Corquiéu y Ribeseya

 

Taba tancáu’l Corquiéu,

el Corquiéu taba zarráu,

col so chigre ensin xaréu

y el paséu del cai cambiáu.

 

Nin siquiera un xaponés

cantaba Ribeseyana,

ye un mal añu, ye un mal mes,

col andanciu na solana.

 

Hai bien d’años que nun diba,

calteníase La Guía,

cola virxe ellí enriba

ya allá lloñe, Guadamía.

 

Equí corrí la noviada,

d’equí colara a Cuadonga,

aguantamos la boriada

y xubiéramos a Ponga.

 

Cavilgamos ente peñes,

pela faza del Infiernu,

qu’escaecimos Tereñes,

Vega y el Camín en ciernu.

 

Tornaremos otra vez,

como’l ríu pela oriella,

onde cola mar se mez,

afayando en Ribeseya.

 

Pa entós tocará Corquiéu,

anque seya n’Atalaya,

Lluci entonará d’abéu

y Pin esfrutará a esgaya.

Al presidente de Perú

Tando yo la selmana pasada pel monte sintiera que’l nuevu presidente del Perú de los peruanos espetara a los convidaos de piedra españoles na so toma de posesión que “mientres los tres sieglos que pertenecieron a la corona española esta dexó esplotar los minerales que sofitaron el desenvolvimientu d'Europa”. Ye’l casu que, como la nuesa delegación nun aldericó nada, voi retrucar yo a esi cabezaleru de tan escomunal sombreru…

Sr. Castiellu Tarrones: Los romanos, munchos sieglos enantes, yá llevaben l’oru del noroeste d'España por tonelaes ya enxamás reclamamos nada nin a los italianos nin a los suevos nin a los vándalos nin a los alanos. Anguaño, una compañía del norte del so continente páñanos l’oru y contamina la faza per onde estraye n’Asturies ya arriendes quier meter mano a la mayor reserva d’Europa occidental d’esti metal, que tamién s’alcuentra nesta comunidá, ensin que la nuesa alministración tampoco lu refugue. D’otra miente, repostia−y –por si nun lu sabe− que n’España (con cuasi 4 millones de paraos) viven más d’un cuartu de millón de peruanos ensin colonizar, más otros dellos milenta nacionalizaos españoles. Por aciu d’ello se m’abulta que, dacuando en vez, l’ala del sombreru nun nos dexa ver la viesca.

Muitas gracias

 Como vien asocediendo davezu, la censura'l Feisbuc me torgóu d'estimar a bien d'amigos la súa felicitación pol miou cumpleaños. Por aciu d’ello voi dedicar esti poema a Marcelino Marcos Lindez, José Ramón Feito Lorences, Carlos Fernández Mayo, Manuel Angel Menéndez Iglesias ya outros paisanos de Tinéu que me felicitanon daquella.

Una maraviya,

la meyor d’España,

Tinéu por villa,

Tinéu por braña.

 

Con melguera vista,

ía la más tranquila,

anicia la llista,

el conde la enfila.

 

Ía la más galana

ya la más prestosa,

s’agüeya la Fana,

la nublina pousa.

 

Ta sobro un cairel,

pero ía una estrella,

arrogante, él,

la más guapa, ella.

 

Tinéu ía historia,

sou home, valiente.

Tinéu, la gloria

del nuesu occidente.

 

Na sienda del cielu,

Camín Xacobéu,

rosada por velu,

l’edén ye Tinéu.

 

Foi dende otra data,

cola cruz por signu,

blasón del pirata

ya esti’l nuesu himnu.

 

Montes, praos ya murias,

col verde a degüellu.

Suerte ser d’Asturias,

más d’esti conceyu.

 

Sensibilidá

 Fixéronme ayeri una endodoncia y la dentista, que yera abondo moza, tuvo qu’espetame tres veces l’aguya pa inyectame otres tantes l’anestesia y de resultes abuitame enforma la quexada. Darréu, la sida de la odontóloga dexóme entá más ablucáu y cavilgando: “Tien que me perdonar, pero ye que nun soi a finar cola so sensibilidá”.

 

Paeza bien o paeza mal,

ensin nenguna elección,

vacúnase nel Zendal

a esgaya de población.

 

Ellí nel mediu de nada

y abondo mal señaláu

llega la xente a porrada

y aparca nel escampáu.

 

Pa torgar la nueva fola

va con paciencia infinita

al Zendal a facer cola,

onde−y mandó la cita.

 

Alredor del so perímetru

hai percorrer un kilómetru,

tres pagar lo del taxímetru

o venir de lloñe en Metru.

 

Pa nun rodiar l’hospital,

meyor eches un pigazu

y vas de nueche al Zendal,

evitando ansí un solazu.

