Lluis de Turiellos

Y un poeta orixinal, que ye una categoría a parte que dexa güelga propia nel camín de les lletres, que yá ye abondo. (Munches gracies, Lluis)

lunes, 31 de julio de 2017

Dar la nota

    

     Podría dicise que lu que fai míster Bean nesti videu ye dar la nota por partía doble. Lo peor ye que na realidá, al marxe de la comedia, hai  bien de xente nesti país a la que mantenemos namái que por dar la nota. Sí, pasa na política, nel deporte, na televisión… Magar que nel otru cabu tamién hai cada vez más personal, que nun cotizara enxamás, que tamién da la nota y vive de nós. Fasta agora, esto mal que bien va aguantando, pero la cosa pinta mal y pueque, más ceo que sero, de tanto tirar del tetu esti escose y la tema arreviente.

domingo, 30 de julio de 2017

Toos en bicicleta


     Dicen que la bicicleta ameyora la circulación: la tuya propia y la de la ciudá. D'igual miente, amenorga la tensión arterial: la de les arteries de la población y tamién la tuya. De resultes, allegra'l corazón de dambos y nun aforfugues col fumu del vehículu. Asina que, si tienes un Audi o un BMW, que son les marques nes que más s’enfoten los asturianos, valte más dexar d'utilizalos ya emplegar la bici. Nun t’apures polos tos coches que nun tienes más que me lu dicir y paso yo a recoyelos; arriendes, voi pagate la tresferencia.

jueves, 27 de julio de 2017

Juanjo Arrojo


Xuanxo, Xuanxo tien l’Arroxu,
l’Arroxu del so apellíu,
arroxu al que nun da noxu,
nin resulta escaecíu.

Ye la cámara d’Asturies,
ye semeya y sentimientu,
acutando peles muries
y torgando’l pruyimientu.

Fai la foto al nuesu vezu,
onde s’amuesa’l raigañu;
pente xinesta y berezu,
ves a Xuanxo, añu tres añu.

La llingua afita daveres,
los valores, les costumes,
magar que naciera en Mieres,
–y gusta esguilar les cumes.

Ye creyencia nel folclor,
sofitu de tradiciones,
ye procuru, envís, remor,
atraición por nuesos sones.

Chilecu y boina por traxe,
nos reises o aguilanderos,
ye d’Asturies la so imaxe,
arrodiáu de compañeros.

Defende los animales,
–y tenta l’arqueoloxía,
esfruta en baillar tarrales
y cola chavalería.

Emponderaos los amigos,
presta tar a la so vera,
comiendo quesu o formigos,
bebiendo sidra con xera.

miércoles, 26 de julio de 2017

¡VUELVEN!

"Vuelve". "Vuelve a la naturaleza, a l'harmonía…" Vuelve la seca. Van volver a atizar. Va volver l'Alministración a inorar lo qu’asocede. Van siguir calteniendo unes lleis qu'afalen les quemes. Va a aneciar en facer caún lu que-y peta en beneficiu de so: ¡l'egoísmu humanu! Va volver a salir de baldre la llaceria. Asturies volverá a amburar y a un tiempu millones d'animales y plantes, y pueque dalgún paisanu. De resultes, esi paraísu va ser cada vez menos paraísu. ¡NUN LU DESDEXES Y DENUNCIA!

martes, 25 de julio de 2017

El pitu fierro

   
       El pitu de fierro que bailla sobro una sola pata nel mesmu llugar nun canta un res, pero t'amuesa la direición de la fresca. Por embargu'l palombu de plumes que restola per tolos llaos nun ye a señalate nada. Yo m’asitio a metá de camín ente'l pitu yá'l palombu yá qu'ando adulces pel teyáu de la que voi iguar daqué esgonciáu ya escapo volao de la que me truñen les griespes cuando calco ensin querer en dalguna teya na qu'alluguen el so aviesperu.

A la pata, pata coxa,
que bailla’l mio pitu fierro,
mientres el palombu toxa
y yo coles griespes cuerro.

