La distancia (a los mios deleres)

Nunca más sentisti tu, falar de mi,

anque yo siguí, pensando en ti,

de toa esta murnia que quedó,

tanto tiempu yá pasó

y enxamás t'escaecí.

Cuantes veces pensé que tornaría

y dicite que’l mio amor nun camudó,

pero'l mio silenciu me torgó

y na distancia muerro día a día,

ensin sabelo tu.

El restu d'esi’l nuesu amor finó,

bien lloñe y aventáu uquier que voi,

viviendo nel pasáu aínda toi,

anque too yá camudó,

sé que nun t’olvidaré.

Cuantes veces pensé que tornaría

y dicite que’l mio amor nun camudó,

pero'l mio silenciu me torgó

y na distancia muerro día a día,

ensin sabelo tu.

Cavilgué dexar d'amate d'una vez,

resultó mui abegosu y carecí;

si daveres, amor, pienses en mi,

ten presente si entemez

 a esti que nun t’escaez.

Cuantes veces pensé que tornaría

y dicite que’l mio amor nun camudó,

pero'l mio silenciu me torgó

y na distancia muerro día a día,

ensin sabelo tu.

El Premiu les Lletres

Si te cuento un par de cuentos,

tienes que dame un chuchín,

qu’al inventor, por inventos,

-y repleten el faxín.

Si rellato’l mio rellatu,

tendrás qu’alvertir de mano,

que nun ponga cara fatu,

el magüetu del to hermanu.

Si te lleera un sonetu

primero esclaria al to pá,

que guarde un plizcu respetu,

que nos tercetos se va.

Si xuxuriu a tos oreyes,

procura aguantar de rir,

si acaso faigo cosquielles,

qu’entós nun soi a siguir.

Si a la to ma nun-y presta

un poeta muertu fame,

voi aporta-y una cesta,

con tarucos a so algame.

Si-y chinga al to pariente

que soi llistu col encople

y nun pue fincate’l diente,

si fora a soplar, que sople.

Cuando me dean el Premiu,

de la Princesa d’Asturies,

si allegues con tol to gremiu,

t’encamiento que-yos curies.

Que nun me fadien el día

y que tean calladinos,

qu'a cuenta mio poesía,

-ys van a invitar a vinos.

Poemes y Suaños de Pindesierra

http://www.authorstream.com/Presentation/yciar-2488714-poemes-sua-os-de-pin-sierra/

La Caridá

(Otru enfoque)

¿Nun se llee nesti país porque nun s'escribe, o nun s'escribe porque nun se llee?

¿Nesti país ye precisu ser taurín pa ser dereches o ye precisu ser de dereches pa ser taurín? o, entá más importante, ¿ye necesariu ser taurín y ser de dereches pa ser español? Esperanza Aguirre cree que los antitaurinos son antiespañoles. ¡Y un cuernu, Sra. Condesa! Usté ye una grande d'España, pero ente los ruinos y los caritatibles tamién hai españoles. D’otra miente, la Fe sí ye una virtú teologal, pero yá duldo de que la Esperanza lu seya, como nun lu ye la crueldá, señora grande, qu’abúltaseme trabuquen vustedes cola Caridá.

Plantes d'Agustín

Quieren algamar la llinia,

eses plantes d’Agustín,

pa falar con Abisinia,

o quiciás con Carbayín.

Ye que cortaron la suya,

cola fuelga Movistar,

magar que nun meten bulla,

toes pruyen por falar.

Que les plantes tamién falen,

pallabres que lleva’l vientu,

que con esi vientu esnalen,

se sienten col pensamientu.

Elles son como muyeres,

si’l teléfanu-ys falta,

van enfocicar daveres,

¡que-yos dean aína l’alta!

Toos taremos tranquilos,

el güelu, el pá y el fíu,

si furrulan los sos filos,

nun paguemos el coríu.

RESTALLU

     El Día les Lletres ye un día mui guapu y folixeru. Ye un día de tocar la gaita y recitar poemes. Ye un día de bonos y cabales procuros, como’l de Navidá. Ye un día nel que siempres asoleya dalgún personaxe afamáu y s’amuesa tamién dalgún otru de cualesquier muérganu oficial o académicu. Ye un día de xuntanza pa pidir la oficialidá y ¿dempués qué? A siguir falando castellán el restu los díes. Yo, de la que voi per Asturies, falo davezu n’asturianu, magar qu’haya xente me mire torcío. La nuesa llingua nun espoxiga porque namái un día al añu reivindiquemos esa oficialidá a la que tenemos derechu. La nuesa llingua remanez y desendolca falándola toos de contino y emburriando asina a l'Alministración a esi reconocimientu. Sinón, van siguir riendo de nós.

¡LLIBERÁI a LULO!

     Un pidimientu ta garrando puxu na Rede:

     Pindesierra emprincipió esta campaña. Calca nel ESCHANXE.Org y robla.

     Foi’l casu que Lulo, de la qu’entrara a mercar nun hipermercáu nel polígonu de Roces, agüeyó una moza qu’espublizaba nel so chilecu: “TOI EQUÍ P’AYUDATE”. Darréu, garróla y la llevó pa Cangas pa que-y echara un gabitu al catar les vaques. Por culpa d’ello-y prindara una patrulla de les fuerces d’orde.

     ¡FIRMA ESCONTRA LA PUBLICIDÁ ENGAÑOSA Y POLA SALIDA INMEDIATA DE LULO DE VILLABONA!

     Yá atropamos 1256 firmes, fáltannos 354 pa les 25.000. 

El Gaiteru II (Xabel Coppula)

    El xuez da la razón a El Gaiteru, que nun tendrá que camudar les etiquetes y nin siquier de gaita.

