Lluis de Turiellos

Y un poeta orixinal, que ye una categoría a parte que dexa güelga propia nel camín de les lletres, que yá ye abondo. (Munches gracies, Lluis)

lunes, 27 de febrero de 2017

Caparina d'Asturies


¡Qué guapa, qué guapa yes!,

caparina d’aire y vientu,

mariella, ñegra ensin pies,

caparina del mio cuentu.


Espeyando lluz del sol,

caparina del riscar,

poses sobro’l caracol,

sin que te seya a torgar.


Si acaso un día a socaire

nales a los tos deleres,

vas ser oral, vas ser aire,

vas ser el vientu, daveres.


Caparina de mio Asturies

de la color carambelu,

te ruego col soplu curies,

del mugor del nuesu cielu.


Caparina d'aire y vientu

de la nuesa primavera,

aventa coria hasta avientu

d’esta Tierrina melguera.

domingo, 26 de febrero de 2017

Yá nun rueda la bola

La entós nueva radio de madera, agora arrequexada, nos procuraba una intercontinental sintonía nos años 50 del pasáu sieglu. La cadena radiofónica del mesmu nome la creara Ramonín Serrano Suñer; sí, ho, el célebre cuñáu. Los fines de selmana desaniciaba la tristura al son de “Ruede la bola”. Mientres, m’asitiaba ente’l mio pá ya una escomanada prensa que titulaba cenciellamente “YA”. D’esa miente, al tiempu que sentía a los aspirantes, escuclaba ensin resultancia les sos escures nales a la gueta de dalguna estampa que la ilustrara. “Ruede la bola” aneciara toa una dómina y cuntábemos cola so eternidá in sæcula sæculorum; sicasí, un día ensin decatanos dexó de rodar como cualesquier cosa nesti mundiu, como les nueses propies vides.

miércoles, 22 de febrero de 2017

Acabáu


Nun frayo algamando a vieyu,
hai tiempu qu’ando frayáu,
teo arrasáu’l pelleyu
ya’l maxín desendolcáu.

Va cuantayá nun ingreso,
que me torguen de salir,
lleen l’hestorial y, neso,
so sangre entama a pruyir

por como caltengo en pie
y apuren por facer pruebes
y alcuerdo lu qu’allorié
de los muérganos y frebes.

¿Amoria peles mañanes?,
¿nun aforfuga al falar?,
¿nuny tremecen les manes?,
¿nun apingaya al xintar?

¿El bandulluy furrula?,
¿siente un xiplu nos oyíos?,
¿y xube bien la pirula?,
¿dacuando, pies esfrecíos?

¿Qué toma pa la tensión?,
¿y dan cólicos nefríticos?,
¿quier morrer d’aburrición?,
¿y dan voltures los cítricos?

¿Caltién el so tratamientu?,
¿refuga’l Trankimazín?,
¿y da cefalalxa’l vientu?,
¿constipa si caye orpín?

¿Y manquen los parietales?,
¿y les vidayes, davezu?,
¿y dan alerxa les sales?,
¿y queda tiesu’l pescuezu?

¿Vacunóse pa la gripe?,
¿cáncanos na parentela?,
¿y chinga quey sotripe?,
¿tien la muyer varicela?

¿Estriñíu o cagaleru?,
¿careciera les paperes?,
¿xila col xelu en xineru?,
¿nun tien vértigu, daveres?

Paso l’interrogatoriu,
como pasara una guerra.
¡Tome esto pal rasoriu!,
¡ta usté acabáu, Pindesierra!

martes, 21 de febrero de 2017

NELLO TAMOS


     Nello tamos, Constantín, nesti día de la llingua materna y dende hai yá más de mediu sieglu; sicasí, el que nun sabe tien que tener el procuru de deprender y ente los que saben un plizcu dexar d’andar a la greña. Anguaño, pidiéronme dalgún trabayu p’asoleyar nuna biografía d’autores asturianos. Diba a apurrir daqué, encantáu; magar que dempués me lu refugaren col silenciu por culpa de que nun espublizaba en llibros mercantiles. Súpilu a traviés d’un terceru. De toes maneres, abonda murnia carez unu na vida, como pa dame pena de min mesmu. Mientres, sigue chapurriando’l que chapurria, malencoplando’l qu’encopla y pocos son a facer valir el so derechu a espresase davezu n’asturianu. Mentanto, entren xentes d’allá aculló y anecien en marchar mozos al tiempu que perdemos raigañu ya’l mesmu aldu. Pa remate’l presidente d’Asturies escaeció la so llingua vernácula al reclamar más derechos pa les otres, quiciabes porque nun recibe presión d'abondo. ¡Nun tenemos igua, Constantín, ya entama ún a perder el xeitu!

lunes, 20 de febrero de 2017

¡Retírate, ho!

