¡Sacái a la plataforma!

 Ensin crowdfunding nin nada,

nin sovención nin puestín,

nin siquiera pandorgada,

escribe de baldre, Pin.

De la sala, nel escuru,

frayáu por culpa la edá,

remanezo del apuru,

ayén a publicidá.

Sofitando l’asturianu,

del despreciatible, bable,

andechando col paisanu,

chingando al indeseable.

Asoleyando poemes,

amosando los relatos,

entamando con llexemes,

finando fadiando fatos.

Nun diré a la Semanona:

Vezu y llingua son cultura.

Tamos fasta la corona

de que seya la tortura.

¿Nun será delitu d’odiu?,

¿acaso nun ye un abusu?,

¿será’l próximu episodiu

enchirolar pol so usu?

¡Sacái a la plataforma!,

¡roblái escontra’l raigañu!,

¡torgái yá la llingua enforma!,

¡la inorancia nel escañu!

Todas las reacciones:

70Alicia Polledo, Isabel Servan Caro y 68 personas más

DA-Y A LA LLINGUA

 Onde la tortura ye arte,

la llingua, que ye cultura,

nun tien nin arte nin parte,

como nuna dictadura.

Nun la fala’l noble

nin el que tien el control,

¡viva, viva’l pasudoble!,

¡viva lo español!

Quieren dar a l’asturianu,

como al toru, la estocada,

que por culpa del paisanu

nun finó desaniciada.

¡Viva la plaza de El Bibio

y la música foriata!

¡Muerra llingua y toru nidiu

al son d’esa serenata!

Na quinta dimensión

Naquél bancu d’esti parque.

recarguéme ensin corriente,

garro col maxín embarque

ya esnalo pal occidente.

Qué cenciellu y que baratu,

lu que paez abegosu,

afaya ya asela un ratu,

finando mui animosu.

D’entamu, suelta tol llastre,

ye como quedase en blancu,

inora cualquier desastre,

seya de casa o del bancu.

Cuando’l palombu s’acerque

y pase pela entepierna,

ensin reparar qu’empuerque,

yá refugues la faterna.

Tas na quinta dimensión,

un estáu de conciencia,

camín de la evolución

espiritual n’esencia.

Ye’l momentu de viaxar,

ensin tarxeta CONECTA,

ensin un euru gastar,

sin droga de mala secta.

Magar que teas ausente,

vas tornar a meyor vida,

más llixeru y más consciente,

con xeitu p’atopar xida.

La texedora de Puerma

 Texedora de Puerma

texe, texe un tapíu

qu’enxamás merma,

que yo voi colar pa Cuba,

adiós texedora que torga’l fríu

sin meter xuba.

Voi alluendi de los mares,

¡ai texedora!,

pa escaecer los tos telares

porque a deshora

texes que texes

con Xandru’l galán hasta l'aurora.

Tres de cantate la parrandada,

¡ai texedora de la cardada!,

la to esparueda

dexo con dolor,

sin chal de seda

nin cobertor.

Quiera Dios qu’allalantrones

queden los de Santuyanu,

por aciu que los moscones

nun quieran alzar la mano.

Como un pisón,

soi de Grau y nun lu niego,

tamién moscón,

¡andái pel riegu!

El pintar m'importa un pitu

 El de la obra me cobra,

el de la barca m’embarca,

nun sobra daqué que sobra,

de marca’l sapu, nin marca.

Nin heredá nin heriedu,

nin sanxuanín en San Xuan,

digo Uviéu; non, Oviedu,

balandrana a balandrán.

Apenco y caltengo pencu,

probando la probitú,

nun llena’l concu’l reconcu,

voi salvando la salú.

Sele voi en soledá

pel camín de la camera,

l’atadera de la edá

desdexa la faladera.

La fama del afamáu

nun pruye na mio pruída,

nun franzo por afamiáu,

paso la vida ensin sida.

Nun me maten a menguar,

nun m’amenorga la mengua,

encoplo por encoplar,

pola llingua; non, la llengua.

Enllamargo na llamuerga,

sin qu’agabite un gabitu

nin que xiringue una xerga,

que’l pintar m’importa un pitu.

Todas las reacciones:

72Alicia Polledo, Menéndez Suárez Carmen y 70 personas más

Faltón

 ¡Llei, si sabes lleer, faltón! Porque arriendes d’inorante (nun tien conocencies de lu que ta falando) yes faltón (que trata ensin respetu). Talamente como los otros faltones, cola “f” d'una llingua que foi la oficial del reinu mientres dos sieglos y qu’amuesa nun ser dialectu: Fachendosos, fadiosos, faladeros, falambaldres, falanciosos, falancieros, faldetes, faldoteros, fálicos, falifos, faligotes, falsos, faltosos, fallaos, fallicos, fallíos, falseros, fanáticos, faltriqueros, fandangueros, fandosques, fanegueros, faniegones, fantasiosos, fañagüetos, faragayos, fardeles, farfantones, farfayes, farfullones, fargatientos, fargatones, fargayos, fariellones, fariñones, faroleros, farramplinos, farrapios, farrucos, fartones, farxoletes, farxolos, fatos, faxineros, fayaos, figures, felpeyos, feltrones, ferieros, ferraos, ferres, ferretes, ferrones, ferruñentos, ferruñosos, festeros, fexes, fiascos, fiastros, filanderos, filtrayes, finos, fisgones, fiadores, fiyascos, fiastros, flexes, floxos d'aguyes, flonderos, focetos, focicones, focicudos, fogardines, fuinos, folgazanes, folgones, folguetes, folixeros, fongosos, fónicos, foniles, foranos, foriatos, forfugues, forgaxes, foriones, forres, foscos, fosqueros, frangüesos, fresqueros, frixuelos, fuinos, fuleros, fumiacos, fungones, fuñones, furabollos, furones…

