Anda y zumba

Anda a cutir la llueca,

que suena a lluezo,

tiemblo como una teca,

 nun t’escaezo.

Xubi y tanxe’l campanu

del campanariu,

yo carezo nel vanu

vete a diariu.

Sopla y sufla la xipla,

que nun al tueru,

el mio xeitu cacipla

pol to saleru.

Zumba la pandereta

y la payella,

marcho siempre a la gueta

por culpa d’ella.

Toca les tarrañueles

o’l to tambor,

testes en taragüeles,

muerro d’amor.

La gaita, la zanfoña,

ya’l xirimbáu,

pastelín de boroña

vente al mio llau.

Garra y tira del filu

del riquirraque,

tiénesme abondo en vilu,

faigo almanaque.

Voi picar na ta puerta,

cuento llevate,

debes dexala abierta,

n’albentestate.

La Llei de Murphy

     

     Estimando ensembre a toos el vuesu sofitu, quiero confesavos qu'enxamás pensé que diba finar intoxicáu por culpa de papar mal a gustu activos tóxicos. Sicasí, yá me gustaría a min vivir en dalgún activu tóxicu de los que voi sovencionar al Bancu de Santander. D’otra miente, nun me prestaría facelu nos otros munchos qu'ocuparon de baldre ya ensin  nenguna triba de rempuesta xurídica y qu’a lo cabero tamién vamos a pagar nós. Amestar, qu'esta mañana, de la que caleyaba pa esfrecer el maxín, cavilgué en si nun tará yá institucionalizáu’l furtu nesti país y yo nun soi más qu'una presa afayadiza. Foi'l casu que nun debía andar mui escamináu, cuando Murphy –qu'asina llamábase'l perru de manzorga– taragañóme un mordigañu na pantorría drecha al pasar pela so vera. Nun podía ser d'otru mou, los perros tienen un olfatu bien refináu y la famosa Llei de Murphy espeta que "si daqué pue salir mal, va salir mal". Dempués m'entrugaron que si diba a denunciar al can y retruqué que non, que nun diba a facer recayer el pesu de les mios miseries sobro un probe animal, talamente como faen nes places de toros col inocente herbívoru. Arriendes, si pa la qu'entra me reencarno, voi gastar en vicios tolos aforros como fai la mayoría la xente pa nun carecer más a sangrinos.

¡Intentáilu!

    Non, nun ye verdá lu que diz esti cartelu. La mala xestión y la peor supervisión emburrien a un rápidu desenllaz a escondidielles de los amos del bancu, los aicionistes. De sópitu, la comisión reutora del FROB anuncia un eufemismu: “resolución”. D’igual miente, el Bancu Central Européu asoleya otru más ruin: “inviabilidá”. De resultes, mengüen el capital social a “0” euros cola amortización, por imperativu llegal, de toles aiciones en circulación. Al tiempu, alcuerden una ampliación de capital de 684 millones d’euros n’aiciones de 1 euru. Darréu, van tresmitir toos esos títulos a Bancu de Santander. Mentanto, los aicionistes queden ensin un céntimu. Si daquién cree que podría puxar con 1 o con 20 euros por esa entidá, que lu intente.

    Polo qu’a min respeuta, trabayé una montonera d’años nesi bancu y gran parte de los mios aforros me los van pañar. Dalgunu podrá reburdiar lo que seya, pero muncha xente cavilga que’l dineru onde meyor ta ye na propia empresa. En resultancia, güei ye un mal día pa min y nun sé nin como saqué xeitu pa espublizar esti comentariu col envís de que nun me refuguéis por ser un poeta más probe entuvía.

Na Residencia d'Estudiantes.

       Güei tuviera con Federicu na Residencia d’Estudiantes. Amosárame’l so cuartu ya’l pianu col que tocara enantes de l’amarraza y qu’agora lu caltienen nel silenciu de l’alcordanza. Dambos dos escurrimos que les guerres nun aporten arte nin solución a nada nin a naide. Xugáramos un bon pedazu a los encoples ya a les ocurrencies; magar qu’a pocu nos sotripamos por culpa les metáfores. Lleera embaecíu dalgunu de los mios poemes n’asturianu ya aína alcordóse de lo bien que lu pasara en Grau cuando s’allegó con La Barraca. Arriendes, mentárame a Severo Ochoa, que tamién tuvo de residente. Esclarióme que bien d’ensayos de la so compañía teatral desendolcábenlos nel propiu auditoriu de la residencia. La mañana trescurriera amodo, como cualesquier mañana de la vida y de la muerte. Darréu, tornamos a la realidá del pinar a mediudía. “Too yera cultura y folixa daquella”, mermuraba cuando nos despidiéramos ente llárimes…

RECUERDOS

La música siempres tuvo amestada dafechu a los recuerdos. Enantes, nes fiestes de prau, apurábase a baillar fasta la pava por culpa que tenía que trescurrir tou un añu fasta la siguiente verbena y se trabayaba enforma esclavu. Mui bien antes de qu’Albert Hammond interpretara “Échame a min la culpa”, ese afamáu cantar yá sonaba pel mundiu y tresformóse nuno de los más célebres del repertoriu de les orquestes daquella. Seique a dalgunu–y traerá más qu’alcordances o sinón que–y lu digan a Rafa Lorenzo de la que cantaba nos “Jekes”. Sicasí, que seyan pa suañar escurque y nun pa fender a naide’l banduyu.

