jueves, 21 de mayo de 2020

De mangonéu y censura.


Ye la España qu’entá estrema,
la qu’anecia n’amarraza,
que caldía l’odiu sema,
la qu’esfruta cola caza.

Esa que turria al vecín
porque nun piensa como ella,
la que s’enllanca en camín,
la qu’alienda con ferviella.

La que quier más al foriatu
qu'al que se caltién na vera,
na que se doctora’l fatu
y monta la escandalera.

La qu’anecia na censura
dende unu o otru cabu
en corte cámara escura
ya esquita sangre de nabu.

La que la cultura amuesa
de belén y campanariu,
que calca con norma tiesa,
fediendo’l mocu a diariu.

La de charanga y guitarra,
la de la casta y el trepa,
la que ciega la mamparra,
la que se xube na xepa.

La del inciertu mañana,
la que ceba la folgancia,
qu’empeña col tarambana,
tomándolu too a chancia.



sábado, 16 de mayo de 2020

SETENTENA

(Semeya, El Plural)

Al nun torgar la “faena”
en plaza, estadiu y vial,
medró’l mal cola verbena.
Por aciu, na capital,
carezo esta SETENTENA.

Nel mediu de la llocura,
ayén a esa escandalera,
va’l Feisbuc y me censura,
pañándome la mio xera.
¡Válgame la Virxe pura!

Nin poesía nin bable,
namái mercar o aplaudir,
cruciándome dalgún cable
al terrén nun pueo salir,
por mor, reburdio inestable.

miércoles, 22 de abril de 2020

Poemes de Pindesierra II



Quiero dedicar los mios poemes d’esta 2ª presentación, de mano a Yciar que me la iguó y a la mio hermanina que foi quien más enfotó nel desaniciu feisbuqueru de les mios obres pa que les repunxeren. Dempués, a los que se molestaron en roblar na recoyía de firmes y darréu a tolos demás que me sofitaron. Por si me viera obligáu a abandonar esta xera, ruego a tolos que m’entrugarais por si diba a espublizar dalgún llibru que m’apurráis la vuesa direición y teléfanu pel priváu o al mio corréu Pindesierra@gmail.com pa unviávoslu si más adelantre decido asoleyar dalgunu. Arriendes, de la que pasen los díes, quiciabes vaya retirando delles poesíes y relatos de la mio muria nunyos vaigan a valir a ellos.

lunes, 20 de abril de 2020

EN LA POLA DE ALLANDE de Alfonso Camín

    
Una pena que la mayor parte la xente crea
que la bona poesía ye aquella afamada que-y manden mercar los medios de
comunicación en curioses presentaciones o los cabezaleros de dellos muérganos
oficiales y qu’arriendes cubre los panfletos y bibliografíes sectaries con ringleres
prietes d’inorancia en estrofes d’engañifa.

domingo, 19 de abril de 2020

Valientes arqueros


   
    Los animalinos tomen les cais mientres se clausura’l so malfechor. Una partícula biolóxica invisible pon en peligru a tola humanidá. Un muérganu censurador automáticu feisbuqueru desanicia obres lliteraries. El plásticu sigue atropando mentanto la mar amorrenta por culpa los arramaos. Naide aporta solución; sicasí, pal primer de los casos, rogamos dende Madrid a los valientes arqueros d’Uviéu que vengan a controlar a estos de la semeya, como fixeron colos probes xabalinos.


(Tamién me torgan de llantar los enllaces a los mios blogues por aciu del so spam mental)

viernes, 17 de abril de 2020

¡VADE HAIKU!


¡Vade haiku xata zas!

FEISBUCensura,
siyos comiera l’osu
conmueyuvirus
--------------------
Nun me sofiten
losdelpuestíninALLA,
l’interés calla.

martes, 14 de abril de 2020

La conseña



- Nun hai nada qu'entender –dixo'l faroleru –. La conseña ye la conseña. Bonos díes.

Y apagó'l so farol. ¡Alón!



