¡MALDITOS!

       Enantes de les eleiciones, los mios amigos y collacios de mandrecha  espotrexaben de los mios amigos y collacios de manzorga. Enantes de les eleiciones, los mios amigos y collacios de manzorga reburdiaben de los mios amigos y collacios de mandrecha. Dambos s’enfotaben en llevar la razón según la so circunstancia orteguiana. Foi’l casu que, como aínda hai xente que s’enfocica con daquién cuando nun cavilga como él, decidí nun fadiar a naide y dar voz a los inocentes que muerren careciendo les sangrines fiestes d'esti país y que de nada-yos val aldericar porque los míseres nun quieren entender nin los sos bramíos. Talamente, como n’otres facetes de la mio vida, fuime a estrellar amestáu a los otros más de 326.000 votantes que nun algamaron representación dalguna pa ellos, mientres qu’EH Bildu con menos de 260.000 votos consiguió 4 escaños. La fin de la llaceria animal va tener qu’esperar, precisando necesariamente tantu del nuesu sofitu como’l de toles cases conceyu onde s’amañen estos sádicos y retrógados espectáculos a la vista de los propios neños.

Conmigo mesmu

        Voi semando apuntes pel camín como’l que sema pataques nun riegu siempre ensuchu. Anotaciones qu’esnalen a mercé del vientu de caín. Cuentos qu’enxamas se van a contar a neños que nun los van sentir. Relatos que nunca se van rellatar y de los que nun se va saber. Poemes que nun se van recitar porque la distraición y la costume triaren el recursu y la métrica. Fueyes que trespapelen ente la publicidá o la prensa finando de ceba pal contenedor del papel. Alcordances, allegríes, murnies, ilusiones y sobre manera sofitos a la nuesa llingua. Caleyo ente repunantes que nun s’enteren nin de lo que falen, metanes d’otros que sabríen falar magar que nun–yos peta. Pente miraes inorantes de refugu, ayén a una xente que m’arrodia d’insensibilidá. El mesmu ordenador xuniera al despreciu desaniciando bien d’escritos de la so memoria de ferralla. La mio xera va soterrando inxente d’anoxu mientres espoxiga abonda refugaya. Los medios de comunicación inoren lo nun axustao y namái’l mio silenciu remanez de la llaceria. El mio propiu fíu me riñe por escaecer un castellán que nun precisa de naide que lu defenda. La mio mano escribe con tinta d'escura inconveniencia. Adulces, la mio pallabra se tresforma puramente en aforfugu y refunfuñu. Mentanto’l vecín celebra la to valtada, el mio maxín algama la bipolaridá convenida. Mientres, anecio en falar n’asturianu fasta a les mios coraes ensin conocer siquier cuando voi rindir d’esa mala zuna.

Lluz de cultura

(Semeya de Mary Canto)

Como la farola alluma,

el llibru siempre illumina,

como resplandez la lluna

dende’l finxu’l cielu, nina.

Nesta vida hai bien de lluces

y murnia ñegru acebache,

pues topales en Per!!uces

o nel llugar d’El Bailache.

Esa lluz nos val de guía

pa refugar l’amargura,

como guía la poesía

pel camín de la cultura.

La cultura del palaciu

Miranda Valdecarzana,

adulces, sele, despacio,

s’esparde na so antoxana.

Nel biblioárbol de Grau

o na biblioteca lleo,

xunto a la placa d’al llau

que nos recuerda a Eliseo.

Lise ye como otra lluz

que remanez na contorna,

onde la sabencia esmuz

ya’l so acebache l’adorna.

Arriendes el Cubia espeya

pela faza los rayinos

d’esa lluna y de la estrella

mientres sientes cantarinos.

Les estrelles col so mantu

aporten más lluminaria

na foto de Mary Canto,

que ye de Grau emisaria.

Pente cortines de fumu

Chemtrailín, chemtrailán,

fumerinos de San Xuan,

los del rei afumen bien,

los de la reina, tamién.

Piden pan y nun-yos dan,

piden quexu, dan-yos güesu,

tol día vienen y van,

afumando monte y fuexu.

Que nun ye combalechar,

que nun quieren fumigar,

que ye agua condensao

ya un plizcu sarriu arroxao.

Que van d’equí p’acullá,

pa gastar en querosenu,

que naide aforfugue yá,

que salga a alendar el nenu.

Yo nun sé que coime pasa,

dime tu como lo ves,

sobro’l cielu la mio casa,

sobre Cueiru ya Avilés.

