Anónimu

En cualquier día anónimu d’enantes

na mio anónima vida de poeta,

entamé a escribir versos d’escoyeta,

camudando a Cabal, dende Cervantes.

Milenta poesíes, nun sé cuantes,

magar ensin la “j”, de “a” a la zeta,

pallabreru d’Asturies a la gueta,

valieron pa cafiar mil repunantes.

Anónimos, tamién, estos manguanes,

de reflundiu fociquen no qu’escribo,

si dacuando en vez lladren como canes,

de lo que–ys debo pásenme recibu,

si de ser a algamar quedáis con ganes,

perdonái pos n’altor ye onde vivo.