Lluis de Turiellos

Y un poeta orixinal, que ye una categoría a parte que dexa güelga propia nel camín de les lletres, que yá ye abondo. (Munches gracies, Lluis)

jueves, 27 de noviembre de 2014

Pasudoble de prau


     Esti pasudoble, magar que desime los acentos métricos nos versos d’arte mayor pal compás de la música, nun vayáis pensar que ye de coña, pos yá lu bailaba Pelayu na so dómina.


Voi cortate una ramina de lloréu
pa que vengas a la fiesta a la mio vera,
pero alviértelu al to mozu, esi tan feu,
nun nos vaya a montar la escandalera.

Garradinos los dos de los cadriles,
baillaremos de nueche na verbena,
que lu sepa la to xente de Porciles,
quien bien calca les chaples y l’arena.

Pasudoble y corríu son los reyes del prau,
el merengue y la cumbia nun se queden atrás,
cola moza curiosa nunca fines baldáu,
anque tea’l pisu pindiu como en Santarvás.

Nun hai fiesta como la fiesta asturiana,
ente montes, ente viesques, ente gloria,
col arume de la sidra de mazana,
d’esta miente fasta’l repunante amoria.

Pasa’l tiempu y la folixa se repite,
la familia aínda teniendo peles muries
y si nel pueblu además tas de convite
desanicies meyor les amarguries.

Pasudoble asturianu,
dende A Veiga hasta Unquera,
ye un pasudoble paisanu,
bailao de cualquier manera.

Nuesu vieyu pasudoble,
ye’l pasudoble más noble,
yá lu bailara Pelayu,
dando vueltes a un escayu.

¡Viven les fiestes de prau!,
¡viven les fiestes na plaza!,
pero anda pelo segáu,
nun sotripe la rapaza.



viernes, 21 de noviembre de 2014

Carta a la mio ma


Querida ma:

                     Dios quiera qu'al recibu d’ésta t’alcuentres bien auquiera que teas, quedando nós bien pel momentu.

                      Emprincipio la carta como tu me deprendieres a ello, magar qu’Él nun t'echara nin siquier un gabitu de la que tanto padecisti enantes de marchar.

                      Voi dicite que morriera la Duquesa d’Alba y que tolos medios de comunicación se faen ecu de la novedá, al aviesu de cuando tu colasti que nun te reseñó nin la prensa na llista de los que finaron nel día. De les dispenses de pagu pol so patrimoniu, nun te voi falar; yá se sabe que siempres pañaron namái de la refugaya y que, de resultes, siempres pagamos los mesmos.

                      Escaecí camentate qu’Alvarín acabó les dos carreres y una montonera cursos, de los que güei llamen “másteres”, y que foi’l primeru de la so promoción. Sicasí, nun nos dieren nin una mala beca, se conoz que pa eso tamién hai que tener mano. A lo postrero, agora anda bien colocáu.

                      Me presenté a aquel concursu de poesía, nel que por cierto ganó un poema tan malu que diéronme voltures a cuenta l’autor y, sobre too, de la poca vergoña del so padrín. Dende entós, anque que me caltenga ente dolcu y la media manta, yá nada apurro a eses comedies.

                      Pa remate, esclariar que refugué alcordame del to cabudañu pa nun recordar enxamás aquella repunante data.

                      Y por ésta, namás, nun me despido de ti por mor de qu’enxamás dixebrasti de la mio vera, hinchiendo’l gran ciñu que te tengo.

jueves, 20 de noviembre de 2014

Grapes


     D’entamo somos neños. Sí, guah.es despreocupaos y revolvinos. Dempués, mozos n’ayén que tolo sabemos. De secute, paisanos col xeitu y el procuru más asitiaos. Darréu, vieyos arrequexaos y escaecíos. Más sero,  tornen a alcordase de nós, de la que yes afamáu per un día y el nuesu nome sal espublizáu nesos cartelos que-yos llamen esqueles. Pa entós, toos yéramos abondo bonos. Sicasí, col trescurrir del tiempu, rinde la memoria y cayen les fueyes del cuadru los avisos. A lo cabero, namái se caltienen les grapes, eses repunantes tires d’alambre que s’enferronen dafurto al pasáu como cafiantes cachiparros del nueso destín.

domingo, 16 de noviembre de 2014

Con tol rebañu


La dolce, dolcena,
chivín, chivirina,
yá nun das nin pena,
yá nun das nin clina.