Y al cabo, nada debo; debéisme cuanto escribo.
A la mio xera aplico, coles mios perres pago
la fueya na que cubro −que pañáis sin recibu−
col poema que glaya’l vuesu silenciu vagu.

lunes, 6 de abril de 2020

Na cuarentena



La primer ventena de la cuarentena abultáraseme abondo murnia zarráu nesti cuartón de la Villa y Corte. El cielu pintaba entá más gris el panorama ya aneciaba en llorar la llaceria sobro les cais desiertes. Sicasí, nestos últimos díes, estenara un plizcu ya’l sol empobinó los primeros rayos d’esperanza. Ellí, nel finxu’l cielu yá azul, la cordelera ría cola novedá amosando los sos dientes blancos de ñeve. Mientres, como davezu, el Capitán Panderu zurraba les ocho sobro’l so instrumentu. Nel intre, les terraces, balconaes y ventanos aplaudíen el llabor de los sanitarios. Toos menos los de los que nun tornaron a les sos cases, los sos parientes y los qu’azorronen a los que se caltienen dientro. Dempués, los neños festexan la ocurrencia y saluden y retruquen y vuelven a saludar; sobre manera al quey llamen “Dompepito” ya otru al quey apelliden “Donjosé”.

jueves, 2 de abril de 2020

DESANICIU



Dear FACEBOOK people: You have removed at the same time from this page all the publications of the last week by and most of the previous corresponding to 12 years without any explanation. All of them are stories and poems that are offered for the dissemination of Asturian - a language in danger of extinction - totally free. I understand that this is difficult to understand for a company that offers its services with commercial zeal. The truth is that if I have made a mistake in trying to post my last story, it was because I tried several times because something did not go as I intended, or because I repeated the name of the urbanization where it was located, it was because of my meager knowledge of computer science and from their own standards. I beg you to replace them for reading by those who habitually read them. Thank you.

Señores de FACEBOOK: Desaniciaron de báramu d'esta páxina toles publicaciones de la cabera selmana por SPAM y la mayor parte de les anteriores ¡MIENTRES 12 AÑOS! ensin esplicación dalguna. Toes elles son cuentos y poemes que s'ufierten pa esparder l’asturianu −una llingua en peligru d'estinción− totalmente de baldre. Entiendo qu'esto sía abegosu de garrar pa una empresa qu'ufierta los sos servicios con enfotu comercial. Lo cierto ye que si yo cometí dalgún erru al pretender colgar el mio últimu cuentu, sía por intentalu delles vegaes porque daqué nun asoleyaba como pretendía, sía porque repetí'l nome de la urbanización onde s'allugaba, foi poles mios febles conocencies d'informática y de les sos propies normes. Ruego que los repongan pa llectura d'aquelles persones que davezu los lleen. Gracies.

miércoles, 1 de abril de 2020

Chicolates Matías López

    

     Ensin tener el billete doráu ganador como Charlie ya ensin nin siquier garrar l’ascensor de cristal volador –que bien pudiera ser el de la estación de tren−, vas poder visitar la fábrica de chicolates Matías López de El Escorial a traviés d’esti vidéu. Arriendes, hai un premiu especial que ye la mesma fábrica. Como la familia de Charlie podrás quedar en maxín a vivir nella nuna quinta dimensión, yá qu’esa ciudá del chicolate zarrara en 1964 y el terrén de la fábrica y el barriu de los chicolateros ta ocupáu anguaño pola urbanización Parque Real. Ye indispensable
pa participar n’axudicación haber tastiao esi chicolate, talamente como Pindesierra lu fixo hai una montonera d’años.

martes, 31 de marzo de 2020

A la gueta de mio hermanina



     Pente la borrina del aislamientu tamién surden les duldes. Hai unos díes que nun tenemos noticies de la mio hermanina, Ánxeles Rodríguez Pérez. Yá sabéis qu’ella ye la mio hermana por parte de la nuesa madre Asturies y del mesmu conceyu de Tinéu, que nos aportaron idénticos apellíos. La muyer ya yo andamos dafechamente esmolecíos. Nun contesta al teléfanu, nun retruca pel priváu y naide sabe d’ella. Pa remate, nel departamentu del Huca onde teo sentío que trabayaba m’espeten que nun la conocen. Toi en contautu con un garapiellu xente al envís de recibir dalguna bona novedá. Confíamos en que tou sía por cuenta d'un mal funcionamientu del Feisbuc y del propiu móvil. Mentanto, nos caltenemos a la gueta.

lunes, 30 de marzo de 2020

Nel Cuetu los Chopos



     Hubo un tiempu sele pa les lletres nel que Madrid nun asoleyaba tantos ministerios, por aciu d’ello sobraben dellos ministros. Una dómina na que pel solar de los nuevos entá corríen los caballos y se podía escuclar nel altu una llomba l’afamada residencia d’estudiantes, a manzorga del anguaño Muséu de Ciencies Naturales. Ellí, nel altor del Cuetu los Chopos, florecíen roses, suaños y poetes como enxamás lo fixeron n’España nuna mesma faza. Nesi llugar, pente los álamos, pasiaben Xuan Ramón Jiménez, Antón Machado, Rafael Alberti, Xosé Moreno Villa y Milio Prados o ríen les ocurrencies cantando al son del pianu de Federico García Lorca. Dempués, tres d’una repunante amarraza, aumentaron los ministros ya amenorgaron los poetes de calidá mientres diben enchipando tan comenenciosos como los propios políticos.

sábado, 28 de marzo de 2020

Misantropía


Tanta pita, pita pinta,
pintara pintu’l piteru,
un pitín picó la tinta
y tamién, el picatueru.

