Lluis de Turiellos

Y un poeta orixinal, que ye una categoría a parte que dexa güelga propia nel camín de les lletres, que yá ye abondo. (Munches gracies, Lluis)

miércoles, 28 de noviembre de 2012

Esclariando'l destín



     Ayeri tuvi cucando nel "Facebook" una parolada que tuviera'l mio amigu David Rivas con una xoven nun tren. Algo asina me pasara a min, güei mesmo; sicasí, yo nun garré’l so corréu por culpa de la edá y de que la muyer tienme prohibíu falar con moces prestoses...

     Asentóse a la mio vera una moza foriata roxa y mui curiosa nel cercanies, camín de Cantublancu-Universidá, de la que diba a ver a la mio tía al asilu y tuvo falando conmigo un bon cachu. Chapurriaba un plizcu castellán y ¡nada d’asturianu! De magar que me llevanté, cuando algamábamos esa estación, la rapaza entrugóme qué si diba "here", a lo que yo-y retruqué: non, nun voi tan lloñe, voi quedar equí.

(Toi llantando ente comines dalgunes pallabres foriates, que debíen dir en cursiva, por culpa de que'l blogue espublízame too con esi tipu)

lunes, 26 de noviembre de 2012

Pal fin del mundiu


 


     LOS ESPERTOS SOFITEN AL PRINCIPÁU Y RECLAMEN TRÁFICU MISTU PA LA VARIANTE... 

 

...Fomentu afirma —anguaño—  que la so intención ye que la Variante, entamará'l so serviciu a finales de 2014...

 

LNE (güei, 26 de payares)


El trayectu ente Uviéu y Madrid va ser de 3 hores en 2013, según Trevín.

( LNE, 5 d’abril de 2011)

“El viaxe en tren Madrid-Asturies, en tres hores dende finales de 2012, asegura Blanco”

(LNE, 24.10.2011)


      Nun vos enfotéis nin calezáis cola tema la Variante. Cada añu que pasa, retrasen el ramu; d’esta miente, toi bien seguru que va llegar el fin del mundiu enantes de que la inauguren.

     ¡Esto nun ye alta velocidá nin velocidá alta, David, ésto ta praúticamente paráu! Vamos morrer llantando la media hora en Llión cola bocona abierta y ensin que furrule’l furacu.


#2
 - Pindesierra el día 26-11-2012 a las 12:44:42

jueves, 22 de noviembre de 2012

Peles orielles del Cubia

(Dende la mio galería)


Peles orielles del Cubia,
púnxime a contar un día,
les gotes que tien la lluvia,
pero vi que nun podía.

Aneciaron los minutos,
aporfiando les hores,
mentanto alitaben frutos,
diben cayendo les flores.

A la vera de la ponte,
non mui lloñe del banzáu,
tonaba escontra del monte,
mientres taba arrequexáu.

Esa tona afayadiza,
traíame los perdones,
d’una fiesta vaqueiriza,
de mui bien cerca d’Ayones.

Españando pelos cuetos,
emburriando l’airiquín,
el de xaldos y marnuetos,
que ye idénticu a la fin.

Seique’l rayu pon ardura,
seique calez a les nubes,
cola color de debura,
rescampla de la que xubes.

La campa viste de verde,
la tarde’l so mantu gris,
col ruxerrux que nun pierde,
el cantu d’esti país.

Agua, viesca, mar y vientu
d’esti benditu terrén,
col futuru en movimientu,
y alcordances a mamplén.

Peles orielles del Cubia,
encamiento al mio paisanu:
 la meyor tierra, ensin dubia,
ye’l nuesu campu asturianu.

Pindesierra

lunes, 19 de noviembre de 2012

Ente hermanos



     Ye persabíu lu bien que furrula l’Alministración equí en Madrid. Anguaño, pa fomentar el contautu col vecín y sacar partíu a la enerxía fedo-térmica, amenorgaron el númberu de trenes del metru. Asina, tolos díes, afalágase daquién que nun garra l’ameyoramientu. Güei, ensin dir más lloñe, de la qu'algamáramos una de les estaciones, otru viaxeru m’aldericó: “Si nun dexamos pasar, nun circulamos, hermanu”. A lo que yo-y retruqué: “Voi p’aquel requexu pa dexar pasar y pa que circules, hermanu prior”. Seique nun-y prestó lu que-y camenté porque siguía reburdiando pel andén. En magar que me decatara-y amesté: “D’esa miente nun vas iguar nada, Gárgamel; tienes qu’apurrir una epístola a la direición de la congregación”.

miércoles, 14 de noviembre de 2012

Así es Asturias


    “Así es Asturias” ye la cabera película que vieron xuntos los mios pais. Facía muitos años que nun pisaran un cine, sicasí'l reclamu foi'l nome d’Asturias tando morando llonxe d’ella. Porque, daquella, nun ye qu’Asturias tuviera a más distancia de Madrid que güei, non, ye que'l tren tardaba tola nuoite en llegar a Uviéu ya llueu había que garrar l’Alsa fasta Tinéu. Inda dempués, outru fasta Xera, San Fliz o Casa Dios. ¿Quien diba dicime que col tiempu’l sou direutor ya guionista Xuan Antón Cabezas diba ser un bon amigu míu?; d’él acorico dellos llibros que me dedicara: “La Montaña Rebelde”, “Asturias, bibliografía de una región”, “Diccionario de Madrid”, “Asturias, catorce meses de guerra civil”... Él yá marchóu, de la mesma mena que los mios pais, pero las súas obras téolas acoricadas en dalgún requexu; arriendes que, las alcordanzas anden afayadas na célebre “memoria celular” del mio maxín.

martes, 6 de noviembre de 2012

Cavilgar


     Habrá una selmana que llamé dende casa al mio númberu de teléfonu y taba comunicando. De xuru que foi un descuidu; pero, si algamara a coneutar, quiciabes entamara a falar conmigo mesmu, lu que diba permitime cavilgar.