¿Son inventu: Abarca, abeduriu, argaña, árgoma, arroxu, artu, balagar, bálagu, baniella, bidul, berciu bilortu, biruéganu, borona, bouza, brenga, cachiparru, camba, cándanu, carbayu, caspiu, combayar, cotolla, cuetu, embueza, engarabecer, gamayu, gamón, gamonita, ganzu, garabatu, gárabu, garabuyu, guarar, güelga, llamera, llamuerga, llastra, matu, magüetu, touzu, toza, veiga, adobar, angazu, bandón, enaspar, escanciar, esgadañar, esparabán, espetu, esquirpia, gabitu, gabiñón, gadaña, golupa, guarecer, llata, ripia, rueca, sala, triscar…?

Nun te voi mentar pa nun endilgate más fama de la que garres caciplando, magar que curiate de lu que reburdies yá que l’odiu sí pue tar penáu con cárcel.

Todas las reacciones:

82Angeles Rodriguez Perez, Nel Anxel Gonzalez Fuentes y 80 personas más

Xuaquira

¡Ayudáime a alcontrar a Xuaquira!

 

Robáronme la burra,

cola so albarda,

la mio burra tan curra,

tan nidia y parda.

 

Amás de la mio neña,

la cabezada,

nun dexaron nin seña,

buelga nin nada.

 

Si la viera un collaciu

que dea noticia,

que toi perdiendo’l xaciu

por esa picia.

 

Si la viera un paisanu

que me lu cuente,

del oriente llonxanu

o d’occidente.

 

Y, si nun−y conozo,

me val tamién,

porque tien puesto’l bozu,

nun come bien.

 

Que voi da−y premiu abondo

pola pollina,

al dir vender un fondu

de la vecina.

 

Anque nun me factura

nin va de xira,

ye l’ausencia mui dura

de la Xuaquira.

Atila

 Munchu se falara sobre l’orixe de Pelayu y nada se supo exautamente; sicasí, una pista nos la pue aportar la etimoloxía del nome del so fíu Favila. Esta pallabra vien de falwa, faffila…, y según los mios caberos estudios del mesmu rei de los Hunos, Atila. Pue sonar a coña, pero una documentación encriptada qu’atopé cavando perbaxo d’esti cartelu de l’autovía m'amosó lu que yá se m’abultaba. Arriendes, esi mesmu avisu conmemora l’allegada d’esi monarca per esi camín con 66 de los sos homes y el so pariente Rugila a Asturies. Foi’l casu que fui quien a poneme en contautu con una sociedá mui secreta que se caltién dende entós y que me lu esclariara dafechu. Por culpa d’ello, perafítase qu’onde calquen dellos de los nuesos caballos, testerones y machos nun vuelve a espoxigar el yerbáu.

¡MUNCHES FELICIDAES!, ¡MUITAS FELICIDAES!

Punxera yá’l nacimientu,

san Xosé fendió la vara,

la fragua la llevó’l vientu

y el neñu emporcó la cara.

 

Al güei−y cayera un cuernu,

teo escondíu un romanu,

non pol fríu del iviernu,

ye que−y falta una mano.

 

Nun topara al rei Gaspar,

frayó la pata un camellu,

la estrella nun fui a pegar

porque nun m’apega’l cellu.

 

La pita que caltién tiesta,

namái tien una patuca,

nun hai mofu nin xiniesta,

paez urxencies del Huca.

 

Llanté too n’antoxana

y riñóme la muyer:

Nun queda figura sana,

ye meyor nun lu poner.

 

Obedecí por respetu,

yá lu asitié en delles caxes

y fui a mercar un abetu

de plásticu nes rebaxes.

 

Nun sé sí pola seronda,

−y va cayendo la fueya,

la Navidá ye la monda,

pero nun m’afayo nella.

 

Comí un cachu de turrón

y manquéme nuna muela,

nun sé sí escapar pa Ounón

o arrequexar per La Puela.

 

 

 

 

 

 

Vivo ensin vir en min

 Nun algamo’l metaversu

porque soi vieyu y mui neciu,

escribo y vivo nel versu,

por nun tener partu reciu.

Fui quedando desfasáu,

nun me dio por engatar,

afayo col qu’anda al llau,

si nun me vien a cafiar.

Nun gasto móvil nin xoyes,

siempres merco con dineru,

nun teo faza en Margolles,

refugo ser llimosneru.

Vivo cola soledá

y tamién cola Miercedes,

pago d’otros, caridá,

me salgo per sal si puedes.

Teo bien de tatuaxes,

magar que nun son de tinta,

son de firíes ya ultraxes

de xentes de mala pinta.

Teo collacios pollinos

ya amigos que son mui burros,

gusten que−yos pague vinos

o que−yos convide a churros.

Vivo ensin vivir en min,

pero nun aguardo gociu,

faigo pel monte camín,

de papu, nin tuvi bociu.