     S'encamienta tornar nos cartelos de la villa’l topónimu de Villaviciosa a Pola de Maliayo pola tema la imaxe. D’otra miente, van siguir enredando tamién col cianuru y el mercuriu de les mines d’oru.

¡RECICLÁI!

Namái con dos segundos reciclar,

sedrás poro cabal, curiosu y llistu,

mentanto dellos funden n’alta mar

los barcos espardiendo tol so esquistu.

Nun lleves entós mal ternu,

que si reciclamos xuntos,

vas pasar a ser eternu

y algamaremos más puntos.

A emporcar que son dos díes,

p’afogar nun solo instante,

lleendo estes poesíes,

esmazcares al mangante.

ESCONTRA'L VICIU

     "El Principáu esixe que la etiqueta d'El Gaiteru lleve más ruin el nome de Villaviciosa"

Por culpa la corrupción, agora van escontra toa triba de viciu, magar que seya toponímicu y perafitáu.

VACÍU LLEGAL

     En Madrid, delles viviendes foron ocupaes polos sos mesmos propietarios. Ante lu abegosu del casu, por culpa la llaguna llegal afitada, tan estudiándose midíes pa-yos aventar primeru de torna-yos los pisos otra vuelta. Mentanto, parientes de los “okupes”, plataformes “antidesahucios” y fuerces d’estopa vanse de farra.

Lu que'l vientu se llevó...

La editora del vientu,

llevóse los poemes,

rellatos y algún cuentu,

y me dexó les penes.

Agora cuando sopla,

aguardo lo imposible,

que torne cualquier copla,

daqué valoratible.

Magar que seya mudu,

el so soplíu xordu,

col aire nun camudo,

nin en domingu gordu.

Coló col mio procuru,

pañárame’l mio versu,

dexóme’l cuartu escuru

y el mio maxín inversu.

Tocárame la rifa

d’aviesu al mio llabor,

el premiu la engañifa

sume en ordenador.

Asitio nel vacíu,

atrapáu nesi buecu,

de falcatrúa, fíu,

col xeitu tibiu y secu.

La llárima la ensugo

con una fueya en blancu,

anque frayáu pel xugu,

llevántome de bancu.

Zarapiqué en morriyu,

nun foi na mesma piedra,

valtara sobro’l tillu,

firíu d’otra guerra.

Batalla’l desaniciu,

enllena de cadabres,

que nun quexo de viciu,

afuego nes pallabres.

¡P'Alemaña!

     El Gobiernu del Principáu autoriza la gueta d’oru, plata y cobre sobro 85 millones de metros cuadraos  de Valdés y Tinéu…

Se m’abultaba velea,

pero tornen a la carga,

el que dulde que lu llea

nesta novedá amarga.

Cree dalgún cabezaleru,

asitiáu nel Principáu,

que too val por dineru

o qu’Asturies ye’l so prau.

Rogái con un miserere,

una rempuesta divina,

sinón, un quesu de gruyere,

va paecer la Tierrina.

Ensin un rispiu procuru,

furarán pel occidente.

Tres esparder el cianuru,

tendrá que colar la xente.

¡Coime, malaya, demoru!,

aniciaron en Boinás,

envelenando pol oru

y yá van polo demás.

Si daquién nun-ys pon torga,

-yos retruca ya-ys fai cuellu

a estos que van de  manzorga,

vamos finar sin resuellu.

Que camuden el cartelu:

“Paraísu Natural”,

será infiernu’l nuesu suelu,

per culpa’l lladín metal.

Ensin mala baragaña

y yá con too encetáu,

colaremos p’Alemaña

a cuenta del Principáu.

Ensin TPA

     Tuvi estos díes santos en Grau. Ellí nun teo conexón cola Rede; asina que si daquién cumplió años en Pascua que se dea por felicitáu. Como siempres, atopé una montonera amigos y pasé’l tiempu encantáu. De la qu’agospiaba en casa, como tolos que moramos lloñe, prendía davezu la TPA. Foi’l casu que, como nes televisiones de Madrid nun s’algama a acolumbrala, pos merqué una n’Uviéu y l’acarreté pa esta Villa y Corte.  D’esa miente, camudéla al llegar pola de la sala y ¡Coimes!, nun lu vais creer pero equí yá nun s’agüeyaba. De resultes, ando abondo enfocicáu por culpa de qu’esta mañana nun fui quien nin a ver Los Bolechas. 

GRAU

Voi pa Grau, voi pa Grau,

y aquel que me reconoza,

que nun mire pa otru llau,

que nun voi quita-y la moza.

De la que crucio la ponte,

siempres cuco los coríos,

dende’l corredor, el monte,

y p’atrás, los amoríos.

Cuando almuerzo nel Exprés,

compongo como’l más curru,

tres d’esi cristal me ves,

escribo ente churru y churru.

Pasio pel fluvial paséu,

caleyo cais y places,

peles fiestes, toi d’abéu,

y merco en mercáu, fogaces.

Lleo llibros n’asturianu,

apingayo tres la xinta,

estréllome pel ventanu,

con un paparáu o pinta.

Voi dicivos, d’otra miente,

que, nun requexu, m’afayo,

escontra’l pueblín d’enfrente,

que lu llamen San Pelayo.

Fago marches, fago rutes,

dacuando xubo al Pedroriu,

esfruto si tu disfrutes,

davezu algamo’l Casoriu.

Falo con tolos paisanos,

tamién con toles paisanes,

ellos son abondo sanos,

elles son enforma ufanes.

Ando d’aquende p’alluende,

xubo’l cuetu, m’echo en prau,

aliendo con tol qu’aliende,

esi raigañu de Grau.