Lluis de Turiellos

Y un poeta orixinal, que ye una categoría a parte que dexa güelga propia nel camín de les lletres, que yá ye abondo. (Munches gracies, Lluis)

jueves, 27 de marzo de 2014

Aldovinanza

(Semeya, Flor de lluna)

¿Qué cosa, qué cosadiella,
camudó nesti retratu?,
yeren cuatro na reciella
y agora nos falta un gatu.

Aldovina nesti cestu,
quien trocó pelu por pluma,
acolumbra pol so xestu
y dempués fai bien la suma.

¿Tienen cara de curuxa,
estos gatos curuxeros?,
¿o la curuxa gatuxa
tien los sos güeyos gateros?

Si nun foras quien a ello,
mira sele’l so focicu,
vas deprender l’enguedeyo,
si atopes nel intre un picu.

lunes, 24 de marzo de 2014

Asina somos


     Seique morrió otro bon paisanu. Cuasi que tol que muerre, en resultes foi una bona persona, fasta pa los que-y andaron poniendo falcatrúes. A vegaes, abúltaseme que munchos castrones fueron bonos castrones. Asina somos los humanos. Güei les televisiones tuvieron tol día dando al rabil, anque nesto sí taben d’alcuerdu, y aporfiaron na mesma xera, aneciando coles imáxenes d’esi caberu adiós. Bien de xente s’averó a la Sala de los Pasos Escaecíos, ente ellos bien seguru que más d’un qu'enantes refugara dir al entierru de dalgún pariente; sicasí, asina somos los humanos. Hai una montonera homes y muyeres qu’abocana cada día ensin que naide se decate. Si acasu, asoleyen una curtia reseña na prensa’l día qu’entra na seición de necrolóxiques. A la mio ma, que tamién foi una muyer maraviyosa, de la que nos dexó, nin siquier la conseñaron nesa fueya. Sí, la mio ma, como nun yera afamada, careció fasta l’escaezu del requexu l’escaezu; magar qu’enxamás el nuesu, porque asina somos los humanos.

viernes, 21 de marzo de 2014

Güei ye’l día la poesía…



PA TARESINA GONZÁLEZ (reed.)

Tráyote’l cabás Taresa,
cola moñeca de trapu,
¡cuantayá, frañera encesa!,
seique-yos tornara'l Papu.

El mio versu, si te peta,
afitáu nestes ringleres.
Una preba, d’escoyeta,
del maxín a sos deleres.

Alcordances del collaciu
de guedeyes de panoya
que mudó a mayor, con xaciu,
sin escaecer la troya.

El mandilón de cuadrinos,
d’un caxón de la memoria.
Chuchos de los rapacinos,
los qu’enredaben na noria.

Les cintines de colores,
sin desendolcar los llazos.
Enfotu pa que nun llores
y de la to xente, abrazos.

Revolvinos de la fonte,
de la corra, unes castañes.
Una semeya la ponte
que cruciabes en Tremañes.

Al cuartu escuru de suaños
quiero, yo, la lluz iguar;
d’esta miente, tolos años,
abondo podrás xugar.


PINDESIERRA

viernes, 14 de marzo de 2014

Gracias Gobierno...


El Gobierno no gravará la vivienda habitual en el IRPF  (14.3.2014) 

EFE / Madrid La vicepresidenta del Gobierno, Soraya Sáenz de Santamaría, ha anunciado este viernes que el Ejecutivo no tiene intención de que la vivienda habitual sea imputada


Detalle tierno
—no está imputada—
de este Gobierno:
no habrá putada.

Bajan pensiones,
bajan salarios,
más comisiones,
nuevos calvarios.

No habrá otro impuesto,
hoy no reiteran,
sobre lo puesto,
nada laceran.

Lo de la luz,
lo del transporte,
es una cruz,
todo es recorte.

Salvo prebenda,
no baja nada,
mas tu vivienda,
no está imputada.

Bárcena y Blesa,
nada les pasa,
saliendo ilesa,
tu misma casa.