Un maletu poesía

(foto: exoterismo)

Camín, camín del futuru,

qu’enantes lu vía claru

qu’anguaño se tornó escuru,

con menos perres, más caru.

Trabayara media vida

nel meyor bancu del mundu,

atropando una partida

pa nun finar vagabundu.

Agora tien valir nulu,

de pocu sirvió aforrar,

nin val pa llimpiar el culu,

ese papel Popular.

Lu que nun gasté aforrara,

foi’l mio mou de vivir,

pa nun vivir pola la cara,

yo nun pido repartir.

Dicen qu’a lo fecho, pechu,

nin siquier la tinta debo,

colo qu’asoleyo a trechu,

nin pago l’agua que bebo.

Encamentóme un collaciu,

que meyor mercara obres,

magar lo pensé despacio:

mientres yo escribo, tu cobres.

Y me dediqué a la ruina,

anque cola tiesta alta,

llixeru como la fuina,

una fuina que nun valta.

Nada val esmolecer,

si ta ún predestináu;

si acaso vuelvo a nacer,

nun pondré cebada al rau.

Y cuando me llegue’l día

del mio caberu viaxe,

un maletu poesía

llevaré por equipaxe.

L'alma se serena

So dos bancos solitarios

esbariaba la seronda,

la flor perdió los ovarios,

la fueya nel pisu abonda.

Nublina qu’auquiera pinga,

el día compón de gris,

cimblando cala la blinga,

anda arrequexáu’l malvís.

Amiesten el verde y cielu,

n’invisible y sele xugu,

d’otoñu l’ambiente y suelu,

l’ensugo nun topa ablugu.

Mentanto l’arbol perenne

desgüeya de la risión,

peles sos cañes, per ende,

col aire, col ramascón.

Ye la humedá arrechada

que pinga en solhorru y vanu,

qu’aporta na tambascada,

que fina con otru branu.

L’alma l’home se serena

escucla nel corredor,

la llaceria torna a pena,

asela murnia en mugor.

Naide prenda más la yesca,

pa esfrutar siempre esta calma,

si anecia n’arder la viesca,

cola vida, ambura l’alma.

¡NUNCA MÁS, NAIDE AMARRÁU!

Falsu amor a la guapura,

nun hai afeutu ensin ciñu,

miremos pa la llocura,

que nada s’igua ensin piñu.

Nun ye solo en siquiatría,

ye tamién na residencia,

s’escucla nel día a día

y se pierde la decencia.

Ayeri foi la mio ma,

pueque seyas tu, mañana,

cuando la salú se va,

la vida ye a teyavana.

De la qu’algames a vieyu,

suel asoceder davezu:

si lu alviertes, ruempe’l reyu,

al topar col escaezu.

Boques abiertes al cielu,

esnudos aforfugando,

nin gabitu, nin consuelu,

mientres la fin va averando.

Futuru de caricós,

amarráu pela moñeca,

somos víctimes de nós

que tamos como una teca.

¡NUNCA MÁS, NAIDE AMARRÁU!

más respetu colo humano;

si precisa más curiáu,

s’aporta sofitu a mano.

Nel requexu claru

Del mio cuartu nel requexu claru,

onde fixo furacu'l taladru,

colingando de muria al so amparu,

yá víase'l cuadru.

¡Cuántes perres me llevara l’amu,

y nun sé nin quien ye esi paisanu,

que-y merqué de la que punxi’l ramu,

güei escucla ufanu!

¡Ai!, ¡madiós!; ¡si yo escribo la ruina

qu’asoleya del fondu la mio alma,

so la voz d’un gruñíu de cuina:

<<tu de fatu bien lleves la palma>>!

¡Nun quexiquéis!

     Non, ¡nun quexiquéis!, nun hai porque remanecer en casa viendo telebasoria n’horariu de guah.es por mor de que la ufierta de bienes culturales sangrinos ya otros repunantes espectáculos ye bien bayurosa… A min, préstame más deprender daqué, escribir, caleyar, sentir sones o echar un cantarín. En reduñes d’ello, decatárame de que nel YouTube amuesen una montonera de karaokes del cantar de la Llibertá de Labordeta, pero nun atopé nengunu del que diz que dende tiempos a esta parte vamos camín de nada.

