miércoles, 27 de diciembre de 2017

La Variante


 La Variante, sí;
 la Variante, non; 
 va quedar ansí, 
 como un caleyón.

 Lleva la Variante
 años de retrasu 
 porque’l gobernante
 nun nos fai nin casu.

 La Variante, sí;
 la Variante, non; 
 va fartar ansí 
 a más d’un fartón. 

 Nun lluz la Variante
 nin a Campumanes
 por nun ser tocante
 a los catalanes.

 Porque en implicando
 a los mesmos vascos,
 taba furrulando
 dende Álvarez Cascos.

 Como estos aguanten, 
que son bona xente,
 el ramu nos llanten
 allá en 2020.

 Les males llingües dicíen, 
que por culpa unos pelgares
 y los fatos que se fíen, 
vas dir siempre per Payares. 

 Si pa Murcia sí, 
si p’Asturies non,
 yá naide se ri,
 paga y pel Negrón.

martes, 26 de diciembre de 2017

¡TIENEN OTRU PLAN!

(Semeya, Ánxeles Rodríguez)

¡TIENEN OTRU NUEVU PLAN PA LA VARIANTE!

El 21 de febreru de 2003, con Álvarez Cascos de ministru de Fomentu, el Conseyu de Ministros autoriza la contratación del proyeutu, siendo'l plazu d’execución previstu de cinco años.

En xunetu de 2005, Zapatero s’averó a la puesta en marcha de les afuracadores. Anunció trabucando que’l tren entraría en serviciu en 2009.

El trayeutu ente Uviéu y Madrid va ser de 3 hores en 2013 según Trevín (LNE, 5 d’abril de 2011).

“El viaxe en tren Madrid-Asturies, en tres hores dende finales de 2012, aseguró Blanco”
(LNE, 24.10.2011).

Ana Pastor, prometió cuatro vegaes en cuatro meses que la obra ferroviaria que coneuta Llión ya Asturies taría finada en 2015 ya amestó que "la inauguración de la Variante ye inminente" (Asturias24.es | 17/01/2016).

Fomento cuenta tener executáu l’AVE ente Llión ya Asturies nel branu de 2020 (El Comerciu 26.12.17)

Curiái de lu de "executáu" que tien más aceiciones…

     Unos ya otros lleven inaugurando la Variante una montonera d’años. El casu ye que llega la data’l ramu y siguen ensin finar les obres, arriendes del fondu’l sacu de Llión y de carecer les averies. Si esos furacos fueren pa dar accesu a Barcelona o Bilbao yá taben furrulando hai bien d’años. Mientres, siguimos pagando les tases de l’autovía que diben a desaniciar. Too esto nun ye namái qu’una vergoñosa falta de respetu, talamente como pa cola nuesa llingua.



lunes, 25 de diciembre de 2017

¡LOS PRIMEROS!


     Al rodio de la entrada anterior nel Feisbuc, nun quixera dexar d’aportar una anéudota qu’asocediera al mes aproximáu del yá mentáu conciertu, de la que’l tema de Busindre Reel algamara les primeres posiciones de les llistes d’ésitu radiofónicu. Foi’l casu que na Devesa de la Villa de Madrid esiste un camín onde s’afitaben daquella una montonera meses, una tres d’otra, au se xugaba a les cartes ya onde la mayor parte de los veceros yeren asturianos. Por culpa d’ello, a esi carreru se–y conocía como l’Avenida d’Asturies. Coincidiera que naquel instante pasiábemos la mio ma (q.e.p.d.) ya yo a la vera d’eses meses falando con un pariente llonxanu de Tebongu, cuando de sópitu se sintió glayar al altu la lleva a una paisana abondo vieyina que s’averaba apurada a la faza: ¡VAMOS LOS PRIMEROS!, ¡VAMOS LOS PRIMEROS!

domingo, 24 de diciembre de 2017

Maxa verde


     Les brañes son llugares máxicos. La maxa dicen que ye blanca o ñegra, pero la de la braña a min se m’abulta verde. La braña de Busindre s’alluga en conceyu de Valdés y la so maxa se tresformó per aciu de Xosé Ángel en suañu. L’entamu del milagru emprincipió nun mes d’avientu como esti d’hai una montonera d’años nel Colexu de Mélicos de Madrid y yo tuvi la suerte d’asistir a él. Cuento que’l nuesu amigu yá vendiera daquella al rodio de 50.000 copies; pero aquello foi l’emburrión definitivu fasta la mesma gloria. Yo, nun tenía entrada pal conciertu y l’aforu andaba cubiertu; sicasí, m’averé fasta ellí. Foi gracies a un sanitariu cazurru al que–y sobraba una que consiguiera entrar. L’auditoriu taba a reventar, magar que naide sería a aldovinar lu que vendría darréu nin lu que daría de sí’l ventureru apueste pola gaita eleutrónica. La puesta n’escena foi cenciellamente xenial, asina como la de tolos gaiteros, tamborileros y dellos otros coleutivos. Lo más espectacular aportó cuando nuna de les pieces s’abrieron toles puertes d’accesu (incluyíes les d’enriba) a un tiempu amosando a contralluz a los respeutivos gaiteros que tocaben al unísonu. Los espectadores qu’asentaron d’aniciu cola normal cachaza calecieron y l’espectáculu desendolcó en deliriu. De la que finó, nun quixi marchar ensin un recuerdu d’aquel inescaecible actu y pidí a Mari José, la so hermana, que me dedicaren el programa. Tuvi qu’aguardar un bon pedazu porque taben celebrándolu al altu la lleva ente bastidores yá que l’ ésitu foi históricu. Nesta semeya amueso la entrada y l’alcordanza que bien seguru–yos va a prestar a dambos hermanos. Nun finara ehí’l suañu, a la mañana siguiente, de la que garré’l coche llinia, la radio del conductor espardía a los cuatro vientos madrilaños les notes máxiques y melodioses de “Busindre Reel”. 