Gracias Gobierno
y patronal,
desde este infierno,
punto final.

martes, 11 de marzo de 2014

L'arcu la muerte

     
     D'Atocha a Santa Euxenia, el cercaníes madrilañu dibuxa un arcu de círculu col so recorríu. Yo vivo práuticamente nel centru de la so cuerda imaxinaria, nun 6º pisu. Aquel malditu 11 de marzu de 2004, la mañana espertaba indiferente. Pasaos unos minutos de les 7 y media, yo m’alcontraba na mio terraza pendiente de que’l neñu s’aviara p’acompañalu al colexu. En torno a les 8 menos venti, y n’apenes 2 minutos, sentí como si daquién cutiera con un martiello repetíes vegaes nuna llata d’aceite vacía. La 1ª, tres veces; la segunda, otres tres y la tercera, cuatro. Aína decatéme de que debíen ser esplosiones por culpa de que’l soníu nun asemeyaba tar enforma averáu. La 1ª retafila vieno de la derecha. La 2ª del centru; sicasí un solo españíu lu oyí a manzorga. La 3ª riola tamién sonó a dereches; magar que d’un llugar más averáu. Namái llevar al guah.e a la escuela, prendí la radiu y yá camentaben qu'había dellos firíos y dalgún muertu. A min darréu me paeció que la cosa diba a ser peor al oyer tantes detonaciones. Colé a visitar a la mio ma nel autobús, que d’aquella yá taba mui malina, y na mesma cruz de la cai Seco cola Avda. de Ciudá de Barcelona, a un kilómetru d’Atocha, algamé a ver pel ventanu a dos mozos moros vistíos de ñegru que sonríen gociosos. Nada se sabía entovía; pero a min tampoco m’emprestó un res esa imaxe. Dempués les males novedaes se fueron socediendo y les víctimes aumentando. Les bombes españaron na estación d’Atocha, na del Pozu, una en Santa Euxenia —cuasique al tiempu que les del Pozu— y el restu xuntu a la cai Tellez, mui bien cerca de la primera. Lu qu’aportó de secute cunto que tol mundiu lu sabe. Ente los cadabres s’alcontraba la hermana de Silvia, la collacia’l mio fíu, a la que tapé col mio paragües cuando cayó la cabera tambascada de la qu’esperaba a la so hermana pequeña. D’igual mena, el fíu del vecín d’abaxo de la nuesa casa de campu y otra moza que trabayaba nun comerciu de la esquina, a la que vía tolos díes. De xemes en cuando, los duelos, los homenaxes, les flores, los llazos, les viesques y la cebada al rau aneciaron; pero valir, nun valieron pa nada. Si a la coria que reventó paisanos, muyeres y neños-yos hubieren torgáu'l pasu, nun taríamos falando d’esa sangrina. Escapao, les midíes de seguridá s'incrementaron “nos aeropuertos”. Les inocentes víctimes morrieron ensin nenguna culpa y a los firíos asina como a tola so parentela-yos arregallaron pola mesma causa. Ente discutinios, tal día como güei, fai yá 10 años. Mentanto, lleo ablucáu na prensa, nesa mesma cai Tellez a la que tuvi de baxar al mélicu, que güei hai más gandaya y amenaces d'esa mesma xente en España que les qu’había entós. De resultes, se m’abulta que tamos perdiendo l’aldu, sinón lu perdimos yá ensembre.



sábado, 8 de marzo de 2014

Pal to neñín


A la pita, pita,
pita del corral,
que’l so ñeru afita,
nel mediu un bardial.

A la gocha, gocha,
gocha del cubil,
la cabrina mocha
mexa na carril.

Al xatu xatucu,
que nun ye culón,
mama de sutrucu,
pos ye mui mamón.

A la oveya xalda,
de llana bermeya,
esguilando balda
a la muyer vieya.

A la pega, pega,
que berra y que berra,
siéntese na vega,
siéntese na cerra.

Al ferre ferreru,
qu’agüeya la presa,
pel fríu xineru
o na tarde encesa.

Al malvís prestosu,
qu’arrodia al paisanu,
al esbardu y osu,
caún más ufanu.