La cabrina mocha
que foi afamada,
como la Camocha,
la de la tonada.

La oveyina xalda,
carneru la llueca,
que’l rebañu balda,
fuxi de la fueca.

Corderín menudu,
llana d’astracán,
curia del papudu,
fartón y manguán.

Castrón poderosu,
cuernu de ferrial,
nun te come l’osu,
sí’l más animal.

Chivina, chivina,
dexái la corrada,
o marcháis aína,
o vais ser tayada.

Con too un rebañu,
colé pal oriente,
güei yá fai un añu,
tenéilu presente.

Toos son amigos,
toos son collacios,
comemos formigos
per estos espacios.


sábado, 15 de noviembre de 2014

Encuesta


     Abúltaseme que va ser meyor por too qu’entame les furadures España enantes que Marruecos; sicasí, de la qu’apingayaba güei dempués de xintar, suañé que cubría un cuestionariu nel 2025 p’aportar a la facultá d’Hestoria nel que m’entrugaben:

     ¿Ónde mandaron intervenir a l’Armada Española na segunda decena’l  sieglu?

a)       □  En Xibraltar.
b)      □  Nos desafíos dixebrantes de Mas y más.
c)       □  De la que la Fociquinos nacionalizara una filial d’una empresa española.
d)      □  Contra unos ecoloxistes qu’andaben cafiando por culpa l’esquistu.

martes, 11 de noviembre de 2014

Una bicicleta adelanta a un Ferrari

D’entamu, foron los Red Bull, dempués los Mercedes, esti año tamién se colaron los Williams per delantre. Agora, pa remate, una bicicleta con un volador amestáu adelanta a un Ferrari. Pos, malagustu, yá nun pienso mercar un.

domingo, 9 de noviembre de 2014

Usté pue ser un asesín

       Enredamos dende neños con xuegos pa entretenenos que son en ringla egoístes y que busquen quedar perriba de los demás. Los xuegos de los ricos nun son namái qu’unos xuegos más caros a los que toos nun pueden xugar. Alimentámonos d'otros seres vivos que sienten y padecen como nós y nun cavilgamos en comer ensin matar animales inocentes. Hai bien de xente a la qu’amás-y presta ver como-yos torturen o acaso dispara-yos ellos mesmos. Dacuando en vez, en cualesquier faza, nos matamos ente nós. La humanidá nun foi quien a refugar les guerres y aporfiamos n’amarranos a cuenta de delles relixones. De resultes, nun convién aniciar nenguna monserga porque la cuestión ponse abegosa y medra si naide da’l so brazu a torcer. Sí, el vecín que menos te pienses ye un asesín en potencia. Arriendes que tu mesmu, si se dan les circunstancies favoratibles, pues algamar a selu porque nun yes yerba d’otra tenada.

martes, 4 de noviembre de 2014

Sabíalu bien

      Aneciando cola tema de como camuden los tiempos, alcuérdome de qu’enantes se cortexaba a tríu, esto ye’l mozu, la moza y la carabina. De la que dabes un chuchín a una rapaza, cuasi que teníes que casar con ella. Sí, naquella dómina too taba mui controláu y nun valía pa nada la falcatrúa de les pareyes de fechu. Tamién recuerdo que tando nun hotel de la mariña mediterránea coincidí con Gloria Fuertes y que de la que prebara la temperatura l’agua la piscina metiendo la deda glayó: ¡Somorguies equí y quedes embaranzada! Y yera verdá, sabíalu bramente, les muyeres entós teníen que curiase perbién pos sentíense abondos casos d’abultamientos por xeneración espontánea.

domingo, 2 de noviembre de 2014

Xera



     Resulta alloriante agüeyar y sentir como camuden les coses col tiempu. Enantes, en Xera too nos yera familiar. Baxábamos dende Vi!!ar de la qu'había que mercar cualquier preséu o alimentu y caleyábamos pela so cai principal mesmamente que como pela Gran Vía de Madrid. Dende que morrieron los mios tíos, travesamos Xera dafurto col coche, namái que de pasada. Sicasí, agora nos da la impresión de ser un pueblu talamente ayenu; cuasi que como un de les películes d’americanos onde malapenes acolumbres les fachaes, anque detrás delles moren otres nueves y candiales xentes. Por embargo, les bombones de butanu aínda se caltienen a la escontra mirando pa Casa Carambolas coles sos cadarmes metáliques asentaes nel mesmu escañu de la impasibilidá.