Alcordances de Les Alfombres

      Al campu de Les Alfombres−y llamaben campu de La Sorda al otru llau de la Castellana. Ellí pasáramos de los meyores momentos de les nueses vides. Una de les muries separtaba esti terrén de la finca de Menéndez Pidal, onde de cutiu se nos encolaben los balones. Teo prometíu dir a la fundación que lleva’l so nome p’aportar enmarcada esta poesía en castellán a la casa muséu d’esti renomáu payariegu. Bien de tiempu depués alcuérdome que’l mio bon amigu Vital, de La Pontecastru Tuña, acarretara al maestru nel so taxi y cuntárame como mientres el trayeutu aquel home menudín pruyía porque−y cuntara coses d’Asturies…

Otra vez que se ha encolado,

que se ha encolado el balón,

al jardín o a su tejado,

¡eche el balón don Ramón!

 

Que se encoló por desliz,

¿acaso no le da pena?,

como poema del Cid,

vuélvalo doña Jimena.

 

Desde el campo de la Sorda,

llamado de las Alfombras,

junto al taller que las borda,

de los muros, en sus sombras.

 

Seducido por su casa

y por el bello olivar

de vez en cuando traspasa

y allí quisiera quedar.

 

Por tanto tiempo a su vera,

como tantos que jugamos

de verano a primavera,

cuando faltó le lloramos.

 

Al pasar por esa zona,

aún hoy huele a romero,

pero el tiempo no perdona,

bien lo sabe el romancero.

 

Este paisano más lerdo

le ruega de corazón,

anclado en aquel recuerdo:

¡Eche el balón, don Ramón!

 

Morriera Mierdina

 

     Hai cuantayá que se lu alvertía: ¡Nun trespaséis la puerta porque fuera ta’l mundiu!, ¡nun trespaséis la puerta porque fuera ta’l mundiu…! Elles paecíen garrar el mensax y se calteníen per dientro de la muria, pero Mierdina foi camudando prudencia por atrevencia ya entamó a surtir cola fin d’esplorar esi mundiu desconocíu. Rufina, la so ma, paecía enfocicar por ello yá que dexó d’afalagala; sicasí, hai más d’una selmana que la so fía empecipiara, ensin cuntar con ella, a faltar a la hora del almuerzu y de la xinta. La teo visto dir con otru gatu nuevu y metese nel terrén d’enfrente. Quiciabes ellí s’alcuentra la causa de la llaceria. Dende va unos díes la muxina nun salía, nun comía y quexicaba al altu la lleva. Güei, de la que llegué, topémela muerta a la solombra una figal. Tou faía presumir que morriera envelenada. Hai bien de tiempu que se lu encamentaba: ¡Nun trespaséis la puerta porque fuera ta’l mundiu…! Lu que nun−yos esclarié ye que ta llenu de castronos.

Necios

 

Equí xaz la media España,

que morrió de la otra media,

magar caltiénse’l qu'engaña,

quien aporta la traxedia.

Torné’l día de mañana,

sin cita nun m’atendieron,

ensin naide y con galbana,

diez ventanielles rieron.

Van retocar les pensiones,

non, les puertes xiratories,

les d’accesu a direcciones,

conseyeríes ya histories.

Namái finar el mandatu

van del muérganu a la empresa,

la cuenta la paga’l fatu,

pero la culpa ye nuesa.

Siguimos creyendo troles,

somorguiara la esperanza,

ansí son los españoles,

necios ensin comparanza.

Fartu

 

Fartu yá de tar fartu yá me cansé

d’entrugar neciu al mundiu por qué y por qué.

La rosa de los vientos va agabitar

y dende agora vais veme namái suañar,

pente'l cielu y la mar

marafundiar.

 

Como una sierpe de blima y de papel,

nalaré tres la ñube pa se−yos fiel:

a los montes, regatos, al sol ya'l mar.

A ellos que m'enseñaron a esmigayar.

Soi palombu torcaz

ya un bon rapaz.

 

Nun me siento foriatu en nengún llugar,

 onde haya llume y sidra tengo'l mio llar.

Y pa nun escaeceme de lo que fui

la mio patria y la gaita les llevo en mi,

dambes les acarreto sobro la piel,

 nunca’l fardel.

 

Nun llarimes en cuenta vaya a quedar,

dístime’l gran ciñu que tu sabes dar.

la solombra que na tarde da una paré

y l’oruxu qu'a esgaya echástime, ne.

Que más pue ofrecer

una muyer.

 

Ye mui guapu partir ensin dicir adiós.

Bien sele la mirada, cruciar los dos.

Si daveres me busques, m’atoparás,

ye abegosu'l camín p’agüeyar p’atrás.