La xaronca ronca,
cuca los sos berros,
na poza la tronca,
perbaxo los cerros.

Ye pal to neñín,
esta poesía,
dientro’l mio maxín,
la estrofa s’avía.

martes, 4 de marzo de 2014

El mar glaya


El mar nun ye pa cantar,
que si ye azul; que si, inmensu,
al mar lu hai qu’afalagar
y nun dexar indefensu.

Nun refundiar les basories
nes sos agües revolvines,
nin al aire valtar cories,
nin al terrén, los purines.

Nin térmiques, nin velenos,
que l’aliendu seya bonu,
pa desataponar senos
y llaceries del carbonu.

Nin más metales pesaos,
nin vertíos, nin gafures;
si nun tamos coordinaos,
morreremos con voltures.

El nuesu mar yá protesta
de qu’afuega, con mil foles,
ye’l mundiu como una orquesta,
que nun te cuenten más troles.

Camudemos el camín
y dexemos d’emporcar
la tierra, ríos y orpín,
o'l mar tornará a glayar.

lunes, 3 de marzo de 2014

Los clásicos griegos

Nun voi dicir que los clásicos griegos foran toos manfloritos, non. Nun voi dicir qu’ehí tan pa que la xente preparao ande arguyoso de ser quien a lleelos, non. Nun voi dicir que la filosofía nun atopó enxamás “La Verdá” y sicasí, aporfien les sos facultaes, enllenes de filósofos, en da-y al rabil a la so gueta, non. Nin siquier voi dicir qu’esos, los sos clásicos griegos, seyan mui aburríos, non; magar que, vamos tornar un cachu a los nuesos deleres a ver si sal con más gracia...


Sócrates

Marchémonos per esti llau y sigamos el cursu l'Iliso, y ellí onde meyor nos pete vamos escoyer dalgún sitiu afayadizu pa sentanos.


Fedro

Vienme perfeutamente salir de casa ensin calzáu, y aforrar nél como tu. Podemos siguir la corriente, y nella vamos tomar un bañu de pies, lo que ye prestosu nesta estación y a esta hora del día. De resultes, vas aventar l’arume a gochu.


Sócrates

Colemos, pos, y escueye tu'l sitiu onde nos vamos sentar.


Fedro

¿Ves esti plátanu de tanto altor?


Sócrates

¡Mialma, a min paezme rebollu!


Fedro

Ellí, a la so solombra, amás de moscar, vamos atopar un airucu prestosu y yerba onde sentanos, y, si nos plaz, echanos un cachu; magar que nun sé si garraremos dalguna pulga.


Sócrates

Pos, tira ho.


Fedro

Dime, Sócrates, ¿nun ye equí, en ciertu puntu de les orielles del Iliso, onde’l castrón de Boreas arrampuñó cola la ninfa Oritea?


Sócrates

Asina se cunta.

Fedro

Se m’abulta qu esi socesu tendría llugar equí mesmu, porque l'encantu sonriente de les foles, l'agua puro y tresparente y esta ribera, tou convida a que les ninfes tuvieren equí folgando.


Sócrates

Nun ye precisamente equí, sinón un plizcu más embaxo, como a dos o tres molinones, onde ta'l pasu del ríu pal templu de Diana Mata Bichos. Per este mesmu requexu hai un altar al páxaru de Boreas... 

domingo, 2 de marzo de 2014

El Juli, profesor universitariu

El Juli, profesor universitario • Las materias que impartirá serán cultura taurina y métodos para motivar • La Universidad Complutense y la Camilo José Cela se disputan su presencia • La Universidad de Salamanca y la de Málaga también están apostando por él… (El Mundiu – 28.2.2014) Y llueu dicen que ta mal la enseñanza en Carpetovetonia. ¿Como va tar, si na universidá anden asina? D’otra miente, voi moyar la tiesta por culpa de que nun sé si toi suañando y nel intre devolver, que me tan dando voltures. Enantes de que se m’escaeza, tolos mios amigos y collacios, que nun torturáis bichos, quedáis nomaos doctores “Cum laude”, acordies colo visto y conforme a min me peta.