Lluis de Turiellos

Y un poeta orixinal, que ye una categoría a parte que dexa güelga propia nel camín de les lletres, que yá ye abondo. (Munches gracies, Lluis)

viernes, 31 de julio de 2015

El santu de Llouru


       La guapa entrada que fino d’acolumbrar na muria de Milio Mariño, “Dios xugaba a les cartes”, aportó’l que m’alcordara d’esta semeya. Esti foi l’único santu que salvara na Guerra Civil de los milicianos en Llouru (Pravia). Ta perclaru’l porqué. D’otra miente, nun quixera escaecer que’l vienres y sábadu de la selmana qu’entra, 7 ya 8, son les fiestes de San Llorienzu nesi guapu pueblín; asina que yá sabéis onde dir de folixa, amás d'a visitar al santu. Pa finar, un abrazu pal so eméritu alcalde don César García Pire y tola bona xente de Llouru col envís de que tea a reventar.  

jueves, 30 de julio de 2015

Occidente d'Asturies nel 2039


Vista aérea del occidente d’Asturies nel añu 2039.

PUBLICIDÁ: Visite’l restorán El Canadiense, n’Uviéu na mesma salida del desiertu balses. Especialidá en carne al caricote y cachopu al cianuru.

martes, 28 de julio de 2015

Más respetu

     Tuvi restolando per LNE na rede y nun atopé esti comentariu; sicasí, me paez una falta de respetu como un carru d’esquirpia. D’igual mena, desacreita al magüetu que lu escribiera. Al rodiu d’ello, si lleí otros asemeyaos qu’espublicen baxo alcuñu, lu que me paez de cobardes. Siempres qu’afité dalguna esplicación na prensa lu fixi col mio nome y dos apellíos delantre del mio nomatu; magar qu’esto se m’abulta una esceición y dalguna vez me sotripara cualesquier de los cuasi anónimos. Esta xente, de la qu’enrieda, namái quier enfrentar y señalar a los que tean a favor d’iguar la nuesa llingua como dixebrantes de manzorga. Por mor d’ello me prestaría esclariar a esta triba de toperos qu'hai bien de paisanos a los que-yos pruye la sangre por culpa de que s’escaeza la so llingua llariega y nun tien nengún asitiamientu políticu —como ye’l mio casu—, anque sí un plizcu d’educación. Arriendes y pa finar, cavilgo qu’esto pinta mal nel nuesu país o rexón yá que quien nun ta a favor de daqué ta bramente al aviesu, seya nel terrén de la cultura, el furáu gafu del oru que va esfardanar l’occidente o les quemes que nos afueguen y camuden esti Paraísu Natural qu’anda abocanando. ¡Qué haya suerte, que la vamos precisar!

     

domingo, 26 de julio de 2015

Merengue


Merengue de merengada,
merengue de merengón,
fadiando la madrugada
al restu la población.

Del so Perú vieno a España,
casó con una española,
agora’l banduyu baña
y namái trabaya Lola.

De la que vien la so triba,
glayen al altu la lleva,
¡qué viva’l mambu, qué viva!,
que berre más quien más beba.

Ruxe l’amplificador
con bien de sones foriatos,
qu'impón el yá emperador
a los súbditos más fatos.

Naide riñe nin gorguta,
que-y puen llamar racista,
él tola fastera acuta,
el candongueru y fuerguista.

La xente nun pue dormir
fasta valtar los mangantes,
dando exemplu al consentir,
porque somos tolerantes.

Merengue de merengada,
merengue de merengón,
cola samba y la llambada
vais de… rumbar la nación.

jueves, 23 de julio de 2015

SAZA


     Saza foi vecín míu seique unos cinco años nel distritu de Retiru equí en Madrid; sicasí, malapenes cruciábamos pallabra. Foi, de la que conocí dempués a Vital —un paisanu de la Pontecastru Tuña—, cuando-y apurría les sos alcordances o dalgún recáu. Vital, que fora taxista, foi tamién xofer de los actores más afamaos de los años 60 al 80 del pasáu sieglu, incluyida Katharine Hepburn que tamién rodó n’España. La cabera novedá que-y treslladara a Saza foi la muerte del mio emponderáu amigu. Él agradeció’l mio envís a traviés del porteru automáticu y se disculpó por nun baxar a saludame, yá que per entóncenes yá s’alcontraba abondo delicáu. Vital, que tantes anéudotes me cuntara d’otros afamaos actores, tamién s’alcordaba davezu de lu que rió con Saza. Agora, Saza tamién coló y, bien seguru que si hai otru mundiu, ellí lu tará aguardando Vital col so coche p’agabita-y nesa inescusable mudanza. ¡Fuelguen y viaxen dambos dos en paz!

