VALIR

 

¡Qué neutru ser neutral y qu’abegosu!,

remata l’amistá quien nun pon vetu,

respeta’l pensamientu por respetu,

reposa pola mor, amodo’l posu.

 

Refuga vanidá del vanidosu,

nun val el decretar para’l discretu,

nun repara en retar, ayén al retu,

magar falta valir, ser valerosu.

 

Nun me mandes falar mal d’un collaciu,

que nun soi a anuedar un cabu sueltu,

que nun quiero enxarciar al que tien xaciu.

 

Ye viciosu valtar namái pol vueltu

ya espantible cinxir a un ruin espaciu,

revolviendo’l guxán gufa’l revueltu.

 

Sin problemas

     Foi’l casu que conocí a la direutora d’aquella revista porque gané’l primer premiu del so certame (milagru pa min). Al dir a cobrar, ufiertóme una seición infantil onde me caltuvi mientres siete años. Esti qu’asoleyo foi un de los encoples qu’espublizara naquella dómina. Dempués presénteme al de relatos curtios n’asturianu del Centru. Ehí, nun pañé nada. El xuráu d’académicos que vieno d’Asturies elixera’l trabayu d’una maestra venceyada a l’Academia. Nun volví a preséntame a nengún “concursu”. 

 

Eco (en castellán)

 

A la leche desnatada  atada,

al tiempo que sin lactosa  osa,

a conservase delgada  hada,

hada que nunca sonrosa  rosa.

 

Así la central lechera  era,

la que logra con su peso  eso,

ir licuándolo a la espera  pera,

de rebajarle, sopeso  peso.

 

Y esa niña consumida  ida,

 consigue que dicha leche  eche,

unos quilos que ya olvida  vida,

y que nadie la despeche  peche.

El tren del añu que vien

 

https://www.leonoticias.com/comarcas/entranas-variante-pajares-20171006163831-nt.html#comments

Al tren del añu que vien−y llamo asina porque siempres aseguren qu’entamará a circular pa l’añu qu’entra a traviés de la Variante Payares. A rodapiellu y por si morréis primero que pongan el ramu vos ufierto un viaxe virtual y, bien importante, ensin peligru d’esbarrumbu.

 

El viaxe en tren Madrid-Asturies, en tres hores dende finales de 2012, aseguró Blanco (LNE, 24.10.2011).

El trayeutu ente Uviéu y Madrid va ser de 3 hores en 2013 según Trevín (LNE, 5 d’abril de 2011).

Ana Pastor, prometió cuatro vegaes n’otros tantos meses que la obra ferroviaria que coneuta Llión ya Asturies taría finada en 2015 ya amestó que "la inauguración de la Variante ye inminente" (Asturias24.es | 17/01/2016).

Xueves, 13 ochobre 2016, El Comerciu: Abrir la variante de Payares antes de 2018 ye imposible si se respetan los contratos.

Luis Ordóñez - La Voz de Galicia: Remor a que l'apertura de la Variante de Payares se retrase a 2019.

Fomento cuenta tener executáu l’AVE ente Llión ya Asturies nel branu de 2020 (El Comerciu 26.12.17).

La Variante de Payares va entrar en serviciu en 2021, afirma Fomentu (LNE, 15·06·17).

Les obres de la variante de Payares van finar na segunda metá de 2021 (El Comerciu, 26.11.19).

L'entierru

 

L’entierru siempres foi drama

col prefaciu nos cipreses,

ensin escenes de cama,

ensin tampoco entremeses.

 

El conflictu ye l’heriedu,

la mala estrella ye’l muertu

que yá travesara’l sedu,

que yá finara nel güertu.

 

El güertu ye’l güertu’l cura,

el cura’l que llee’l responsu,

rezu que davezu ambura,

pueque ciertu, pueque sonsu.

 

S’empapiella en tou entierru

pol paisanu soterrañu,

azorrona’l más gamberru,

dientro un añu, el cabudañu.

