Lluis de Turiellos

Y un poeta orixinal, que ye una categoría a parte que dexa güelga propia nel camín de les lletres, que yá ye abondo. (Munches gracies, Lluis)

lunes, 30 de noviembre de 2015

Nel cumpleaños



     Ayeri foi’l 60 cumpleaños del mio hermanu pequeñu. Dímos-y una sorpresa una montonera familiares y amigos que-y aguardábamos al belume y dafurto nuna sala de renta. Quedara bramente ablucáu pola impresión y darréu lu festexamos toos a mamplén. De reflundiu, proyeutaron una riestra de semeyes de familia y nel intre la mio vida paeció trescurrir nun tris pela pantalla, de manera tala qu'al finar nun fui quien a tornar dafechu a la realidá. La tema fíxome cavilgar sobro la condición de la nuesa esistencia. El tiempu, cuando yá pasa, nun caltién más qu’alcordances. De neños, espurre a la perllonga. De mozos, trescurre adulces. Cuando somos paisanos se desendolca aína y, a lo cabero, finamos nun reblagu ente murnies. Abandoné la folixa col envís de camudar pa siempres no que me tocara vivir. Sí, con esi mesmu procuru qu’acarretamos de la que venimos d'un entierru y qu’inxente escaecemos.


viernes, 27 de noviembre de 2015

INOCENTES



L’aición de gracies cotiza güei a 6 pavos tres la llaceria de los Estaos Xuníos…


jueves, 26 de noviembre de 2015

Alderique na NE

 
   
     ¡Tamos aviaos! Abúltaseme qu’ésta ye la única rexón o país del mundiu onde ún nun pue falar o escribir na so llingua llariega ensin que te riñan los de siempres…

     P’Aureliu, el que reburdiara en LNE güei sobro la clas de “bable” qu’escribo y que nun entendía’l so güelu. Ye que nel intre desaniciaron la noticia del nuevu retrasu n’apertura del “fondu de sacu” de Lleón onde taben llantaos los comentarios.

“¡Miániques, Aureliu! Esta seición ye de trenes, asina que trabucasti l’alderique. Yo escribo n'asturianu normativu y tamién lu faigo n’occidental. Equí lu fixi nel primer d’ellos, esceuto los apóstrofos que me los camudaron por signos d’entruga. Iguar un normativu foi necesariu tamién col castellán. Si a ti o al to güelu nun vos presta’l nuesu, podéis encomenda-y a l’Academia de la Llingua les correiciones que vos pete. Pa preguntar con más procuru sobro la verdá yo t'encamiento El criteriu, de Balmes, y p’ameyorar el to chapurriáu (la to mestura nun ta bien escrita, nin en castellán nin en asturianu) vas tener que tornar a la escuela.
 
     Perdona que nun te retruque si anecies en tarrecer, ye por culpa de que nun me dedico a perder el tiempu en amarraces”.

martes, 24 de noviembre de 2015

El belén

 

Armóse gordo’l belén
a un mes de la Navidá,
de mazar, ruempe l’abén,
fechu una calamidá.
 
N’oriente nun queden reis,
¿quién apurrirá l’inciensu?,
burros y bues, los que veis,
los romanos, col so censu.
 
Les estrelles tintiniando,
corderos escabezaos,
los cielos se van nublando,
los pastores, en fregaos.
 
El castiellu lu españaron,
el ríu, contamináu,
los coríos esnalaron,
anda San Xosé frayáu.
 
Magar nun hai llavanderes,
abonden los “caganer”,
col asuntu les señeres,
la metá quieren francer.
 
El champán tien sabor murniu,
burbuya ensin allegría,
el gaiteru anda de turniu,
nun toca la llotería.
 
Torna Herodes y Nerón,
al cucar la cosa qu'arde.
Dívos comiendo’l turrón,
por si dempués ye mui tarde.

viernes, 20 de noviembre de 2015

L'Holandés Errante

 
¡Recoyéi ancles y suañái!
 
 
Cuenten que cuenta la hestoria,
dicen que diz la lleenda
qu’un barcu algamó la gloria,
saliando tou mar y sienda.
 
Por culpa una maldición
que careció’l capitán,
cola so tripulación,
siempres al debalu van.
 
Foi pol pactu col diañu,
seique-ys escarmara Dios,
a penar añu tres añu,
a analayar dende entós.
 
Nun-ys valió l’esconxuru,
tuvieron sieglos en danza,
pol enfotu, de seguru,
de doblar Bona Esperanza.
 
A quien se-y apaecía,
camudaba la so suerte
y quiciás, nel mesmu día,
taba esperando-y la muerte.
 
Hai tiempu que nun se ve,
nel Índicu o pel Exéu,
yo pol destín lu alcontré,
nun requexu de Tinéu.
 
Naide lu vaya a buscar,
abelluga na quimera
y nun lu van a topar,
si acaso, nuna escalera.
 