viernes, 22 de diciembre de 2017

Felicitación navidiega


Como hai tiempu que nun asoleyo nada en castellán, aprovecho p’apurrivos la felicitación de Navidá nesa llingua dende’l mesmu “Esto colmo”.

Ya no hay blanca Navidad
pues lo del cambio climático
se está poniendo dramático
y no nieva en la ciudad.

Lo que se mantiene igual
es lo de la lotería,
la comedia de ese día
y el grotesco carnaval.

Con la crisis, el turrón
ya no es duro; sí, pesado,
igual que el año pasado,
se cambia por polvorón.

Venden mazapán genérico,
como el paracetamol,
las bebidas, sin alcohol,
incluso, cava quimérico.

A muchos no influye nada
por culpa de ser esclavos
que a fuerza de menoscabos
trabajan esa jornada.

En un alarde de fe,
 muda el jefe impertinente,
en cualquier belén viviente,
de Judas a San José.

Los pelotas son pastores,
no se les escapa una,
con su actitud lacayuna
y de viles confesores.

Sin que nadie se moleste,
a todos felicitamos,
lo hacemos cuando nos vamos,
emigrando hacia el noreste.

Que aquí todo el mundo roba,
que esta tierra no es segura,
que ha entrado mucha figura
y el belén ya se joroba.

jueves, 21 de diciembre de 2017

¡Prestosu Día de la Salú!


     ¡Quería adelantame y deseavos pa mañana un prestosu Día de la Salú a toos!      

CAMBÉU.Org.

Gobiernu d’España: Dexen de crear enviciaos a la cuenta de toa triba de xuegos como la llotería, la primitiva, el bonolotu, los euromillones, bingos, casinos, quinieles, apuestes hípiques y les tragaperres en xente qu’aínda carez la crisis y que nin siquiera sabe de númberos.

Agabita a Pindesierra p’algamar les 500.000 firmes. Roblaron yá 346.251, falten 426.354.

martes, 19 de diciembre de 2017

Conocencia


Glaya un cantar arxentín:
“que’l rodar nun será ciencia…”,
que me lu digan a min
que m’engrilla la prudencia.

“…Pero tampoco pecáu.”,
al menos, de rabilar,
cuento que toi perdonáu
y les gracies voi a dar.

Nun rodé nel carricoche,
que rodé pel mio terrén,
caleyando día y nueche,
la mayor parte n’ayén.

Que me pudiera la murnia,
que me valtara’l remor,
que’l xeitu guardara en furnia
y carecí’l resquemor.

Que ye doliosu’l disgustu,
que te manca la rensía,
que produz más mieu’l sustu,
si la medrana t’avía.

Que de cuando’l ñacimientu,
que vive tola to xente,
al caberu sacramentu,
pasa un momentu aparente.

Si la vida ye un instante,
nun–y tremezas a nada,
separta del repunante,
del ranciu y del que t’enfada.

Anecia en cantar el gauchu
que “ye una mala esperiencia…”
y, agora qu’esgasto’l cauchu,
m’allega esa conocencia.

lunes, 18 de diciembre de 2017

Ensin validar


     Tres aguardar 35 minutos pa ser atendío nuna sucursal bancaria, habiendo namái una persona delantre, diríxome al direutor por si pudieren asitiar otru caxeru. Ésti m’alderica que non y que pueu allegame a otra oficina de la redolada. Decido esperar y dispongo de la mio cartiya a los tres cuartos d’hora. Pongo esti fechu en conocencia de dellos servicios d’esi bancu y, dempués de que me refuguen la comunicación a traviés del corréu eleutrónicu, de la Ofª del Defensor al Veceru, que me retruca d’un mou talu…  

Madrid, 18 de diciembre de 2017


Estimados Sres. del Defensor del Cliente, BBVA:

     A mí me sucede otro tanto con su dirección, tampoco la tengo validada; no obstante, yo si doy por válida su comunicación.

     En cuanto a la 2ª opción, les informo que ya no voy a rellenar más formularios.

     De igual modo, 3ª opción, no pienso perder más tiempo escribiendo a ningún otro departamento de Vdes. Ya me he dirigido a varios; si lo estiman oportuno, dense por informados de mi queja o, si no, dejen que la inconveniencia denunciada la sufran otros usuarios.