 

En repetise aportuna,

la historia ye’l mesmu cuentu,

desendolcu y mala zuna

acompasaos col llamentu.

 

L’epitafiu ye resume,

el que morrió foi mui bonu,

del inciensu quedó arume,

foi la ceremonia a tonu.

 

El morrer siempres foi drama,

muerre fasta’l más castrón,

el mozu y tamién la dama,

ya esta foi la esplicación.

 

 

Pese a les fechoríes del Feisbuc, siguimos espublizando nesa rede ya asoleyando trabayos en “Pimpiruladas”

 Fungando fadios de falambaldres, farsantes, faltosos, faltoses y “rufianes”

Madrid aporta a la 'caja común' 23.000 millones más que Cataluña desde 2009 con menos impuestos

La Comunidad bate un nuevo récord de aportación y cubre el 70% de las contribuciones al fondo de solidaridad estatal, frente al 24% que pone Cataluña (El mundu, güei).

Llamentu

 

Yera’l segundu, minutu,

y yera’l minutu, hora,

enxamás sentía’l cutu

como lu carezo agora.

 

Pasaba tan lentu’l día

que paez que nun pasaba

y la selmana paecía

que’l so fin nunca algamaba.

 

Pasaba adulces el mes

y sele pasaba l’añu,

una eternidá a traviés,

un eternu desengañu.

 

Y cuando pasaron trenta,

pasaba too al contrariu,

contaba al revés la cuenta,

coyía l’añu en breviariu.

 

El mes camudó en selmana,

la selmana, nuna data,

repares de mala gana,

por aciu rincar la pata.

 

Pasa’l día nun reblagu

y la hora nun minutu,

tresformara’l tiempu un magu

que’l minutu fai sollutu.

 

Espertó l’alma dormida

ensin entender el cuentu,

de la que fina la vida

de nada val el llamentu.

 

Tampoco val l’allegatu,

probe ñací, probe muerro,

muerro nel anonimatu

echando la gata al perru.

 

La moza de mal aliendu

 

La moza de mal aliendu

espanta na romería,

axoriza como un rendu,

anque ye pura allegría.

 

La de la boca fedionda

nun sabe d’arume a fresa,

tien una pena bien fonda,

magar qu’a naide interesa.

 

Camuda murnia en contentu

y la tristura en sorrisa,

nun ye princesa de cuentu

nin aporta oral na brisa.

 

Pero ye la meyor moza

y tien la cara de cielu,

ye la envidia de la boza

y ye llimpia como’l muelu.

 

Nun valió la melecina

pa combatir l’halitosis,

nin enxagües nin salina,

nin el malvariscu en dosis.

 

Asina ye la natura,

amuésase caprichosa,

dacuando lo frío ambura,

dacuando güel mal la rosa.

 

La moza de mal aliendu

remanez pa vistir santos,

vive sola careciendo

atropar cuarenta y tantos.

Carsovía

 (Carsovía, semeya d'Antonio Varela)

A Rufino Vallejo Castañón:

Carsovía nun ta lloñe,

tiénesla nel corazón…

Pel camín de Carsovía,

llantaron la vía’l tren,

pasa’l tren sobro la vía,

pasa la vida, tamién.

 

Pela ponte de Los Fierros

colaba esi tren al pandu,

coles murnies y los berros

d’aquel que marchó emigrando.

 

Dalgunos yá nun tornaron,

morrieron per otros llares,

a dellos otros mataron,

finando los sos pesares.

 

Tamién crucia La Carisa,

la célebre vía romana,

pende aportara la sisa

y l’autovía cercana.

 

Dixebra’l pasu a nivel,

magar qu’enxamás la vida,

nin la ocurrencia’l fardel

que trabucó en Casorvida.

 

Carsovía soleyera,

Carsovía la madrona,

historia, allegría, xera,

fonte, palaciu y casona.

 

¡Carsovía, Carsovía!,

onde s’escaez el duelu

ya’l monte marca la guía

pa xubir direutu al cielu.

