La suerte de vivir

Los cuentos siempres finen bien, la vida ye la que siempre acaba mal (Pachín Mulleiroso).

     Falamos d’alcordances, murnies y penes; sicasí, tuvi bien d’años allegándome a hospitales ya asilos d’asistíos y de resultes llegué a albidrar que ye una suerte a cencielles el caltenese vivu nunes condiciones mínimes de salú. El cuentu del videu, en dos capítulos, nos fala d’una residencia na que los internos nun precisan de sofitu. El mozu –como siempres–  ye nuevu, guapu y bonu; arriendes, ye’l guionista ya amás, un ánxel. Los demás actores van sacando provechu de lu que diz y fai. Quiciabes a dalguno de nós–y seya a aportar tamién daqué. Por cierto, al probe protagonista paez que de nada–y valió andechar nuna bonanza d’aniciu nin na casa d’una pradería dempués, yá qu’un despiadáu cáncanu–y empobinó d’asetío a esi camín escontra’l cielu. Sei bonos, pero si daquién vos chinga de contino, defendevos.

El mio pasáu

     El mio pasáu güel a pan nel fornu, pote de berces, papes ya segáu. Malapenes se ve tres la povisa de los mesmos caminos, una cafiante velea y la borrina d'unes llárimes yá ensuches. Siéntolu nel cantar etereu del carru’l país, nel dexe sele d’una llingua qu’abocana, el ruxerrux de la mayadora ya’l bramar de les vaques. Tien tastu de murnia, alverbiu de tiempu y sidra de barrica, ya afuega de señaldá polos que se fueron. El so tautu ye nidiu d’agua puro de ríu, cara de rapacina, casa esbarrumbada y mantega qu’esmuz al querela apalpar. El pasáu queda amestáu al to maxín y pue remanecer tan fadiosu que seya a esmucir la curtia realidá del to presente. Por culpa d’ello, nun escaezas el to pasáu, pero cúriate d’él.

Aguilanderos

     Pa conocimientu de la xente en xeneral y del mio apreciáu amigu Xosé Antón en particular, por si–y fuera a aportar dalguna novedá:

     Nel añu 1924, el boletín del Centru d’Estudios Asturianos asoleyaba un escritu de D. Faustu Vigil sobre costumes asturianes onde falaba de los “aguilenderos” de Quirós –aguilandeiros en Grau– como personaxes qu’axunten en comparses col envís de pidir l’aguilandu los díes de Navidá y Reis. Estos comediantes y los sos respeutivos papeles yeren los que se citen darréu, según lleí:

·      EL BLANCÓN. Yera’l de más altor de toos y s’allugaba delantre. Vistía chaqueta o blusa blanca, pantalón de la mesma color, enagua de muyer, polaines de pañu ñegru y, na cabeza, un cucuruchu de papel o cartón y mázcara, d’igual miente prietos. Trayía una escoba de rama de xardón.

·       EL MARAGATU. Amarutaba de tala usanza ya empuñaba una vara llarga pa separtar a los mozos.

·      L’AFILADOR. Gastaba un traxe cualquiera, pero con zahones. Remanaba por navaya una quexada de burru qu’asonsañaba afilar sobre otra quexada, tamién de pollín. Cola primera afeitaba a tolos aguilanderos que diben con barba. Davezu, s’allugaba a la vera d’una charca y, dempués qu'atropaba abondos espectadores, daba blincos nel agua chiscando a los fisgones.

·     EL MÉLICU. D’aspeutu curiosu, bien vistíu, con sombreru de copa, bastón y polaines de cueru. Curaba a los aguilanderos qu'exercíen de vieya, filadora ya escardona.

·     EL BOTICARIU. Nun tan repolludu como’l mélicu. Acarretaba una cartera con melecines ya una escomunal llavativa.

·      LES DAMES. Yeren un par de paisanos amarutaos de muyer col so traxe del país.

·    LOS GALANES. Otros dos homes con bon traxe de calzón y montera que baillaben coles dames.

·     EL DIABLU. Amosaba cuernos, rau de cabra y llargos bigotes. Bramaba ya espantaba a les moces.

·       CENICEROS. Diben con un barquín o un sacu de pelleyu pa guardar la ceniza qu'espardíen sobre la xente. Enfotábense coles moces más fines.

