Mortal

(Paticas.es)

Dicen que tien el pulpu

tres corazones,

la lladrona que culpo

nin tien perdones.

Cuenten que tienen, neña,

el sangre añil,

muerren contra la peña,

yo, nel cantil.

Que la so hemoglobina

ye rica en fierro,

como’l to xeitu, nina,

yo por ti berro.

Pémeque esi moluscu

ye un escapista,

a ella, cuando la busco,

se me despista.

Paez qu’una cierta triba

seique asonsaña,

la que ye la mio vida

davezu engaña.

Anque dacuando anecie,

nada me val,

como dalguna especie,

pue ser mortal.

Si, como’l pulpu, fueres

intelixente,

me quedríes daveres,

¡conmigo vente!

A 182 años andaos dende la so nacencia

A les orielles del Sar,

encoplara los pesares,

güei los soi a versionar

a orielles del Manzanares.

Yera bien pacible'l día

y taba templáu l'ambiente,

y, nesi día, llovía

adulces y mansamente;

y mientres que silenciosa

sollutaba yo y ximía,

el mio neñu, tienra rosa,

apigazando morría.

De la fuxó del mundiu, ¡duce aselu na so frente!

Al ve-y yo alloñar, ¡qué umbada xutó na mía!

Tierra sobro'l cadabre que suerba

primero entame a malvase... ¡tierra!

Yá'l fuexu cubrió, ¿aseláis?,

col tarrón al que s'aferra,

verde medrará la yerba.

¿Al rodiu d’estes tumbes que buscáis,

foscu’l vuesu mirar, nubláu'l míu?

¡Nun miréis namái vuelve al poveríu!

Enxamás el que fuelga en sepultura

va fadiar, entá siendo creatura.

¡Xamás! ¿Ye verdá que tou

pa siempres acabará yá?

Nun pue finar lo eterno d’esi mou,

nin pue algamar el fin la inmensidá.

Manspreading

Nun esparnes paisanu nel to asientu,

que nun dexes espaciu pa la dama,

esparde les tos piernes na to cama,

permite a la muyer el movimientu.

Qué tean que riñir ye d’esperpentu,

la llinia de Madrid garra mal fama,

qu’apieguen instrucción, paez de drama

a la xente educao, col encamientu.

Retira’l to chaquetu y la rodiella

qu’invaden l’otru sitiu con descaru

–seya la fema nueva, seya vieya,

seya una mociquina ensin amparu–

ya avera la to bolsa a la to oriella,

magar qu’elles tamién pasen pel aru.

A les tres y media

A les tres y media, en Francia,

de neumonía y de flema,

morrió nesa tarde rancia,

pero nunca'l so poema.

Hai un español que quier,

vivir y otru nun–y dexa,

ente una España d’añer

ya otra España que bocexa.

Españolín nun t’engañes,

curie Dios la to razón,

qu’una de les dos Españes

va xelate’l corazón.

Depriende de la llamera,

qu’ayena al tiempu y la foria,

floria cola primavera,

ensin repetir la hestoria.

A Machado

A Antón Machado nel so, yá, 80 cabudañu.

Pallabra nel tiempu eternu,

pallabra tuya y la mía,

que van salvar del infiernu:

cantar y cuentu, poesía.

Mentanto la piel engurria,

mientres fraya la cadarma,

ye’l versu’l que’l xeitu emburria

y a la muerte la desarma.

Pindesierra

Río Duero, río Duero,

ballesta de verso y Soria,

bañas de Castilla el cuero,

sus alamedas e historia.

Ventanal de San Saturio,

sobre tus aguas rizadas,

donde el bullicio es injurio,

y las palabras, forzadas.

Donde paseó el poeta,

donde el pedregal subía,

donde la dicha es completa

y siempre es excelso el día.

Allí el olmo es el monarca,

entre iglesias y palacios,

tótem ajeno a la parca,

el señor de estos espacios.

Es Soria pura y Numancia,

es el Duero, es el poema,

de quimeras, la alternancia,

tierra de belleza extrema.

Rio Duero, Río Duero,

eres de Soria, una alhaja,

del destino, compañero,

y de esa vida que ultraja.

El farroncu y Valdetroncu

Recibí una invitación,

una invitación en blancu,

llibrando de comisión,

nuna ampliación del bancu.

Soscriba usté les aiciones

que-y arramplarán mañana,

pa engordar dellos golfones

flaquiando–y a teyavana.

Vendiéronme hai nada un coche,

gasoleu últimu modelu,

oxetu güei de reproche,

porque contamina’l cielu.

Magar que creciera’l paru,

necesiten más foriatos

d’esbaratu y con descaru,

anque nun cuadren los datos.

Andaba Pachu feliz,

echara moza n’IFEMA

y nun pue dir a Madrid

pa casar cola so fema.

