Llévome bien colos burros. Non, nun m'importen les chancies. Almiro los utres; pero solo a los que vuelen. Burru ya
utre pueden ser insultos, magar que namái pa otres besties. Los primeros viven
y dexen vivir; la triba de los antropomorfos, malapenes dalgunos. Yá quixeren
estos ser tan bonos como los pullos o esnalar tan altu de mires como esos
paxarones. El pollín rayón me conoz y vien al mio alcuentru a pola so ración
selmanal de pan. Los utres nada quieren saber de los humanos. Del perru ya’l
cabritu vos podría comentar otro tanto, anque nun los hai más perros y más
cabritos que dellos bípedos. Si faltamos con nomes d'inocentes criatures, tenéi
por seguru que’l receptor nun merez esos afalagos.
Poesíes, cuentos y rellatos curtios n’asturianu qu’asoleyo davezu sofitando la nuesa llingua.
Lluis de Turiellos
Y un poeta orixinal, que ye una categoría a parte que dexa güelga propia nel camín de les lletres, que yá ye abondo. (Munches gracies, Lluis)
jueves, 26 de diciembre de 2019
viernes, 20 de diciembre de 2019
Xuníos
https://www.lavozdeasturias.es/noticia/asturias/2019/12/20/argayo-grandes-dimensiones-vuelve-cortar-salida-ferroviaria-meseta/00031576827283510278223.htm?utm_source=facebook&utm_medium=referral&utm_campaign=fbgen_a
Cuando nun ye por
argayu
−que
ye tamién un revés−,
ye davezu por un
fallu
qu’asocede cada mes.
Mientres retrasen el
ramu
del furacu de la
risa,
al nun furrular el
tramu,
del Güerna pagamos sisa.
Odisea del Despacio
sufrimos los
asturianos,
por culpa del nuesu
xaciu
nos caltienen de
paganos.
La tema ye tar xuníos,
que nun mama’l que
nun berra,
asteniendo por avíos,
como faen unos d’Esquerra.
jueves, 19 de diciembre de 2019
Odisea del despacio
Les obres del furacu la Variante Payares
camín d’algamar a les d’El Escorial (daquella, ensin tantos medios). Nun son a llegar
a tálamu. Mientres, nós, a llenar la duerna del Güerna ya a dar dineru n'Adaneru. ¿Pondrán el ramu pal añu qu’entra? El remate a tantu
trafulcu sería qu’esbarrumbara de la que crucie’l tren.
miércoles, 18 de diciembre de 2019
Doña Pamela
Gastaba doña Pamela una ídem cola que
duplicaba la so presencia. Doña Pamela llantaba la so homónima restallara’l sol
o anubriera la solombra. Podía paecer que cubría la so cabeza por distinción;
sicasí, yera un vezu adquiríu de cuando baxaba a segar el trigu ya’l centén
lloría abaxo. Pamela nun ye un nome asturianu, magar qu’esta paisana llevaba la
palma d’asturianía. Esta muyer yera’l claru exemplu de que nun debemos marmullar
tantu, yá que les apariencies, de cutiu, trabuquen.
martes, 17 de diciembre de 2019
¡FELIZ NAVIDÁ, AMIGOS!
Güei, al baxar del monte, atopéme colos
pastores, los romanos, los camellos y fasta con elefantes y xirafes peles cais
de San Llorienzu del Escorial alredor del nacimientu de la plaza. Ello me fixo
cavilgar, mientres papaba l'escomunal platu de verdures rustiaes que m’empobinen
na sidrería de Lloviu, que yá tamos en Navidá. En resultancia, vos deseo unes MUI
FELICES FIESTES de NAVIDÁ ya AÑU NUEVU, amigos.
lunes, 16 de diciembre de 2019
Les porreres
Diba una moza tan
aparenciosa col so bolsu de Cachimba y Lola afumando col so porru a tolos que
s’allugaben a la so vera y cayí na cuenta de que col llinguaxe inclusivu
falamos de los porreros ya escaecemos a les porreres. ¡Va por elles!
Yá nun se ven cigarreres
peles cais de Xixón,
namái dalgunes porreres,
igual qu’en tola nación.