José Rodríguez Pérez
(Suficientemente acreditado en otras notificaciones)

viernes, 15 de diciembre de 2017

Brindis


     Nos van poder arramplar el trabayu, les perres, la casa, les tierres y dalgún qu’otru derechu; pero, si nos oponemos, nun nos van poder quitar la dignidá nin torgar d’espresanos na nuesa llingua de la que la seyamos a falar de contino ya ensin vergoña nenguna. El que te mire torcíu, ablucáu o nun-y convenga que nun t’escuche; magar que naide seya a inorar lu que yá nun tien torna atrás.


    Hai munchos años –más del doble de los 25 d’esta semeya– que pruyía y brindaba namái que pola cooficialidá col envís de xunir a la xente de los dos cabos políticos; por embargo, paez qu’agora unos la refuguen y dellos otros la utilicen al aviesu. Nun tenemos igua: la llingua y la cultura hai qu’acoricales y nun faer política con elles. Polo qu’a min toca, voi siguir cola mio xera buscando l'entendimientu y resalvando l'amarraza ente paisanos.

jueves, 14 de diciembre de 2017

Desenllaz


...Nun tris, el fluxu del sangre esporpollaba de mou alarmante de la que salíen apuraos del agua per un cabu de la sablera. Aína, ella enroscó fuertemente una toballa alredor de la firía mientres escuclaba pa la chapla ferruñosa qu’él entá nun posara. De sópitu, perdió’l conocimientu y al cayer, ensin qu’él se decatara, golpió la nuca contra unu de los numberosos morriyos de la faza. Él, contando que–y diera un infartu, entamó a aplica–y exercicios de reanimación cardiupulmonar ensin que fora consciente de la propia gravedá del so tayu. Vente minutos más tarde, ella nun recuperó ya él, aceleráu pola ansiedá, desangró pela femoral al llau d’ella. Al valtar, la chapla quedaba afitada ente los dos cuerpos amosando al cielu’l númberu oxidáu de matrícula del coche qu’había un añu esbarrumbara’l bonachón de Llorián non mui lloñe d’ellí.

miércoles, 13 de diciembre de 2017

El viaxe


      ...A Lloriány fixeron l’autopsia por puru trámite. A Fina, la exmuyer, malapenesy endilgaron un par d’entrugues la parexa policíes del xulgáu que se presentaron na so casa, mientres que’l so nuevu home escuchaba agazapáu dende uno de los cuartos. Naideyos fadió pa más nada. El branu pasáu cumpliérase’l cabudañu d’aquella llaceria ya una selmana dempués d’esa data colaben xuntos tan guapamente de vacaciones. Alcordaron un recorríu per tola costa norte qu’aniciaron en San Sebastián y que finaríen en Pontevedra. Tres faer nueche na ciudá de Santander ya en Cangues d’Onís, al tercer día axustaron agospiase na Regatina en Llamuñu, onde bascularon l’equipax. L’atapecer invitaba al baño y decidieron averase a la cercana sablera de la Concha d’Artedo enantes de cenar. El chapuzón sería inevitable de la que l'últimu veceru marchaba del arenal. L’agua nun s’alcontraba mui frío ya'l decoráu pintaba idílicu cola inmediata puesta de sol. Desafortunadamente, dellos minutos dempués, una chapla rectangular ferruñosa qu’emburriara la resaca arregalló de mala manera la pierna derecha del abogáu mui bien cerca de la vería. Nun tris...

lunes, 11 de diciembre de 2017

La separación


     La separación foi aparentemente bien aceutada. Los bienes se partieron según a ella–y petó y, arriendes, él consintió n’abandonar la casa. Tamién n’apariencia, se treslladaría a la villa adonde–y aguardaba la so hermana. La recién separtada ya’l so abogáu dexaron too bien amarráu, naide sabía de la so tapada rellación y so señoría tragó la versión d’esi lletráu. Llorián cargó too aquello que–y paeció oportunu de lo que–y tocara nel repartu nel más vieyu de los dos automóviles. Abrió la puerta del garaxe dexando la llave na pesllera ya anició la marcha camín de Cuideiru. Namái escuclara la mar, aceleró’l coche escontra’l primer cantil valtando un barganal al envís de somorguiar pa siempres cola so murnia y lo pocu que–y dexaron.

domingo, 10 de diciembre de 2017

Encadenada de Domingu


Entamo a nun tar seguru,
seguru nun toi de nada,
de nada malaya amburo,
amburo a zuna quemada.

Quemada que ye aguardiente,
aguardiente que ye oruxu,
oruxu d’uva y semiente,
semiente mazana’l fluxu.

Nel fluxu voi pela cai,
pela cai del amarguriu,
del amarguriu namái,
namái camudes a buru.

Buru que ye repunante,
o repunante o canosu,
canosu ye’l vieyu, mante,
ya’l mante, mui amorosu.

L’amorosu amuesa amor,
amor escontra repunu,
el repunu da al mugor,
magar non, el té morunu.

El morunu ye queríu,
queríu y nos aventara,
nun aventara al mio tíu,
qu’al mio tíu lu matara.

Matara nuna matancia,
matancia qu’escaecióse,
escaecióse l’andancia
y l’andancia repitióse.

