lunes, 30 de marzo de 2015

L'amuesa una Tierra.


Mentanto otros la emporcaben,
él la iguaba más ayalga,
benditos los que mercaben,
bona alcordanza-ys valga.

Cachinos ñegros d’Asturies,
ñegros de nidiu acebache,
sacáu con mui bien de curies,
tresformáu en cachivache.

Cachivache de bayura,
bayura con puru arte,
procuru na compostura,
que güei Lise nos comparte.

Xurásicu nes tos manes,
ye proteutor, ye la cigua,
perendengue, esparabanes,
la nuesa cultura ambigua.

Cascoxos y caparines,
un fósil nos medallones,
en fueyes y floriquines,
aniellos y corazones.

Ye l’ amuesa d’una Tierra,
un paisax, nueche y estrella,
qu’abluca per cualquier cerra,
brava, folixera y bella.

Seique Lise nun marchara,
ta con nós nesa so xera,
na pieza escura qu’iguara,
que relluma primavera.

Vas decatar pela breda,
si t’averes equí a Grau,
na contorna de La Preda,
lu vas sentir al to llau.

sábado, 28 de marzo de 2015

Elexía al aviesu



...Vas posar na pescal de la mio era:
pelos arrecendores de les flores
brotará la to alma truebanera

d'anxelicales mieles y llabores.
Frayando los caxellos y les rexes
con dellos ablucaos escritores.

Xuntos a la solombra de les texes,
llibrará la pallabra al nuesu llau
en riestres de cebolla pente fexes.

Ansí’l Peritu en Lluna escarceláu,
alitará en estrofes bayuroses
espardiendo aquel versu entós truncáu.

A les alaes almes de les roses
de la peral de nata, torna al ñeru,
que tenemos falar de munches coses,
compañeru del alma, compañeru.











































jueves, 26 de marzo de 2015

Nun día cualesquiera


Nun día cualesquiera,
d’iviernu trabucáu,
llegó la primavera
a la pescal y al prau.

De trinos y de fueyes,
na viesca tomó’l mandu,
triñía nes oreyes
y afalagaba’l pandu.

A calecer el ríu,
aínda nun foi quien,
pos aguantaba’l fríu,
se caltenía bien.

La tarde de solombra
enfrescó la vallina,
reverdeció l’alfombra,
supliendo lluvia fina.

Mañana otra engarrada,
de ñube, sol y vientu,
de marzu, marmerada,
de brotar, otro intentu.

Alcuentru d’estaciones,
igual que tolos años,
restolen emociones
y espierten nuesos suaños.

Nun día cualesquiera,
vas alendar l’arume,
de flor de primavera
y de natura’l zume. 

martes, 24 de marzo de 2015

TENDAL D'ACACIES


Calderu apináu de ropa,
que fora llavada a mano,
cuerda endolcada d'estopa,
qu’acarretaba’l mio hermanu.

Les pinces, nun fardelín,
sol mio brazu, aquel barreñu,
pesaba mui poquiyín,
por mor que yera pequeñu.

Camín pindiu les acacies,
percorríamos la cai,
facíamos acrobacies,
escalabramos namái.

Tres arreyar el cordel,
con arremangu y vería,
tendíamos el mantel,
les sabanes, la toquía…

La mio ma que tresportaba
el balde de mayor pesu,
cuando la ropa colgaba,
nos daba a los dos un besu.

La lluria, de caña a caña,
la muda prendida cuelga,
na piel, la calor españa,
el tiempu nun dexó buelga.

Nel valtáu de d’aquel estanque,
empantanao pol morgazu,
que caltenía l'atranque,
un neñu frayó un costazu.

Un socesu entá m'encrespa,
darréu, al mover un cantu,
seique aguiyóme una griespa,
enllenándome d'espantu.

Aportaba algún amigu,
quiciás una neña nueva,
sestaferiaben contigo,
furando’l fuexu o la cueva.

Páxaros y caparines
volaben como les hores,
ente plantes y florines,
nes tardes engañadores.

El sol remató’l trabayu
ensuchó la tendalada,
al tornar de tayu en mayu,
la xera taba finada.

D'acacies, yera’l tendal,
colada de gran estima,
alcordances d’un chaval,
de la so candial mamina.

lunes, 23 de marzo de 2015

Inorantes

(Semeya, Forges)

¿Nun vos decatarais de lo inorantes que son tolos que nun voten a los nuesos?

sábado, 21 de marzo de 2015

Día Mundial de la Prosa Poética

     El destín m’averó a Grau. Na so “Aula de las Metáforas” tolos díes podríen ser, como güei, DÍA DE LA POESÍA; namái hai que peñerar ente l’ufiertáu  y entamar a lleer…                                                                                                                                                        
Nesti mundiu tan brutal,
hai un día, sólo un día,
que va ser día mundial,
Mundial de la Poesía.

Poesía al por mayor,
ya otros díes, l’escaezu,
si partimos ye meyor,
si aportunamos davezu.

Si esnala la nuesa alma,
si nos valta’l corazón,
si la primera, con calma,
si l’otru, con emoción.

