BRANDAL en BELMONTE

Cai nel brandal, la farina;
calma la sede, la fonte.
La Fonte la Canalina
sintiéronla per Belmonte.

Seique dalguna de Netu
escuitárase n’alzada.
Foi nel parque, per xunetu,
ente xota y vaqueirada.

Sones guapos ya castizos
de la fastera asturiana,
sones mui afayadizos,
¡dir a mercalos mañana!

Asina, Grau ya Tinéu
pesllaron la discoteca
por culpa d’esti xaréu
perbaxo Peña Manteca.

Ye que cuando Tania canta,
seya en Xedré, seya en Tuya,
en toa folixa encanta,
naide ye quien a armar buya.

Dende estos andurbiales,
espublizo pa tol norte,
ya roblo que son mundiales.
Pindesierra – Villa y Corte.

A LA GUETA'L CIELU

A la gueta’l cielu,
Carriquín de Dios;
ellí va’l mio güelu
curiando de nós.

Cucando no prietu,
Carriquín del Rei,
agüeya’l to nietu;
rellumu, prendéi.

El rayu de lluna,
pela nueche escura,
cola cara bruna
y nidia veyura.

A l’Arcu la Vieya,
posáu nel teyáu;
al verde que mueya,
bañando’l segáu.

Lluceru del Alba
canta la tonada;
a la tierra ralba,
al futir, la fada.

Cola xornalera
fasta la seronda,
al campu da-y xera
y semiente abonda.

A la chisba’l norte,
dende la carril
que sal de la corte,
al llau del pretil.

A la gueta’l cielu,
al riscar el día;
el sol torga’l xelu,
retueya la ería.

LOS VIEYOS TAN DE SUERTE

Ye una suerte tar conxeláu agora qu’arroxa na Villa y Corte pol chornu. Si nun fora poles midíes que tomara l’Alministración –frayando’l Pautu Toledo– d’ esfrecer los vieyos y nun sotripar a los qu’armaron la crisis, más d’ún morriera d’un golpe calor.

¡GOCHOS!

Sí, esti comentariu va por vos, los gochos que tirastis los DUREX, allá per mayu, nel área de Sorribas, nel conceyu Grau.

D'aquella, anduvi dende l’apeaderu’l FEVE fasta la faza recreativa –ida y vuelta–, amestando un paséu pela redolada, un total 32 quilómetros con una pergrande angüeña na planta’l pie. El casu ye que, na mesma entrada l’área, dalgunos gochos dexaron en suelu preservativos ensin fadiase dempués del traxín en percorrer apenas 7 metros pa tiralos nel contenedor. Recoyílos con un garabuyu, amás de dalgunes basories qu’escaecieren otros collacios de rebañu, y la campa quedó como’l riscar l’alba.

Al otru día, esguilé les peñes de Peñaflor y baxé delles llates de saín que tamién tiraren otros gorinos nuna pista.

En xunu torné a Sorribas, y entós había un gran fedor porque abandonaren mediu cadabre d'un animal.

Ente toos debemos refertar l'actitú de toos estos gochonzonos que contaminen davezu nuesa Tierrina d’esta mena o de cualesquier otra qu’empuerque'l so territoriu.

¡NORABONA A LOS OCCIDENTALES!

Yá nun voi llantar más robles nel altu de Cabruñana,

atayará pela Doriga’l coche la mio paisana;

yá que tras cinco retrasos, por fin allugó Pepiño

a inaugurar esti túnel que trespanda’l so “Camiño”

ALVARÍN CON DAMBAS ORLAS

Fino de tornar de Tinéu del entierru una tía. D’outra miente, dalgunas cousas nun fonon a drechas nesti añu; sicasí, dacuando en vez, daqué tien que pintar bien, mesmamente que'l mio fíu Alvarín –con 23 añinos– bilara, al empar, las carreras de Derechu ya de Direición d’Empresas na Universidá Rei Xuan Carlos ensin abasnar nada. Amás, la d’abogáu, con sobresaliente de media.

¡Oxalá que l' orbayu qu’entama a cayer sobre Madrid somorguie pa siempre las nuesas tristuras!

ADIVÍN

Tuvi en La Manga nun hotel mui estrelláu nel qu'había delles termes cartaxineses y dalgunes estatues como la qu’amuesa la soleya. El casu ye qu’una paisana diba tirar una foto a otra que taba asitiada posando xunto a una d’estes figures; entós, de la que yo pasaba a la so vera, y-dixi: “nun-ys la saque asina que van surtir ensin tiesta”. Y foi verdá, la señora, nel intre que la falaba, esvió la cámara y dambes salieren cola morra tarazada.

¡GRACIAS COMPAÑEROS!

Hoy han finalizado las clases del añejo taller de Recursos Literarios que va tomando, año tras año, cierta fama y relevancia. Atrás queda otro periodo de tiempo acompañado de magníficos coadjutores y de fructíferas vivencias a su lado. Se cierra la libreta de constatar sueños. Duerme la pluma, se silencia la impresora; pero no la imaginación. ¡Cuánto queda sin escribir a su amparo!

Gracias a todos, en general, por las atenciones recibidas; y a ti Raquel, además, por tu última cita que me he permitido transcribir...

