Lluis de Turiellos

Y un poeta orixinal, que ye una categoría a parte que dexa güelga propia nel camín de les lletres, que yá ye abondo. (Munches gracies, Lluis)

lunes, 27 de septiembre de 2010

Don Licinio


El cura’l nuesu barriu yera una escelente persona. Tol mundu lu quería o, a lo menos, naide falaba mal d'él. Yera chaparro y d’humilde condición. D'avanzada edá y pasu lentu. Repartía les hosties mui seliquín y más que confesor yera un psicólogu vecinal. Predicaba con un xeitu qu’asemeyaba falar “ex cátedra” como'l so xefe. La so homilía amosábase tan afayadiza qu'arimábase dalgún qu'otru atéu. Distribuyía carambelos y otres llambionaes ente los neños de la redolada, amás d'a los qu'asistíen a la catequesis, anque fueren de La Ventilla. De la que cruciaba con dalgún garapiellu guilopos, toos galguiaben pa besar la so mano.

Cavilgo que don Licinio —como asina se llamaba esti sacerdote— yera un santu y yo, entós, atalantaba que daría cola so cadarma nuna confitería. Tengo confesar que creía a les clares en que la composición de los pastelinos denominaos “güesos de santu” yera lliteral. Trescurríu'l tiempu, el mesmu día en que don Licinio finó, daquién esclarióme'l tracamundiu y pudi comprobar, dafechamente, como don Licinio recibió cristiana sepultura nel campusantu San Isidro.

domingo, 19 de septiembre de 2010

LABORDETA NUN MORRIERA


“Adiós a los que se quedan
y a los que se van también,
adiós a Huesca y Provincia,
a Zaragoza y Teruel...”

Labordeta nun morriera
que marchó col so collaciu,
el que foi pala ribera,
acompanga-y con xaciu.

El maestru s’afitáu
pa siempres en Aragón,
que naide tea alloriáu,
qu’inda glaya’l so pregón.

Ta nel aire de Teruel,
d'Huesca y de Zaragoza,
amestáu nel so troquel,
xuníu a la xente moza.

Cola so Albada del Vientu,
del que nun pudo tornar,
de xineru fasta avientu
va sentise’l so cantar.

Labordeta nun morriera,
nun trabucar la noticia,
que lu sepa España entera,
sigue con nós, nun ye ficia.

Camina’l pandu camín,
pelos cordales esguila.
¡Tamos contigo manín!,
arrequexaos na mochila.

miércoles, 8 de septiembre de 2010

Smoke gets in your güeyos


Quixera dar a notoriu
lu que socedió en Xixón
nun mui célebre casoriu
na Quinta del Infanzón.

La ilesia foi San Xosé,
el xardín surdió de cuentos,
los novios, col so xarré;
los invitaos, doscientos.

Hubo comida a mamplén,
la bebida, a farta farta,
los gaiteros del terrén,
d’arroz con !!eite, la tarta.

Sentanon na nuesa vera,
de Tinéu ya d'Uviéu,
mozas de Tabacalera,
fumando toas darréu.

Escontra de los sos pelos,
colingaos a la par,
glayaban cuatro cartelos:
¡Nun seyan quién a fumar!

En pasando de la tasa,
tuvimos qu’esmolecer,
ya apurrir pa cada casa,
esti fedor de muyer.

Asina tamos como antes,
xingan cola tolerancia,
unas cafian tan campantes
ya outros a sufrir l’andancia.

Teo enritáu’l gargüelu
pol arume del Marlboru.
¿Qué pensaría mio güelu,
viéndo-ys fumar a coru?