VACACIONES EN LA PLAYA

     Hai nada qu’entamaben les vacaciones, ¿vós alcordáis?; agora, anden finando. El tiempu avanza; sicasí, les estaciones —güei, como ayeri de la qu’escribiera esto—, se repiten. La seronda yá ta equí. Que naide garre una depresión, nun paga la pena.

DESHONRA

Ye la España afitada nel sangrín,

de besties que torturen acaldía,

de feries y barbarie a sangre fría,

peles vegues que coren al cornín.

D’humana marabunda, l’espantín,

que-y afustia por miles na lloría,

nun ye quien a torgar esa elexía,

esfarrapáu’l probe yá a la fin.

La España qu’entá arroxa les mexelles

güei anecia de nuevu nel abusu,

la España que procura engarradielles

s'enferrona al martiriu qu'en desusu

 deshonra la conciencia en Tordesielles,

rutiando a la razón, el fieru obtusu.

Coples del faltón faltosu

Siempres hai dalgún faltón

qu'ensin plizcu de respetu,

queriendo llevar razón,

anda espetando l’espetu.

Asina y en resultancia,

pasa tol tiempu enredando,

ayén a la tolerancia

y al par col so mazu dando.

Lu blancu diz que ye prietu,

lu prietu diz que ye blancu,

ye del repunante, netu,

ye torga, piesllu y atrancu.

Asoma pela to muria,

cuando aporta la contraria

y, guapamente, la lluria,

ye mosca ensucha y mamaria.

Davezu son radicales,

a les clares, estremistes,

igual-ys da lu que fales,

nin qu’aporfies nin qu’insistes.

Nin que digas so nin arre,

sé que-ys falta un fervor,

afáyense nel amarre,

retoliquen de mugor.

Entós, nun paga la pena,

aldericar al faltosu,

yá tien abonda condena,

¡qué-y coma l’alma l’osu!

Sombra

La castellana, recién, enantes de que s'evapore'l salitre...

Entre la luz de las velas

se oculta la sombra prieta,

cirios, lágrimas, candelas,

de cera, la muerte reta.

Acento pone la luna

y diéresis, las estrellas,

la bruma cruza oportuna,

borra todo trazo de ellas.

La mar matiza de añil,

allí, lejos de las olas,

  procura el faro candil,

en tanto a la orilla rolas.

A bordo de tu velero,

que la madrugada anhela,

posa en la vela un lucero,

vela que la vela vela.

Luz y sombra, sombra y luz,

la marina y el océano,

  graba el agua en el talud

quiebros de sones lejanos.

Día y noche, noche y día,

vuela ajena la gaviota;

  si bien, resta la poesía,

la parca, la vida agota.

L'Hotel del Amante

     Tal y como vos desplicaba na cabera entrada, cuntaba que de la que tornáremos d’Asturies díbamos a quedar en casa; sicasí, a la muyer se-y ocurrió de secute rentar un cuartu nun hotel de Calpe y tuvimos de colar darréu. Cuando llegamos y xubí con ella a la oncena planta too s’amosaba enforma afayadizu, magar que nun me decatara del nome del hotel fasta qu’entré nel escusáu: ¡Hotel del Amante!, ¡coimes! De resultes, quedé dalgo amusgáu y tuvi de salir pa la terraza col envís de cavilgar sobro’l casu. Dempués supi que nada tenía que ver cola muyer, sinón que yo trabucara’l nome por culpa de tar mediu tapáu’l cartelu. Asina que nun-y dixi nada y, enantes de xintar, baxamos a conocer la Villa montando nun tren que tenía ruedes y andaba pela carretera. El percorríu foi dafechu prestosu, anque vengo con un esguince nel costazu de tanto corresponder al saludu d’una montonera xente qu’abultábaseme que nun conocía. Amás, nel restorán pañé unes croquetes de quesu y, como taben esfrecíes, metíles nel microondes y por mor de que nun sabía como furrulaba-yos calecí sobre manera arroxando’l focicu, la parpayuela y fasta’l mesmu gargüelu. Foi’l casu qu’aína nos averamos al hospital onde me diagnosticaron quemadures al Cabrales de tercer grau. D’esta miente, alvertivos qu’entamo en tientes otra vegada nel Feisbuc, pero abondo fadiáu.

