VACÍU LLEGAL

     En Madrid, delles viviendes foron ocupaes polos sos mesmos propietarios. Ante lu abegosu del casu, por culpa la llaguna llegal afitada, tan estudiándose midíes pa-yos aventar primeru de torna-yos los pisos otra vuelta. Mentanto, parientes de los “okupes”, plataformes “antidesahucios” y fuerces d’estopa vanse de farra.

Lu que'l vientu se llevó...

La editora del vientu,

llevóse los poemes,

rellatos y algún cuentu,

y me dexó les penes.

Agora cuando sopla,

aguardo lo imposible,

que torne cualquier copla,

daqué valoratible.

Magar que seya mudu,

el so soplíu xordu,

col aire nun camudo,

nin en domingu gordu.

Coló col mio procuru,

pañárame’l mio versu,

dexóme’l cuartu escuru

y el mio maxín inversu.

Tocárame la rifa

d’aviesu al mio llabor,

el premiu la engañifa

sume en ordenador.

Asitio nel vacíu,

atrapáu nesi buecu,

de falcatrúa, fíu,

col xeitu tibiu y secu.

La llárima la ensugo

con una fueya en blancu,

anque frayáu pel xugu,

llevántome de bancu.

Zarapiqué en morriyu,

nun foi na mesma piedra,

valtara sobro’l tillu,

firíu d’otra guerra.

Batalla’l desaniciu,

enllena de cadabres,

que nun quexo de viciu,

afuego nes pallabres.

¡P'Alemaña!

     El Gobiernu del Principáu autoriza la gueta d’oru, plata y cobre sobro 85 millones de metros cuadraos  de Valdés y Tinéu…

Se m’abultaba velea,

pero tornen a la carga,

el que dulde que lu llea

nesta novedá amarga.

Cree dalgún cabezaleru,

asitiáu nel Principáu,

que too val por dineru

o qu’Asturies ye’l so prau.

Rogái con un miserere,

una rempuesta divina,

sinón, un quesu de gruyere,

va paecer la Tierrina.

Ensin un rispiu procuru,

furarán pel occidente.

Tres esparder el cianuru,

tendrá que colar la xente.

¡Coime, malaya, demoru!,

aniciaron en Boinás,

envelenando pol oru

y yá van polo demás.

Si daquién nun-ys pon torga,

-yos retruca ya-ys fai cuellu

a estos que van de  manzorga,

vamos finar sin resuellu.

Que camuden el cartelu:

“Paraísu Natural”,

será infiernu’l nuesu suelu,

per culpa’l lladín metal.

Ensin mala baragaña

y yá con too encetáu,

colaremos p’Alemaña

a cuenta del Principáu.

Ensin TPA

     Tuvi estos díes santos en Grau. Ellí nun teo conexón cola Rede; asina que si daquién cumplió años en Pascua que se dea por felicitáu. Como siempres, atopé una montonera amigos y pasé’l tiempu encantáu. De la qu’agospiaba en casa, como tolos que moramos lloñe, prendía davezu la TPA. Foi’l casu que, como nes televisiones de Madrid nun s’algama a acolumbrala, pos merqué una n’Uviéu y l’acarreté pa esta Villa y Corte.  D’esa miente, camudéla al llegar pola de la sala y ¡Coimes!, nun lu vais creer pero equí yá nun s’agüeyaba. De resultes, ando abondo enfocicáu por culpa de qu’esta mañana nun fui quien nin a ver Los Bolechas. 

GRAU

Voi pa Grau, voi pa Grau,

y aquel que me reconoza,

que nun mire pa otru llau,

que nun voi quita-y la moza.

De la que crucio la ponte,

siempres cuco los coríos,

dende’l corredor, el monte,

y p’atrás, los amoríos.

Cuando almuerzo nel Exprés,

compongo como’l más curru,

tres d’esi cristal me ves,

escribo ente churru y churru.

Pasio pel fluvial paséu,

caleyo cais y places,

peles fiestes, toi d’abéu,

y merco en mercáu, fogaces.

Lleo llibros n’asturianu,

apingayo tres la xinta,

estréllome pel ventanu,

con un paparáu o pinta.

Voi dicivos, d’otra miente,

que, nun requexu, m’afayo,

escontra’l pueblín d’enfrente,

que lu llamen San Pelayo.

Fago marches, fago rutes,

dacuando xubo al Pedroriu,

esfruto si tu disfrutes,

davezu algamo’l Casoriu.

Falo con tolos paisanos,

tamién con toles paisanes,

ellos son abondo sanos,

elles son enforma ufanes.

Ando d’aquende p’alluende,

xubo’l cuetu, m’echo en prau,

aliendo con tol qu’aliende,

esi raigañu de Grau.

