Master and Commander

https://www.youtube.com/watch?v=4tSq1P5pels

     Non, esta música nun la compunxo nengún Master and Commander, nin siquiera Ennio Morricone. Esti son d’esa célebre película garráronlu de la Música Nocherniega del maestru  Boccherini qu’asomaba dende la so balconada allugada a la vera de l’antigua plaza de Progresu pa sentir esi ambiente castizu del centru la capital que nada tien que ver col de güei. Anguaño al pabardu inorante que caleya pela faza d’esi Madrid de la percha (https://pindesierra.blogspot.com/search?q=Percha), si ye quien a llevantar la cabeza y decatase de la esistencia de la placa, el so nome nun−y suena más qu’a boquerón. La gran boquera ye la que carez él pola que derrama les sos contaes neurones. Nun dexéis de sentir tola composición del vidéu; sobre manera, a partir del minutu cuatro.

Rede de San Lluís

    

     La Rede de San Lluis. Munches vegaes teo baxao a la estación de metro Gran Vía −naquella dómina llamada de “José Antonio”− nel so ascensor, acompañáu de mio madre, los al rodio de 20 metros de fondura dende mediaos de los años 50 del pasáu sieglu. Creo recordar que cobraben 5 céntimos de peseta por paisanu y t'espachaben el correspondiente billete d'ascensor. El so templín, con marquesina de fierro y cristal, yera obra del afamáu arquiteutu gallegu Antón Palacios y foi valtáu en 1970. Polo qu'a min respeuta, la mayor sorpresa que llevé con esta instalación foi atopámela bien d’años más sero nun parque d'O Porriño (Pontevedra) cuando fui a visitar a un bon amigu que fixi mientres el serviciu militar n'aviación.

Laa vida ye llocada

     “Ai d'aquel que na nueite nun ve más qu'escuridá ya nella nun ye quien nin siquier a suañar”(Pinón el d’Ounón).

El probe ye de manzorga,

mientres el ricu de drecha,

l’egoísmu a costa fecha

que’l bon enclín nunca torga.

Enxamás, escontra forga,

por culpa d’un egoísmu

que raya nel fanatismu

del ruino na so llocura

por algamar la bayura,

esbariando nel abismu.

Ye verdá, pos: reprimamos

de la vida la cobicia,

la roxura n’avaricia,

por si dacuando suañamos.

Y sí fairemos, pos tamos

en mundiu tan singular,

que'l vivir va ser suañar;

y l'esperiencia m’enseña,

 que l'home que vive, sueña

lo que ye, hasta espertar.

Suaña'l rei de rei, y vive

cola engañifa mandando,

disponiendo y gobernando;

ya esi aplausu, que recibe

emprestáu, nel vientu escribe

ya en povises lu convierte

 la muerte (¡llaceria fuerte!):

¡qu'hai quien intente reinar

viendo que va esperezar

nesi suañu de la muerte!

Suaña'l ricu na riqueza,

que más curiaos−y ufierta

suaña'l probe fai en puerta

cola miseria y probeza;

suaña'l qu'a medrar empieza,

suaña'l qu'enfota y pretende,

 suaña'l que cafia ya ofiende,

y nel mundu, a última hora,

suañen lo que son agora,

magar que nengún lu entiende.

Yo suaño que toi n’arbada,

 destes cárceles cargáu;

y suañé que n'otru estáu

torgaba la tambascada.

¿Qué ye la vida? Llocada.

¿Qué ye la vida? Ilusión,

una solombra, ficción,

 ya'l mayor bien ye pequeñu;

que tola vida ye suañu,

y los suaños, suaños son.

La maletina

     Güei, la maletina de mio ma finó con toles alcordances entafarraes nel contenedor de borrafes. Nin siquiera fui quien a atopar la semeya que fixi d’ella hai dellos años. El pasáu día 15 la tambascada anubrió'l chigre, el garaxe, el trasteru ya el bañu de los baxos de la casa. Ente los tres nos encargamos d'achicar l'agua. Nun pidimos aida a naide. Siguimos baldiando y tirando toa triba d'oxetos. Como dicía Labordeta: somos xente que nun pide −namái nos pañen− y a los que tampoco-yos dan.

Nun viaxe, la mio ma,

nun garró la maletina,

¿ónde te fuisti, mamá?

