Lluis de Turiellos

Y un poeta orixinal, que ye una categoría a parte que dexa güelga propia nel camín de les lletres, que yá ye abondo. (Munches gracies, Lluis)

miércoles, 26 de abril de 2017

Esperanza


Esperanza, Esperanza yá nun yes a baillar charca, cha.
Esperanza, Esperanza sólo sabes contar charca, cha.

Te conocí y te sofité ya arriendes t’upé 
y güei entres en prisión,
al esviar el dineru “B”
s’aportó dolor al mio probe corazón.

De nada valen los abriles que vivimos,
cuando los homes van al refuelle,
el que paez bono anda metíu en dellos timos
 ya en charca ranes yá naide cueye.

Ai qué pena me das, 
Esperanza por Dios,
yá enxamás
vas mandanos a nós.

Ai qué pena te vas,
Esperanza, ¡rediós!,
pagarás
tu tamién polos dos.

Esperanza, Esperanza yá nun yes a baillar charca, cha.
Esperanza, Esperanza sólo sabes contar charca, cha.

Te conocí y t’agabité ya arriendes t’upé
y güei too s’acabó,
al conocer el to feu al PP,
abondo dolor al mio corazón–y causó.

De nada valen los abriles que vivimos,
cuando los homes van al refuelle,
el que paez bono anda metíu en dellos timos
 ya en charca ranes yá naide cueye.

Ai qué pena me das, 
Esperanza por Dios,
yá enxamás
vas mandanos a nós.

Nun hai murnia quiciás,
Bornos queda, ¡rediós!,
pos condesa serás
aínda entós.

Esperanza, Esperanza yá nun yes a baillar charca, cha.
Esperanza, Esperanza sólo sabes contar charca, cha.



martes, 25 de abril de 2017

La muyer que yo quiero


La muyer que yo quiero nunca precisa
carretar dineru, gárrame la VISA.
Tien abondos defeutos, diz la mio madre,
ya abondosa cadarma, diz el mio padre.

Pero ella tien l’arume de pan y tierra.
El mio amor ye un amor que por ella berra.
La muyer que yo quiero ye una bendita
nun esfueya de nueche una margarita.

La muyer que yo quiero ye mui prestosa,
ta espetada en mio alma como una rosa.
Yá quixeron llevala los mios amigos,
pero namái conmigo come formigos.

Porque ensin querer  t’envolubra'l so arrullu
ya al marmullar s’arima dalgún capullu.
La muyer que yo quiero nun ye ciñosa
y maurez tan feliz, duce y vanidosa.

La muyer que yo quiero m’arreyó a xunta,
nun m’entrugues porqué, pa min ye la cunta.
La cunta que me fala con voz de sabiu;
de la que nun me fala, yo siempres rabio.

Anduvieran tres d’ella, dellos d’enantes:
los que nun son faltosos, son repunantes.
La muyer que yo quiero m’ató a podrella,
magar pasan los años quedo con ella.

lunes, 24 de abril de 2017

Terrorismu ecolóxicu


Ríos, montes, valle, llar;
seres seles de la viesca,
qu’un ruinyos foi a amburar
por acio prender la yesca.

Asturies, madre, terrén,
malditu’l que lu profana,
aponzoñando tamién
nuesa tierrina galana.

Aliendu calmu del sol,
fueya que xipla col vientu,
baille d’uz y de xarol,
la xarana ye llamentu.

Cueves qu’entren nes coraes,
mines que faen otro tanto,
roxada nes alboraes,
¡s’alcuerda’l maxín de cuanto!

El pasáu nel corredor,
la pallabra en talamera,
futuru con mal fedor,
encetando la fastera.

Tamos informatizaos,
al marxe de la quintana;
pa siguir toos cebaos,
¿quién trabayará mañana?

Abraza la faya, amigu,
talamente, al castañéu,
nun tarán siempres contigo,
lu qu’aporta pinta feu.

Mentanto a naide se prinda,
tampoco naide dimite,
derechu romanu, aínda,
que la llaceria permite.

