FUTURU LLONXANU

La ministra Fomentu amosaba nel Senáu la programación dedicada a Asturies nel nuevu plan d'actuaciones del departamentu fasta 2024. Ensin entrar en plazos concretos, Ana Pastor perxura que rematará l'autovía del Cantábricu y la llegada a Asturies de l'alta velocidá ferroviaria. Sobre l'AVE, esclarió que los trenes nun solo van llegar a Uviéu y Xixón. La llinia va tener un ramal a Avilés.

“Para el 2024,
que taremos nel asilu,
llegará l’AVE a Avilés”

Una comedia teatru
pa caltenenos en vilu.
¡Tamos fartos de cuplés!

EL MIO ESTUDIU DE CAMPU

Los humanos y los goriles, más cerca xenéticamente. Un grupu d'investigadores descifren el xenoma del simiu, del qu'un 15% de les sos secuencies coinciden coles de la nuesa especie (La Voz d’Asturies, vienres 9 de marzu).

¡Coime!, ésto yá lu sabía yo fai una montonera d’años. Agora toi con un estudiu de campu, afitáu nel arume del metru de Madrid, p’amosar qu'hai xente que comparte’l 99% de la so carga xenética col gochu.

La Casona Picarosu

Na fiesta de Picarosu,
si nun baillen los paisanos,
dancen melandru y raposu
pelos bardiales cercanos.

Si nun s’arma romería,
has de caltener paciencia
y saber pasar el día,
como faen na residencia.

Nesti llugarín de cuentu,
asitiáu nesi cumal,
tol mundiu fala contentu
y naide s’alcuentra mal.

Ente viesques, praos y güertes
como nun los hai n’España,
ye un paraísu en ufiertes,
con imposible asonsaña.

Onde’l tiempu ta varáu,
enredando nel altor,
columbrando tou Grau,
del cielu, nel corredor.

Allugáu nesa Casona,
a la vera los mayores,
a la escontra de la trona,
ente caleyos y flores.

Un saludo con estima
a esa talaya del norte,
de Castiella, pa esa cima,
Pindesierra, Villa y Corte.


Unviáu a la Casona Picarosu, ayeri 5 de marzu.

QUERER AL PRÓXIMU

La vida ye esencialmente igual pa nós que pa cualesquier otru ser vivu, sía malvís, güe, perru o elefante. Acordies con ello, debemos el máximu respetu y procuru a los nuesos vecinos. Non, nun tán al nuesu serviciu, ¡qué babayada! ¿Crees que son los tos esclavos?, ¿yes acasu un absolutista o un dictador?, ¿cavilgues que'l tar na tiesta de la evolución te da derechu a triar a los menos intelixentes? Al debalu, facemos eso mesmu colos de nuesa mesma especie y asina nos va. Nun precises matar pa comer nin pa vistir pero, de nenguna manera, pa gayola. Los otros collacios sufren como nós y tienen asemeyaos sentimientos, nun te creas meyor qu'ellos. Camuda la to actitú escontra estos y, per ende, escontra la natura. Refuga'l to disfraz y l'antroxu perenne de congoxes nel que te ves somorguiáu. Si vives trabucáu, recompón la to vida y busca la so compañía, non la so utilidá, vas ser más afayadizu y estimaránlo los inocentes; d'esa mena, vas entamar a querer de sópitu al próximu.

DEPRENDI ASTURIANU

Locuciones alverbiales de llugar:

a la vera, al llau, al par, a lo baxero, a lo cabero, a lo cimero, a lo fondero, de cote, escontra de, de la mano arriba, xunto a, etc.

Locuciones alverbiales de tiempu:

a vegaes, al empar, allá una vegada, de contino, de cutiu, de cuando en vez, de ralo en ralo, de secute, de xemes en cuando, nel intre, etc.

20 Minutos y España, güei; Sudamérica y Comunidá 20, ayeri:

JOSÉ RODRÍGUEZ PÉREZ. 03.02.2012

¿Nos hemos vuelto locos? Con 5 millones de parados, con profusión de salarios famélicos, con pensionistas congelados, con condiciones laborales cada vez más infames, con licenciados en prácticas sin cobrar un euro, con subidas exponenciales y abusivas en servicios como la luz o el gas; hoy 3 de febrero, leo con estupor en su diario: Wert aumentará las ayudas a los toros para considerarlos 'Patrimonio Inmaterial'...