·     LA FILADORA. Vieya que portaba una rueca cola que filaba llana. De xemes en cuando, simulaba ponese mala pa que l’atendiera’l mélicu ya’l boticariu.

·   LA ESCARDONA. Compañera de la filadora y tan vieya como ella. Cardaba la llana qu’emplegaba la otra. Dambes llucíen dos talos collares de conches de cascoxu en pescuezu.

·     EL RECAUDADOR. Facía de pinxón. Recoyía los aguilandos, que consistíen sobre manera en nueces, ablanes, carne salao, embutíos y perres.

     Completaben la comparsa dellos magüetos con traxes diversos, mal curiosos y de peor gustu.

    El domingu siguiente a Reis axuntábense pa consumir lu recaldáu, supliendo a escote lo qu’echaben en falta. Dempués de comer y de beber se cantaba y baillaba, enfilándose más d’un.

El topu de Villarejo de Salvanés

     El topu de Villarejo de Salvanés ye una soespecie endémica de la faza central y s’alcuentra en mayor peligru d’estinción que'l topu ibéricu (Talpa occidentalis). Tien vida solitaria y soterraña, y coles sos garres construyi galeríes que ventilen el terrén, polo que pa della xente ye beneficiosu; por embargo, pue ser dañible pa campos de llabor, güertos y dalgunes conducciones. Emite un gorgolitu nidiu, ye abegosu de localizar y pue pasar una montonera tiempu ensin salir a la superficie. Nos sos ñeros abonden les pulgues ya ácaros. Clasificáu dientro la orde de los insectívoros, ye mui fartón y tien como alimentu básicu a los merucos, completando la so dieta con llimiagos, pequeños rucadores, anfibios y materia vexetal, arriendes de toa triba d’inseutos que ye a afayar pelos fondos reservaos.

Gotes

¡Norabona, doña Ida, pol premiu, pola so poesía y polos sos conocíos! Darréu, voi asoleyar la mio versión de Gotes n’asturianu.

¿Manquen cuando esporpollen y se funden?

Acaben de dexar de ser la lluvia.

Enrieden nun recréu que confunden,

son gatinos d'un reinu qu’entá dubia,

 cuerren llibres per vidriu y per barandes,

estragales del llimbu ya abalorios,

síguense, pue qu’escuerren mientres andes,

diendo de soledá a los casorios,

p'amestase ya amase na so suerte.

Refugando en silenciu la so muerte.

L'osu Balmonte

Nun van consiguir que calle,

nin la noticia ye falsa,

que s’allegó un osu a El Valle

y bañara na so balsa.

Por acio de la llavaza

 ya'l so componente activu,

alluma güei pela faza,

esi osu radioactivu.

Illuminando la vega

ya’l regueru’l Regueral,

de la que llegó a Bixega,

tornó’l probe a Ferredal.

Sintiendo nun poder más

porque–y faltaba aliendu,

algamara al fin Boinás,

nesi paraxe d’arriendu.

Nun viera per nengún llau
nin rastru del Arroxón,

sí’l Cauxa col arramáu

de la contaminación.

¡Qué burlla de paraísu,

que–y vienden al turista!,

espotrexaba ensin rixu

polo que tenía a la vista.

Naide cuente que ye trola,

qu’esi osu de Balmonte,

da lluz como una farola

nesa llaceria de monte.

Va a ser en Cangas mañana

y pasáu será n’Ayande,

esfardanen la quintana

ensin torga y a lo grande.

TAMIÉN DE LLABORATORIU

(Nel 20 de güei)

     ¿El castellán tamién ye inventáu?, ¿el castellán ye de llaboratoriu? Les pallabres nueves d’esa llingua –como podéis escuclar NA SEMEYA– ígüense talamente como toles qu’amiesta l’asturianu; mentanto, les brigaes antibable nun reburdien un vierbu. Mientres DEPRIENDEN a la so inorancia, coles mesmes, aguardemos agora a qu’estos arrenegaos seyan a manifestase escontra la oficialidá del castellán.

Fábules

Páxaros en xaules,

molinos eólicos,

escolinos n’aules,

malures y cólicos.

Llobos que faen mal,

pero taben antes;

hai na capital,

lleven blancos guantes.

Globalización,

efeutu llamada,

sobrepoblación,

¿yá nun pasa nada?

Nesti día a día

col ecoloxista,

sobra hipocresía,

¿garrarais la pista?