Ye terrorismu ecolóxicu,
contra’l turismu rural,
contra’l pensamientu llóxicu,
el Paraísu, a bardial.

viernes, 21 de abril de 2017

Tierra y Lletres


22, Día de la Tierra… quemada.
27, Día de les Lletres nel Esterior. 

     Decatárame un día de que yo tamién vivo nel esterior: nel esterior del terrén, nel esterior de la esfera, nel esterior de les llapaes, nel esterior del ámbitu de los proyeutiles perdíos... Sí, nel esterior d’una tierra qu’aforfuga ya entá anecian en vendela como paraísu natural. Nel esterior de la llende l’egoísmu qu’aventara a los mios pás, onde caún se cree l’amu de tou y cola esclusiva de la verdá. Ellí per ende s’adora’l cachopu y la sidra mientres se canta por nun llorar. Au se presume de lo que muerre y la tolina se suicida en sablera. Auquiera que’l fumu afuega, la viesca ambura ya’l ríu envelena mentanto nos tresformamos en cómplices d’eses fechoríes por pura inactividá. Aquende la prensa calla, la radio entumez y la tele celebra la risión. Ande’l vecín camudara n’enemigu ya a los güelos–yos dan voltures na so escura güesa. Un país pastu de les llames, que van camudar l’arboleda talamente en pastu, mandáu por magüetos afitaos n’ayén. Sí, esisto o non –ensin aldu–, fora de la raya que separta una montonera xente que fai lu que-y peta y que va dexar la llaceria ya’l polígonu por heriedu. En resumíes cuentes: vivo ayundes nel esterior pente murnia, refugáu del versu, de la planificación y de la mio mesma pallabra n’asturianu qu’afarfulla ensin valir pa nada.

jueves, 20 de abril de 2017

Pasión paisana


    Ando siempres trestornáu coles asociaciones d'idees que davezu s’atropen nel mio maxín. En Vi!!ar hai un paisanu al que-y llamen Manolo la Pena, lo que fixera que m'alcordara darréu de Manolo Tena yá iguar hai un instante la Pasión paisana.

Cuando nun tas, tou va mal,
cuando nun tas, nun queda nada.
Si tu nun tas, ando fatal;
tamién si tas enfocicada.

Pasión paisana y sangre d’Asturies
cuando toi contigo a soles.
Pasión asturiana refuga penuries,
el mundiu ente les cuatro poles.

Cuando nun tas quiero berrar,
 cuando nun tas la pena'l mio corazón encadena.
Cuando tu tas nun sé amurniar;
magar si tas, los tos brazos son la mio condena.

Pasión paisana…

Cuando nun tas, pierdo'l compás,
 siento los celos gatuñando nel mio pechu.
Quiero berrar si tu nun tas,
tiénesme amoriáu dafechu.

Pasión paisana...

miércoles, 19 de abril de 2017

El Real Colexu


    Güei, la heroica ciudá dormía la siesta por culpa la velea d’ayeri a cuenta de que ganara’l Madrid. Arriendes de que Madrid tamién se m’abulta una ciudá heroica, talamente como Vetusta, alcuérdome d’un titular de prensa de setiembre del pasáu añu nel qu'aseguraba que’l Madrid y la heroica van siempres de la mano. Yo, nun voi amestar más nada pa que naide piense mal, namái asoleyar una semeya del Real Colexu. Ta perclaru que’l Real Colexu ta na Villa y Corte, magar que nun ye un colexu d’árbitros, sinón d’escolinos. Los guah.es del Atléticu van a otru.

viernes, 7 de abril de 2017

L'elefante nel pasáu recién


Yera duru pal braniante,
yera pardu amarronáu,
el papel del Elefante,
que desendolcaba en prau.

Non tanto como la prensa:
La Nueva, La Voz, Rexón.
Tanta fueya, tanto censa
per lloría y fondigón.

La Ilustración asturiana
siempres fixo bon papel
qu’espardía na quintana
en catropea y tropel.

Dempués, los tiempos modernos
endilgáronnos el rollu,
dacuando’l de los cuadernos
pal apuru con resuellu.