Grupu DA SILVA

     L’AMISTÁ, COMO LA MÚSICA, NUN SE VE, SE SIENTE. Gracies amigos del Grupu Da Silva pola vuesa amistá…

Ye Antón, ye la so fía,

folixa y voces del prau,

ye Da Silva, ye Allegría,

afamáu y bien ganáu.

De la pena ye escaezu,

ye cumbia, ye pasudoble,

a la Santina, ye rezu,

ye’l so procuru más noble.

Ye romería, ye fiesta,

ye, d’ayeri, l’alcordanza,

nel baille lleven la cesta,

ye, del vecín, la xuntanza.

Ye arremangu, ye reclamu,

ye la Maruxa Llimón,

del alloriu faise l’amu,

collacios de corazón.

Más qu’un grupu, son familia,

Da Silva ye l’amistá,

acompañen la vixilia,

a vieyos y a mocedá.

Como sorradiando’l fornu,

s’esparden los sos cantares,

son d’esta tierra, cabornu,

qu’aventa bien de pesares.

Da Silva siempre a la vera,

seya en branu, seya iviernu,

en seronda o primavera,

cantar con bon xeitu eternu.

Podemos conxugar

Podemos entiende que se pueden conjugar defensa de los animales y tauromaquia

La diputada de Podemos en la Junta General del Principado de Asturias (JGPA), Lucía Montejo, ha dicho este miércoles que "se puede conjugar la defensa de los derechos de los animales con la tauromaquia".

(Güei na AM Sociedá)

Si, ne, PODEMOS conxugar:

Yo defendo los derechos de los animales y torturo un toru

tú defendes los derechos de los animales y tortures un toru

él defende los derechos de los animales y tortura un toru…

¿Por qué nun alderiquen?

     Yá anden nos comentarios de La Nueva España de güei reburdiando baxu alcuñu col inglés y escontra l’asturianu. ¿Por qué nun alderiquen los aludíos? Pela mio parte yo yá-ys retruqué otra vegada col mio nome y los dos apellíos:

     “Keep calm and speak asturianu. ¡Aselái los foriatos qu’esto ye un derechu que torgaron a esta Tierra!"











 

GRAU

Grado, puerta de occidente,

de esa Asturias paraíso,

que recibe complaciente,

a quien llega de improviso.

Grado es villa y es concejo,

es Camino de Santiago,

mixtura de nuevo y viejo

y de belleza, un embriago.

Es historia, es monumento,

es feria, fiesta y mercado,

palacios y ayuntamiento,

es la tradición, es Grado.

Es huerta, es artesanía,

júbilo en calles y plazas,

parques y gastronomía,

es sosiego en sus terrazas.

En un valle encantador

rodeado de montañas,

donde el verde da esplendor

y elimina las migrañas.

Cercano a la capital,

por tren y por autopista,

centro del Camín Real,

placentero y costumbrista.

Sus bollos, pan y pasteles,

su queso de Afuega el Pito,

sus pueblos que son vergeles

  muestran Grado como un mito.

Grado en asturiano es “Grau”,

no es capricho, es toponimia,

cual el gato miaga miau,

la verdad nunca fue alquimia.

Grau

     Sí, de mano, entré en Grau adulces, cuasi que como esa procesión que percorría la cai na nueche na que tomaron esta semeya al atopame con Xabel Alonso o como aquel vieyu Alsa que travesaba la Villa Moscona y me treslladaba a Tinéu de la que yera neñu, allá pelos años 50 del pasáu sieglu. Dempués, entamé a faer amigos, munchos d'ellos al traviés del Facebook o a cencielles porque yá lleíen los mios blogues n'asturianu, eses humildes publicaciones coles que me propunxi aportar el mio granín de sabla pa la recuperación de la nuesa querida llingua asturiana. Dexé por ellos un tanto arrequexáu’l castellán que me procuró matar el cocu de la publicación y superar el millón de copies colos mios poemes y delles agabitadures lliteraries. Güei, tres mercar abellugu xunto al Cubia, nun rindo de tornar siempres que puedo y de caleyar pel so perguapu cascu urbanu o pel so afayadizu paséu fluvial, asina como d’esguilar a los cuetos y pueblos de la redolada. Soi testigu de cómo medra la ufierta turística y cultural d'esti conceyu. Soi amigu d'esa cultura, del so raigañu, del folclor, del terrén y de les xentes d'Asturies en xeneral y de los de Grau, en particular.