Don Euxeniu


     Ayeri suañé con una clas maxistral del mio antiguu profesor de llingua y lliteratura mientres el bachiller. Lu mató’l tabacu enantes de que me decatara de lu munchu que-y estimaba a él y de lu que sedría quien a envalorar la so asignatura. Pero los nuevos nun garren dalgunes coses fasta que nun se-yos dan a entender los años y les muses nun s’averen a los que nun-yos quieren. Alcuérdome d’acordies qu’enantes d’espertar-y propunxi entamar clases de cantu y solféu, que nos taben torgaes a los neños por culpa de que nos empobinaben nesi tiempu al ximnasiu de la OXE. A lo cabero, me prestaría qu’esti maestru algamara a sentir los poemes que puedo componer agora, de secute y ensin necesidá de comprobar métrica nin númberu de sílabes; sicasí, la vida bien de vegaes nun da una segunda oportunidá. Magar d’ello, güei escribayo estes llinies na memoria de don Euxeniu. Yo tamién-y aprecio.

lunes, 20 de julio de 2015

La vida


     Ellí se caltién, musgu y meditabundu na puerta’l mercáu dende bien ceo, pente los demás veceros; repitiendo les hores, esbariando les díes y atropando bien d’años y tristura. Naide repara nél, esceuto dalgún nuevu que ri por culpa de que va en camiseta cotón. De la que dan les nueve y abren, se dirixe a onde les lleches y entruga al encargáu per una de soya que cuasi nunca atopa. Dempués de mercar lu necesario pa dixerir la xornada, cola del hiper escondiéndose perbaxu los árboles camín de casa. Pela tardiquina, cuando’l sol valta pel finxu’l cielu, sal a caleyar les repunantes cais de la contorna. Abultaríense toes hermanes de la qu’hai tiempu aquel coche llevárase pa siempres a la so muyer nel pasu cebra, dexándo-y ensembre esfardanada la vida.

viernes, 17 de julio de 2015

Ríu Cares


Ríu Cares, ríu Cares,
guapa Garganta Divina,
nada torguen los pielgares,
si esa sienda se camina.

Va yá pa cuarenta años,
que fixi la de Caín,
pente cuetos, pente suaños,
onde’l cielu ye’l camín.

Onde tamién ye conxuru,
au la cabra ye la reina,
xunto a la canal y el muru,
onde espotrexa la pierna.

Ellí caltengo de visu,
curiando del desbentíu,
nesi frayu’l paraísu,
sobro esi afamáu ríu.

M’alcuerdo de Camarmeña,
xinta de tortiella y pellu,
d’aquella, sola na peña,
acolumbrando l’Urriellu.

De la bona xente’l monte,
quexando de les angüeñes,
de Poncebos, pela ponte,
del sudu qu’anubre ceñes.

Dende Arenes de Cabrales
a Posada Valdeón,
de Picos, lleves les gales,
la mio alma y corazón.

Ríu Cares, ríu Cares,
si nun te volviera a ver,
será bien a mios pesares,
pos nun te voi a escaecer.

martes, 14 de julio de 2015

Nello tamos


Nello tamos, Costantín, dende yá va mediu sieglu.

lunes, 13 de julio de 2015

Cultura

 
      Ésti ye’l mio sobrín, Xesús Morán. Ye fíu d’un hermanu de la muyer. Nun penséis que perdiera la camisa, non, ye cenciellamente que ye modelu y a los modelos-yos faen semeyes ensin camisa. Yá andaréis cavilgando que pinta’l mio sobrín equí. Pos vos lo voi esclariar: Xesús nun ye asturianu nin tien nada que ver con Asturies; sicasí, él va tornando toles entraes que colingo nel Feisbuc col so bon procuru y el gabitu d’un diccionariu. D’esta miente va deprendiendo la nuesa llingua. ¿Qué vos paez? Mentanto hai xente que refuga lo suyo, hai otra, arriendes foriata, a la que-y presta garrar cultura; porque naide escaeza qu’aínda caltenemos una perguapa cultura a pesar de tantu desarraigonáu.