Esta es mi respuesta contra las subvenciones a la tortura animal:

SONETO PARA LA ABOLICIÓN

Asoma, desalmada, la cuadrilla,
irrumpen, tras su rastro, monosabios;
desplegando la ira entre sus labios,
aplauden los crueles de la villa.

Su fiesta, torturar a un inocente,
las varas, banderillas y estocada
desangran; dando muerte con la espada,
en salvaje espectáculo inclemente.

Azuzan, sin la mínima cordura,
para que, quien designan por maestro,
linche a la infortunada criatura.

Las bestias que defienden la tortura,
cómplices del brutal guión siniestro,
a esa degradación, llaman cultura.


http://www.facebook.com/antitaurinoperu

o A 126 personas les gusta esto. / Gracias amigos de Perú, Colombia y el resto de América.

TOLOS AMIGOS Y COLLACIOS DE PINDESIERRA TAIS CONVIDAOS AL NUESU CASORIU Y A LA ESCRITURA LA PLAZA GARAXE.

De bon xeitu, tenemos el gustu de convidar a tola xente la contorna Pindesierra al nuesu casoriu y a la escritura la plaza garaxe que vamos celebrar el dolce febreru de 2012 na notaría de Prospero Trapa Ayalga, Cai de la Escandalera, 7. De la mesma mena, prestaríanos a esgaya vos allegarais a la xinta que vamos antroxar, de la qu’escotemos l’IVA, na Delegación Facienda de la localidá.

Honorina Páez Hurtado y Recaréu Ruiz Gallardón

Amestáu al romance del Cuartu la Riera del Sieglu XIX...

Col enfotu de que Ramona ya las suas collacias sigan asoleyando romances ya cuentos del cantu la memoria pa que nun s’escaezan.

Sobre’l romance Ramona,
la de la Casa d’Arriba,
voi amestar esta cona
ya qu’esbarie nesa riba.

Hai penas de sentimientu,
tamién de piedra ferrial,
las d’entamu, de llamentu;
de finxu, las del final.

Sé qu'hai penas en Casares
y en Santianes, hortolana,
surten pel puertu Payares,
fasta una tierra llonxana.

Tarazada eiquí en Tinéu,
de la que marchas d’Asturias,
l’hortolana del penéu
güel endagora qu’amburias

pelos pandos de Castiella,
nel to coche, cola pena
qu’afuega como podrella
dende’l conceyu de L.lena.

El francés

Aprendí'l francés que pue deprendese mentanto'l bachilleratu, ensin maestros nativos y ensin trespandar a Francia. La verdá ye que daqué falsiaba porque nun aprendimos enforma bien. O'l sistema nun yera l'aparente o yéramos toos mui cortinos, amás de nun poner demasiao procuru nel escuru —poles semeyes antigües— métodu Perrier. Güei, dempués de munchos llustros, siento cantares franceses y esa llingua paezme un idioma abondo guapu. Falo dalgo más qu'enantes y entiéndome meyor coles franceses que colos franceses, sobre too coles nueves. D’otra mena, Francia tamién se m'abulta bramente afayadiza. Tuvi ocasión de faer un viaxe rescamplu a París y pudi comprobar “in situ” lu que m’albidraba d’aquella y seique aporfiaba un veceru arxentín sobre esa capital: Paris, Paris ye una ciudá maraviyosa; sicasí los franceses, los franceses son unos fíos de puta...Yo nun guardo esi refugu llexendariu escontra los galos; ye más, prestaríame que s’espardiera la nuesa rellación con ellos, por culpa de qu’en toles comunidaes convién llevase bien y los franceses son los nuesos fanegueros vecinos d’enriba.

Cuentu d'Añu Nuevu

Esti nun ye'l Cuentu de Navidá de Charles Dickens, sinón el Cuentu d'Añu Nuevu, resumíu, de Pindesierra.

