La lluna

 

Lluna llena sobre L.lena,

lluna nueva sobre Nueva,

el menguante, d’otra mena,

el creciente medra y ceba.

Si nesi cuartu ta echada,

cola nueva nun se ve,

la enllena ta illuminada,

menguante: d’esquierda ye.

La lluna tien cuatro fases,

hai calendariu llunar,

cuando la pides, te pases,

pero peor ye allunar.

Si la tienes ye qu’acaso

lleves nun casu razón,

si acaso nun te faen casu,

andes con ella macón.

Hai media lluna nel carru,

yá col fierru ferruñosu,

píntenla dacuando en tarru

y nel anochar fermosu.

Güei yá nun la baxa’l mozu

que cortexa a una vecina,

el gociu cayó nun pozu,

ella la baxa solina.

Quedó−y cara lluna enllena,

pueque−y fartaren bien

en almuerzu, xinta y cena.

Al tar nella, ta n’ayén.

PUERCOS

 Día de Fin d'Añu: mientres acarretaba borrafes y plásticos que tiren los puercos –como faigo a trechu− dende cualesquier viesca  a los contenedores más cercanos, entamaben les primeres quemes. Asturies, si nun fuera pola agua bendita que caye del cielu, sería un desiertu. Culpables: l'Alministración que nun roza y los que piensen que la natura ye namái de so. El “statu quo” se caltién  y naide fai nada, malapenes se prinda a dalgún pirómanu. Enantes había camineros y los paisanos quemaben solo’l morgazu. Anguaño, arroxando, espoxigaron l’odiu y la dexadez. Mentanto muerren rustiendo millones d'animales de toa triba, dellos chalaos aneciamos en llimpiar el monte de baldre ya apagar si cuadra. ¿Por qué nun ponen a los de les ayudes, qu’anden pasiando pelos centros comerciales, a realizar estos llabores?

¡Melgueru Añu Nuevu!

 

El fíu del venáu de “Jägermeister” ya yo deseámosvos un melgueru Añu Nuevu llibre d’andancios. Nun m’entruguéis qu’onde toi porque de la me senté na tarima reparé nun cartelu qu’encamentaba nun xubise nella. Tampoco me preguntéis que sí ye en tal sitiu o en tal otru llugar qu’esto nun ye “El picu”. Un candial abrazu pa toos.

Canción Navideña 叮叮当 lyrics/chino INCSIP /Juan23

        Quiero felicitavos a toos estes fiestes con un villancicu en chinu pa nun ser a frayar l’ambiente que respiramos. La torna al asturianu amiéstola darréu.

 

      Salú y suerte, que la vamos precisar, amigos. 

 

Navidá, Navidá, duce Navidá,

dende Oriente a tola xente

sulfataron yá.

 

Navidá, Navidá, duce Navidá,

nun va quedar quien lu cuente,

dixo la to ma.

 

Nun−y dieron importancia

escontra de toa lóxica

y s’afitara l’andancia

d’esta guerra biolóxica.

 

La ministra nos estrena

l’AVE pela Pola L.lena,

sigue pagando dineru

en Llión y n’Adaneru.

 

Llegó Navidá, ensin movilidá,

la Variante pega’l cante

ya otru añu se va.

 

Navidá, Navidá, duce Navidá,

si nos llevanten la veda:

Sálvese quien pueda.

Milonga contra asturianu

Milonga contra asturianu,

milonga del antibable,

milonga contra’l paisanu,

la milonga indeseable.

Cántanla cola guitarra

lo mesmu que rabilando,

cola so voz de cigarra,

pero siempre machucando.

Milonga del que nun sabe,

milonga del repunante,

milonga na que nun cabe

entrugar al informante.

Nun ye gauchu’l que la entona,

sinón el que pega estopa,

sordu como una tamona,

que forga como garlopa.

Milonga d’aquel qu’enantes

procurara’l desaniciu,

milonga pa que t’espantes

y pa sacate de quiciu.

Milonga la del condáu,

la qu'al reinu fora impuesta,

que glaya l’interesáu

sofitáu pola so orquesta.

Milonga contra derechu,

milonga contra’l raigañu,

milonga que cafia a trechu,

compuesta pa faer dañu.

Lucia Ceresani

.

Descubriera a Ceresani,

pasu, trancu y nidia voz,

como’l tapíu d’Armani

al son de forcáu y foz.

Buelga nochera en Cosquín,

de cantares, una mina,

bordoneando pel camín,

milongueando n’Arxentina.

Pa la mio querida Lita,

un abrazu dende España,

en Madrid cosmopolita

que pide, roba o engaña.

Muxos trapecistes

 Ello yera un muxu monu

que xubió un día al trapeciu

−caña d’olivar a tonu−,

del peligru, con despreciu.

D’otros gatos foi la estrella

por culpa de l’atrevencia,

pos daba la forcadiella

ensin rede, tenía ciencia.

En butaca VIP, enriba,

ablucaben nel so asientu,

dos mixinos de tal triba,

tamién solmenaos pol vientu.

El restu de la ximielga

ta na peral de la vera,

menos una gata pielga

allugada en talamera

d’un gayu que nun se ve,

onde colinguen les cañes

qu’ensuchen polo que sé

encañando eses fazañes.

Ansí ensin pagar la entrada,

toos ven al trapecista,

que pegó la gran sapada,

cayendo a la estrada pista.

Magar que nun se mancara,

valtó otru gatu del sustu,

que seique volvió la cara

ya allanciara del disgustu.

El gatu ñegru y barbudu

gasta pelos nes oreyes,

arriendes de bigotudu,

ye espantible nes semeyes.