Chemtrailín, chemtrailán,

fumerinos de San Xuan,

los del rei chinguen bien,

los de la reina, tamién.

Los de Duque, truque, truque,

que dexara’l ministeriu,

quien lo ruque que lo muque,

que pa min ye un gran misteriu.

Pachín

    Como siempres, tenéis que me perdonar los que cumplistis años nestos caberos diez díes por nun felicitavos, pero yá sabéis que cuando marcho ando desconectáu dafechu yá que nin siquiera gasto móvil. De resultes, perdonái y davos por felicitaos.

     Foi’l casu qu’esnalé pal Vietnam y merqué esti gorín de la semeya col envís d’algamar dalguna triba d’ayuda, pero esclarióme la fema de los servicios sociales que pa los animalinos nun había nada. Yo–y alderiqué que desque nun soi probe de solemnidá nun dexan de cobrame fasta por alendar y que daquella naide nos agabitaba de nengún país del mundiu. Ella amestóme que ta axustáu asina y que les aides son pa paisanos. Despidiérame de la mentada moza non ensin enantes prometela que de la que salga otra vez me traeré dalgún disidente. Pa remate, la muyer nun quier al gochín pol arume qu’esparde, asina que –por si daquién tuviera interesáu– póngolo a la venta por 900 euros. Llámase “Pachín”, o seya “Pa Chinh” en vietnamita.

Dime paxarín parleru

Díme paxarín parleru,

díme qué fales,

col to piar melgueru,

mientres esnales.

Tienes unos ñegros güeyos,

plumes castañes,

y guapos badagüeyos

con qué m’engañes.

Dicen que’l Presi morriera,

yo nun lu creo,

miráilu a la mio vera

siempre lu teo.

Díme paxarín parleru:

¿con quién charrabes?

De la llingua, voceru,

mui bien lo sabes.

Dicen que s'inventa’l bable,

xente inorante,

eso nun ye fiable,

yo soi falante.

Díme paxarín paisanu

que nun s'inventa,

que cumplió l’asturianu,

d’años, milenta.

FALANDO

(Semeya de ROCA)

       Atopara bien de veceros de los qu’esbarrien de contino escontra la nuesa llingua reburdiando nos comentarios de LNE al respeutive de la manifestación d’ayeri en Xixón. Voi falar con “f” y namái que con “f” mentando a dellos –non toos– nos que fui a reparar anueche: Fachendosos, fadiosos, faladeros, falambaldres, falanciosos, falancieros, faldetes, faldoteros, fálicos, falifos, faligotes, falsos, faltones, faltosos, fallaos, fallicos, fallíos, falseros, fanáticos, fandangueros, fandosques, fanegueros, faniegones, fantasiosos, fañagüetos, faragayos, fardeles, farfantones, farfayes, farfullones, fargatientos, fargatones, fargayos, fariellones, fariñones, faroleros, farramplinos, farrapios, farrucos, fartones, farxoletes, farxolos, fatos, faxineros, fayaos, fechiceros, fediondos, figures, felpeyos, feltrones, ferieros, ferraos, ferres, ferretes, ferrones, ferruñentos, ferruñosos, festeros, fexes, fiascos, fiastros, filanderos, filtrayes, finos, fisgones, fiadores, fiyascos, fiastros, flexes, floxos d'aguyes, flonderos, focetos, focicones, focicudos, fogardines, fuinos, folgazanes, folgones, folguetes, folixeros, fongosos, fónicos, foniles, foranos, foriatos, forfugues, forgaxes, foriones, forres, foscos, fosqueros, francíos, frangüesos, fresqueros, frixuelos, fueyes, fuinos, fuleros, fumiacos, fungones, fuñones, furones y futes.

     Ente dichos comentarios, como siempres, nun vi nengunu nel que retrucara dalgunu de los más aludíos.

Boni, Bonita

       Cuando nos muerre dalgún pariente non afamáu cuasi naide s’entera, como nel casu de la mio ma que nun asoleyó nin les necrolóxiques de la prensa. Nesta selmana finara Albertu Cortez y toos calcamos na carina qu’esbaria llarimines del Feisbuc y foi de mou sinceru por aciu de que Bertu yera una persona mui quería. Agora que tol mundiu paez qu’ensugara’l so lloru, voi llanta–y yo tamién el mio particular homenaxe. Allá pelos entamos de los años 60 del pasáu sieglu, Bertu emprincipiaba a iguar cantares con menos conteníu que los sos postreros. Esti que vos comparto aneciaba en sonar na radio y gustaba a los rapacinos y ye qu’a los guah.es–yos presta cualesquier cosa cenciella y dannos siempres lleiciones de como nun tenemos de complicanos la vida. D’esta miente, Albertu Cortez sigue vivu nos mios oyíos de guah.e con “Boni Bonita” o “Bonita mía”.