Si lleemos mui adulces,
somorguiando na llectura,
si col to versu m’endulces,
nos va prestar de llocura.

Refuga yá’l topicazu,
condiciona como yes,
como viaxar nel plazu,
ufiertáu nel Tayu Inglés.

Que la to moza curiosa,
con  llabios de carambelu,
ye fermosa como rosa,
que les estrelles del cielu,

que la mar del calamar,
que si'l sol, que si la lluna,
dexa ya d’aporfiar,
con esa verde aceituna.

Ita, itu, papó un pitu,
ina, in, comió un pollín,
que si l’amor ye benditu,
y el to fíu, un serafín.

Azu, aza, atu, ata,
on y ada, ona, ida,
la to moza ye una fata,
te tien la zuna comida.

Escribe lu que te pete,
pero, ¡coñu!, ensin ser ñoñu,
el deprender ye l’ encete,
venga manín, nun yes soñu.

viernes, 20 de marzo de 2015

L'ECLÍS


Anque nun se ve l’eclís,
tamos toos eclipsaos,
yá que polo que dicís,
andáis toos bien frayaos.

Si nun miramos pal cielu,
nun vamos ver les estrelles,
si traes melendrín el pelu,
traerás roxes les mexelles.

Ye por culpa de la nube
o eses estelaes que ves,
qu’anden tamién pel You-Tube,
seique, “chemtrails” en inglés.

Quiciás pola Llei  Mordaza,
al par, por culpa’l PP,
o daquién que metió baza,
arriendes, de mala fe.

Pue que combalechadura,
pue que secretu d’estáu,
pue que por culpa del cura,
o peor, del obispáu.

Fixéronme mercar gafes,
unes gafes especiales,
nuna campaña d’estafes
y nun ves nin les chavales.

Como la pila de Tesla,
refugáronlu n’España,
al sur y al norte del Esla,
el que nun prinda, t’engaña.

Esti eclís ye una engañifa,
güei la pegaron col sol,
mañana con una rifa,
la novedá ye farol.

domingo, 15 de marzo de 2015

Añada de la neña roxa.


Añada la neña roxa,
que relluma nel escuru,
que ri y enxamás esnoxa,
nin esmolez el procuru.

Dormi, dormi, la mio neña,
dormi, duérmite’l mio sol,
ea, que naide la reña,
apagái yá esi farol.

Ea que ximielga’l mezu,
ea, marmulla la Xana,
ea, que dormi davezu
y esperteya na mañana.

Colinga’l colingaderu,
el to esbardu ta emburriando,
aserrín del madereru,
aserrán que tas suañando.

Suaña que suaña anxelín,
suaña querubín del cielu,
esnala col Ventolín,
da-y un chuchín al to güelu.

Rúa que rúa l’arrullu,
rúa que rúa con ciñu,
dormi que dormi’l mio arguyu,
al mio abellugu, cariñu.

Dormi, dormi, mio estrellina,
lluz de la lluna llunera,
dormi la mio rapacina,
neña roxa gayaspera.

viernes, 13 de marzo de 2015

Na universidá


     Prudenciu tornó a la universidá, 33 años dempués, col envís de que-y devolvieren siquiera lu que pagara de tases yá que nun foi quien a exercer y naide-y alvirtiera n’almisión que nun diba a tener salida.

     (Podrá paecer una comedia; sicasí, hai dellos seutores de raigañu familiar nos que malapenes daquién ye a introducise y si trabayes pa ellos ye talamente cuasi que como esclavu).

miércoles, 11 de marzo de 2015

I Festival de Poesía de Xixón


       La celebración del Día Mundial de la Poesía, el próximu 21 de marzu, va sirvir como exa pal estrenu d'un nuevu alcuentru poéticu: El Primer Festival de Poesía de Xixón “Sollétrame Poesía”, qu'entama'l colectivu artísticu-cultural Musa Cafeína xunto a la conseyería de Cultura del Principáu. El Día Mundial de la Poesía va aniciar na Casa Natal de Xovellanos cola sesión "Poesía Llingua", na que van intervenir poetes habituales. Poesía al por mayor. Enantes, el sábadu 10, menú poéticu a 19 euros. Talleres qu'igual son a iguar estrofes nel paralelu y a faer l’equilibráu de versos, de xuru qu’ensin rima. Vidéu poesía con memoria salina y pa remate, nel Fervedor, sesión de “Poetry Slam-Micro Abiertu”. ¡Demasiáu pa la mio cadarma! Magar que, valoratible.