Repitióse del revés,
del revés vieno’l qu’echaba,
t’echaba de Marrakech,
de Marrakech, con chilaba.

Chilaba de munchu ringu,
el ringu rangu d’Annual,
n’Annual finara Domingu,
güei, Domingu, too val.

sábado, 9 de diciembre de 2017

Resumen del 2017

https://www.facebook.com/yearinreview2017/?source=shared_story

Asoleyara un resumen,
de tol  2017,
con semeyes que rellumen,
según al Feisbu–y pete.

Nun saldrá al que nun comparte
cola xente’l so recuerdu,
paez, de la maxa, arte
cuento que tamos d’alcuerdu.

La verdá que tastia a pocu,
pos falten milenta amigos,
ta’l guah.e que saca un mocu,
pero nengunu de Figos…

Sí, la tía, que colara,
y les neñes de Granada,
Noemí que me cantara,
de bon xeitu, una tonada.

La despidida de Conce,
que peslló la so cabaña,
s’afita en maxín el tronce
col so ciñu y bona maña.

Asomen Xuaquín y Be,
seique Ánxeles y Lita,
Mariló tamién se ve
y daquién que t’agabita.

El fíu en peluquería,
yá hai años, ¡casualidá!,
porque fuimos nesti día,
tornamos bien pelaos yá.

Perdonái los que nun tais,
como a toos empondero,
por tolo que sofitáis:
¡ehí va un abrazu melgueru!

viernes, 8 de diciembre de 2017

¡Qu'aburrición!


     Tuviera escuclando un llibru d’una escoyeta poemes d’autores perafamaos:

     “La princesa tien la so boca de fresa. El mar, la mar, sólo la mar (del calamar). El to pelo negro acebache, los tos dientes de marfil. La ñeve blanco ya’l mar azul. La lluna, el sol, les estrelles. Lluceru de la mañana. Voi xurate amor eternu. La más guapa neña robárame’l corazón. El tiempu pasa esnalando, la vida ye curtia y como un ríu. L’atapecer y la puesta’l sol nel finxu’l cielu. Vientu, primavera, oral, afalagos, quexíos…”


     Zarré esi llibru ya abrí otru, pero ponía lu mesmu. ¡Qu’aburrición! 

domingo, 3 de diciembre de 2017

El mendigu


Pente bolses, sacos, mantes…,
tresporta’l tiempu’l mendigu,
de penuries, unes cuantes,
col futuru d'enemigu.

El carru col qu’acarreta
toa triba d’achiperres
nun lu abasna porque–y peta,
sinón porque nun tien perres.

El sombreru d’ala ancha
y la barba pelo d’oru,
la murnia a so vida engancha
y la refuga ¡demoru!

Comparte l’agua y la fame
que colinga d’esi carru,
tien l’aventura al algame,
siguiendo l’acera’l Darru.

Entruga por cualquier cosa,
quiciabes seya por nada,
nun ye de novela rosa,
ye de drama per Granada.

Escucla pa un llau ya otru,
dormi un perru a la so vera,
anque naide–y corre’l potru,
tampoco–y ufierta xera.

Total, si nun la precisa,
nun carez esa condena,
al amu nun llanta risa,
nin l’ensobia la cadena.

Enxamás entró pel aru,
ye pa que blinquen los perros;
magar te paeza raru,
rumba llibre pelos cerros.

sábado, 2 de diciembre de 2017

NIN SE MERCA NIN SE VIENDE


Vendíen
un nacimientu enteru
por bien poco dineru,
baratu de verdá.

Sonríen,
me dicen"parte quiero”,
y yo me muerro, muerro
por nun la poder dar.

Porque yá lu merqué l’otru día,
y nun supi baxar nin finxí.
Y Facienda me llevó a María,
y al ver que más quería, yo–y dixi ansí:

Nin se merca nin se viende,
como’l ciñu verdaderu,
nin se compra nin se viende.
Pide’l Montolo dineru
y seique naide lu entiende,
que’l rellenar el 600 
por mercar los nacimientos,
nun tien xida y munchu ofiende.

El día
que tu m'intervinisti,
allegre te punxisti,
y yo nun sé por qué.
Tovía
quedes colos los pastores,
y les cases meyores
ya ansí alloriáu quedé.

T'ufiertaron
bayures y honores.
Ansí dañes,
por too chapar.
Güei que pañes
los paxes y mores,
tendré que cantate’l mesmu cantar.

Nin se merca nin se viende,
como’l ciñu verdaderu,
nin se compra nin se viende.
Pide’l Montolo dineru
y seique naide lu entiende,
que’l rellenar el 600
por mercar los nacimientos,
nun tien xida y munchu ofiende.

jueves, 30 de noviembre de 2017

A mou de Martín Fierru…


Fino d’abrir la mio muria y m’alcuentro con una solicitú d’amistá na qu’ufierten centros de difuntu. Entamara la mañana fría y macabra, mesmamente como la nueche, yá que de la que me fui pal trubiecu acabara d’escuclar un capítulu d’Histories de la Cripta. 