Choyu

     Mercara esta figura na feria d’Arcu 2019 hai pocu más d’un mes por tres mil euros ya agora resulta que la muyer nun la quier. Pruyía por dir a la manifestación pola oficialidá del asturianu –magar que yo soi más de cooficialidá– el sábadu qu’entra a Xixón, pero ella me torga de gastar cuartos nesi viaxe que fadría dende Madrid puramente con esi envís. Amiéstame qu’abondo tiempu y dineru esbardio yá cola mio xera de sofitu a la llingua pa nun sacar nunca provechu nengunu, como pa marafundiar aínda más. Por culpa d’ello, asoleyo a la venta la mentada figura en namái que dos mil euros por si dalgún tratante d’arte de les brigaes antibable tuviera interesáu nesti choyu.

La pita Pacina

La pita Pacina

ya’l pitu Agapitu,

perbaxu l’ancina,

queden en pie fitu.

Con forma de ñeru,

baxo la so rama,

fuera del piteru,

llantaron la cama.

So les abiyotes,

que dacuando cayen,

–yos ven los más zotes,

que davezu glayen.

Qu’arriendes del glayu,

el cuervu o coríu,

tamién el más payu

emite’l glayíu.

Y ruempe la calma

de la soledá,

ellí onde l’alma

afayada ta.

Guaria los sos güevos,

la pita Pacina,

seis pitinos nuevos,

va ablugar l’ancina.

Radicales llibres

       Los radicales llibres son molécules inestables que percuerren el nuesu cuerpu intentando pañar un electrón al envís de recuperar la so estabilidá eleutroquímica. Por culpa d’ello, son bien peligroses, porque p’algamalu ataquen molécules estables. Una vegada que'l radical llibre consiguió robar l'electrón que precisa pa empareyar el so electrón llibre, la otra molécula camuda coles mesmes n'otru radical llibre, empecipiándose asina un ciclu destructivu para les nueses célules.

     Eso ye pura física. Lo peor de la tema ye cuando los demás radicales llibres –de toa triba– furrulen por mala química. D'esta miente, anden focicando pelos tos blogues, les tos páxines y la to mesma muria del Feisbuc pa reburdiar escontra lo que políticamente nun–yos gusta. Estos radicales puen allugase azorronaos ente les tos mesmos amigos o collacios y nunca comenten nada, esceuto cuando se–yos abulta que yeres de los otros, magar que nun lo seyas. Davezu nun garren lu qu’allugues nel to artículu d’opinión por culpa de la so inorancia, yá que nin siquier saben lo que ye un ensayu. Son los “hooligan” de la política que se radicalizaron por ella. Guarden rocea ya un odiu visceral a tol que nun cavilga como ellos ya enxamás van llograr la mentada estabilidá. Tampoco son a decatase de que los suyos tamién cuenten troles y prometen en dómina electoral delles coses que nun van cumplir. Ye’l casu qu’estos radicales llibres abonden cada vez más y me toi plantegando l'astención n'usu de la mio llibertá ensin radicalizar; arriendes de pa que nun m’engañen.

María l'Americana

Peles nueches de lluna y de fríu,

l’americana de Portugal,

al debalu pel ríu,

son ateríu,

un cantar fixo real,

que lu canta María

al querer d'un andaluz.

María ye l’allegría

y l'agonía

d’un ser qu’esmuz.

Que fora namorando

naquella tarde

del vinu verde qu’arde,

y ente palmes de fandangu

foila enredando,

llevándola’l corazón.

Y na sabla Canela

foron perder la razón,

onde’l mar ye acuarela

besó–y la boca

y amó na roca.

¡Ai, María l’Americana!

Dende Ayamonte hasta Faru

s’oi este fadu

per tol Guadiana,

au bebe “vinho" qu’ambura.

¿Por qué canta con tristura?

¿Por qué esos güeyos zarraos?

Por amores desgraciaos.

Por eso glaya, la so amargura.

Fadu

porque estraño los sos güeyos.

Fadu

porque me falta’l so aliendu.