     ¿A esto sí diz “sí”, Rubiera?

martes, 10 de marzo de 2015

El Ministeriu del Tiempu


     Ayeri, acolumbré na Primera onde taba asitiáu'l Ministeriu del Tiempu y güei bien ceo m’averé col envís de desaniciar pa siempres el pagu les tases de les autovíes de “Campumanguanes” (qu'hai cuantayá que-yos diben suprimir de bocona en dómina eleutoral) y de “Adardineru”. Fui cola intención d'enterame si había dalguna puerta pela faza Grau y si podía trespandar ellí al pasáu más recién pa facer el viaxe de papu. D’esa miente, tampoco diba esperar al ramu’l furacu’l ferrocarril de Nunca Acabar y nun m’arriesgaría a quedar soterráu si por culpa dalguna otra nueva chapuza esbarrumba’l monte. Al llegar, piqué nesa puerta —que taba pesllada—, pero se conoz  qu’a los funcionarios nun-yos prestaba un res la que se t’armando nel presente, yá que toos ellos se m’abulta que colaron pa otru tiempu, cuidáu qu’ellí nun había naide; nin siquiera, un sosecretariu.



domingo, 8 de marzo de 2015

El moñecu llana


Cuntómelu esa paisana,
esa güelina encantada:
 “Esti moñecu de llana
me lu regaló una fada”.

Monigote de ganchiyu,
de llabios de terciopelu,
 sonri como cualquier fiyu,
nació esperteyáu del cielu.

A los sos güeyos t’atenta,
acorícalu al so llau,
dempués lu abraza contenta,
nun abrazu de bordáu.

Canta y ri, marmulla y canta,
 al monigote d'encaxe,
pelele vudú qu'espanta
axorizando l’ultraxe.

¡Hola guapa!, ¡hola vecina!,
mira'l mio moñecu amigu,
mira que pelleya fina,
siempres vivirá conmigo.

Faime muncha compañía,
les  mios malures refuga,
afalágame tol día
y les llárimes m’ensuga.       

Ente les sielles de ruedes,
camuda de mano en mano,
amasúñen-y ensin vedes,
 neñu de cotón ufano.

¿Y sabes como se llama?,
nun lo sé, nun dixo nada,
dormi na mio propia cama,
 regalómelu una fada.

jueves, 5 de marzo de 2015

CANTARINOS



Al entrar al colexu dan les nueve, nueve, nueve,
 bonos díes señorita Rita, Rita,
fora un coche pita, pita, pita, pita.
Al salir de la clase llueve, llueve, llueve, llueve.

Al tornar a la escuela nieva, nieva, nieva, nieva,
bones tardes señorita Rita, Rita,
fora un coche pita, pita y yá t'irrita.
Güei por fin terminamos la selmana, glaya Ana.

Vamos dir de ronda xente abonda, abonda, abonda.
nel nuesu coche Ford Fiesta, fiesta, fiesta,
cola xinta nuna cesta, cesta, cesta.
Cunta un chiste'l mio pá, que ye la monda, monda, monda.

Volveremos estudiar otru llunes, llunes, llunes,
otra vuelta a la rutina, glaya Tina,
esti llibru nun termina, fina, Fina.
Si nun te plaz deprender, males zunes, males zunes.

Ye hora del recréu, mediudía, día, día,
 nesti patiu yá nun xela, xela, xela,
vien por nós la nuesa güela, el tiempu vuela,
canturriamos seliquín poesía, poesía.

L’añu qu’entra va acabar la primaria bien precaria,
porque pasa al institutu hasta’l más brutu,
que nun ye a faer la “o” con un canutu,
ye’l sobrín la señora inspectora Olegaria.

martes, 3 de marzo de 2015

Ruina y desaniciu


      Va invertise munchu más en tratar de reparar los daños xeneraos por estes mines que los beneficios que van producir; pero lo peor ye qu’una montonera de los trafulcos del cianuru ya otros metales pesaos nun tendrán igua y talamente'l terrén va quedar irrecuperable. Entóncenes, naide será responsable d'esta zarracina nin de les llaceries carecíes dende peronia.   

lunes, 2 de marzo de 2015

Sorrises y llárimes



     Tráxome’l mio bon amigu David Rivas una alcordanza al colingar esta semeya nel Feisbuc…

     Nós teníamos el cine Chamartín asitiáu xustu delantre, na cera enfrente la cai. Nesti cine nun proyeutaben películes d’estrenu, poro yera un cine de barriu. Camudaben les carteleres cuando finaben los domingos y los llunes ufiertaben una nueva programación doble. De la que nos echábamos pela nueche, sentíamos claramente lu que falaben nos filmes na cabera sesión. Un día, llegó-y la vegada a Sorrises y llárimes y arriendes de que’l primer día yá entrábemos na sala, enantes de morrer la selmana, los rapazos de la contorna yá sabíamos los sos cantares, que quedaron pa siempres afitaos nel nuesu maxín. D’igual mena, dalgunos garramos arrémente la conseya que sobre manera paecía esnidiar del musical, l’amor a la Tierra. Porque’l que nun quier el so terrén y el so raigañu ye como'l que nun quier al so pariente, al so paisanu o a los mesmos animales que nos acompañen, un verdaderu desalmáu.

domingo, 1 de marzo de 2015

Varexando

 (Semeya: Homenax al campu asturianu)

            Agüeyar esta xera en cualesquier campa asturiana, fasta los años 60 del pasáu sieglu, yera daqué normal. Pero acolumbrala en plenu cientru Madrid, na cera’l Portiellu Embaxadores au los mios tíos y les mios primes de Sierra diben varexar la llana tamién una vegada al añu, yera abondo más raru, magar qu’asocedía.