<<Nun me vengan, –retruqué–,
con retafila difuntos:
qu’esos son otros asuntos;
vei si me sois a prindar,
que nun me voi a entregar,
magar vengáis toos xuntos>>.

Yá nun aguardaron más,
se m’echaron a montón;
como a perru cimarrón
m’arrodiaron ente tantos
que m’encamenté a los santos,
empuñando’l mio rozón.

Y ansí los fui despachando,
según diben averando.
Yera tal la rozadura
que–yos saqué l’asadura,
finando’l benditu mes,
a un tiempu de San Andrés.

Si a dalgunu más–y peta
colar a ver la so güela,
–y espero nesta tayuela
pa satisfacer so meta.
Nun penséis que busco guerra,
ye un cuentu de Pindesierra.

lunes, 27 de noviembre de 2017

¿Por qué nun tomen midíes?


    Paez qu’esti mes de payares, cola seca y l’airón, aneciaron en atizar l’arboláu. Lu que nun quemen esti añu lu van quemar pal qu’entra y nun van parar fasta que quede too amburáu; mientres, esos cientos de pirómanos se crecen ensin castigu somorguiaos nesos intereses creaos. ¡”Too” güel a podre y naide fai nada! 

    Tolos díes alluguen a cientos d’axentes peles crucies y carreteres españoles que multen a los automovilistes ya al tiempu prenden fueu a les bayuroses viesques asturianes y gallegues qu’amburen añu tres añu por falta de vixilancia.

—Mire vuesa mercé —retrucó Sanchu— qu'aquellos qu'ellí apaecen no son xigantes, sinón cientos de molinos eólicos ensin nenguna mala torre de vixilancia antiquemes. ¿Por qué será?


     D’esta miente, la conciencia nos rique: ¡Nenguna llárima más, van afogar a los nuesos heriedes, andái sollertes y dai parte!, sinón, dempués, la cebada al rau y a quexicar.

domingo, 26 de noviembre de 2017

Mirando pa los ánxeles


     De la que pasáramos per Málaga, montaben la decoración navidiega na cai del marqués de la xinebra. Les muyeres miraben nel cabu la cai pal altor de la cadarma metálica qu’imitaba la pedresa de la catedral y qu’esguilaba faza’l cielu. Paecía como si tuvieren escuclando pa los ánxeles. A la escontra, los homes agüeyaben pa la semeya de los otros ánxeles del comerciu que la Vitoria de los secretos diba a inaugurar esquina cola plaza de la Constitución. De resultes, toos chisbaben pa los ánxeles; elles dende l’entamu la cai y ellos al so mesmu entamu, y toos albidraben una Navidá que yá s’atopa mui bien cerca.

sábado, 25 de noviembre de 2017

La ratina presumida

La ratina presumía (cuentu colingáu por Rafael Castillejo). ¿Y vós cómo coime facéis pela nueche? “Porque tu nun me la das”, anecia la ratina mientres refugaba a tolos pretendientes, fasta que viniera’l Ratu que yera quien tenía una tarxeta Black. Ye que les femes siempres fueron mui interesaes. Toa esta montonera cuentos de los años 50 sintiéralos yo bien de vegaes pela radio. Por culpa d’ello agora soi tan cuentista. Amestar que la voz tan afalaguera del narrador yera la del asturianu Xosé María Oviés Morán, que tamién punxo voz a Groucho Marx en Una nueche na opera, a Spencer Tracy, James Mason y Walter Pidgeon.

jueves, 23 de noviembre de 2017

Zamba de la soledá, a los mios deleres.


Al cayer la oración,
col so mantu de gris na ciudá,
asolombra nel mio corazón
l’avesida murnia de la soledá.

L’alcordanza de paz,
de mios hores felices d'ayer,
va golpiando en maxín y renaz
como un ríu de suaños al alborecer.

Yo tamién árbol fui,
qu'al pasar pela vida frutié nel llugar.
Pero en tiempu y llonxanza rindí,
fendiendo’l mio tueru, quiérenlu arrincar.

Namái quiero al partir
nun llevar na mio alma un rancor.
Que lo amargo qu’aportó’l vivir
fue más duce y prestosu, xuníu al to amor.

Y si acaso, tal vez,
col recuerdu pudiera ablugar,
si una copla al so ritmu entemez,
xuntu a ese alcordanza la seya a cantar.

Yo tamién árbol fui,
qu'al pasar pela vida frutié nel llugar.
Pero en tiempu y llonxanza rindí,
fendiendo’l mio tueru, quiérenlu arrincar.

miércoles, 22 de noviembre de 2017

Siete trenes y milenta pasaxeros afeutaos pola avería d’un Alvia (EC, 20.11.17).


El cuentu de la Variante
y del AVE esi d’ADIF
sé qu’entamara en Madrid,
¿cuándo finará?, ¿quién sabe?

Total, si atranca un paletu,
ye por culpa una avería
que se resuelve nel día,
qu’acarrete col maletu.

Yo cubriera una vegada,
la fueya reclamación,
de la que diba a Xixón
y nun retrucaron nada.

Ye que somos de segunda,
por eso naide dimite,
xugái col móvil ya’l bite,
que la medrana nun cunda.