Pero’l pantalón baxar
seique resultó abegosu,
fora en corte o en payar,
pa cubrir culu y toroxu.

Peor al albentestate,
podía pillate un vecín
o una paisana escuclate
pel traseru o cebollín.

Magar llegó l’escusáu,
iguara lo repunante,
aportó papel blanquiáu
y refugó l’Elefante.

martes, 4 de abril de 2017

SOVENCIONAOS



     Voi contavos un cuentu del que m’alcordé al rodio de lu que camentaba Lluis Fernández hai unos díes:

“Ye lo que tenemos los asturianistes, que tamos tol día ocupaos pensando en como imponer l’asturianu al restu de la sociedá… Como vivimos sovencionaos y tamos tol día folgando, nun tenemos nada meyor que facer”.


     Asocediera equí en Madrid nuna xuntanza d’asturianos de yá hai unos años. Foi’l casu qu’uno mui repolludu que finaba d’aportar de Xixón camentó a otru: Los del asturianu siempres andáis garrando sovenciones de los muérganos oficiales y sois toos d’esquierdes como los antitaurinos, que dempués se farten de cachopu. L’otru infeliz–y retrucó: Yo, na mio vida gané nada col asturianu; magar que lleve mediu sieglu andechando nesa xera, gastando tiempu y dineru de mio en escribir ya asoleyar lo qu’escribo, sobre too una poesía que tien una cierta calidá. Si yo soi antitaurín nun ye por fadiar a naide, ye porque se m’abulta que debíen desaniciar toa triba de maltratu animal y por culpa d’ello soi vexetarianu de tola vida. Arriendes, nun soi de manzorga nin de dereches y nin siquiera, fíu de puta.

lunes, 3 de abril de 2017

Corporativismu


Atapeciendo en Shanghái,
tando nós a mediudía,
atapecer, ye lu qu’hai,
atapez na mio poesía.

Si atapez na Mar de China,
¿ a min que coime m'importa?
Nun reburdies más, manina,
que sinón l’encantu corta.

Agora endilga’l poeta,
versos d’un llugar remotu,
arrémente, d’escoyeta,
y te quier vender la moto.

Ñeva que ñeva en Manchuria,
¿acaso nun ye románticu?,
¿ye ñevar una penuria?,
¿qué quies, un poema cuánticu?

Caleyo Puertu Vallarta,
¿qué se te perdiera ehí?,
toi con la pandorga farta,
porque tal cosa escribí.

Cuento un cuentu tropical
y rutio yá a tiru fechu
d’encargu d’editorial
y asina acomodo a trechu.

Que lo tropical ye exóticu
de la que cuerre l’anduelu,
magar te paeza un tópicu,
anque faigas el canelu.

Toi pensando yo tamién
entrar nesi paraxismu,
polo munchu que convién
lu del corporativismu.

Falar d’amor y de mar,
lluna y sol en tonu sele,
p’asina poder cobrar
ya arriendes salir na tele. 

domingo, 2 de abril de 2017

PRESUNCIÓN



Rosal, menos presunción,
qu’esa rosina de mayu
finará como un escayu
sin valir la esmolición.

¿De qué sirve presumir,
rosal de tan bon xurdir,
 si acabantes de nacer
tas entamando a morrer?
Fai llorar y tamién rir,
vivu o muertu ente formol,
sía a rellumar col sol:
dende oriente al occidente,
la guapura ye accidente,
igual que la perfeición.
Rosal, menos presunción,
onde tán les clavelines,
mañana van ser espines
les qu'agora roses son.

Nun ye grande la ventaya
que la realidá afaya:
que nes mantielles d’aurora,
la nueche amortaya agora.
Nun hai floruca de faya
 que nun t'algame de díes
pastu de caballeríes,
por ser pariente del alba,
ta escoyonando la malva,
la melota d'un tarrón.
Rosal, menos presunción,
magar que güei tengas roses,
seguru mañana escoses
les roses de quita y pon.

Pos non, nun ye presunción,
lo que la natura asume,
que too na vida sume,
guardái toos compasión.