Fadu

porque nel ríu yá a mueyu.

Fadu

porque se fuera morriendo.

Dicen que foi’l “te quiero”

d'un marineru

razón del so carecer,

que nun barcu anochando

de contrabandu

pal llagostín foi al paecer.

Yá n’avesíu del ríu

un disparu sonó

y d'aquel sufrimientu

nació'l llamentu

que l’allorió.

La mio hestoria

     Los mios pas ñacieron nun occidente entá más desconocíu qu’agora. Como nun yeren meirazos tuvieron que colar d’Asturies yá enantes de la guerra. Por culpa d’ello yo nací onde me dio pola gana tras d’una procesión del día’l Carmen. Pasé la neñez afogándome y d’escursión al Institutu Antidiftéricu. De guah.e fui a un colexu que nun amosaba placa por causa de l’amarraza. Fixi la comunión ensin algamar nin siquier a vicealmirante. Trabayé y estudié a un tiempu y me titularon de Bachiller Superior, pero nun fui quien a ser economista porque un día me decaté qu’aquello yá lo sabía ya una nueche colé de la universidá. Cortexé pocu por pura cortedá y me casé cola que me paeció más curiosa. Como yera probe, namái tuvi un fíu; sicasí, abondo más llistu que yo y que sí foi a finar delles carreres. Camudé de xera y me caltuvi trenta años en banca. Aforré ya invertí n’aiciones de la mesma entidá col envís d’aselar la vieyura, magar qu’un mal día me pañaron tol “botín” y ta perclaru que finó en Santander. Anguaño encoplo y compongo pa escaecer les mios penes anque me sal al aviesu. Arriendes, nun puedo espublizar y pa remate’l mio padrín morriera hai yá cuarenta años. Davezu ando pel monte cola intención d’alcontrame a min mesmu; pero, por puru despiste, nun faigo más que perder coses. Carecí dalgún qu’otru drama aparte que yá vos cuntaré más alantre n’otros selce minutos.

Na sidrería de Lloviu

     Siguimos esguilando al debalu pela faza baxo’l fechizu del monte sagráu d’Abantos, l’encantu de “La Herrería” y les corrientes telúriques del monasteriu de San Llorienzu. Pa que nun falte de nada, a 150 metros d’ésti, na cai Xaquín Costa, 8 a Carlos –enrazáu en Tinéu– se–y ocurrió abrir una sidrería, que quixo nomar “de Llovio”, onde xintamos. Ellí nos afayamos como en ca’l güelu dende qu’entamáramos el nuesu particular camín aniciáticu pel conceyu de El Escorial. La ufierta: sidra, llicores y toa triba de productos asturianos abondo bien cocinaos; pero, sobre manera, l’amabilidá de Carlos y tola so parentela. Arriendes, pa los vexetarianos como yo, siempres s’alcuentren dispuestos a camudar daqué del platu del día por dalgo que seyas a comer, talamente como en cualesquier otru restorán de los que me conocen pel occidente y centru d’Asturies. Nestes semeyes podéis escuclar a Carlos col so fíu Xabel (Javi) ya una de les raciones coles que me ceben (¡cómo pa quedar con fame!). De lo que nun vos vais decatar ye qu’al llombu de la so camiseta asoleyen una escomunal Cruz de la Victoria.    

Fina'l Día la Poesía

Fina’l Día la Poesía,

mañana será’l del Agua,

hai Día de l’Armonía,

y siempre un día que nagua.

Hai Día de la Salú,

tamién Día de la Muyer,

anque non de la Virtú,

nin tampoco de la Ester.

Seique lu hai de la Radio

y de Xusticia Social,

magar tea de mal fadio,

que la xusticia anda mal.

Hai de la Llingua Materna

y de la Vida Montesa,

non de la llingua paterna,

pola inclusividá esa.

Contra Discriminación

ya arriendes el del Deporte,

otru de la to nación,

ensin festexar la cohorte.

El de Llibertá de Prensa

y, como non, del Amor,

pémeque de la Defensa

ya’l de Derechos d’Autor.

Amás de la Tolerancia,

el día Mundial del Sida,

ansí, otru de la Infancia

y toa triba de vida.

Nun sabrás qu’hai del Retrete,

igual que lu hai del francés,

celebra lu que te pete,

mercando nel Tayu Inglés.

Col del Pueblu Palestín,

que se vea la xaceda,

camina pel bon camín,

que tienes qu’entrar en breda.