

más que falar se marmulla:

aquel paisanu ta llocu,

siempre ta metiendo bulla.

 

Se pregunta poles vaques,

si semasti yá los ayos,

si sacasti les pataques,

si rozasti los escayos.

 

Polo que saques de renta,

pola vecina d’al llau.

Fálase más de la cuenta,

toos menos el fináu.

 

Se para de dar pel sacu,

¡yá valió, cago en mi mantu!,

baxa la caxa al furacu,

dientro ensin movese’l santu.

 

Yá reza’l responsu’l cura,

col feligrés soterrañu:

esta vida ye mui dura,

¡Dios nos llibre del diañu!

 

Repítese ansí la historia,

mientres el muertu t’alvierte,

na gloria pela memoria,

morrer ye cuestión de suerte.

 

Pal to guah.e, pa la neña,

asoleyo la mio obra,

pal paisanu, pa la peña,

d’un poeta que nun cobra.

 

Para'l bien intencionáu,

pal que calca nel me gusta,

pal que caltiénse al mio llau,

pa quien s’amarra na xusta.

 

Pal que ta siempre a la chisba,

magar que nun dexa buelga,

pero que torna a la tisba,

pa esi colingáu que cuelga.

 

Pal que vive mermurando,

pal que sabe lo qu’inora,

pal d'unu ya otru bandu,

pal que nun da nin la hora.

 

Pal qu’afaya nel puestín,

pal impostor de la tele,

qu’a midida celemín

anda chapurriando sele.

 

Pal que reburdia na prensa,

bramando nos comentarios,

pal qu’anecia cola ofiensa

por intereses sectarios.

 

Pal Feisbuc y l'antibable

de la cai de l’Amargura,

qu’enxamás echan un cable

y refuguen la cultura.