Evidencia

Entá más célebre se m’abulta esto, Natacha…

–¿Quies dicime, si te plaz, qué camín debo garrar pa salir d’equí?

–Eso depende munchu d’a ónde quieras dir –retrucó’l gatu.

–Poco m’esmolez au dir –aldericó Alicia.

–Entós, poco importa’l camín que tomes –aneció’l muxu.

Vien tamién a cuentu de la entrada anterior, collacios, por culpa de qu’eso mesmu nos pasa a nós.

¡Qué coime pasa equí!

–SE TORGA de CANTAR, BAILLAR y TOCAR LA GAITA–

     Tenemos un trazáu ferroviariu a traviés de Payares del sieglu XIX. Hai qu’aguardar al tren que xube pa que l’otru puea baxar ya en Llión vamos sero y de culu. Arriendes, col ramu de la variante, cada añu nos cuenten una trola nueva.

     Cola seca, tolos años quemen media Asturies y cuasi que nun prinden a naide.

     Autoricen a furar per tol occidente col envís de que llanten más mines d’oru y balses contaminantes y nun consulten nin siquier a los vecinos.

     La nuesa llingua, el padre del castellán, qu’esistía enantes d’este y enantes de qu’esistiera España, en pura diglosia, a la trágala pol artículu 143 y en agraviu comparativu coles llingües d’otres nacionalidaes.

     Equí, los paisanos soporten l’impuestu de socesiones que nun carecen n’otres autonomíes; mentanto, delles saquen porgüeyu fasta pa roblar los presupuestos.

     Dexábennos tocar y cantar na Gascona ya entamar concursos de tonada pa que seyamos a escaecer, pero agora multen a una banda de gaites por tocar al albentestate. ¿Qué va ser lo qu’entra, desaniciar les fiestes de prau?

     Pa dalgunos ta perclaru que toos somos iguales; magar qu’unos más iguales qu’otros y nós talamente echamos pelo, yá que somos malapenes: NAIDE.

N'estinción

      

     Hai quien diz que los colexos madrilaños ya otros de delles ciudaes españoles tan enllenos de foriatos. Los qu’esclarien que los neños son neños tienen abonda razón; arriendes, la mayor parte son españoles. Los que son foriatos son los sos pás; magar que munchos yá tean nacionalizaos. Yo, que crucio Madrid davezu, veo que ye asina. Por culpa d’ello, presta ver dacuando en vez a los fíos –o fíes– de dalgún castizu de raigañu que, como nós, quiciabes s’alcuentre en procesu d’estinción.

De comunión per Granada

     Va ser verdá lu que dicen de que’l mundiu ye un pañuelu, Viri (Llar de Viri). Tuviera na comunión del fíu d’una sobrina en Granada ya’l día siguiente xintamos nel Oleum, ¿qué te voi dicir d’ehí que tu nun sepas? Sí t’esclariaré que’l to bon collaciu, Gregoriu García, al que yá conocía, ye un bon amigu del mio hermanu mayor, arriendes de vecín de la cai San Antón d’esa ciudá. Pa quien nun lu conoza, Gregoriu, l’amu del Oleum, ta mui venceyáu a Asturies a onde vien davezu y suel mercar productos asturianos qu’acarreta pal so restorán, sobre too del rodio de la faza de Grau. Amás, tolos años igua unos afamaos alcuentros gastronómicos onde amiesta lu meyor de les cocines asturiana y granadina.

El gatu con madreñes

    Ello foi una vez que morriera’l molineru’l reinu y dexara como heriedu al redrueyu de los sos fíos un cabañu esbarrumbáu ya un gatu malcuriosu, mientres que'l restu de los sos hermanos tuvieren muncha más suerte. El fíu pequeñu quixo abandonar al gatu o si acaso comelu como cachopu mixín, pero pa la so sorpresa’l gatu fala y siente ensembre. El gatu–y pide’l so sofitu, un par de madreñes ya un sacu, perxurando que–y fairá salir de la probitú. De secute, calzáu coles madreñes, pañó pal sacu les meyores fabes y berces de la contorna, y gracies a la so astucia ya arremangu ye a coneutar col rei, al que cocina’l meyor pote que papara na so vida. De resultes, quedara tan agradecíu, que–yos invitó al so palaciu, onde’l rapaz conoz a la princesa cola que se casa. Pa que seya a aguantar a esta, yá que yera abondo fata, y marche lloñe con ella–y nomen Marqués de Santarvás, algamando a vivir ricu pa siempres; mentanto’l gatu s’axunta cola gata del madreñeru’l monarca ya anguaño yá gasta madreñes ensin tasa.