Con h.axís o mariguana,
hai agora bien de moces
qu'esnelden tola selmana
dende Veriña hasta Roces.
Esa mocina curiosa
que s’asienta a la to vera,
que tien papiellos de rosa,
pueque seya una porrera.
Amodo d’un carreteru,
lliate y te prende un pitu,
encendíu col chisqueru,
tres de la igua y sofitu.
Acarreta col papel:
los mistos, la yerba y china
nel so bolsu de Chanel,
fumando a la
rebalguina.
D’esa miente’l so gargüelu,
va atropando’l mocu a esgaya,
surniando peor qu’un güelu,
cuspiendo la refugaya.
Cáncanu y traqueotomía
tan a la chisba aculló.
Pelos derechos un día,
la cigarrera lluchó.
jueves, 12 de diciembre de 2019
Collaboración
Tres les portaes,
pintures,
páxines: cuarenta y
cuatro,
cartes d’amor y
llectures,
narrativa ensin teatru.
Pal qu’apriende,
abrazaderu,
con cites nel primer
cabu
−bebederu “abrevadero”−,
escoyíes por Gustavu.
De la cultura ye guía,
pente l’amuesa, l’ensayu,
nun pue faltar
poesía,
como siempre, nella
afayo.
Nel caberu númberu 15 de Les Fueyes del
Foru (Las Hojas del Foro), revista de creación y llectura asoleyada pola
biblioteca de Grau.
jueves, 5 de diciembre de 2019
Na cueva l'osu
El que reburdia a la tema
del nuesu mundiu abegosu,
pero vive del sistema,
que chingue ya−y coma l’osu.
Al que−y repuna’l dineru,
pero ocupa la vivienda
que mercara un compañeru,
que−y engulla n’otra
sienda.
Al más llistu que Varistu,
que vive de la to ayuda,
que lu rustie con esquistu
o−y pape en carne cruda.
Quien nun quixo cotizar,
esquitando toa prueba,
y más pensión quier cobrar,
que lo almuerce na so cueva.
Al políticu que pacta
tres siete años la renta,
tráguelu y que conste n’acta
y naide lu tea en cuenta.
El que quema la so viesca,
camudándola n’infiernu,
qu’ambure ellí como yesca
pa la ivernada d’iviernu.
Dientro de la cueva l’osu,
onde xanta tan campante,
ves cadarmes de faltosu,
y tamién de repunante.
lunes, 2 de diciembre de 2019
¡YÁ TENEMOS GOBIERNU!
(Videu colingáu por Dan)
ÚLTIMA HORA: El PSOE y PODEMOS refuguen a los
dixebristes d'Esquierda Republicana de Cataluña y pauten con Abascal. Nun
vayáis pensar lu que nun ye, que foi por culpa d’una rellumada del cielu que
como−y
asocediera al homónimu d’Ilesies−y fixo cayer de la pollina y camudar la
so repunancia pa cola nuesa llingua a querer facela cooficial; arriendes, royeron−y
les coraes ya'l siguiente pasu que va dar ye primir pa que se supriman la caza
y la tauromaquia. Darréu, pretende que llanten el ramu la variante pa xineru
del añu qu’entra, desaniciando a un tiempu les tases de l’autovía. Lo que diz
que va caltener ye lo de la patada nel culu a los golfones ocupadores ya’l que
quiera ayuda, que trabaye. ¡Chachu, van afarar!, ¡YÁ TENEMOS GOBIERNU!
viernes, 29 de noviembre de 2019
TUÑA RETUÑA
Ésti ye un relatu de
Pindesierra de Vega y Carpiu que desendolca nun futuru imperfeutu:
Nun universu paralelu, nun
país paralelu y con pueblos paralelos, un manguán foriatu ocupó la casería d’un
vecín mui queríu d’una d’eses parroquies. Los paisanos de Tuña –qu’asina
se llamaba esi llugar paralelu− encamentaron la desocupación a les
fuerces d’orde, que retrucaron que nun podíen facer nada ya amestaron que
debíen falar col xuez. Darréu, los paisanos de Tuña encamentaron, tamién de mou
paralelu, la desocupación al xuez qu’aldericó que nel intre tampoco podía facer
nada ya esclarió que yera por culpa les lleis, añadiendo que debíen dar parte a
l’ Audiencia, magar que tardaríen abondo tiempu en dictar sentencia. Los
llabradores, al vese desdexaos por unes lleis inútiles, aconceyaron y alcordaron
de mano llantar un cartelu na entrada de la localidá asoleyando esti testu:
“SI’L QUE DEBE NUN FAI NADA,
QUE TRABAYE COLA AZADA.
