Lluis de Turiellos

Y un poeta orixinal, que ye una categoría a parte que dexa güelga propia nel camín de les lletres, que yá ye abondo. (Munches gracies, Lluis)

miércoles, 23 de marzo de 2011

¡NON A CUALESQUIER GUERRA!


Esto de les guerres ye la hostia. Tu nun puedes solmena-y una mocada a daquién que t'ande cafiando; tienes que denunciar, dir a los xulgaos, contratar un lletráu y amosar dalgo que sabes que ye verdá. De la que pasen los años, munches vegaes, seique quedes como tabes, pero con menos cuartos. Agora que, si tan embredando una nación, puen unviar aviones, barcos y somarinos pa bombardiar un país y ensin pasar pela Audiencia.

Camienten qu'España entró nuna guerra contra’l cabezaleru Libia, col que fai unos díes diba’l nuesu de la mano, ¡nel nome de toos!. Pétame aldericar que nel mio nome ¡NON!; d’otra miente, voi amestar un glayíu: ¡NON A CUALESQUIER GUERRA!

miércoles, 2 de marzo de 2011

Adiós Vital


Adiós ríu Xinestaza,
adiós Picu Brañasín,
nun voi tornar a esa faza,
finxada nel mio maxín.

L.lora'l regueiru Solanos,
el Castru ya la Brañueta,
alcordanzas de los branos,
na solombra de La Mueta.

Berra’l Cuartu la Riera,
Tourayu ya Espinaréu,
Las Campas ya La Piñera,
amargurando Tinéu.

Morrió’l mio amigu Vital,
con esti mes de febreiru,
cerca de la capital
ya llonxe del castañeiru.

D'Asturias, Madrid y Soria,
cuentos ya caxigalinas,
nel mio cantu la memoria,
espetanon como pinas.

Déxasme abonda tristura,
anque nengún escaezu,
pos recuerdos en bayura,
m'acompañarán, davezu.

Viniesti de Ponte Castru
pal pandu Nuevu Baztán,
nel camín, siento’l to rastru,
ando ablucáu ya rabián.