Cuando iguemos lo del restu,
yá furrulara lo vuesu,
ye qu’esa obra ye un güesu
y naide paña pal cestu.

La lladera ye inestable,
pingó un diluviu en furacu,
arriendes del fondo’l sacu,
tien el so aquel, como’l bable.

Nun quexéis más de la cuenta,
sabéi qu’aneciamos nello:
el puertu a pasu camellu
ya’l ramu en 2050.  

martes, 21 de noviembre de 2017

Ente conflictos


Teo l’alma ente conflictos,
pente conflictos la mio alma,
a veces pierdo la calma
ya otres gano veredictos.

Decatéme pol cartelu,
que colinga d’una espita
na mesma muria de Lita,
y m’afitó’l desconsuelu.

Cuento que ye d’Arxentina,
lu asoleyó l’otru día,
güei encoplo esta poesía,
ensin querer meter pina.

Ye qu’agora s’amarraron
la mio alma col mio ego,
siendo yo abondo zuniego,
vaya cuestión que m’armaron.

El problema ye abegosu,
voi precisar de l’astucia,
magar que nun tea agucia,
amestando bien de posu.

Ye qu’a cuenta la engarrada
valto per una polea
nes mios nueches de velea,
pos nun dexen meter baza.

Allorio pol mio maxín
y nun soi a discurrir;
si daquién sabe salir,
que m’apurra otru pasquín

instruyendo la ocurrencia,
qu’enfotaron alma y ego,
y bien de golpes me pego,
entá ingresáu d’urxencia.

lunes, 20 de noviembre de 2017

Sobro la velea de Marta G. Eguidazu


     Vi alborecer, sí, ya’l trescurrir de bien d’hores de la madrugada. Lo peor de la velea ye que tienes demasiáu tiempu d’avagar. Colo cenciellu que ye abandonase nos suaños, mesmamente cuando nun yes a recordalos al espertar o nun fueron especialmente prestosos.

    Remanecer colos güeyos abiertos na escuridá, cuando yá tan abondo cansaos pa lleer, te procura asomate a la fondura d'un mundiu silenciosu ya arrayante, escuchar al tiempu los llatíos del to corazón y fasta oyer el murmuriu de les tos penes, como si un rumor de foles batiera nuna sablera solitaria. Tu yes la propia sablera, quies sentir como esi mar llambe les tos firíes, pruyes por tresvolar, zarres los güeyos pa imaxinar que ye de día, qu'un sele sol afalaga la to cara y que nin siquier esiste'l rabión.

     Desfilen amodo intrescalable los minutos, tentes a reposar y sabes como lu faer: aliendes fondamente, aventes l'aire adulces, intentando desdexar el to maxín; pero la to mente va por llibre y nun quier aselar. Pensamientos positivos –te dices–, imaxes formoses, remembrar momentos felices... Nun hai mou, sonsonia na to cabeza afarto fuerte'l ximir de la to alma; si acaso afluyera en forma de llárimes, apangaría la congoxa y desamarraría esi nuedu que prime'l to corazón. Eso ye: concéntrate nos llatíos, déxate taramingar al son del so compás.

     ¡Ah!, escaecíaseme, el mio corazón valta descompasáu; sicasí, nun m'esmolez, nun lu atiendo, de día déxo-y dir a los sos deleres, namái dalguna vegada teo que posar ya esneldar fondo. Pero agora, nesta nueche escura, esi valtar espareyu enoxa bramente. Aguardes al viniente llatíu; cuando afustia, cuasi que nun yes a respirar.

    ¡Venga, que nun se diga, yá valió! Priendo la lluz, llevanto, voi fasta la cocina, bebo un vasu d'agua y torno pa la cama. Cueyo'l llibru que taba lleendo ya intento embaecer, somorguiar nel so argumentu.


     Güei, acarreto'l pesu del mundiu a recostines: pesa, ablaya, espreceta…

sábado, 18 de noviembre de 2017

Nueva téunica


     La téunica de la escritura llibre (del brexinglés freewriting) ye mui cenciella: consiste en escribir ensin parar mientres unos diez minutos…

     La del torbolín d'idees (del brexinglés brainstorming) ye asemeyada. Equí, en vez d'escribir frases allugues pallabres o idees…


     Sicasí, naide fala d’encoplar ensin parar coles frases o les idees que te peten. Ye una ocurrencia que m’acabo d’inventar cola fin maurecer idees y d’avezase a componer a un tiempu. Foi’l casu que fino d’algamar los 3.333 amigos, puesto qu’ayeri m’unviaron ocho solicitúes, y nun cuntaba con ello fasta la selmana qu’entra. De resultes, vamos a ver –al rodio d’ello– como resulta esa nueva téunica. Perdonái si nun vos presta, pero yá sabéis que refugo’l clixé y l’aburrición nos poemes. Arriendes, aprovecho pa davos les gracies a tolos de la riestra treses por caltenevos a la mio vera.

Esti ye’l cuentu del tres,
la suma de dos más un,
ye un númberu como ves,
tres servos son de betún.

Como tres nel to zapatu,
cuando andes a disgustu
ya entá va y te pisa un fatu
ya arriendes te mete un sustu.