L'amuesa una Tierra.

Mentanto otros la emporcaben,

él la iguaba más ayalga,

benditos los que mercaben,

bona alcordanza-ys valga.

Cachinos ñegros d’Asturies,

ñegros de nidiu acebache,

sacáu con mui bien de curies,

tresformáu en cachivache.

Cachivache de bayura,

bayura con puru arte,

procuru na compostura,

que güei Lise nos comparte.

Xurásicu nes tos manes,

ye proteutor, ye la cigua,

perendengue, esparabanes,

la nuesa cultura ambigua.

Cascoxos y caparines,

un fósil nos medallones,

en fueyes y floriquines,

aniellos y corazones.

Ye l’ amuesa d’una Tierra,

un paisax, nueche y estrella,

qu’abluca per cualquier cerra,

brava, folixera y bella.

Seique Lise nun marchara,

ta con nós nesa so xera,

na pieza escura qu’iguara,

que relluma primavera.

Vas decatar pela breda,

si t’averes equí a Grau,

na contorna de La Preda,

lu vas sentir al to llau.

Elexía al aviesu

...Vas posar na pescal de la mio era:

pelos arrecendores de les flores

brotará la to alma truebanera

d'anxelicales mieles y llabores.

Frayando los caxellos y les rexes

con dellos ablucaos escritores.

Xuntos a la solombra de les texes,

llibrará la pallabra al nuesu llau

en riestres de cebolla pente fexes.

Ansí’l Peritu en Lluna escarceláu,

alitará en estrofes bayuroses

espardiendo aquel versu entós truncáu.

A les alaes almes de les roses

de la peral de nata, torna al ñeru,

que tenemos falar de munches coses,

compañeru del alma, compañeru.

Nun día cualesquiera

Nun día cualesquiera,

d’iviernu trabucáu,

llegó la primavera

a la pescal y al prau.

De trinos y de fueyes,

na viesca tomó’l mandu,

triñía nes oreyes

y afalagaba’l pandu.

A calecer el ríu,

aínda nun foi quien,

pos aguantaba’l fríu,

se caltenía bien.

La tarde de solombra

enfrescó la vallina,

reverdeció l’alfombra,

supliendo lluvia fina.

Mañana otra engarrada,

de ñube, sol y vientu,

de marzu, marmerada,

de brotar, otro intentu.

Alcuentru d’estaciones,

igual que tolos años,

restolen emociones

y espierten nuesos suaños.

Nun día cualesquiera,

vas alendar l’arume,

de flor de primavera

y de natura’l zume. 

TENDAL D'ACACIES

Calderu apináu de ropa,

que fora llavada a mano,

cuerda endolcada d'estopa,

qu’acarretaba’l mio hermanu.

Les pinces, nun fardelín,

sol mio brazu, aquel barreñu,

pesaba mui poquiyín,

por mor que yera pequeñu.

Camín pindiu les acacies,

percorríamos la cai,

facíamos acrobacies,

escalabramos namái.

Tres arreyar el cordel,

con arremangu y vería,

tendíamos el mantel,

les sabanes, la toquía…

La mio ma que tresportaba

el balde de mayor pesu,

cuando la ropa colgaba,

nos daba a los dos un besu.

La lluria, de caña a caña,

la muda prendida cuelga,

na piel, la calor españa,

el tiempu nun dexó buelga.

Nel valtáu de d’aquel estanque,

empantanao pol morgazu,

que caltenía l'atranque,

un neñu frayó un costazu.

Un socesu entá m'encrespa,

darréu, al mover un cantu,

seique aguiyóme una griespa,

enllenándome d'espantu.

Aportaba algún amigu,

quiciás una neña nueva,

sestaferiaben contigo,

furando’l fuexu o la cueva.

Páxaros y caparines

volaben como les hores,

ente plantes y florines,

nes tardes engañadores.

El sol remató’l trabayu

ensuchó la tendalada,

al tornar de tayu en mayu,

la xera taba finada.

D'acacies, yera’l tendal,

colada de gran estima,

alcordances d’un chaval,

de la so candial mamina.

Inorantes

(Semeya, Forges)

¿Nun vos decatarais de lo inorantes que son tolos que nun voten a los nuesos?

Día Mundial de la Prosa Poética

     El destín m’averó a Grau. Na so “Aula de las Metáforas” tolos díes podríen ser, como güei, DÍA DE LA POESÍA; namái hai que peñerar ente l’ufiertáu  y entamar a lleer…                                                                                                                                                        

Nesti mundiu tan brutal,

hai un día, sólo un día,

que va ser día mundial,

Mundial de la Poesía.