viernes, 10 de julio de 2015

Númberu 1 otra vegada



     Finamos de tornar de la IE Law School, una de les escueles cabezaleres del mundiu nel campu los negocios. Tres una conferencia de dos hores onde intervinieron delles personalidaes del terrén del Derechu d’esti país y dempués d’imponer les correspondientes orles a los graduaos del V Máster Executive del Programa Cimeru d'Asesoría Llaboral pa Profesionales, pesllaron l’actu amestando qu’enxamás hubo un cursu tan preparáu como esi y que la Xunta de Calificación Final decidió por unanimidá declarar nº 1 al mio fíu Alvarín, faciendo entrega del diploma acreditativu y estatuína correspondiente (Minerva de bronce). Esclarió D. Inaciu García-Perrote, una de les 9 estrelles de l’abogacía n'España, que nunca punxeron un 10 fasta agora y que’l rapaz sorpriende non solo poles sos conocencies sinón que tamién pola so cenciellez. Esti ye’l so quintu máster dempués de llicenciase en Derechu y en Direición d’Empreses igualmente col númberu 1 de la so promoción. La mio reflexón al respeutu ye que yo nun debería de cobrar como él, nin tampoco los qu’anden paciendo pel verde los parques, nin siquier daquién qu'ande folgando tol día mientres qu’él nun sal nin los fines de selmana por culpa l’estudiu qu’entrepola cola so xera.

Xelaos

(Xelaos Revuelta)


Vainilla o de fresa,
tamién chicolate,
nun había comtesa,
caún se decate.

Carrinos de murnia,
tamién d’ilusión,
llantaos na so furnia,
fresca afitación.

Tiempu de xelaos,
humildes y pillos,
ensin remelgaos,
pero con barquillos.

Vocingla una moza,
s’averen los neños,
paez qu’uno foza,
dientro los tarreños.

Son a dos reales,
uno merca Xicu,
rin tolos chavales,
emporcó’l focicu.

Entós, como güei,
s’enfresca’l gargüelu,
equí toos d’acuéi,
el ñetu y el güelu.


miércoles, 8 de julio de 2015

L'Home de los Pies Ñegros



Alvertencia: Nesta entrada va poder interactuar tol mundiu por aciu de les feisbucomunicaciones.

L’Home de los Pies Ñegros

     Diba al mediudía asentáu nel metru de Madrid col maxín n’ayén cuando, de sópitu, allugárase a la escontra l’Home de los Pies Ñegros. Foi’l casu que, como nun-y conocía de nada, nun-y diba a entrugar por qué tenía los pies tan ñegros; asina que se m’ocurrió llantar na solapa la mio placa falsa del WashXixón Post pa poder tira-y una foto, pos bien sabíu ye qu'a los paisanos vieyos-ys presta salir na prensa. De resultes, colingo la semeya al envís de que seyáis quien a votar sobro l’orixe d’esti bigardu y sobre too de los sos pies tan ñegros.

Namái debéis decantiavos por una d’estes cuatro rempuestes y retrucar darréu:


a)     El paisanu finaba de tornar de Benidorm

b)     Esti home ye de Ciudá del Cabu (la ciudá que ta más al cabu de toes).

c)      El personaxe pertenez a la triba de los Pies Ñegros (del noroeste de Montana).

d)     Ye un espécime desconocíu qu’arroxara les piernes caleyando per Madrid.


     Nun tengáis mieu de trabucar la rempuesta, yá que naide va rir de vós a cuenta de lo burros que podáis ser.

lunes, 6 de julio de 2015

El caballu d'Alicina


Arre caballín melgueru,
tira yá del mio xarré,
cuerre y salgamos del veru,
blincando pela paré.

Esnalemos nesti cielu,
esguilando peña y monte,
sin poner los pies nel suelu,
aprovezamos el pronte.

Dexé la moñeca en casa,
pero tando a la to vera,
voi viaxar ensin tasa,
lloñe de la guiadera.

Vuela’l caballu mimosu,
vuela Alicina con él,
l’atmósfera afita’l rosu,
en catropea y tropel.

Nel tropel de les sos rises,
rises de namái los dos,
ablucaron los malvises,
trayeutu de caricós.

De la que rinden na tarde,
de la que llega la nueche,
tornan xuntos con gran farde,
la neña en caballu y coche.

Mañana será otru día,
día de maxa y de parque,
p’Alicina, otra allegría
y, pal caballu, otru embarque.