Viva’l mio teyáu qu’afita
al palombu palomberu,
al machu fierro la pita
y a les griespes d’espanteru.

jueves, 20 de julio de 2017

El mañana siempres llega

    

  En delles ocasiones, mientres qu’asocedía dalguna situación afayadiza que me prestaba, m'emplazaba pa recordar nel futuru aquel mesmu escenariu y tiempu. Asina lu fixi cuando vi en direutu a Lluis Aguilé y a Gigliola Cinquetti entonando esti cantar de “Escaezamos el mañana”. Agora, trescurrío al rodiu de mediu sieglu, me tresllado a aquel instante y cavilgo en que desgraciadamente’l mañana siempres llega, magar que la lluna y la mar anecien en siguir ehí. Arriendes, si mires namái pa les estrelles vas finar llamentablemente estrelláu. De resultes, aprovecer lu que pague la pena ya esfrutái, amigos. 

lunes, 17 de julio de 2017

El gato maragato

     
     Como-y prometiera a Marga una en castellán pa los sos ñetos ya agora vien a cuentu por culpa qu’Ángeles sacara esta tema, pos vamos asoleyar una caxigalina d’un gatu maragatu…


Estuve en León un día
y vi un gato maragato
de la Maragatería.

En aquella tarde fría,
jugaba con un zapato
de una gran zapatería.


Luego, del escaparate,
vigilante se entendía,
con mirada de magnate.

Sin caer en disparate,
esquivando se movía,
afinando en el regate.


Inaudita sensación,
observar tras los cristales
esa representación.

Era tal su distinción
y tan finos sus modales
que causaba admiración.


De soslayo era ese evento
marchando entre vidrio y cuero,
ni siquiera un aspaviento

se atisbó en ningún momento,
pues con porte lisonjero,
 se retiró a su aposento.


En tan sólo unos instantes
nos dejó a todos perplejos,
sus garras, cual de rampantes,

cimbreaban los estantes;
pasmados de sus reflejos,
quedamos los viandantes.


A veces, en esta vida,
algo simple nos divierte,
resultando entretenida

cualquier cosa acontecida,
descubriéndola, con suerte,
no pasará inadvertida.

domingo, 16 de julio de 2017

Un seis ya un cuatro

(El seis ya'l cuatro de Marta Fernández)

     Munches gracies/muitas gracias, amigos, poles vueses felicitaciones. Fino de tornar de la fin de selmana y magar que’l Feisbuc me torgara de lleer cuasi que la metá de les vueses candiales felicitaciones, quiero agradecevos a estazón por esta’l vuesu procuru…

“Un seis ya un cuatro
pinten la cara
del mio retratu”.


Namái un dichu
de cuando nenu,
col tiempu’l sichu
cayó d’esmenu.

Sobre mio cara
y la pelleya,
valtó la tara,
“la engurria bella”

Nunca cunté
qu’algamaría,
güei yá se ve,
llegó esi día.

Puro teatru,
de toos moos:
col seis ya’l cuatro,
¡gracies a toos!

Vós sois los estres,
sois l’argumentu,
sois a la riestra:
poema y cuentu.

jueves, 13 de julio de 2017

¡Morrió'l páxaru de trapu!


Morrió'l páxaru de trapu,
dixeron que l'otru día,
yera'l páxaru más guapu
de tola xuguetería.

Al entierru, de mañana,
viniera l’osu sonriente,
la mona de porzolana
y una montonera xente.

Seis moñeques de Famosa,
tres ñácaros de Nenucu,
tamién la Pantera Rosa
y, de fieltru, seique un cucu.

Col auténticu Pinochu,
Campanina y Peter Pan,
un can más chulu qu’un ocho,
quiciabes, de Supermán.

Una princesa ganchiyu,
dos soldaínos de plomu,
Geppettu con Pepín Grillu,
la Caitana ya un nomu.

Madelman, la Serenina,
dellos gremlins de Quirón,
bien de nanos de resina,
Cenicienta ya al Rei Lleón.

Alicia, el coneyu blancu,
figures d’un nacimientu,
Garfiu, el pirata mancu,
y la reciella otru cuentu.