Ente peaxes y gastos,

el combustible y radares,

van caltenese mui castos,

caún pelos sos llugares.

A Paulín–y morrio’l padre

ya por culpa del impuestu,

embargaron–y la madre,

dexándo–y colo puestu.

Dicen que van a poner

ferrocarril, AVE, a Mieres,

cuando entamen a morrer,

tolos homes y muyeres.

Porque van llantar el ramu,

al tiempu qu’en Valdetroncu,

na ermita’l caberu tramu

y s’apaeza’l farroncu.

Nos siguen tomando’l pelo,

los d’un cabu y los del otru,

mientres s’amarra’l canelu,

anecien corriendo’l potru.

Palíndromo ya acurdión

Palindromo, palindroma,

unu ata, ata unu

coma, puntu, puntu coma,

unu y una d’Unamuno.

Anilina d'anilina,

anilina da cianosis,

vallina, valle, vallina,

alito ellí de la dosis.

Bifronte especial, bifronte,

llámalu tu como quieras,

ye la pallabra una fonte,

como ríu de Xunqueras.

Xuega, xuega tu tamién,

y fai maxa col to versu,

encopla si suena bien,

ya encopla en sentíu inversu.

Ese, exe, solos, sedes,

escribo lo que me peta,

me peta: coses veredes

ya una rosa na escopeta.

Palíndromo, diz un llistu,

técnicu del anagrama,

fixo la lluz con un mistu,

l’apagó y marchó a la cama.

Espetáilu cola forca,

que nun sabe d’ilusión,

que tamién xugaba Lorca

cola fras como acurdión.

Si te gusta, nun me pagues,

si nun te presta, tampoco,

soi muertu fame, yá sabes,

magar que como bien poco.

Xabalinos

(bashny.net)

     Vanse viendo davezu delles semeyes de xabalinos a la vera les vaques. El d’esta foto pue tar maquinando daqué con elles y constituyir un verdaderu peligru pa la nuesa civilización. Por culpa d’ello vos ruego nun fiar de les apariencies ya andar sollertes. Sobre manera los arqueros ya escopeteros, asina como toa triba de peñes armaes. Arriendes, a l’Alministración–y pidiría un plan especial d'ayudes pa camudar los 4x4 por vehículos blindaos. Si nos caltenemos xuníos nada podrán amañar contra nós.  

Nun lu creyéis,

¡cago en mi mantu!,

nada sabéis

del d’Erimantu.

Comía paisanos

y a les muyeres,

a los troyanos

y a los de Mieres.

Si lu diz Pin,

nun ye de risa,

créyelu, nin,

tou va a misa.

Una odisea

     Anguaño, cada día ye’l día de dalgo. Güei ye’l día de la radio. Yá vos falé d’ella otros años, asina qu’esti nun voi aneciar nello. Sí vos voi camentar que de neñu oyía cuentos na vieya radio de madera de casa. Agora, siéntolos na radio y sobre manera na televisión. Cada cadena de televisión te cuenta'l mesmu cuentu, pero a la so manera. Esos cuentos son tan creyibles como puedan ser los de mio, ansí que pa remate vos voi contar unu, tamién a los mios deleres. Titúlase “Una odisea”...

    Ulises Umeru contratara un viaxe a Troya, a traviés d’un mayorista, dexando a la muyer tan enganchada a la Rede qu'enantes de colar tuvieron un teleco.  El cruceru resultó tan enrevesáu que’l tornar foi una verdadera odisea yá qu’echó venti años nello. Foi’l casu que mercara un bolsu de piel marrón pa la so pariente, Penélope, pero nun se lu regaló  por culpa de que la pilló enredando pel Feisbuc con una montonera pretendientes. Arriendes, nun foi quien nin a reconocelu siquiera por causa de que vieno mui gochu. Namái’l so perru, Argos, –al que la Pene tenía arrequexáu con tantu viciu– s’alcordó d’él y por culpa d’ello se diz que’l perru –y nun la muyer– ye’l meyor amigu del home. Enantes de reaniciar la epopeya Ulises–y esgonció l’ordenador, non sin enantes eliminar a tolos amigos de la la so fema chingando–y la propia biografía.

Poema de les 4 la mañana

A les cuatro la mañana,

camudó la mio persona,

ya‘l cuartetu, na so nana,

na velea del Corona.

Siendo les cuatro, especulo,

aneciaba esa velea

–el que quiera que me crea–,

qu’acarreté dende Angulo.

Mientres que pel Albaicín

nel vientu'l recuerdu sople,

con sangre escribe’l mio encople,

que ye al empar: Lorca y Pin.

Esa brisa amorosiega,

con notes d’una romanza,

canta sele l’alcordanza

col son que la vega riega.