“Recordaré a José, por esa facilidad para la poesía, en bable o en castellano, por esa sutil ironía con la que riega todos sus relatos y por ese fino sentido del humor. Y todo ello aderezado con ese extenso léxico con el que nos ha prodigado todos estos meses. Aunque no ganes concursos, ni te presentes, el mérito y el talento lo tienes.”

CORPUS CHRISTI

Corpus Christi, voladores,
los nenos de comunión,
l’ilesia cubren de flores,
entama la procesión.

Escaecen l’amargura,
alcordanzas yá llonxanas,
mentanto predica’l cura
ya repiquen las campanas,

Folixa de bona pinta,
la orquesta anicia a tocar,
de la que fina la xinta,
de la que presta cantar.

De la que claria lo escuro,
de la qu’estena l’orpín;
col paparáu café puro,
aína esnales col maxín.

De la que reza la güela,
de la qu’enrieda’l rapaz,
de la que para la zuela,
de la que sientes la paz.

Corpus Christi, voladores,
vezos vieyos ya tonadas;
nel pueblín los mios amores,
como en dóminas pasadas.

DOLCE PUNTOS DE ZREIZAS

Inda nun escaecí la sapada que diera nel !!ombu, fai unos años, al fender las escaladas, de la echaba un gabitu pa pañar mazanas na pequena península de Santu Adrianu, a la vera’l Narcea. Tampoco, de la que m’enganché nuna espetera fierro al blincar d’un teyáu; nin siquiera, de la que cascara la pala’l fornu qu’emplegara de piértiga pa salvar un bardial en Buseiru. Agora qu’alcuérdome meyor de la qu'armé'l caberu sábadu, al tornar de Grau, al dir tapar unas zreizales pa que los glayos ya las pegas nun las arruinaran. El casu ye que, tando nel pasu d’enriba, al empobinar la rede pa trespandar el cabu una zreizal, ximielgué la escalera ya esbariaron las patas, cayendo de raspión escontra una muria qu’esfardané dafeitu. Entós, el ferrial que taba de mano enfocicó conmigo ya frayóme de sopitu fasta dientro la caniella. Darréu, n’Urxencias, el mélicu, dempués de dexar curiosa la faza la !!umera (Agüeyar soleya), cosióme “dolce puntos de zreizas”.

¡MALDITOS!

(Perrina Mila - Soleya Llevante)

Una perrina ye topada debaxo un coche, en Belgrado, coles cuatro pates amputaes. La precisión de les feríes refuga l'accidente y apunta a l'atomía.

VIEYOS ESFRECÍOS

En llugar de faer recayer la crisis sobro los sos causantes, qu’enantes arriquecieron, l'Alministración turria y conxela les pensiones de los inocentes xubilaos (esceuto los que cotizaren menos), a los qu’en dómina de vaques fartes nun-ys apurríen más que la revisión l’IPC.

¡Qué apruza'l dineru negru los culpables y qué tornen un cachu de lo especuláu!, ¡qué los países a los que davezu perdonamos la delda nos echen un gabitu! y ¡qué se machuque contra la economía somorguiada!; d'esta mena, surtiremos otra vegada a flote, ensin afogar a quien nun tien culpa.

AFALAGAR LO NUESO

Los asturianos nun provenimos del África. Tamos n’Asturies/as dende la nueche/nueite los tiempos, de magar qu'iguase la resta!!ada’l Big-Bang. De la qu’esfreciera’l cortezu terrestre. La mio parentela yá morara nos conceyos de Tinéu, Sierra (Cangas del Narcea) y/ya Bual enanties/as del Carboníferu Superior. Naide pue dicir qu’esti terrén nun ye de nueso/nós. D’otra/outra mena, yo, nun soi “Ciudadanu del Mundu” como'l mio bon amigu Pedru Zurita –tienes/ties que perdoname, Pedru-, nun escaeciera nada n’otros/outros países; soi asturianu, namái. Afalago la nuesa faza y la nuesa !!ingua, non como quien-ys refuga. Los mios güesos son povisa d’esta tierra. Nun me peta cafiar foriatos; sicasí, aborrezo que me chingue cualesquier gandaya.

¡GRACIES AMIGUINOS!

Gracies collacios por avisáme que toi camudando tol pelo de roxu a blancu.
Nun me decatara d'ello.

Un saludín, y amarrá-y curtiu la moza.

Pindesierra

LOS NENOS D'AZUREIRINA

Abenayá, fai de 15 a 20 años, diba d'estrenu un Nissan Patrol roxo, al debalu, camín de los Cadavales; seique, m’esvié a manzorga fasta La Piñera, ya trabuqué una pista cola entrada pa una corralada mui pindia, ya tuvi que surtir a palpu cola marcha de tras. Depués, rumbé pol castañéu l'escontra ya, más sero, esguilé pola Fana Xinestaza. Pa finar, algamé Azureirina ya tuviera falando bien de tiempu col paisanu la soleya. De la que taba echando'l caleyu con esi home, de!!os nenos fonon asitiando !!erones alredor de las ruedas, ensin que me decatara d'e!!o. Asina, qu'al arrincar, furacáronme los baxos, lo que me costó abondo tiempu ya dineru iguar.

Agora qu'aque!!os nenos yá son mozos y, auquiera que tean, espero qu'esto !!egue a los sos oyíos ya pónganse en contautu conmigo pa, de la que vaya, convídenme a un platu queisu ya una sidrina en ca Pipo o en ca la Virxe, como desagraviu.