Caperucha Collorada,
cuatro barbies de Mattel,
pente bruxes, una fada
xunto al Capitán Marvel.

Morrió’l probe na so xaula,
mira ensin consuelu’l fíu,
los paxarinos de so aula
s’allegaron fasta’l ñíu.

miércoles, 12 de julio de 2017

De baldre


     Lo meyor de la vida ye gratis y somos tan necios que nun nos decatamos: suañar, enredar y ser como neños sal de baldre. Nun esmolezas si nun yes quien a suañar: llee lu que t’amueso y soñaremos xuntos.

martes, 11 de julio de 2017

Cambéu climáticu


     Agora, la xente per Madrid anda reburdiando de la calor y paez qu’escaeciera’l fríu estremu que careciéramos nel pasáu iviernu (ver semeya). Sicasí, la Villa y Corte ye lu que tien: o arroxes o te xeles y, por culpa d’ello, ye tan cenciellu xubir al cielu a traviés del furacu del que falen nel so eslogan. La verdá ye que nun tamos preparaos pa nada ya entá menos pa un plizcu de cambéu climáticu. 

viernes, 7 de julio de 2017

FILA


Fila que te fila, hermana,
el filo d’otra bandera,
d’una bandera asturiana,
pasando pela peñera.

Que nun seya a última hora,
que nun seya un pendón ruin,
que cuele esa bordadora
prindada nel Albaicín.

Que seya d’azul del cielu,
d’esi cielu de Granada,
qu’a la victoria dé asuelu,
per aciu una cruz dorada.

D’esa miente en to memoria,
ondulará nes Asturies,
pola lliberal victoria,
esbarrumbando les muries.

Asina l’aniciu y fin,
serán xuníos agora,
en formigón de Veguín,
con agües del Darro y Nora.

Que nun hai tierra llonxana
si se sienten a la vera,
y, en Granada a teyavana,
texen la nuesa bandera.

jueves, 6 de julio de 2017

¡Llueve!

     
     Por fin llueve sobro la Villa y Corte, y l’infiernu nos da tregua. L’asfaltu yá nun escachiza y l’agua asela la so sede. Los charcos abonden y cuspen la so repla. La mierda sal de salea. Los castrones aprovechen p’acelerar averándose a la cera y calate fasta la cadarma. Flores, fueyes, cagaritos ya escupiatos valten pal pisu ya esbaries nel mecigayu. Yá quedáramos ensin arguyu y namái remanez la humildá. Los pasiantes foriatos de l’aída güei enfarxopeten los centros comerciales. Algamo la mio casa y güel a café puro. La cafetera faime beneficiariu del so arume ya éntrame la galbana. L’apnea del suañu m’empobina a esti y yá toi ehí con vós, al ablugu d’un solhorru. L’orbayu ye lu que tien: ¡Bienllegada lluvia! 

martes, 4 de julio de 2017

¡Una bona novedá!



     Esta mañana ceo, caleyando per Madrid, decatárame de qu’un camión de la policía municipal acarretaba la bicicleta de l'atleta paralímpica Xema Hassen-Bey. Entrugué al conductor y m’esclarió qu’hubiera muncha suerte n’atopala. Foi alcontrada na cai Tribulete cola so cadena desallugada. Anecio, en Madrid, de la que te desdexes, te roben fasta l’alma.

lunes, 3 de julio de 2017

La casa los mios suaños

   
     Dempués d’espropiame 12.000 euros de los mios aforros d’años en aiciones del Bancu Popular, los xestores d’agora m’ufierten –a traviés del Feisbuc y de la inmobiliaria de so– esti chamizu como “casa de los mios suaños” pa ver si aínda me queda dalgún perru pa mercásela y remanecer entuvía más na ruina.

domingo, 2 de julio de 2017

Novela


Güei, voi narravos una novela; pero curtia, porque si non, rindo…


     Los personaxes son Xabel, Xicu y Xuan que, como davezu, van camín del chigre de Pin.

     Nel desendolcu, chumaron toles botelles del bar mientres qu’echaben la partida.

     Nel desenllaz, morrieron toos por culpa d’una cirrosis hepática.


FIN