Que nun tien caseru o dueñu,

como l’agua Lanxarón,

magar qu’en Pedro Alarcón

fora a torgar el mio sueñu.

Cuando’l tiempu perdió’l ser,

taba Granada ximiendo,

Pin de Sierra componiendo

ya espertando la muyer.

Desanicióse’l preséu,

aventando la mio pena

ya’l tastu de berenxena

que m’aportara’l muséu.

Algamó l’agua l’albada,

fixóme apagar la lluz;

mentanto’l mio versu esmuz,

espardíase en Granada.

Naide valtará en so valle,

nin en toa Andalucía,

mio asturiana poesía,

sacante mio mano calle.

Más finos

     Vivimos col asturianu nuna dómina llingüística na que’l preparáu trata de recuperar ya aporta lo que ye a ello, mientres que l’inorante reburdia escontra él porque lu que nun sintió cavilga que ye un inventu. Nun tiempu y país nos que ye poeta tou aquel al que–y sal de la bragueta. Nun presente nel que camudamos piedra por lladriyu y calma sele por baturizu. Nuna actualidá vocinglera na que se sustituyó’l llibru pol móvil y nun vemos más allá de la nuesa mirada virola. Nunos años onde yá nun se gasta boina magar que se calca gorra cola visera por detrás pa que dea solombra al espinazu. Nun periodu onde se refuguen los purinos de la casería mentanto se mexa pelos requexos de les villes ya entá contamos que somos más finos.

Neñu de la guerra

Escribe sol vientu,

neñu de la guerra,

el to sentimientu

col sangre na tierra.

Traza nesa ñube,

neñu prisioneru,

el mensax que xube

el xaciu melgueru.

Pinta nesi cielu

la lletra qu’esnala,

que camuda en xelu,

qu’asela la bala.

Respiga nel fríu

un cuentu qu’afuega,

qu’afuega’l glayíu

del que siempre anueda.

Compón el to versu,

seya ñegru o blancu,

nesi llibre inversu

que tranquen col trancu.

Que sepa la xente:

quien ye aquel que mata,

quien ye aquel que miente.

Robla y pon la data.

El babayu

"Es muy fácil vivir haciendo el tonto. De haberlo sabido antes me habría declarado idiota desde mi juventud, y puede que a estas fechas hasta fuera más inteligente. Pero quise tener ingenio demasiado pronto, y heme aquí ahora hecho un imbécil."

"El idiota", Fiodor Dostoievski.

    Asina siguimos: Los más fatos del mundiu viviendo a cuenta de los más preparaos; los que fuelguen, a cuenta de los que trabayen; la xente guapo, a cuenta del refugayu; los lladronos, a cuenta de los que desocupen. Les puertes xiratories entá voltien como turbines mientres los padrinos emponderen al afiáu y los cabezaleros miren pa otru llau.

      Si vuelvo a ñacer, yo tamién seré entuvía más babayu, Fiedor.

     “N'España'l méritu y la cultura nun se premien. El vividor apremia y vive del eméritu colo que nun paga la pena estudiar” (Pin Estrella).

La boda de Milia

Hai unos díes que recibí la invitación pa la boda de Milia

La moza más fea

del nuesu llugar

vive na mio aldea

y se quier casar.

La menos galana

de tola parroquia

nun sal por galbana,

fala con un Nokia.

La menos curiosa

del nuesu conceyu,

arriendes ye sosa

y cortexa a un vieyu

qu’atropa millones

y nun tien familia.

Dende Reis los dones

apurren a Milia.

Al tar afitada

la fecha’l casoriu,

se verá casada,

anque ensin amoriu.

Vistirá de blancu,

él con tarabica

y cuenta nel bancu

que la fairá rica.

Cola fanegada

va ser atrayente,

ella va ensin nada,

él ensin un diente.

Seduz el dineru,

qu’aporta guapura,

al finar xineru,

–yos bendiz el cura.

AVISU

ESTI YE UN AVISU P’AVIADOR DRO:

• Si nun se desanicia aína’l peaxe’l Güerna como prometistis.

• Si nun furrula l’AVE d’equí a 5 meses pela Variante Payares.

• Si nun s’oldea l’impuestu de socesiones col de Madrid.

• Si nun s’obliga a la retirada inmediata de cualesquier contaminante de balses o escombreres de les mines d’oru.

• Si d’equí a un añu nun ta en funcionamientu la totalidá de l’autovía Uviéu – La Espina.

• Si a tol que se garre atizando na viesca nun se–y meten diez años replantando.

• Si l’asturianu nun ye cooficial yá...

Me voi proclamar presidente d’Asturies pal añu qu’entra y pueque al to Xabel–y dea una amnistía.

En El Peligru, a 28 díes andaos de xineru de 2019