CONTRA’L QU’OCUPA, REOCUPA
Y MANDA AL GOLFÓN AL HUCA”
Arriendes, aquella mesma
nueche'l delincuente foi sacáu de la propiedá arrampuñada, recibiendo una bona cuelma
palos y precisando d’ingresu nel HUCA. Aína, el xuez fixo actu de presencia
acompañáu de les mentaes fuerces d’orde, entrugando al altu la lleva a la
población que s’alcontraba toa aconceyada a la vera la ilesia:
¿QUIEN BALDÓ AL OCUPADOR?
Los paisanos glayaron a un tiempu:
¡TUÑA RETUÑA, SEÑOR!
A lo que la so señoría berró:
¿Y QUIEN YE TUÑA RETUÑA?
Rematando'l pueblu exemplar en voz alto:
¡TOOS EN COMUÑA!
jueves, 28 de noviembre de 2019
Col home esperteyu
Esta mañana atopéme col Batman que taba baxando
pela fachada del so hotel na Gran Vía –yá sabéis qu’él enxamás garra
l’ascensor, porque pa eso ye Batman− ya esclarióme qu’anda con medrana nun−y
vaya a absorber dalguna llinia aerea, como cuntaba que-y pasará a Supermán. La
verdá ye que l'home esperteyu entovía tenía que tar contentu yá que la mayor
parte la xente nun ye a treslladase pel aire namái que col so maxín. Al
alderica-y eso y que nel falcon, que pagamos toos, sólo pue esnalar el que nos
quier xubir el gasoleu a tolos demás, colara tan feliz esguilando pela torre de
Madrid.
domingo, 24 de noviembre de 2019
Primer desdexu al asturianu
Cantar d’historia pal nenu
ya encamientu al antibable:
que salga del Pleistocenu
y se faiga más sociable.
Nun fora inventu l’agraviu
que carecimos de mano,
barrió pa Castiella’l Sabiu
ya desdexó l’asturianu.
Escrito por Pindesierra,
ensin cobrar una perra.
--------------------------
La reina Berenguela,
güi, güi, güi,
llamada asina,
trico, trico, tri,
fora tan fina,
lairó, lairó, lairó,
lairó, lairó,
que con Fonsu casara,
güi, güi, güi,
casara aína,
trico, trico, tri,
y Llión amestara,
lairó, lairó, lairó,
lairó, lairó.
Dixo’l so fíu Nandu,
güi, güi, güi,
Nandu III,
trico, trico, tri,
pa yo tar gobernando,
lairó, lairó, lairó,
lairó, lairó,
da−yos dineru,
güi, güi, güi,
a les infantes,
trico, trico, tri,
que taben antes,
lairó, lairó, lairó,
lairó, lairó.
Dempués el fíu’l “Santu”,
güi, güi, güi,
que sabía tantu,
trico, trico, tri,
desdexó por Castiella,
lairó, lairó, lairó,
lairó, lairó,
la nuesa llingua
bella,
sí, sí, sí.
Ansí’l “Sabiu”
manguán,
trico, trico, tri,
impunxo’l castellán,
lairó, lairó, lairó,
lairó, lairó.
jueves, 21 de noviembre de 2019
Qué viva'l baille
Viva’l baille ya’l que toca,
vivan los que tan baillando,
el que canta ya’l qu’aboca,
ya’l zapatu zapatiando.
Viva’l cuerdu, viva’l llocu,
que mui llocu tien que tar
pa dedicase al barrocu
y bien de fame pasar.
Viva la sorrisa d’ella,
qué viva’l plumeru d’él,
la tarrañuela en tropiella
ya’l so cuerpu de pincel.