Pasteleros

      A tolos músicos ya escritores que lluchen por sobrevivir mientres que dellos afamaos qu'exercen de xuez y parte nos xuraos parten siempres la tarta…

El músicu muertu fame,

talamente que’l poeta,

cola fame fai enxame

y nun gana una peseta.

 

Sestaferia colos sones

y cola tristura andecha,

como carru de triones

se caltién a costafecha.

 

Cola murnia canta sele,

magar qu’enxamás afuega,

ye teloneru na tele,

ye feligrés que nun ruega.

 

El que nunca foi afamáu

nun rinde cola galbana,

nun enfastia d’afamiáu,

xunta, de comer, la gana.

 

Nun tien perru nin padrín,

tien la guitarra qu’astiella,

ye collaciu para min,

compañeru de mormiella.

 

Nun esbaria por cobicia,

nenyures foi presumíu,

cola folganza nun vicia

nin s’afaya ente’l xentíu.

 

Col músicu muertu fame

bien seguru que m’atopes,

tamos los dos al algame,

de la ruina somos popes.

 

Contracultura

https://elmiradoriu.wordpress.com/2020/11/08/si-es-una-postura-retrograda/?fbclid=IwAR3PpObyrcu_XW4rORURhv_wdhtnCh7cvrb-0rbus8hiibnquixsDaniPDs

Toi talamente d’alcuerdu col alderique, magar que no que toca a la cooficialidá…

“Si hai una mayoría social partidaria de reconocer tamién los derechos llingüísticos de quien se reclamen usuarios del asturianu (cuidao que yá se reconocen los de los que se reclamen usuarios del castellán), y esprésase en mayoríes parlamentaries salíes de les urnes, entós va haber oficialidá. Y si nun hai esa mayoría, nun va haber oficialidá. Asina de simple: llámase democracia”.

Aportaría que l’usu del asturianu ye un derechu de los paisanos falantes d’Asturies y por aciu d’ello nun tienen por qué ser mayoría. Yá van abondos sieglos de desaniciu. Si los desapegaos, los egoístes, los coreanos desagradecíos, los del inglés, les brigaes antibable y los inorantes negacionistes constituyeren una mayoría y la llantaran taríamos tamién falando d’abusu ya inxusticia de dellos coleutivos qu’andechen como verdaderos movimientos contraculturales. 

Los cinco xinetes de l'Apocalipsis

      Los cuatro xinetes del Apocalipsis camudaron en cinco: La fame, la guerra, la perfecundidá, la contaminación y l’apandamientu. N’Asturies acaballen los dos postreros por aciu de que’l primeru acabalga per onde−y peta ensin que cuasi naide quiera saber nada. Na mio cabera entrada del Feisbuc que fala sobro’l futuru del Occidente tenéis la preba col ruin siguimientu. N’Asturies lo qu’interesa ye’l puestín, la fama, el fútbol, la folixa, la sidra y el cachopu. Sobra dicir que pa la mayor parte la xente la cultura, el raigañu, la llingua y la propia historia son como la madre que−yos parió: tan ehí, pero van morrer talamente como los demás antepasaos. Amestar que los que defenden lo contrario son namái un puñáu d’abarrenaos. Sicasí, cuando l'últimu mazanal tea ensuchu, l'últimu regatu envelenáu y l'últimu monte ermu, te vas dar cuenta que nun pues comer esi dineru que tantu cobicies ya’l más gochu nun será quien nin a mexar la sidra de la Semanona na sablera de Poniente.

CAOS

 

Cambien oru por cianuru,

cambien la vida por muerte,

dan presente ensin futuru

ya ensin que’l paisanu espierte.

 

La vallina pela balsa,

un trabayu para agora.

Pela autovía d'Aucalsa

colará’l fíu que llora.

 

S’enfoten col Occidente,

nun−yos valió con Balmonte

nin col refugu la xente

de Salave col so pronte.