De tres vienres, la selmana,
seique va ser enxamás,
si bocexes con galbana,
nun mui sero dormirás.

La selmana de tres xueves
va ser talamente al tal,
si tres campanos te bebes,
quiciabes te sientas mal.

Tres son tres, les tres Maríes,
estrelles del Sietestrellu,
qu’acarreten enganíes
d’afatase nel to cuellu.

De tres, tamién el muñuelu,
el muñuelu de sartén,
que siempres fría’l mio güelu
ya espoxigaba a mamplén.

Acaso, nun ser tres dioses
ye ser malo y pocu honráu,
asoceden estes coses
al que s’alcuentra arruináu.

¿Xugasti a les tres en raya
col vecín de la to vera?,
xugaba hasta la más paya
p’asitiar tres en ringlera.

Tres marinos a la mar
xueguen a l’esconderite,
equí fina esti cantar,
tres en tres, de fite en fite.


viernes, 17 de noviembre de 2017

Los cuentistes del poyu


     Como davezu, nun yera quien a abrir enforma los güeyos por culpa del sol que me pegaba a la escontra; magar qu’al bellume percibía ensembre bien la figura del paisanu que taba asentáu nel poyu a la mio vera. Yera un home altu con acentu foriatu, gastaba sombreru tamién d’altor, dábame un aire a naftalina y se m’abultaba abondo educáu. De la que nun pasara naide pela redolada, entamó a falame d’un coríu feu, d’una serenina, d’un soldadín de plomu, d’una princesa ya un arbeyu y d’una montonera cuentos de fades. Yo–y retruqué que caltenía cientos d’ellos de toa triba ya esclarié qu’otros milenta finaron na basoria, nel fogón de la económica o nes coraes d’un ordenador que los desaniciara pa siempres. Nel intre, encomendóme perafitar too en dellos llibros o en cualesquier otru llugar seguru. Darréu, entrugóme pol mio nomatu y, cuando yo–y pregunté pol suyu, tornaba la muyer y yá nun quixo dicir más nada. Ella, por embargu, aína m’aldericó: “¿qué faes falando solu?”.

martes, 14 de noviembre de 2017

Les llaves del cielu


     ¡Por fin fixera’l tratu la mio vida! Yá naide me va a endilgar que namái faigo negocios ruinosos. Foi’l casu que la muyer llevóme unos díes a onde la torre s’amiesta colos molinos y l’AVE, que nun son quien a trayer p’Asturies, nos tresportó a Málaga en dos hores y media. Tuviéramos enredando pela faza ya’l domingu pasáu nos allegamos a un mercadín, mui bien cerca d’un centru asturianu que s’asitia nel llugar, nel que quedé escuclando ablucáu pa un manoyu llaves vieyes qu’asoleyaben nuno de los puestos. Decatárase al instante l’amu y nel intre m’espetó: “Son les llaves del cielu”. Yo, que d’entamu nun yera a créelo, saqué aína dineru del bolsu col envís de paga-y lu que me pidía per elles enantes que dalgún espabiláu se m’adelantara. Agora, que fino de tornar, vos les amueso mui fachendosu: ¿qué vos paecen? Tai tranquilos los amigos y collacios que de la que morráis vos voi abrir de secute. A los mediu afamaos a los que-yos espublizó un par de cuentos l’Academia, que namái fociquen pela mio muria pa dacuando en vez sacar porgüeyu ensin dexar buelga, vos voi tener nel purgatoriu delles selmanes. De resultes, si nun queréis qu'eso asoceda, yá vos tais materializando y, cuando vos preste daqué de lu qu’escriba, calcái tamién nel “me gusta”. 

miércoles, 8 de noviembre de 2017

Bécquer a los mios deleres


Magar davezu la sorna
s’alcuentra ente les mios xeres,
nun preciso de la torna,
versiono a los mios deleres.


Cendal flotante de la gurriana,
rosada cinta de mariñana,
cimble sonoru
de gaita d'oru,
besu de brisa, rala de lluz:
flor de la uz.

Solombra aérea, que bien de veces
al falagate desapaeces
¡como la llama, como'l soníu,
como la ñebla, como un ximíu
xunto a Contrueces!

Na mar sablera onda tremante,
yes nel vacío cometa, mante,
llargu llamentu
del foscu vientu,
ansia perenne d'algo meyor,
¡yes tu’l mio amor!

Yo, qu'a tos güeyos, na mio agonía,
los güeyos vuelvo de nueche y día;
yo, qu'incansable cuerro yá inxente
¡tras la solombra, tras la fía ardiente
d'esta poesía!

martes, 7 de noviembre de 2017

Chapuza

https://www.elconfidencial.com/tecnologia/2017-05-29/variante-pajares-teneles-ave-chapuza-fuentes-secas-leon-asturias_1389772/

Mayor chapuza nun quepe
qu’esta obra de teatru
qu’entamó nel 2004
y nun fora escrita en Lepe.

La fonte de la Brimbera
Reguerales, Veiga y más,
nun ensugaben xamás
nesa acuta la biosfera.

L’agua foi a tunelones,
inundación y fiascu,
sin furrular, con atascu,
esbarrumbu y más millones.

