Lluis de Turiellos

Y un poeta orixinal, que ye una categoría a parte que dexa güelga propia nel camín de les lletres, que yá ye abondo. (Munches gracies, Lluis)

lunes, 28 de septiembre de 2009

UN ALCUENTRU PRESTOSU

Fai unos díes, al surdir de mercar nel Carrefour Azabache, topéme con Elías García (Llan de Cubel, Felpeyu, Tuenda). Pa quien nun-y conoza, ye’l más bon mozu, el más nuevu y el que zarra menos los güeyos a la escontra’l sol por tene-yos más escuros. N’Asturies hai perbonos músicos pero, davezu, la xente nun sabe d’ellos si nun salen na televisión. Tuvimos sintiendo a Rafa Lorenzo, paisanu de Tinéu, en Villaviciosa y cuasi que tábemos en parentela (quedé ablucáu). ¡Hai qu’acoricar más lo nuesu! Elías toca, de cutiu, con Ambás en Camín de Cantares, asina que bien seguro que-y conocéis.

lunes, 21 de septiembre de 2009

TESTERAZU NEL RAMU


Nesta cabera selmana tuviéramos nel ramu’l pisu Grau y zumbara cola calamocha la muria pindia del sobráu, onde tan los cuartos. De la tiesta nun aliqué, la estructura nun fendió y el terremotu na Villa nun pasara del 5,6 na escala Richter; asina qu'ensin novedá.

viernes, 11 de septiembre de 2009

"LIQUIDACIÓN, NIÑOS AL 50 %"


Caleyando pela ciudá, topéme col cartelu: “LIQUIDACIÓN, NIÑOS AL 50%”. Nun paezme muncho bien que casi tou tea escribayáu en castellán, pero ¡Coime! que véndanse los neños, abúltame ensembre mal. ¡SI NUN LOS QUIERES, NUN LOS TENGAS!