Picaron nel picalín,
pintaron la picalera,
pintó la poza Pachín,
que ye un plizcu pexiguera.

Pasó un patu persumíu
y perpintara les pates,
pescanciara pavoríu
les sos pates nes zapates.

Tola piedra y la parede
supiera del papasal,
papó un paparáu y pede
un páxaru nel pasal.

En pipando la pintura,
un pegatu de la pega,
al plasmar l’apegadura
la pegó a una paririega.

Pariera un pintu pencosu,
la paya na payareta,
como’l pitu del patoxu
o la pita Turuleta.

El páy punxo Pixuetu
pela parroquia pesllada,
pidió’l párrocu respetu
pa despintar la pintada.

Entá’l pitín pía, pía,
y la pita pinta, pinta,
postiando misantropía,
p’acutar platos de xinta.


viernes, 27 de marzo de 2020

La Graciosa II



     Daquella, los nuevos amos s'encargaron aína de retirar la última buelga de La Graciosa. Anguaño, la mio semeya ye lo únicu que queda d'ella. Tres camudar el nome, nun tardaron munchu en dixebrar caún pel so camín mientres qu'esa isla se caltién ensin encetaos ayena al presente andanciu y bien seguru que dende Pedru Barba a Caleta del Sebu ri la gracia de la cabera fechoría. Pueque esi azulexu bien valiera  pa defender a los sos propietarios de lo dañible, ¿sabrálu dalgún guanche? Pa quien nun lo recuerde, amiesto'l párrafo qu’entra colo qu'escribí nel so día sobro ella…

     “Tornaron al so orixe y paez que foi ayeri… Dempués d’una montonera d’años viviendo nesa urbanización madrilana a la vera nós, colaron camín del puertu d'Huelva colos sos dos perros, un fardel d’ilusiones y delles caxes d’aperios y ropa que malcuriosu afayaben nel escasu sitiu qu’espurría del pequeñu coche. Nél marcharon colo que rescataron del pasáu, tol so presente y los nuevos proyeutos de futuru. El barcu partiera dende Cádiz, pero a Gigi nun–y debió prestar un res arrequexar día y mediu zarráu nel tresportín yá que morrió darréu. En resultancia, La Graciosa dexó de selu tantu; sicasí, tres más de cinco años, el so baldosín entá anecia n’amosar na muria’l caberu destín de los postreros moradores de la casa, qu’aínda se caltién en silenciu. Güei, Saulu vieno de visita mientres que la madre remanez nes Canaries. Xintaron xuntos y pela tardiquina, el cuartu d’Álvarín españa en risaes al tiempu que dambos enrieden y glayen. Arriendes, la mesma estampa de La Graciosa se m’abulta qu’esboza una llixera sorrisa”.

jueves, 26 de marzo de 2020

El pangolín que nun yera


Cola so llingua allargada
vive y papa’l pangolín,
dicen que la enguedeyada
foi por culpa esti bichín.

Otros que ye l’esperteyu
el culpable de l’andancia,
yo nun toi seguru d’ello,
nun vos lo tomar a chancia.

Ensin datu aclaratoriu
qu’aporte dalgún manguán,
pueque d’un llaboratoriu,
de la provincia Wuhan,

escapara l’ingrediente
ya agora se quier culpar
como siempre a un inocente,
a un animal del llugar.

La falta ye del humanu
por faer lo que nun debe,
por xingar un mundiu sanu
o comer ensin ver sebe.

Que llueu enceta’l banduyu,
qu’hai que xintar con porgüeyu,
qu’enantes d’esti baruyu
yá tuvi mal badagüeyu

colo del Añu la Rata,
amás, rata de metal,
que diben meter la pata
ya a toos pintar mui mal.

¡Salú y suerte pal collaciu!,
que nenguno cole enantes,
d’esti compartíu espaciu,
que marchen los repunantes.