Viva tou aquel qu’escuche,
viva tou aquel que sienta,
la xibla ya’l sacabuche,
la vigüela ya’l que cuenta.
Viva’l laúd y la tiorba,
qué viva, viva la danza,
el que blinca y nun encorva,
y tol que mueve la panza.
Viva quien te fai suañar
vivan los sones del arpa
y tamién los del llugar
qu’esfrutamos baxo carpa.
lunes, 18 de noviembre de 2019
Sonetu en chancia
Sonetu que t’espeto a
ti, Anicetu,
asela la espinela, la
de Nela,
sabe de seguidilla,
la Sabela,
tercetu que te meto
tres cuartetu.
Que naide a ese
sonetu ponga vetu,
que si con Nela esnala
esa espinela,
que cante la Sabela
cantinela
y d’esti pericuetu
acote’l retu.
Entrastio colos tres,
nun ye estribillu,
balancia so la bancia,
nun ye estancia,
llantar al
tresbolillu ye de pillu,
encoplo cola copla de
la infancia,
qu’alluma la parola
ensin dar brillu,
sumiendo esti sonetu sólo
en chancia.
viernes, 15 de noviembre de 2019
Semeya del futuru
Güei viera na Puerta’l
Sol
como un grupu
antisistema
taba raptando a una
fema
col so bolsu de
charol.
Al tar la xente
avezada,
naide−y aportara auxiliu,
unos porque tan d’exiliu,
otros porque nun faen
nada.
Uno mira pa otru
llau,
otra curia les
maletes,
nun−yos fadia que−yos
guetes,
porque’l robu t’afitáu.
El que nun te roba,
pide,
el que nun pide,
maquina,
apostáu en cualquier
esquina,
como’l tueru d’una
vide.
Colo que pañen d’impuestos,
monten un árbol p’avientu,
de Navidá, como’l
cuentu,
con perendengues bien
puestos.
Pela cai d’atrás, los
bancos,
presumen de torrexones,
a cuenta les
comisiones,
nunca se van quedar
mancos.
Ayén ta Carlos III,
montáu sobro’l so caballu,
ensin reparar aballu,
mientres lleven el dineru.
Ye una foto del
futuru,
equí nengunu trabaya,
el que nun te quita,
calla,
y too se torna
escuru.
lunes, 11 de noviembre de 2019
¿Qu'andaremos faciendo mal?
El día dempués la güerta
d’Europa amaneció facciosa. Seique los furtos abondaron mientres una montonera
d’años. Pémeque qu’esa ye la rexón más castigada polos robos ya’l riesgu ye un 44% superior al del conxuntu del
país. Les muyeres tarrecen que les monten los de les menaes. Centenares d'okupes
asalten cases y xalés de branéu d’esti territoriu. Arriendes, los gabitos
siempres s’echaben a los mesmos. Les agües del Segura baxen de revuelta. El día
del aniciu los pimientos colloraos camudaron la color. Fadiaben les coles de
Bruxeles. Les cebolles taben yá fartes de lloricar. Los pepinos amargaben per
toles sos coraes. De la flor vieno'l golor y de la fruta'l mal sabor. Aína hai
qu’empobinar a esta xente pel bon camín; pero, que si quies arroz del Mar
Menor, Catalina. Pa finar, una calabaza se m’amosara kafkiana y m'aldericó:
Munches vegaes ye más seguru tar encadenáu que ser llibre. ¡Qué pena! –Y digo yo a usté, señor guardia:
¿Qu’andaremos faciendo mal?
domingo, 10 de noviembre de 2019
Babayu ya antibable
El castellán fai 1100 cambeos y diez nueves
incorporaciones d'una vegada ensin que reburdiaren nin aldericaren un res los
de los inventos y de la llingua de llaboratoriu. Por culpa d’ello, voi poneme
en contautu cola RAE pa que na so siguiente edición del so Diccionariu de la
Llingua Española amiesten “babayu” y “antibable”.
martes, 5 de noviembre de 2019
¡MALDITU SEYA!