Pol focicu y pola boca

tien l’aspeutu d’un humanu,

cola so presencia moca

−y presta xubir al vanu.

Esti muxín ye pequeñu,

magar que paez mayor,

gusta comer nun tarreñu,

nun camuda la color.

Cola so mirada inquieta,

paez dicite daqué,

faltó−y mui nuevu la teta,

el probe güérfanu ye.

La ma foi envenenada

por un castrón del llugar,

al que nun−y pasó nada,

nin seique−y va a pasar.

Trescaláu cola tristura,

miaga pa pidir comida,

la so vida será dura,

mientres dure la so vida.

Mentanto yo soi so padre

y d’otros siete mixinos,

coles mesmes soi la madre,

¡créense mios fíos, ninos!

Inorantes

Inoráu por inorantes,

nun espublizó les obres,

mientres trunfen los farsantes,

tantu vales, tantu cobres.

Ansí ye la poesía,

morriera na probitú,

por aciu una apoplexía,

intenta imita-y, tu.

¡Qué dura ye la vida

d’aquel que fuye de lu establecíu,

y sigue la escondida

sienda, ensin avíu,

de raros poetes de versu escoyíu;

que nun l’enturbien l’arca

inorantes soberbiosos dirixentes,

nin de dorada marca

aceuta pretendientes

de los que manipulien a les xentes!

Nun importa la fama

callada del so nome pregonera,

ayén si−y encarama

la llingua falaguera

que nun garra poesía verdadera.

La xubida la lluz

 

¡Por Taranis y por Isis!

Teo descomposición

por aciu la electrolisis

que sufro ensin compasión.

D’entamu taba compuestu,

por culpa tanta xubida,

a retorciñón y al cestu,

descompónenme la vida.

Lliberáronme electrones,

cola carga negativa,

mira que tienen cationes

y fonte desaprensiva.

El recibu ye patóxenu,

cáusame ruina ya andancia,

porque nun produzo hidróxenu

y queden tola ganancia.

Col mio carecer diariu,

cuidáu que nun soi políticu,

nunca seré secretariu

y remanezo raquíticu.

Al nun furrular la cona,

somórguiome ente la xente,

sin envidiar al Carmona,

nin siquiera al presidente.

Magar nun me gusta un pelu,

la descarga ye mui fuerte,

alvertíenlu en cartelu:

Tas en peligru de muerte.

La más guapa neña

La más guapa neña

del nuesu llugar

cata, pica lleña,

xunce y va a segar,

viendo que los güeyos

qu’a la lloria van,

por acio los vieyos,

qu’anguaño nun tan.

Dexáime llorar

xunto al balagar.

Dicía’l so güelu,

na so tienra edá,

llárimes del cielu,

na so mocedá,

tiénenme encantáu,

¿quién la ensugará?

siendo yo pasáu,

cuando nun tea yá,

Dexáime llorar,

arroxando’l llar.

De llorar camuden,

güeyos de güei más,

si acaso recuden

de la que te vas.

Mio ñeta querida,

igua d’alifaz,

cura de firida,

na mio muerte, paz.

Dexáime llorar,

al dir a marchar.

 Nel requexu más desamparáu de la barriada, en faza de camín esclusiva para aquellos que se perdíen, vivía namái que del vientu'l vendedor de veletes. L'aire yera'l so aliáu y pocu menos que sosistía d'ésti. Dispunxo achaplar y dar forma al fierro un día en que cansara de tar paráu. Malapenes vendía veletes; sicasí, nun gastaba en casi nada. Les formes caprichoses del metal esbariaben de les basories, de la so imaxinación y, más sero, de los teyaos. Podría asegurase qu'estos artefautos cobraben vida una vez remataos, escuclando impasibles la so nueva contorna mientres añoraben la ruina fragua de Quintín, qu'asina se llamaba esti desafortunáu artesanu. El taller formaba parte de la minúscula casa a la que s’alcontraba apegáu. Fuera, una elevada valla torgaba la observación de la manufactura. Ente los vecinos, había quien consideraba a Quintín un paisanu fuera de dómina. Tenía Quintín un perru que s'asitiaba perennemente a la vera de la ferramienta y de les ferriales pieces como defendiendo esi menudu material. Nun falaba con naide; masina porque nun salía al esterior que por introvertíu. Razón pola que naide lu echo en falta’l día en que, acompañáu del so can, tomó la direición que-y señalaba'l pitu ferruñosu, la cabera veleta que compunxera y qu'abandonó pa nun tornar enxamás.

63Cady Fernández Miranda, Nel Anxel Gonzalez Fuentes y 61 personas más

11 comentarios

1 vez compartido

Me gusta

Comentar

Compartir

Mesa billateral

Esiximos al Gobiernu,

el de Madrid capital,

fartos de llevar mal ternu,

la mesa billateral.

Aceuten el pidimientu,

ponga les piles, Barbón,

nun nos falta l’argumentu,

tenemos igual razón.

Nun valen esparabanes,

convocaremos consulta,

igual que los catalanes,

si l’agraviu nos insulta.

Los puntos son namás tres,

nun algamen pa una quiebra,

nun dexen pa punta’l mes,

pa que nun haiga dixebra.

La contestación, apriesa,

esti ye’l nuesu xantaxe,

que llantamos nesa mesa:

Desaniciu del peaxe

de l’autovía del Güerna

y llanten el ramu anguaño

a la Variante Payares.

¡Valió yá de tantu apañu!

Arriendes, la de La Espina,

inauguren talamente,

de la qu’esti añu fina,

que pruye’l suroccidente.