El día 2 de xineru, xubiendo per una cera l'avenida, crucié con un fox terrier que llevaba abasnando un cachu de la correa d'amarre, preba evidente del so fuximientu. Miré alredor por si columbraba al propietariu; pero nun había nin rastru d'él. El perru diba escontra la muria de la M-30 y el so futuru se presentaba so les ruedes de dalgún vehículu. Nesi momentu, decidí cruciame tamién nel so fatal destín y, ensin dexar de cucar al animal, busqué dalgún reyu col que fora quien a lu prender. Una caxona de borrafes d'un comerciu d'artículos de segunda mano aportóme una petrina blanca de kárate. Llogré ensobia-y cola cincha y dempués visité a un veterinariu, empecipiando la gueta de los amos. Orbayara nel riscar y la repla de les sos pates amosaba que la fuga entamárase, siquier na viéspera, el día d'Añu Nuevu.

La llectura del chip desveló que'l can venía de Valencia. Na clínica veterinaria esclariáronme qu'en dicha ciudá'l día calteníase festivu y yera'l RIVIA'l que centralizaba les identificaciones, qu'en dicha comunidá nun yeren d’espardimientu públicu. Quedaron colos mios datos y esperé una novedá qu’enxamás empobinaren. Afité al perru na mio casa y, viendo que nun comía lo que-y ufiertaba, merqué una llata grande de croquetes que tamién refugó. Saquélu a pasiar un par de vegaes nes que l'animal non yá nun m'estrañaba sinón qu’acompangaba los mios pasos como si camináramos xuntos tola vida.

La mio mañana siguiente trescurrió procurando'l contautu telefónicu col mentáu organismu ensin algamalu. Entendíme col Conceyu de Valencia, el Colexu de Veterinarios y dos proteutores d'esa provincia, anque empecipiaron la so conversación en valencianu, y lo únicu que pudi sacar en claro ye que'l perru aportara, agora, d'Alicante. L'asuntu enredábase, aldericando eses entidaes que tampoco elles podíen brindar la identificación del referíu dueñu. Dempués parolé con otra sociedá protectora y col Abellugu, dambos de Madrid, narrándo-yos lo socedío. Afayadízamente, dos moces devolviéronme la llamada; amás, esclariáronme que llograren falar col RIVIA, sicasí ésti nun topaba’l dueñu l’animal. Amestaron que siguiríen intentando l’alcuentru y que me llamaríen de la que se produxera.

La tarde del día 3 saqué al perru fasta'l parque más averáu y ellí, enantes de les dieciocho hores, decidí aína que díbemos caleyar por si los propietarios decidieren enllargar la so estancia ante'l tresmanamientu del animal y colingaren dalgún cartelu pela contorna. Apenes percorriera un kilómetru, cucando árboles, valles y faroles, cuando restalló la casualidá. Esi mesmu día, a esa mesma hora, nesi mesmu momentu y nesi mesmu llugar —que nun yera'l de la so residencia—, dos críes apegaben la so súplica per aquellos requexos: “Fox terrier blancu con pintes, respuende al nome de Tintín, sumió de casa y les sos dueñes, unes neñes de 3 y 9 años tan alloriaes...”

El casual alcuentru finara col meyor regalu de reyes que seique les rapacines suañaren, la torna del so queríu Tintín.

Navídá con gaseosa

Navidá d'un mal quinqueniu,
tres casi un llustru de crisis,
emprobecen el conveniu,
desanicien l'alcoholisis.

Colinguen menos adornos,
mentanto apaguen bombilles,
desatápense sobornos,
dexándonos en toquilles.

Estrúyese’l nacimientu,
los reyes traen enguedeyos,
y aventen, hasta al xumentu,
carambelos a los güeyos.

Nun se canten villancicos,
yá que naide abre les puertes,
avézanse, los focicos,
a perspeutives inciertes.

Chisba ensin mercar regalos,
tola xente na caleya,
condiciónennos, los galos,
y la Merkel, taramiella.

Medra la prima de riesgu,
munchos prindaos pelos boches,
la bolsa decantia’l sesgu,
inmovilicen los coches.

Nun faltando quien te time
cualquier moneda aforrada,
los d'antes de la subprime,
agora nun nos tornen nada.

Aporfien en que xuguemos,
toos a la llotería,
sicasí, nun trabuquemos,
que nun ye ludopatía.