Aporta la mio boca
eses pallabres
sutiles que
s’esparden na to vera,
valtarán en lloría
y cuando llabres,
vas sentiles grumar na primavera.
Falará la mio mano
de llugares,
de mui bien más
allá del finxu’l cielu,
onde entá se
caltienen balagares,
onde aínda’l molín
aventa’l muelu.
Au vas a debalar
allá pel branu,
u vas a requexar
pela seronda,
au vas oyer falar
esi asturianu
a los que tantos
güei lleven la tronda.
Ellí vas escuclar
cola to alma,
el burbús d’esa
fala soterrada,
que bien al so
pesar caltién la calma,
qu’encoplo nel
entrín pela rimada.
Malditu seya aquel
neciu inorante,
que runfa ensin
saber lo que nun sabe,
que namái ye a
gusmiar con mal talante
y piesllu restolar baxo
la trabe.
El que nun ye a
tastiar más que’l dineru,
el que fora a
escaecer la pegarata,
que nun ye a
esconsoñar dexando’l ñeru
por culpa una bilurdia
ruina y fata.
domingo, 3 de noviembre de 2019
L'amor como clixé
Será nóbel o nobel
y nun será de recibu
qu’aprecie más lo
qu’escribo
que lu qu’escribía
él.
Faltando a la
hipocresía
ya a lo que diga la
xente,
siéntolo munchu,
Vicente,
nun me gusta esa
poesía.
Ye que tantu amor yá
rinde,
cuando tresforma en
clixé,
nun sé qué pensaría
usté
de que’l nuesu maxín
prinde.
Azocando n'amar
tantu,
encadenáu nesa idea,
careciendo la velea,
somorguiando nel so
mantu.
Sicasí’l mayor
respetu,
xunto cola norabona,
porque una persona
bona
fora a algamar esi
retu.
Per aciu del so
recursu,
por causa de so
sabencia,
qu’aquel tribunal
sentencia
pa ganar esi
concursu.
Seya nóbel o nobel,
usté amaba la so
xera,
nesi amor de
primavera,
duce y neciu como’l
miel.
miércoles, 30 de octubre de 2019
Aneciando cola casa
Magar gran casa,
siendo otra cosa,
sobro la rasa,
el versu escosa.
Ayeri en vida,
güei yá ta muerta,
sin una xida,
tanca la puerta.
Vendese entera,
con alcordances
d’enredadera,
zarros y bances.
Morrió Vicente,
como Pidal,
cola obra ausente
bien menos val.
Nun hai poesía,
foi pa Bousoño,
un cedru había,
nengún peroñu.
Pantasmal casa
de Velintonia,
pasa de tasa,
dende peronia.
martes, 29 de octubre de 2019
Yo tamién sé de besos ya escaezu, Vicente…
Si la memoria d'un
home ta nos besos,
ta la cai Velintonia
en to memoria.
Pero nunca ye verdá si
ye de coria.
Cuntar la vida polos
besos encesos
nun ye allegre, entá
más murniu de clausura.
Que se viende la to
casa y me da pena.
Que valta nel so
teyáu tiempu ya antena.
Y refungo que quien
muerre vive y dura.
Faer ye vivir más, pueque
vivir mal,
porque nun ye de
razón morrer inxente,
porque siempre
l’escaezu anda latente.
Polo qu'un paisanu fixo esistir val.
lunes, 28 de octubre de 2019
Na cruz d'Abantos
Aire y cruz,
nel mesmu cuetu,
nun esmuz
el pericuetu.
Si por marzu,
esi mes marcia,
vara en zarzu,
mayu nun arcia.
Nun pon torga
al esguilar,
la bandorga
ensin pesar.
Namái cielu
afaya enriba,
das asuelu,
nala la griba.
Nun hai pena,
mentanto sume,
tas de vena,
bendita cume.
Cuatro torres
tres del banzáu,
destes morres
tou alloñáu.
Se me vuela,
la mio peluca,
rolar, ruela,
la mar trabuca.
Si te peta
ven, t’espero,
nun m’enceta
el mal agüeru.
Cuatro y cinco,
amuesa’l versu,
fino y finco
esti universu.
Suscribirse a:
Entradas (Atom)