 

Van por Valdés y Tinéu,

autoriza’l Principáu,

¡manín, esto se pon feu!,

hai qu’andechar col d’al llau.

 

Anda Cangas nesa llista,

Salas nun salva tampoco,

la llaceria ta a la vista,

el mundiu se volvió llocu.

 

Vamos morrer encetaos

si esbaraten la natura,

tres l’andanciu vendrá’l caos

a cuenta la so fartura.

 

Qué camuden yá’l cartelu

del natural paraísu,

trocarán a infiernu’l cielu,

concedieron el permisu.

Tarta de gata

Si perdemos l'humor, vamos perder tou.

Nun alvertí calambur

nin retruécanu esbaratu

no que vi del Carrefour:

¡Yera una tarta de gatu!

 

Nun ye xuegu de pallabres

por aciu de la homonimia

nin paronimia de cabres,

 foi un muxu con arimia.

 

Más que muxu yera muxa,

más que muxa foi muxina,

pequeña como una buxa,

la redrueya de Rufina.

 

Nun nos la dieron por llebre,

tampoco ye polisemia,

sí chancia que se celebre,

un animal con isquemia.

 

Nunca viera cosa tala,

en nengún otru cumpleaños

nin Mierce al desendolcala,

 que foi a reclamar por daños

 

al manguán del pasteleru

del comerciu’l Carrefour,

que−y devolvió’l dineru

riendo como en fuelle un mur.

Baillarina de poza

 

Baillarina de poza,

gota d’orbayu,

 perecedera moza

d’agua de mayu.

 

Blinques, chapoties, saltes

nel to escenariu,

na barraquera valtes

nun tris precariu.

 

Abluquen dende’l ñeru,

les andolines,

pol ximielgu melgueru

de vós, llentines.

 

Al chiscar tan ufanes

nel mediu’l prau,

baxo verdes mazanes,

yerba y segáu.

 

Toca sele la orquesta

en son menor,

címblase la xinesta,

muga’l llabor.

 

Baillarina de lluvia,

del sueñu, ama,

nun rinde si diluvia,

la fresca dama.

Nun escaezas l'esquistu

      ¡Bienllegáu, Poldu!  Afáyate en Madrid colos tos pás y la to parentela, magar que nun escaezas −cuando cuadre− baxanos el barril d’esquistu a la metá n’agradecimientu pa compensar un plizcu los costos de distribución, los márxenes y sobre manera los impuestos colos que nos rustien equí  n’España a los paganos. Arriendes, a los asturianos, nun viaxe d’Asturies a Madrid nos manguen más de 50 euros amestaos poles tases d’un par d’autovíes. Amás, tenemos pendiente otru nuevu diezmu al gasoleu col que nos van llaceriar entá más. D’otra miente ya al respeutive d’ello, una entruga a l’Alministración: si los coches qu'usen esti carburante son tan contaminantes, ¿por qué nos los vendieron ya anecien en siguir vendiéndolos agora?

Alberto Pérez - "Yo te diré" en TVE (1984)

Al mio suegru qu’esfrutaba con Bertu Pérez y a los paisanos muertos en 1898 por culpa de los Estaos Xuníos. De neñu conocí a dalgún sobreviviente.

Yo te diré

por qué'l mio cantar

te llama ensin cesar:

ensin la to risa,

ensin los tos besos,

ensin el to espertar.

Sin la to sorrisa,

ensin los tos besos,

 fáltame'l to espertar.

 

Yo pruyiré

por qué’l  mio cantar

deriva nun clamiar,

col sangre valtando,

en vida naguando

 que tu nun t’alloñes más.

El sangre llatiendo

per vida pidiendo

 que tu nun t’alloñes más.

 

Cada vez que l’aire sopla y se lleva una flor,

albidro qu’enxamás tornará’l mio amor.

Nun m'abandones nunca al atapecer

 que la lluna sal sero y me voi perder.