Nós pagamos el coríu,
nun dexen nin pal turrón,
vamos torgar el rutíu,
pero non la depresión.

Nun s’escaldiará’l mariscu,
vamos comer cacagüeses,
mientres se llibra nel riscu,
nos van papar les careses.

Mas, gociái, polos pequeños,
d'una Navidá prestosa,
nun espardáis los sos sueños,
y brindái con gaseosa.

¡Qu'amarguriu!

Son les 5 la tarde, tres rapazos con pelo tortiella francesa pañen un collar del pescuezu una vieya. Los magüetos tienen otres carauterístiques, sicasí ta mal vistu falar d'ello. Naide de la contorna-y defende, y la paisana marcha alloriada. Voi cargáu como un burru y toi dalgo lloñe pa terciar no que pasó; amás, la muyer me reñe por tar de contino implicáu en engarradielles. Dalgo asemeyáu se repite davezu y los caminantes escuquen encarpazaos. Tornu pa casa ablucáu polo que yá ye una repunante costume; mentanto, alcuérdome de lu que dicía Franz Kafka al respeutu:

“Cuando unu sale a caminar de nueche per una cai, y un home, visible dende bien lloñe —porque la cai ye pindia y hai lluna llena—, cuerre escontra nós, nun lu detenemos, nin siquier si ye ruin y andrayáu, nin siquier si daquién cuerre detrás d'él glayando, dexámos-y pasar.

Porque ye de nueche, y nun ye culpa nuesa que la cai sía empinada y la lluna llena; amás, seique esos dos entamaron una cacería pa enredar, seique fuxen d'un terceru, seique'l primeru ye escorríu a pesar de la so inorancia, seique'l segundu quier mata-y, y nun vamos ser cómplices del crime, seique nengunu de los dos sabe nada del otru, y diríxense corriendo cada unu pola so cuenta escontra la cama, seique son nocherniegos, seique'l primeru lleva armes...”

¡La cuenta!, cavilgo que siempres foi asina, que naide quier saber nada, que llueu fanfarriamos... ¡Qu’amarguriu!

Namás que 7 ingresaos na proyeición de “Lu que'l vientu se llevó”

Esta tarde, y por mor del desaniciu de la publicidá en TVE, nun tuvieron qu’ingresar nos hospitales namái que 7 persones mientres la proyeición de “Lu que'l vientu se llevó”. D’esta mena, anguaño, foi quien a ver finar la película más xente que'l pasáu añu, nel qu’ingresaron una decena d’espectadores (7 homes y 3 femes) de los selce qu’acarretaren a urxencies.

La tonada y las vaqueiras, Patrimoniu de la Universalidá

Tola prensa de güei espubliza que, dende ayeri, los mariachis y los fados son Patrimoniu de la Humanidá. De la mesma mena que nel añu 2010 asocediera col flamencu, a la UNESCO y-plaz qu’agora los sones de raigañu de México y Portugal seyan declaraos talamente.

Nesti sen, y col enfotu de que muncha xente s’amieste a esta andecha, güei, 28 de payares de 2011, porque asina me peta, amueso y declaro a la tonada asturiana y a las vaqueiras, “Patrimoniu de la Universalidá”. Yá ta. ¡Alón!

Robláu: Pindesierra

Enredando na Voz

Enredando na Voz / Güei, 22 de payares

“La derecha perdería peso si los comicios fuesen autonómicos...”

¡Miániques!, a los que tean más gordos yos-vendría munchu bien.


“Fuentes de la Casa del Rey han explicado que Don Juan Carlos se ha golpeado esta mañana accidentalmente con una puerta que él iba a abrir cuando, desde el otro lado, un ayudante ha abierto para franquearle el paso...”

¡Coime!, entós ¿qué ye?, ¿qué l' ayudante, en llugar d'echa-y un gabitu, metió-ylu pel güeyu?


“Carla Nash sufrió en 2009 el ataque de un chimpancé que le desfiguró la cara...”
Hai que tener munchu cudiáu colos monos por culpa de que son los más asemeyaos a nós.

Hai que tener munchu cudiáu colos monos por culpa de que son los más asemeyaos a nós.