Güei, caltiénse la semeya,
como una puerta al pasáu,
solo la traviesa ella,
caballu y xarré al so llau.

domingo, 5 de julio de 2015

La Fresca


Vieno de la capital
y dicen que ye mui fresca,
les moces-y miren mal
y davezu s’arma griesca.

Como viste tresparente
se-y ve tanga y sostén,
queda ablucada la xente,
los homes sí miren bien.

Nun abotona la blusa
y va amosando l’entamu,
la tela la falda escusa
ya-y siguen dalgún tramu.

Ye una rapaza mui fina,
fala munchu col vecín,
enxamás cola vecina,
¡mialma, qué folletín!

A más d’ún-y cai la baba,
pero elles, na contorna,
-y llamen la Reina Saba,
se m’abulta que con sorna.

La tema ye de película,
seique la muyer a Xicu,
por cuca-y a la matrícula,
-y sotripó nel focicu.

Otra, de La Providencia,
denunciara nel xulgáu
y el xuez yá dictó sentencia:
“¡MIREN TOOS PA OTRU LLAU!”.

viernes, 3 de julio de 2015

Cancusa


     Piensa qu’esa ruta o esa romería podríen ser les caberes pos nun sabemos la nuesa data de caducidá, nin siquiera si vamos ser quien a repetir esa hestoria y dempués se tresforme namái que n’alcordanza d’una murnia foto. Ye por ello qu’animo a tolos mios amigos a esfrutar del presente y a refugar too aquello que-yos pueda fadiar. Tamién a respetar la forma de cavilgar de caún, magar que nun teas d’alcuerdo con él. No que toca a la política, yo caltengo amigos de dereches y de manzorgues yá que caún razona lu que piensa condicionáu peles sos circunstancies y non col envís de cafiar. Yá sabéis: dos nun s’amarren si uno nun quier y la cancusa val enforma más que l’aborrecimientu.

jueves, 2 de julio de 2015

Tonada d’Asturies


Soi la tonada d’Asturies,
nacida ente la sidra del mazanal,
a la solombra les muries,
l’arume la vallina, rosa y bardial.

Llevo per sangre, llapada
de rosada qu'arrama l'amanecer
y na mio gaita furada
se sienten alcordances remanecer.

El vientu lleva la mio voz
y l’ecu darréu l’esparderá
dende Pimiango a Pesoz,
esbariando sones pela ciudá.

Con mios hermanes vaqueiras,
a añaes y saltones amestaré;
xotes, floreos, muñeiras,
xiraldilles y otres dances, tocaré.

Alma d'una tierra verde,
de cumes, praos y valles, ríos y mar
con un valtar que nun pierde,
corazón y xeitu del nuesu cantar.

La trona nun calla mio voz,
la gaita-y acompañará,
per aires de forcáu y foz,
en monte, n’aldea o ciudá.

miércoles, 1 de julio de 2015

¿TAMOS PERDIENDO L’ALDU?


     Sí, na mio muria’l Feisbuc tamién colingaron el videu gochu (con perdón, —con perdón pal gochu—). De resultes, como nun toi avezáu a llimpiar cubiles, al tiempu d’esfarrapar el videu, a poco desaniciu al paisanu de Grau al que fixeron cargar col muertu. Tamién me decatara qu’Alicina Polledo yá-y dio estopa al que fixera la fechoría. Por embargu, me prestaría faer dalguna reflexón: ¿tamos perdiendo l’aldu?, ¿de quien ye la culpa? Enantes, de la qu’había una cadena namái de televisión, ufiertaba programación infantil; de la que sabíes lleer, te regalaben 20.000 llegües de viaxe somarín, El caberu mohicanu o cualesquier llibru d’esa triba; les máquines del metru aportaben chicles o llambionaes. Güei, delles cadenes nun asoleyen más que repunancia; los guah.es igual te lleen el Xergónsutra [sic] y nel metru sólo espanden preservativos. Ye como si quixeren aventar el criteriu. Como si nun fora posible’l términu mediu. Como si daquién, nes altures, tuviera la comenencia de que toos perdamos l’aldu y nos amarremos.

     Amodo, esclariar talamente que si dalgún amigu o collaciu recibe un videu gochu nel mio nome, que sepa que yo nun se lu apurrí; magar que se m’abulta que cualquiera de los mios amigos o collacios lu saben ensembre, ensin necesidá d’amestar la más ruina esplicación.