 

Y ansí sabrás

por qué'l mio cantar

allampa ensin cesar:

los besos na brisa,

cola to sorrisa,

amás del to espertar.

 

Fáltenme los besos,

 fáltame esa risa,

fáltame’l to espertar.

El gatu tendíu de Be

(Semeya de Be García)

 Col tendío pasa’l ratu,

nel cabu’l reyu’l tendal,

ensin pinzar lluz el gatu,

ensuchando l’animal.

 

Sin pinces nin anfileres,

al aire, al albentestate,

pa plasmu de les muyeres,

ensin que Xuan se decate

 

Asoleya con saleru,

afayándose tan panchu,

per debaxo del aleru,

sin esmolición, tan anchu.

 

La foto l’amuesa Be,

la fino de ver agora,

ya'l muxu, polo que sé,

nun llavó na llavadora.

 

La posa ye una pasada

que la espardo con buatu.

Ensin ser de la colada,

cuelga n’equilibriu’l gatu.

 

 

Aventures de Xuanón

      Ayeri, atopéme con Xuanón y púnxome la cabeza como un bombu. D’entamu m’endilgara que taría dafechamente bien que los coleutivos que davezu se forren y qu'agora van recibir aides, de la que tornen a les ganancies tamién socialicen parte d’elles col envís de que nun paguemos el coríu siempres los mesmos paganos –les xentes que nun piden y que tampoco−yos dan−.  Arriendes, entrugóme que si nun sería meyor dexar d’usar los Falcon que penalizar con más tases a los probes propietarios de los coches vieyos de gasoleu. Darréu esplicóme qu’un estudiu de la Universidá de Salamanca valoró que l'impactu ecolóxicu d’un viaxe a Benicasim nesi aparatu ye l’equivalente al de 550 coches diésel y que dos Falcon que vuelen fasta Lanzarote suponen un gastu de 70.000 euros, según fontes preparaes del sector aereu. Aína quixo siguir con nun sé qu’histories, magar que−y dexé cola pallabra na boca al retruca−y: "Tienes que me perdonar, Xuanón, marcho qu'ando apuráu".

Con Caretu

 

Sin que naide ponga vetu,

mientres esti estáu d’alarma,

siento en pasu con Caretu

pa nun valtar pela garma.

 

Él ye caretu de cara,

yo salgo con pinta gochu,

la soledá nos ampara

d’esi virus podre o pochu.

 

Col mentáu, que ye un santín,

y dalguna gata rancia

anda encarceláu Pin

nesta repunante andancia.

 

Él nun muerde, yo nun manco,

vivimos y respetamos,

ante la puerta qu’atranco

de tala miente posamos.

 

El futuru ye más perru,

más perru que’l propiu can,

güei equí, mañana muerro,

dellos vienen ya otros van.

 

Ye siniestru l’universu,

magar too se caltenga,

anque duldo que’l mio versu

seya arenga pal que venga.

 

Pente tanta molición

nun vien novedá de China,

nin siquiera de Cantón,

nin vacuna o melecina.

 

Caretu nun sabe nada,

otros nun quieren saber,

les vides son como estrada

pal que mangonia’l poder.

Las Cruces

 

Tan afitaes Las Cruces

a la solombra El Faéu,

nin qu’allumes con mil lluces

en nengún mapa les veo.

 

Na propia llende Miranda

col moscón conceyu Grau,

pela ruta de la escanda,

col osu pardu al to llau.

 

Ente’l Pedroriu y Meruxa,

Repenerencia y Vigaña,

acuruxa la curuxa

y tasties l’arume a argaña.

 

Onde pues algamar Pandu,

dir a Dolia en carretera

o a Porcabezas andando

pela más guapa fastera.

 

Pende viera una rapaza

melguera como una xana,

que yera de Ponte Seaza

y dexé de mala gana.

 

Tan allugaes Las Cruces

nel mesmu Camín Real,

ellí pela historia esmuces

nesta sienda principal.