Les bolses cobraes

yá nun contaminen,

¿ye cosa del Faes?,

¿col plásticu finen?

Que baxa’l petroleu

del día a la nueche,

xuben el gasoleu,

tu a vender el coche.

¿Por qué lu ofrecieron,

si l’aire engochaba?,

los probes perdieron

y l’Estáu ganaba.

Toos son engaños,

como’l cuentu l’AVE,

tres cuasi vente años,

yá d’él naide sabe.

El maletu

        

     Ayeri tornaron a llantanos na televisión “Frenético” d'Harrison Ford, que yá la proyeutaron milenta veces. Foi’l casu que, como andaba’l mio fíu folgando per casa ya–y presta ver dalguna película conmigo, volviéramos a vela. Arriendes, nun quixo camudar de canal pa reparar nos filmes qu'aportaben n’otros porque m’espetó que cuando asoleyen cualesquier escena gocha póngome balmesianu dafechu. Sicasí, esto vien a cuentu namái pa que tengáis munchu curiáu colos vuesos maletos. Sí, yá sé que nós nun carecemos esi problema por culpa que l’aeropuertu ta quedando ensin vuelos, l’AVE y la so variante nun furrulen nin tien pinta de que vayan a furrular y pa trespandar per Payares acarretámoslos nós por causa de tanta avería, pero vos lo digo por si salís a otra comunidá onde l’Alministración mire más pola so xente.

Episodios internacionales

   (Veteranos d’aquelles amarraces, dellos

años dempués; a manzorga, la Casa Corea)

     Malapenes ensin decatame pasáramos de los episodios nacionales a los internacionales. Nun–yos bastara cola Casa Corea, sinón qu’arriendes llevantaron escontra otru edificiu de gran altor, al que tamién s’allegaron los yanquis. Daquella, nun sé quien diera la orde de treslláu, namái m’alcuerdo que nun tris me viera engaramáu nuna pilastra del patiu eleváu traseru d’aquella casa agarráu a los fierros que sobresalíen en forma de cayáu aguardando al nuevu enemigu. De la qu’asoleyaron media dolcena de roxos y fariñentos rapazos, una ñube de morrillos salió proyeutada dende les nueses posiciones. Al ser un conflictu colos estaos de la Unión, la policía cuasi que llegó enantes que’l Séptimu de Caballería prindando a un par de guah.es de los que teníen les pates más curties, lu que nun torgó’l qu’aneciáremos al día siguiente col asaltu. Pa entós, los estauxunienses yá nos aguardaben nuna escondita y pudi comprobar con alliviu que les sos armes nun yeren más sofisticaes que les nueses, cuidao que la fendedura na mio cabeza sangraba de la mesma manera. Lo peor del casu yera apaecer per casa otra vegada frayáu, yá que la mio ma –que davezu daba estopa enantes de remediar la sangrina– paecía asitiase del llau de los foriatos.

60 años y milenta canes dempués

     Les nueses vieyes cases en renta dixebraben de les Cases Nueves per un resbalizu desbentíu de sable prieto y per un regatu ensuchu qu’al llover acarretaba agües del cielu de la faza coles que llevantábemos un escomunal banzáu. En realidá, aquella colonia la cristianaron como de la Virxe de les Victories poles que s’algamaron escontra los marroquinos; de les derrotes, naide festexaba nada. Nella, vivíen families de policíes armaos y xentes amestaes al antiguu réxime. Alcuérdome como escuclamos dende enriba los cuetos como sacaben la caxa d’un home que dicíen perteneciera a la Xunta de la Ofensiva Nacional Sindicalista, qu'abondo sabíamos nós que coime yera eso. La mentada llinde escurría dende la fonte afitada na cruz con Rosa de Silva, que se caltuviera ellí bien d’años, fasta la xuntura con San Felipe. Nós, dende l'altor, gociábamos –talamente como en Cuadonga– d'una posición privilexada pa llanzar morrillos a los invasores; por embargu, estos cuntaben cola bien valoratible aida d'un vixilante plenipotenciariu qu'en casu d'apuru chivaba l'apiertu a la entóncenes gris policía. Si la so brigada aportaba, la nuesa escorribanda yera xeneralizada. A pocu qu'escuchéis con un plizcu de procuru, sol asfaltu de la güei afamada cai de la Infanta Mercedes de Madrid, vais sentir los glayíos d'aquelles emponderaes trifulques.