Dientro un bar, amenorgáu,
afáyase tan campante,
tres d’una puerta, encalláu,
aquel “Holandés Errante”.


domingo, 15 de noviembre de 2015

Fresqueres

(Semeya: Periodistillas)

     Fino de tornar d’Asturies. Foi un viaxe rescamplu por culpa que morriera la cabera tía que me quedaba en Tinéu. Gracies a los que m’apurrieren el so pésame. Esta curtia estancia valió amás pa conocer personalmente a Alicina y a Amadora de lu que quedé encantáu. Gracies tamién a esta última pola preba’l so sabrosu pan. D’otra miente, en Grao dalgunos anecien en acelerar col coche peles cais y en nun respetar los pasos de cebra. Por mor d’ello, llamentablemente va tener qu’haber un atropellu mortal pa que s’arbitren midíes. Alicina, que tien que cruciar a diariu emburriando una siella ruedes, quexa por esa falta de respetu que dellos repunantes amuesen. Se conoz que ye más granible semar les orielles de les carreteres con eses neveres qu’acoriquen un radar ensin revelar. Llueu nos espetan que ye pola nuesa seguridá, cuando espoxigó’l númberu d’accidentes quiciabes por cuenta l’algame de bien de vehículos al que circula delantre que frena pa que nun-y empapelen y, arriendes, pola montonera xente que distraye l’atención de la conducción pa ver si ye quien a acolumbrar les fresqueres. Escurque como los que topetaron güei mesmu a la salida’l furacu’l Guadarrama que tuvi qu’esquitar pa nun cutir escontra ellos. Encamiéntovos tar sollertes con esi nuevu peligru que nos empobinen dende la mesma Xefatura Xeneral de Trafiguríficu.

martes, 10 de noviembre de 2015

Bichos



     Lloñe de la estinción, naide foi a finar con ellos nin sulfatando. Los bichos de Kafka se multiplicaron a trompa talega y arriendes espoxigaron, magar que l’inseutu en si nun pueda ser dibuxao. Nesti añu cúmplese’l sieglu de que s’espublizara “La metamorfosis”. ¡Norabona a tolos repunantes!

lunes, 9 de noviembre de 2015

Maxa de sol


   (Semeya: Nel Ánxel González)


 
Maxa de sol n’Avilés,

magar qu’haya dos palmeres,

crees ver lu que nun ves,

¿ye la solombra, daveres?
 

 

Ye otru enriedu de Nel,

que de too se decata,

nun hai trampa nin babel,

nin parió perros la gata.
 

sábado, 7 de noviembre de 2015

Niti Colsa


     Nun lu vais creyer pero Niti, que yá nun va a cumplir los 70, sigue calteniendo la so guapa y potente voz. Si vais pa Benidorm y vos agospiáis nel Bali, podréis ser quien a comprobalu. Na so cabera intervención na TPA en Cantadera echábase de menos el sofitu musical yá que cantara “a cappella”. Foi un gran placer averanos a una de les sos actuaciones, onde pue dicise que los sos veceros son amigos práuticamente toos, a los que saluda, fala con ellos y dedica cantares. Cantó más de media dolcena de la nuesa Tierra, d’aquellos qu’asoleyara nes sos cintes, y finamos col Asturies Patria Quería. Acabamos de tornar d’ellí y la verdá ye qu’anque rindo nes sableres del Llevante de la que trescurren un par de díes; sicasí, esta vegada pagó la pena’l viaxe.


martes, 3 de noviembre de 2015

Estos son los de mio...



     Estos son los mios convencimientos, trabucaos o non, pero llexítimos, que nun cafien a les persones de bien nin a los más paletos. Yo tamién anduvi munchos caminos...

 
Cuando glayen los heriedos,
reburdiando los cazurros,
se vomiten los acedos
y encarnicen los más burros.
 
Cuando la pallabra manca
y camuda en cagalera,
nada aporta Salamanca
y s’arma la escandalera.
 
Si nun se valora’l ciñu
y retruca malquerencia,
nun se pesca nin con miñu
y de nada val la sencia.
 
Cuando se falta al raigañu,
cuando se valta la historia,
nunca s’escaez el dañu,
va gloria pela memoria.
 
Cuando t’espeta un foriatu
que nun esiste lo nuesu:
nin brenga, camba, nin matu,
que marche o lu coma l’osu.


lunes, 2 de noviembre de 2015

Les coses del querer

 
Son les coses de la vida,
 son les coses del querer,
fui la to prenda querida
y güei nun me puedes ver.
 
Nun tienen fin nin entamu,
tampoco tienen por qué.
Nun les manda nengún amu,
por qué te quiero, nun sé.
 
Tu yes roxa; yo, morenu,
yes bona moza; yo, ruin,
yo, cazurru de Torenu,
tu, asturiana de Morcín,
 
Si yo tengo cara rana,
nun tien un plizcu que ver,
tu, de reina soberana,
ye la cuenta pa xoncer.
 
Tu me quixisti de nueche
y yo te quiero de día.
Si disti la hostia col coche,
la culpa nun pue ser mía.
 
¿Pa qué nos piden razones
del qué del cómo y el cuando?
t’aportara los perdones
y aínda m’anden cafiando.
 
El casu ye que no nuesu,
tuvisti qu’echar a curia,
diben a pegar en güesu,
nun val qu’alcen una muria.
 
Son les coses de la vida,
son les coses del querer,
tu marchasti d’estampida,
con un magüetu d’Ayer.