    
     ¡Retírate, ho! Foi la primer vez de tantes quey lu dixera al mio fíu, de la que llevaba namái que tres meses xugando, cuando vieno a la barbería d’un collaciu onde quedáramos pa cortar el pelo. Foi’l casu que, anque ye tan bono pa los estudios, va pa cuatro añosy diera por xugar al pádel de pareyes con otru que ye tan malu como él; de resultesyos ganen fasta los neños. Talamente, tolos fines de selmana, al tornar pa casay espeto: “Bien seguru que vos ganaren”. Él, dende entós, ri, esboza un glayíu y calla; magar que, callando, asiente. Ye por ello qu’a lo postreroy amesté que s’ufierten como “equipu sparring”, yá que d’esa miente diben a aforrar siquier l’arriendu la pista. Asina ye la vida y pa eso tamos los padres, p’aconseyar enforma bien a los fíos: ¡Retírate, ho!

viernes, 17 de febrero de 2017

Colare


Pensé que nun me la dibes facer pasar tu,
cuando pintaba les uñes nuna faza azul.
Pero xiblasti’l xiblatu avarientu nun llau
y entamé a colar aína pela carril vau.

Colare, oh, oh,
cantare, oh, oh, oh, oh,
n’azul pintao d'azul,
feliz, vistía de tul.

Y colaba y cruciaba arrémente pela Puerta’l Sol
y magar me siguíes mui cerca, pensé de farol,
la to serena tan duce sonaba namái que pa min.

Colare, oh, oh,
voltiare, oh, oh, oh, oh,
na llende pintada d'azul,
tan guapa, vistía de tul.

Magar los suaños a l’alba espierten porqué
cuando la lluna remonta seique nun me ve,
Entá me sigue porque yá fixera bien d’elles
esos urbanos s’enfoten en colgase estrelles.

Colare, oh, oh,
nun pare, oh, oh, oh,
na azul de la faza azul,
tan guapa vistía de tul.

Y aneciaba en cruciar guapamente pela Puerta’l Sol
bien cuntaba que’l municipal diría de farol,
y montáu na so motocicleta vieno tres de mi,
so serena acusica resuena per too Madrid.

Colare, oh, oh, oh,
llegare, oh, oh, oh,
equí al mio palaciu azul,
ya escapo, vistía de tul.


miércoles, 15 de febrero de 2017

El feve de La Cardosa

 

La vida ye como esi tren que pasa per La Cardosa. Agora lu quieren desaniciar.
¡Defende’l to tren de vida!
 
La vida ye vida amarga,
d’una xaceda amargosa,
la cadarma, un tren de carga,
igual que’l de La Cardosa.
 
Que percuerre y que se va,
de Peñaflor a Candamu,
que bien de disgustos da,
fasta que’l fin pon el ramu.
 
Asina que ximelgando ,
marcha’l destín pela vía,
nel viaxe, acompañando,
la nuesa familia avía.
 
Dientro acarretamos penes,
que s’asienten nos asientos,
coles maletes bien llenes
de procuru y sentimientos.
 
Na parada arrecostina,
como arrecostina en Grau,
nin inspeutor nin cabina,
nada afita al nuesu llau.
 
Dempués, a pasar la ponte,
sobro l’agua en torbolín,
ansí salvamos el pronte,
cuando facemos camín.
 
Nes orielles, bien d’escayos,
que manquen pel percorríu,
pente pasos y bardayos,
pente la calor ya’l fríu.
 
Asina ye nuesa vida,
t’espeta la mesma rosa,
de sebe, Feve y firida,
como’l tren de La Cardosa.

lunes, 13 de febrero de 2017

PARÍS


       Un plizcu de romanticismu pa toles namoraes y pa les qu’aínda nun lo tan.  Pa que los mozos de dereches namoren de les moces d'esquierdes y pa que los mozos d'esquierdes namoren de les moces de dereches y de resultes nos pongamos siempres d'alcuerdu y marchen tolos políticos.  Arriendes,  agora que derroquen agua por tar enfarxopetaos los banzaos,  que nos ufierten de baldre la electricidá como enantes nos la cobraron de más de la que nun llovía.

     Na víspora de San Valentín, el mio cantar a lo Dani Martín…


Quiero alborecer
una mañana d'avientu en París,
dame la vuelta y  que me digas tu que sí,
que yá nun hai nada que facer
y agora siguir caminando escontra alantre voi.
 
 P'amanecer
 una mañana de payares equí en Madrid.
 Que pase un añu y ver si siguimos equí,
si entá nos somos a querer,
 qu'hai mil cuesas que se ponen per delantre güei.
 