¡mamá del alma, mamina!

Quedara col to remite

y col caberu equipaxe,

sobresaliendo un rebite,

yá nun dirá de bagaxe.

Seique vieno de Tinéu

ya arrequexó nel trasteru,

como insensible preséu;

na mio alma, no fonderu.

Nada vale acarretar

nin el caltenese esclavu,

nada pudisti llevar,

nada tien valir al cabu.

Fuisti probe tola vida

ya aforrasti pa los fíos,

la Comunidá ensin sida

t’arruinó en dos rescamplíos.

Al empar del sufrimientu,

que remaneció bien d’años,

que sentí como lo siento,

que siento ente desengaños.

Mamá del alma, mamina,

al to llau pa que me curies,

con xeitu y la maletina,

en suaños torno p’Asturies.

El movimientu Yé-yé

     

     Al rodio de la entrada anterior sobro la llingua francesa, los asturianos debiéramos reivindicar que’l movimientu Yé-yé d’aquella dómina nun tuvo’l so orixe en Francia o Luxemburgo, como a abonda xente se−y abulta, sinón nes nueses cuenques y de la mano de Francisca Gayarda de Mieres del Camín. Foi’l casu qu’a esta moza−y silenciaron años dempués d’igualo’l so melgueru cantar “Moñeca de cera, moñeca de son” por culpa qu’a los productores−yos sonaba mal el títulu y por aciu de que la rapaza tatexaba un plizcu al querer desplicar el significáu de la so canción: Ye..., ye… Foi por ello que plaxaron la lletra del cantar al tornala al francés y camudaron fasta’l nome de la interprete por ún asemeyáu, emburriando más sero a la nueva al propiu Festival d’Eurovisión de 1965, que ganó gracies a la xera de la nuesa paisana.

Ensin despidida pa Elías

(Semeya, El Comercio)

¿Ye qué llíes o enguedeyes?,

¿ye qu’enguedeyas o llías?,

¿dime destín cómo escueyes

trabucando con Elías?

La muerte nun tien sentíu,

namái de puru sortéu,

ye una llocura, ye ardíu,

redeña ruina, abixéu.

Suplieron escasos años

porque espurrió la so xera

pente collacios ya estraños,

fora n’ensuga o agüera.

Fora per Llan de Cubel,

fora en Tuenda o en Felpeyu;

zapiqueres en cairel

llenen el Camín d’arfueyu.

La guitarra anda alloriada,

el bouzuki con galbana,

llora Xuacu, llora Bada,

Ambás y Mapi Quintana.

Nun tuvi na despidida

candial de Los Arenales,

yá qu’esnala la so vida

col paxarín nos cumales.

Remanez nes sos semeyes

y nos sos sones, ¡carache!,

¡gadañín, nun enguedeyes!,

vémonos nel Acebache.

El tren del añu que vien

El tren d’enxamás se sabe

ye’l tren del añu que vien,

un tren que como la nave

nel olvidu se caltién.

Esi tren con mal proyeutu,

esi AVE de la trola,

ye faltosu por defeutu,

nun apega nin con cola.

Sedría’l tren de la risa,

si nun fuera pola pena

que da en cántabra cornisa,

dende la Pola de Llena.

Cuando nun peñera l’agua,

hai nel desmonte frayatu,

mientres l’asturianu nagua,

rise de nós el más fatu.

Pa la nueva torga’l fumu,

ventiladores de chorru,

pueque la qu’entra sía grumu,

¡coime, tamos fasta’l gorru!

Sacó procuru Dragaos

d’esta obra paralítica,

colos montaxes paraos,

por culpa de la política.

Selce años del entamu,

les promeses con retrasu,

equí naide llanta’l ramu,

pero sí faen el payasu.

Mentanto: Esguila Payares

o afloxa per carretera,

caleya l’escobiu’l Cares

o quédate equí con xera.

De segunda división

ye la nuesa autonomía,

ensin una dimisión,

remanez muerta la vía.

La gata de pena

Somos nós los que decidimos; sicasí, nun tenemos más derechu que'l restu de los animales.

Rufina, gata de pena,

Rufina, gata del agua,

que vive la so condena,

que de nada val si nagua.