Que más da, que más da,

pequí o allá.

L'almariu musical

 

     Nun sé si daquién me va creyer, pero, de la qu’abríes l’almariu musical y sentíes el so son tan atristayáu, morríes una selmana. Pueque fora malapenes un sollutu, magar que tan apetiguñáu d’alcordances y de murnia qu’arriendes siempres finabes echando la llarimina. Mientres la moñeca bailla reflexada nos espeyos d’esta caxina de música, el to maxín tamién voltia p’acabar mariando. Llevaba una montonera tiempu arrequexada al envís de nun carecer la llaceria fasta qu’un emburrión ensin querer al paquete que l’acoricaba fixo que’l pequeñu mueble cayera pal pisu sofitando qu’entamara a sonar de nuevu pente un mecigayu de cristales frayaos. Pa mayor plasmu, la valtada baillarina aneciaba en danzar escontra la gravedá como por arte de birllibirloque.

Na Dalmáu Carles

 

Enxamás supi onde coime s’allugaba aquel tinteru baxu’l que vivíen un par de ratos que naquella dómina pidíen les vacaciones al maestru. Corríen adulces y arrémente los caberos años del deceniu de los 50 del pasáu sieglu, mui bien enantes de la que dempués cristianaron como Década Prodixosa, y tol saber del mundiu atopábamoslu na enciclopedia Dalmáu Carles. Na so terria portada, una pareya de coloríos guah.es diben camudando de grau y de posición azorronando les sos ñegres fueyes interiores, magar que na nuesa escuela nun viéramos guah.a nenguna. Nunca algamé a saber por aciu de daqué o de daquién el mio vecín, Xabel, nun viniera a aquel colexu, llibrando de les mancadures de tercer grau que solmenaba don Fidel. Tampoco, la causa de qu’estes foran homónimes a les categoríes de les cartiyes. D’igual miente y mientres aquellos años, el porqué de que Nando me marmullara que’l padre del docente yera roxu y que yo atribuyía al tonu talamente colloráu de la so cara. Sí, daquella, yo m’entrugaba munches coses –que nun s’alcontraben na Dalmáu Carles−, tantes que nun van caber nesti rellatu tan curtiu.

¿Por qué?

 (Semeya de Públicu)

¿Por qué camuden tantu de nome y de mou de facturación les compañíes eléctriques? ¿Nun será pa trabucar al propiu veceru? ¿Por qué l'afincar tantu parque eólicu esfarrapa tanta faza verde? El verde como escusa esmorez n’actualidá a traviés de puertes xiratories. Dicíen los vieyos d’otra dómina, cuando dalgún neñu nun se portaba bien, que la so vergoña yera verde y comiérasela un pullu. ¡BASTA YÁ!

Ella toca'l vigulín

 

Ella toca’l vigulín,

cuando toca ta n’ayén,

cuando nun toca, tamién

y nun s’alcuerda de min.

 

Namái repara en solféu,

solo fala col so gatu,

llantó nun marcu’l retratu

y a un tiempu nun camaféu.

 

Suel tocar cuando anochez,

fadia abondo al del terceru,

un babayu charrapleru

que riñe dacuando en vez.

 

Fora mui guapa de moza,

naide sabe d’au vieno

col so arume a xabón de “Heno”

ya una cacía de lloza.

 

Cola maleta de tela

rematada con cartón,

nun−y coyó la ilusión

nin l’abrigu la so güela.

 

Sería fía de la lluvia,

llegó cola tambascada,

yá nun recordaba nada,

lu que m’enllenó de dubia.

 

Nun tuvimos en Venecia,

porque güel munchu a purín,

ella toca’l vigulín

y siempre fuera mui necia.

 

 

Memoria histórica

 

La memoria histórica dacuando ye curtia, por aciu d’ello nun convién escaecer…

Pallabres clave:

Estaos Xuníos, focicu, Maine, Cuba. Anguaño, otra vegada, España – Marruecos: 2.

 

Nesti mundu tan mundial

tien la razón el que manda,

les armes y el capital,

Bilderberg y la so banda.

Vidalita de Lita

 

La vidalita de Lita

es vida de cordobesa,

de esa Córdoba bendita,

donde Argentina te besa.

 

Cubierta de Catamarca,

Buenos Aires a la orilla,

La Pampa como una albarca

y el gran Valle de Punilla.

 

Es la llanura pampeana,

también la Mar Chiquitita,

con su ascendencia asturiana,

que llena de orgullo a Lita.

 

Mujer que nunca se arruga,

amante de la familia,

ampara alguna tortuga

y un carácter que concilia.

 

Ella es guitarra y canción,

así es la vida de Lita,

siempre todo corazón,

dulce como vidalita.