Y queremos siempres roses
 y Venecia, Tresona ya Onís,
 y na vida hai otres coses:
la verdá, la mentira ya un sí.
Y  tenemos caparines
y vierbes ensin seda ya a la fin,
 hai culiebres de vecines
ya un disfraz que se ruempe al vivir.
 
 Quiero alborecer
 ensin los tos abrazos ensin el to ciñu ensin París,
que siempres muerre lo que vimos construyir,
 prefiero soledá
que m'acompaña dende siempres, cerca ya hasta güei.
 
 Quiero amanecer
 ensin los tos encantos ensin les tos ganes de rir,
 ensin les tos virtúes qu'en defeutos convertí.
Maldita realidá,
que lo guapo dura un plizcu y vuélvese a dir.
 
  Y queremos siempres roses
 y Venecia, Tresona ya Onís.
 Y na vida hai otres coses:
la verdá, la mentira ya un sí.
Y  tenemos caparines,
bien de cocos ensin seda ya a la fin
 hai culiebres de vecines
 ya un disfraz que se ruempe al vivir.
 
 Y queremos siempres roses
 y Venecia, Tresona ya Onís.
 Y na vida hai otres coses:
la verdá, la mentira ya un sí.
 
 
 
 
 
 
 
 



 

 

domingo, 12 de febrero de 2017

Pa nun pecar d’inorante


     Si nun tienes la suerte de ser afamáu o de tener dalgún padrín, enantes d’asoleyar o componer daqué como pa iguar cualquier cosu, igual te convenía lleer les instrucciones…



miércoles, 8 de febrero de 2017

L'Home Invisible



     Esta mañana alcontréme col Home Invisible. ¿Nun vós dixera que conozo al Home Invisible? Pos, sí, ye verdá que lu conozo y güei bien ceo me topé con él. L’Home Invisible namái fala cola xente a la que conoz y, si hai daquién más nel llugar, entós te fai dalguna señal qu’a los demásyos pue pasar desapercibida. Taba asentáu nel bancu de la semeya, onde lu deberíeis ver; pero nun sois quien a ello por culpa de que ye invisible. L’Home Invisible entamara a tener esa condición de la quey emprincipió a inorar la so muyer y por aciu d’un fechizu quey llantó la so suegra. Quiero poner l’enfotu en qu’ésti de la foto ye’l verdaderu Home Invisible yá quey salieron bien d’imitadores. Son aquellos a los que fales o saludes y nun retruquen nada. ¿¡Nun vos decatáis de que sí vos ven!? Esos magüetos, arriendes de farsantes, son maleducaos y nunca algamarán a ser invisibles como’l mio amigu.

   

domingo, 5 de febrero de 2017

Reconocencia


    Güei na Rede nun furrulen, a un tiempu, el diccionariu DALLA y l’iguador ESLEMA. Güei los “torneros” quedaron al albentestate y nun son a espublizar. La nuesa repunante diglosia se carez aínda más. El mensax d’oficialidá trabuca porque caleyamos al aviesu. Hai bien de xente que pruye por ella ya a lu más qu’algama ye a glayar: “estes putes fabes tan tan dures como les putes piedres”. D’entamu, estos paisanos tienen que procurar deprender dafechu la so llingua, mientres reclamen la reconocencia; arriendes de que l’Academia y otros muérganos deban d’esparder el so conocimientu. Sinón, nun van llograr más que se rían de nós.

sábado, 4 de febrero de 2017

¡TRECE AÑOS D’OBRES!


     A una selmana del 13º, ¡SÍ TRECEAVU!, “cabudañu” del aniciu y muerte de les obres de la Variante, que siguen en víes de… discutiniu pa iguar siquier les sos propies vies mientres obliguen a la xente a trespandar per Payares ya a carecer averíes. Mentanto, nos tomen pol pitu’l serenu. 

viernes, 3 de febrero de 2017

Arumes de TPA


    De la que tuviera n’Asturies dende final d’añu hasta Reis, la TPA aneciaba en asoleyar una y otra vegada una riestra d’anuncios de toa triba d’arumes y, como col arrecendor aforfugo, a lo postrero cruciáronseme los cables y llancé una botella sidra contra la televisión. Foi’l casu que m’agabitara la suerte y namái caché la so base, qu’españara como un frascu de Xicu Rabanne. De resultes, y como por ensalmu, quedara tol salón trescaláu de lu qu’asemeyaba una mestura de toes aquelles esencies. Lu que más me topetara foi que cuando salí pal mercáu había un fatáu de vecines golifando na mio puerta.


jueves, 2 de febrero de 2017

Nueves midíes.

Andái pelo segao si coláis pa los Estaos Xuníos. El despachu agüeváu camudara tamién el personal de vuelu nos sos aeropuertos.