Rufina a quien naide quier,

a la que tol mundiu inora,

de la solombra ye’l ser,

de la murnia’l cielu llora.

Coles llárimes de lluvia,

sotecha baxu’l caballu,

cavilga pente la dubia,

nunca la fiende l’escayu.

Tampoco ye treshumante,

del so llugar nun tresmana,

ta en purgatoriu de Dante

por culpa la triba humana.

Si−y supliera la fame,

morriera de la fartura,

miaga, miaga y te diz dame,

llibrando del güertu’l cura.

Como l’ama nun la ceba,

come nos díes alternos,

de lo que mio muyer lleva,

ansí aguanta los hibiernos.

Conoz abondo Espinosu,

la tristura de Rufina;

magar qu’él rellambe’l posu

del platu de la mixina.

Llorienzu Santamaría

Prietu terciopelu’l día,

pasó’l tiempu pa él tamién,

Llorienzu Santamaría,

Nueches de blancu satén.

Adulces, sele, suaves,

tamién cantaron con él,

delles voces güei más graves

d’otra dómina en cairel.

Pente esi tiempu qu’esfuma,

remanecieren figures,

surtiendo pente la gruma,

nesa plaza, perdayures.

Aquellos Juniors d’Albertu,

Sucos, Stukes, Cervales,

el pasáu a cielu abiertu

o ablugáu nos soportales.

L’Asturies rocanrolera

sofitaba al mallorquín

ya esos grupos na so xera,

bien espurrida en camín.

Ansí pa que nun olvides,

dedica−y un pensamientu:

como trescurren les vides,

como se les lleva’l vientu.

Guapa nueche d’aquel día,

tornamos a los 60,

Llorienzu Santamaría,

y siendo en Xixón, la cuenta.

¿Qué saben de poesía?

¿Qué conocen de Góngora y Quevedo,

esos que descomponen hoy en día?,

que dicen escribir en poesía

y son los señalados con el dedo

del que engaña al lector con el enredo

que se pierde por la cuaderna vía,

 monorrima razón de antología

que contagia infeliz en su degredo.

Por esa infamia atroz huyen las musas:

porque se mercadea con un verso

que libra estrofas ya patidifusas,

porque se cree poeta el más adverso,

porque de nada valen las excusas

cuando ese corolario es tan perverso.

La piedra pataca

Un día cualesquiera, en cualesquier requexu d’una tierra de llabor asturiana, alcontré la piedra pataca.

                        La piedra pataca

nin fiende nin purga

nin mete na saca

nin te da la murga.

Nin podrez na tierra

nin precisa d’agua

nin al rustir berra

nin en sartén nagua.

Nin esfrez col fríu

nin cuez col calor,

nin val pa un avíu

nin tastia’l sabor.

Nun la llambe’l xatu

nin pica la pita,

quicias el más fatu

cuente que ta frita.

Ayena a la fame,

si en dalgún peligru

s’amuesa al algame,

tasca l’embeligru.

Nun será la monda,

magar ye de traca,

nun lleva la tronda,

la piedra pataca.

Nes sableres del Llevante

     Na cabera selmana de vacaciones, la muyer ya’l fíu empobináronme a remolera a les sableres del Llevante. Ablugamos nun hotel abondo estrelláu; sicasí’l so estén nun−y valió pa torgar les tambascaes que cayeron nesos díes. L’arenal yera de morriyu ya a pocu muerro apedriáu por culpa’l folaxe. Magar qu’andaba un plizcu enfarxopetáu de xente, pel guapu monte de la redolada nun atopabes a naide. Un día, nun “gastro buffet” del pueblu, garré una gastroenteritis. El personal d’animación se m’abultaba d’inmigración y, al respeutive, sí calteníen un animador en chigre que retiraba aína los vasos animándote a chumar más. La escuridá de la nueche paecióme'l momentu más aparente pa estrenar la camiseta que'l mio fíu mercara en Bilbao hai dellos años y que’l noxu me refugaba poner al ser yá un paisanu vieyu. Tornamos con atascu, siete díes menos, ya’l que soscribe cola napia collorada ya otra montonera de cuentos ensin rexistrar.

Frente de Llevante

Frente, frente de Llevante,

ensin dar un pasu al frente,

la muerte s’afaya en plante

pa que la vida s’ausente.