Un tiempu que resalvamos

(Que seya a perdoname l’amu por garra–y la semeya de les Cases Nueves, yá que nós nun teníamos cámara daquella)

     Yera un tiempu de tardes qu’espurríen a rollones sobro los bombardiaos escampleros, de programes dobles nel ranciu cine del barriu, d'infinitos xuegos d’escurrimientu y de cai; de llimes, chaples y banzones, d’amarraces colos foriatos de les Cases Nueves, d’escursiones fasta la llinde’l mundiu na mesma raya de la barriada. Foi una dómina de pan con chicolate, de pastilles de lleche de pollina, de partíos de pelota con pantalones arremendaos, de semeyes de la cámara del pá de Bertu –el de la falanxe– que camudaba a blancu y ñegru una realidá yá abondo escolorida. Foron unos años nos qu’escaecíes davezu los llibros mientres qu’escribíes la to propia y doliente historia pente una montonera refugayos. Malapenes trescurriera una ventena d’años d’una guerra de la qu’enxamás te falaben, magar qu'una afogadiza murnia se caltenía nel ambiente y s’ablayaba uniformada sobre nós; sicasí, naide foi quien a llevanos les alcordances d’aquel escuru tiempu que resalvamos.

¡Canta Lita!

¡Canta, Lita!, ¡Lita Canta!

que–y prestaría al to güelu

sentir de la to garganta

esi afalagu del cielu.

Debaxo un rebollu curcu,

como l’arbolín del cerru,

va a ser a escuchalu’l Turcu,

nesi airín qu’espurre’l sierru.

Que si vió cantar al vientu

baxo un desmayu llorón,

te va a ver a ti al momentu

ya allegrará’l corazón.

Nun digas perdón o adiós

ya endúlzanos la mañana,

col café de caricós,

al son de la Resolana.

Aportanos la bayura

de la to voz tan candial,

namái t’ufierto tenrura

y delles flores d’urcial.

Tando amestaos nel cantar,

naide francerá l’enclín,

nin dixebranos la mar,

que te va emponderar Pin.

¡Lita Canta!, ¡Canta Lita!,

si la to voz s’espardiera,

el ciñu a La Cumparsita,

Gardel, quiciás lu perdiera.

Racismu

    

    Lu de Ryanair nun ye un casu aisláu. Tolos díes hai xente que sufre ataques xenófobos. Abúltaseme qu’esti otru episodiu asocediera’l mesmu día nel metru de Madrid. La persona de la semeya s’afayaba mediu tumbada nun asientu coles botes y los calcetos quitaos. Nel vagón golía talamente como nuna cubil de gochos. Munchos entamaron a reburdiar col remate del tan cacarexáu: “Tenemos lu que nos merecemos”. ¿Ye refugu, defensa de lo propiu o racismu? L’antoxana de los caxeros de les entidaes bancaries, los bancos públicos, les entraes de los comercios y portales, arriendes de cualesquier requexu al abellugu, entamen a alcontrase enfarxopetaos. N’Africa, magar que baxara l’índiz de natalidá, cada muyer traye al mundiu de media a 4,5 neños y d’esta miente nun van poder torgar el doblar la so población d'equí a 2050 (https://umoya.org/2017/12/04/el-descenso-de-la-fecundidad-en-africa-es-mas-lento-de-lo-esperado/). ¿Tendrán tamién los proxenitores dalguna culpa? 

Contracita

  “Nun hai peor perru qu’aquel que manca a los perros” (Kan Perrault).  

Sí, Ángeles, Omar Faisán bien podría ser Omar Khayyám o cualesquier otru –¡cómo lo sabes!–. Al rodiu d’ello, esclariar qu’hai una montonera recursos colos qu’arriquecer la espresión escrita y dellos más que se podríen albidrar –yo toi nello–. Tamién hai sentencies llatines, dichos históricos, encoples célebres, máximes xurídiques… y no que toca a esta esplicación: cites. Les cites tamién arriquecen el conteníu de la obra o del discursu y dacuando en vez agabiten pa ilustrar meyor les idees; magar qu’haya dalgunos enchipaos que davezu abusen d’eses cites cuando tienen pocu que dicir. Escontra tal enclín escurrí “la contracita” cola qu’asoleyo una cita que m'invento y l’atribuyo a un autor que nun esiste: namái un plizcu de comedia nel sen opuestu a la “ostentación” lliteraria.