El Cazurru

       El Cazurru yera un solterón que vivía nun mui lloñe d’equí y que seique tuviera cotizando cuasi que mediu sieglu pola so xera; a vegaes, en más d’un tayu. Quien-y conocía dicía que yera abondo formal. Cola tema de los rescates a los bancos, retiró-ys tolos aforros y mercó una segunda vivienda al contáu col envís de rentala. Foi yá a puntu de retirase, col procuru de qu’agabitase la so amenorgada pensión y d’esa miente nun pasar apuros. Asocedió qu’enantes d’alcontrar un arrendáu se-y metieron unos golfones. Dempués, anduviera 3 ó 4 meses per tolos muérganos correspondientes ensin llograr aventa-yos. De resultes, garró una depresión y una escopeta caza cola que mató a la pareya ocupes. Güei, esi paisanu exemplar, per aciu del señor xuez, nun ye namái qu’un delincuente y podrez en prisión. Naide sabe por qué la noticia nun saliera espublizada na prensa; sicasí, tol mundiu sabe que los finaos yeren veceros d’un bar que nun triaba’l Cazurru por culpa de que-y paecía caru. Naide conoz tampoco quien tabicara la so puerta d’accesu al portal nin la causa pola qué se caltién asina.

Deprendi asturianu

     Los alverbios son como adornos na escritura, nun duldes n'echar mano d’ellos; pero sobre too nun escaezas falar n’asturianu.

     Alverbios de llugar:

     Abaxo, acá~acó, acullá~aculló, alantre, allá~alló, allalantre, allalantrón, allarribón, alluende, alredor, aquende, arriba, atrás, auquiera, ayuri~ayures~ayundes, cerca, dayuri~dayures, debaxo, delantre, detrás, dientro, ehí, ellí, embaxo, ende, enfrente, enriba, equí, fuera, llonxe, lloñe, metanes, metanos, nenyuri~nenyures~niundes, onde, ondequiera, pequí, perhí, pellí, pellá, pembaxo, penriba, perbaxo, perriba, perdayuri~perdayures, u, uquiera...

El santu de Llouru

       La guapa entrada que fino d’acolumbrar na muria de Milio Mariño, “Dios xugaba a les cartes”, aportó’l que m’alcordara d’esta semeya. Esti foi l’único santu que salvara na Guerra Civil de los milicianos en Llouru (Pravia). Ta perclaru’l porqué. D’otra miente, nun quixera escaecer que’l vienres y sábadu de la selmana qu’entra, 7 ya 8, son les fiestes de San Llorienzu nesi guapu pueblín; asina que yá sabéis onde dir de folixa, amás d'a visitar al santu. Pa finar, un abrazu pal so eméritu alcalde don César García Pire y tola bona xente de Llouru col envís de que tea a reventar.  

Occidente d'Asturies nel 2039

Vista aérea del occidente d’Asturies nel añu 2039.

PUBLICIDÁ: Visite’l restorán El Canadiense, n’Uviéu na mesma salida del desiertu balses. Especialidá en carne al caricote y cachopu al cianuru.

Más respetu

     Tuvi restolando per LNE na rede y nun atopé esti comentariu; sicasí, me paez una falta de respetu como un carru d’esquirpia. D’igual mena, desacreita al magüetu que lu escribiera. Al rodiu d’ello, si lleí otros asemeyaos qu’espublicen baxo alcuñu, lu que me paez de cobardes. Siempres qu’afité dalguna esplicación na prensa lu fixi col mio nome y dos apellíos delantre del mio nomatu; magar qu’esto se m’abulta una esceición y dalguna vez me sotripara cualesquier de los cuasi anónimos. Esta xente, de la qu’enrieda, namái quier enfrentar y señalar a los que tean a favor d’iguar la nuesa llingua como dixebrantes de manzorga. Por mor d’ello me prestaría esclariar a esta triba de toperos qu'hai bien de paisanos a los que-yos pruye la sangre por culpa de que s’escaeza la so llingua llariega y nun tien nengún asitiamientu políticu —como ye’l mio casu—, anque sí un plizcu d’educación. Arriendes y pa finar, cavilgo qu’esto pinta mal nel nuesu país o rexón yá que quien nun ta a favor de daqué ta bramente al aviesu, seya nel terrén de la cultura, el furáu gafu del oru que va esfardanar l’occidente o les quemes que nos afueguen y camuden esti Paraísu Natural qu’anda abocanando. ¡Qué haya suerte, que la vamos precisar!