L’enemigu nesos mares

dispara a los sos deleres,

viniendo de Baleares,

fierro de calamiyeres.

Nial d’ametralladores

que remanez del pasáu,

defenden trabayadores,

soldaos nel otru llau.

De la faza de calume,

el fieru cañón rescampla,

la bomba estopa ente llume,

restalla cementu y champla.

Sangre moza collorada

mez col verde de la mar,

la corada estrapallada

espárdese pel llugar.

Un destín con ruin futuru,

la derrota como meta,

condergáu ensin procuru

o cola güesa en cuneta.

Nesa España que yá arrumba,

la ilusión caye en prisión,

el búnker ye catacumba

ya espeyu de la nación. 

Ensembre too dañino,

como foi pal mio pariente,

sumió'l teniente Benino

naquel branu nesi frente.

Tres selmanes n'Asturies

      Tuviera trés selmanes bien granibles n'Asturies que me paecieron namái una. Dempués otra peles sableres del Llevante y yá, de nuevu, tornamos a la calor d’esta Villa y Corte. Como comento siempres, davos por felicitaos los que cumplistis años nesi periodu, porque yá sabéis qu'en vacaciones ando dafechamente desconectáu. De la nuesa estancia n’Asturies, destacar l'alcuentru con tolos ánxeles de la corte celestial -la mio hermanina- y la so fía Adriana (que seique llibró d'Artumisa pol so anagrama). Tamién, les dos xuntances de fala, café y churros que Cady tuvo la xentileza d'entamar, onde asistieron delles persones que yá conocía ya otres a les que nun conocía personalmente, amigues del Feisbuc. D’igual miente, más que s’averaron a conceyu, como la señora con venceyos aristócrates qu’aportara un par de llibros sobro la nuesa tierra o'l xuez exconseyeru de la Xunta de la Galiza que quería conoceme.  Arriendes, los parientes d’Alicina que s’afayaben nuna mesa cercana, a los que tuvi'l gustu de saludar. Por embargo, nada qu’amestar del otru paisanu que-yos acompañaba, que m’espetó que mui pronto yo cobraría pola mio xera col asturianu, al que-y alderiqué que por cuenta la nuesa llingua yo enxamás cobré nada y sí gasté abondo tiempu y dineru. D’otres histories yá vos narraré, en versu o en prosa, más adelantre.

Nun hai peor inorante qu’aquel que nin sabe nin quier saber de lo que fala (Pinón el d’Ounón)

La ruta del Barriu Azul

     Remanez nel aniciu la ruta esi Barriu Azul que s’escuende tres d’un contenedor de borrafes entrín y non tu vas avieyando. Darréu, atopes una Morana qu’escucla pal ruidosu prau de la fiesta que paez escaecer el rebulliciu. Castañéu llora fileres de cebolles sobro’l camín de xubida nel que Xiquín defende la so faza asoleyando los caniles. Roi lladra d’allegría pola to presencia y Grau emprincipia a allugase a los tos pies mientres qu’El Tarreiru bailla con La Matiega. A mandrecha, un horru acambáu narquia por culpa del so par de sieglos ensin querer valtar. Agora ye Rex el que se t’avera con gayola mentanto llanta les sos patones na to arca. Va entamando la baxada pente la solombra d’ablanos, castañales ya ocalitos. El fresquín afalaga la to cara ya’l llento’l terrén pon abegosu’l nun esbariar. Davezu, atopes dalguna paisana que va percorriendo l’encamientu del mélicu pela redolada. Nel altor, un escomunal xalé amuesa la so prepotencia. De secute, la ilesia te recibe impasible tres les primeres cases del cabu la parroquia. Perdayures surde pente’l rozu la máxica cirigüeña que ye a curar tolos males, como los esgatuñaos de los muxos d’Ánxeles, la mio hermanina. A manzorga, el miercedes d’escolta d'un afamáu caudiellu caltiénse al albentestate burllándose d’un tiempu que trescurre ensin piedá. De siguíu, la muria de los vieyos palacios azorrona arguta la rellumanza d’otra dómina. A lo cabero, el perru del tendal apurre la tristura de la so cruz amarráu xunto a la mesma cruz de caminos qu’aporten la fin ya'l puntu y siguíu a esti cuentu.