Cada añu un nuevu ramu,
les promeses incumplíes,
desdexen les compañíes
y muertu murnia tol tramu.

Equí nunca pasa nada,
quien venga detrás qu’arree,
que del burru nun s’apee,
el que cayó na trampada.

Si dalgún quier la tarxeta:
Pepe Goteres ya Otiliu
“chapuces ensin auxiliu”,
con aniciu ya ensin meta.

Ye tema d’hidroloxía,
que van saber los paisanos,
qu’aneciaron n’avisanos
d’aquello que pasaría.

Ye que somos de segunda,
de segunda división,
Adardineru y Negrón,
paga tasa aguanta tunda.

Ansí que’l que nun se muera
verá circular esi AVE,
¿pa que llustru?, ¡nun se sabe!,
n'otra dómina o era.



domingo, 5 de noviembre de 2017

Formentor


       Llegara la carta de Formentor del 55. Paez qu’últimamente'l corréu vien con abondu retrasu. Llamé a esi cenciellu teléfanu 9 de Puertu Pollensa, pero naide descolgara. Ye verdá que yo daquella tenía namái dos añinos, magar qu’agora empondero sobre manera la to carta. L’hotel sería mui guapu, anque se m’abulta que’l mesmu papel pa correspondencia nada–y tien qu’envidiar. Esclarias que la poesía de la vida s’alcuentra en nós mesmos: munches gracies por me lu confirmar. Sicasí, ¿A ónde va dir de la que nós faltamos? Nun quiero asoleyar más detalles por culpa que lo privao tien que caltenese asina. Allegrándome de qu’esfrutaras de la tranquilidá d’esa isla que se perdiera per acio de l’ensamadura xentes, pruyo porque sigas esfrutando ellí onde tes.


     Recibe un candial abrazu a traviés del nuesu atayu temporal, la Rede, la maxa de la escritura y, como non, de los suaños. 

miércoles, 1 de noviembre de 2017

Sobro'l valir de les coses


     Malapenes dormí na Nueche les Ánimes ya anduvi abondo apuráu'l Día los Santos. De resultes, acabé matáu. Facía tiempu que nun díbamos pelos montes de Gredos, na raya de Madrid con Ávila. A la xubida, quedé mirando como siempres pal colexu seminariu de "Rozas". Mientres restolaba pela tarde, cavilgué en que tamos tan pendientes de lu que facemos que nun vemos la guapura que nos arrodia. De la que baxé a tirar unes fueyes al contenedor me crucié con trés mozos con cara de bona xente que baxaben del puertu. Aína, saludáronme mui cordialmente, amestando: “Tienen munchos gatos per equí”. “Sí, son del vecín”, retruqué entrugándo-yos por sí nun-ys paecía mui guapu'l llugar. Darréu, comentáronme que sí y qu'amás había un seminariu pela contorna. Estrañóme sobre manera lo que repostiaron, por embargu despidíme d'ellos tan candialmente como ellos me saludaran. De nueche, yá en casa, el fíu me llanta la película d'El Ritu, na que tamién apaecen una montonera gatos y falen de contino d'un seminariu. Ye'l casu que pasen bien de díes o selmanes ensin que sientas esa pallabra que, como los gatos, nun signifiquen nada p'abonda xente. Escribo esta reflexón sobro’l valir de delles coses ya’l so contestu, yá nel Día los Muertos, ensin saber bien el porqué.

martes, 31 de octubre de 2017

Dellos apuntes sobro les verdures de Bruseles

   
     Les verdures de Bruseles pertenecen a la gran familia de les Crucíferes.

     Anque les verdures de Bruseles tán disponibles tol añu, la so meyor dómina s’alcuentra nos meses de seronda ya iviernu, dende ochobre hasta avientu.

     El conteníu de fibra que nun eslle ye eleváu, lo que favorez la sensación de fartura ya'l tránsitu intestinal, colo qu'ameyora l'estriñimientu. Pue provocar cagalera.

    Estes verdures son les que más caloríes apurren de la so triba.

    El tastu amargoso de les verdures de Bruseles se debe al so conteníu en goitrina.

   Contienen magnesiu, qu'ameyora la inmunidá y tien tamién un nidiu efeutu laxante.


    Destaca la presencia de potasiu, fósforu y yodu, asina como cantidaes discretes de cinc y calciu (de probe absorción). El potasiu participa na tresmisión y xeneración del impulsu nerviosu. El yodu ye un mineral indispensable pa que furrule bien la glándula tiroides. Ésta produz les hormones tiroidales, qu'intervienen en numberoses funciones metabóliques como'l caltenimientu de la temperatura. Coles mesmes, el yodu ye esencial na crecedera del fetu y nel desenvolvimientu del so celebru.

lunes, 30 de octubre de 2017

¡BRUSSALEM!

(L. Digital)

Nesti “moment en Brussel·les somiarem”
como nel “temps de les pel·lícules” mudes.
Ye “le moment en què Brussel·les” pescudes,
ye “le moment en qu’en Brusselles, ¡BRUSSALEM!”

Tol mundiu riendo del so pelo
mientres él lo toma a tol mundiu.