Poesía al por mayor,

ya otros díes, l’escaezu,

si partimos ye meyor,

si aportunamos davezu.

Si esnala la nuesa alma,

si nos valta’l corazón,

si la primera, con calma,

si l’otru, con emoción.

Si lleemos mui adulces,

somorguiando na llectura,

si col to versu m’endulces,

nos va prestar de llocura.

Refuga yá’l topicazu,

condiciona como yes,

como viaxar nel plazu,

ufiertáu nel Tayu Inglés.

Que la to moza curiosa,

con  llabios de carambelu,

ye fermosa como rosa,

que les estrelles del cielu,

que la mar del calamar,

que si'l sol, que si la lluna,

dexa ya d’aporfiar,

con esa verde aceituna.

Ita, itu, papó un pitu,

ina, in, comió un pollín,

que si l’amor ye benditu,

y el to fíu, un serafín.

Azu, aza, atu, ata,

on y ada, ona, ida,

la to moza ye una fata,

te tien la zuna comida.

Escribe lu que te pete,

pero, ¡coñu!, ensin ser ñoñu,

el deprender ye l’ encete,

venga manín, nun yes soñu.

L'ECLÍS

Anque nun se ve l’eclís,

tamos toos eclipsaos,

yá que polo que dicís,

andáis toos bien frayaos.

Si nun miramos pal cielu,

nun vamos ver les estrelles,

si traes melendrín el pelu,

traerás roxes les mexelles.

Ye por culpa de la nube

o eses estelaes que ves,

qu’anden tamién pel You-Tube,

seique, “chemtrails” en inglés.

Quiciás pola Llei  Mordaza,

al par, por culpa’l PP,

o daquién que metió baza,

arriendes, de mala fe.

Pue que combalechadura,

pue que secretu d’estáu,

pue que por culpa del cura,

o peor, del obispáu.

Fixéronme mercar gafes,

unes gafes especiales,

nuna campaña d’estafes

y nun ves nin les chavales.

Como la pila de Tesla,

refugáronlu n’España,

al sur y al norte del Esla,

el que nun prinda, t’engaña.

Esti eclís ye una engañifa,

güei la pegaron col sol,

mañana con una rifa,

la novedá ye farol.

Añada de la neña roxa.

Añada la neña roxa,

que relluma nel escuru,

que ri y enxamás esnoxa,

nin esmolez el procuru.

Dormi, dormi, la mio neña,

dormi, duérmite’l mio sol,

ea, que naide la reña,

apagái yá esi farol.

Ea que ximielga’l mezu,

ea, marmulla la Xana,

ea, que dormi davezu

y esperteya na mañana.

Colinga’l colingaderu,

el to esbardu ta emburriando,

aserrín del madereru,

aserrán que tas suañando.

Suaña que suaña anxelín,

suaña querubín del cielu,

esnala col Ventolín,

da-y un chuchín al to güelu.

Rúa que rúa l’arrullu,

rúa que rúa con ciñu,

dormi que dormi’l mio arguyu,

al mio abellugu, cariñu.

Dormi, dormi, mio estrellina,

lluz de la lluna llunera,

dormi la mio rapacina,

neña roxa gayaspera.

Na universidá

     Prudenciu tornó a la universidá, 33 años dempués, col envís de que-y devolvieren siquiera lu que pagara de tases yá que nun foi quien a exercer y naide-y alvirtiera n’almisión que nun diba a tener salida.

     (Podrá paecer una comedia; sicasí, hai dellos seutores de raigañu familiar nos que malapenes daquién ye a introducise y si trabayes pa ellos ye talamente cuasi que como esclavu).

I Festival de Poesía de Xixón

       La celebración del Día Mundial de la Poesía, el próximu 21 de marzu, va sirvir como exa pal estrenu d'un nuevu alcuentru poéticu: El Primer Festival de Poesía de Xixón “Sollétrame Poesía”, qu'entama'l colectivu artísticu-cultural Musa Cafeína xunto a la conseyería de Cultura del Principáu. El Día Mundial de la Poesía va aniciar na Casa Natal de Xovellanos cola sesión "Poesía Llingua", na que van intervenir poetes habituales. Poesía al por mayor. Enantes, el sábadu 10, menú poéticu a 19 euros. Talleres qu'igual son a iguar estrofes nel paralelu y a faer l’equilibráu de versos, de xuru qu’ensin rima. Vidéu poesía con memoria salina y pa remate, nel Fervedor, sesión de “Poetry Slam-Micro Abiertu”. ¡Demasiáu pa la mio cadarma! Magar que, valoratible.

     ¿A esto sí diz “sí”, Rubiera?