Nel conciertu de Fontoria

Cuentiquinos pa que sueñes,

pa que sueñes col to neñu,

cuentiquinos dende Areñes,

suañu qu’afalaga’l sueñu.

Cuentiquinos de la gloria

qu’afayen l’airón nordés

en cantares de Fontoria,

d’Asturies, como tu yes.

Les dances y la xanina,

la qu’al ríu vivu va,

nun s'escaez a mamina,

pero’l canciu ye al so pá.

Siento a Maxi como soi,

empondero la so xera

d’esi tiempu que nun foi,

que nun hubo primavera.

Naide refugue’l trabayu,

naide acute lo asturiano,

que’l repunante o babayu

nun nos gane pola mano.

Qu'en radio o televisión

suenen sones del país,

que nun mangonie’l castrón,

toos d’andecha nun tris.

El que carez me da pena

cuando esparde asturianía.

¡Llibrái de la so condena!,

magar se caltién la mía.

Nos torgara los abrazos,

esi COVID-19,

enxamás los nuesos llazos,

nuesa cultura se mueve.

Catecismu

¿Yes cristianu?−Soi cristianu pola gracia de Dios.

¿Qué ye ser cristianu?−Ser cristianu ye ser discípulu de Cristu.

Ansí un día ya otru día,

canturriando la lleición,

con sones de sacristía,

pa facer la comunión.

¿Cuál ye la señal del cristianu?−La señal del cristianu ye la santa Cruz.

¿Por qué la señal del cristianu ye la santa Cruz?−La señal del cristianu ye la santa Cruz porque nella morrió Xesucristu'l nuesu Señor pa redimir a tolos homes.

Pa salvar el purgatoriu

entamaba sor Sulpiciu

aquel interrogatoriu

col refugu de too viciu.

¿Qué debe saber el cristianu?−El cristianu debe saber la doctrina cristiana.

¿Qué ye la doctrina cristiana?−La doctrina cristiana ye la que predicó’l nuesu Señor Xesucristu p’amosanos el camín del cielu.

Asina que los ateos

arroxaréis nel infiernu:

malos, travesaos y feos,

¡nun llevái ropa d’iviernu!

¿Quién ye Dios?−Dios ye’l nuesu Padre, que ta nos cielos. Creador y Señor de toles coses, que premia a los bonos y castiga a los malos.

¿Aú ta Dios?−Dios ta nos cielos, na tierra ya en toles partes.

Pero llegó un triste día

qu’en sabiendo la lleición

finara la lletanía

y a facer la comunión.

67 con Lorca

El mio agradecimientu lorquianu dedicáu a los cientos de persones que me felicitaron pol cumpleaños a traviés de la mio muria, priváu o teléfanu, magar qu’espublice menos por culpa la censura’l Feisbuc. Munches gracies por nun m’escaecer/Muitas gracias por nun m’esqueicer.

Descanso la mio cadarma

na to vera, Federico,

d’esta vida que desarma,

de la que nun remocico.

Sacóme con cara fatu,

el mio fíu, de sutrucu,

magar nun val pa retratu,

sí pa echar la estaya al sucu.

Amestando a esta poesía

qu’amuesa contraste y pena:

tu llorabes, ella ría,

los palombos, en cadena.

Ansí son los pensamientos,

los qu’esnicia’l repunante,

nueche y riscar son momentos,

desvelos d’amor amante.

Hai cuantayá nun encoplo

sobro’l corazón de tema,

la edá ye un cardiacu soplu

que desdexa esi problema.

Canoxo por otros drames,

por otra malura engurrio,

xueguen otros a les dames,

que tiré’l tableru al murriu.

Asoleyo soleyeru

los mios años de sainete,

mientres perdía’l saleru,

gané los sesenta y siete.

Alcordances de l'Alhambra

Nesta dómina d’andanciu, censura y desconciertu en tercera fase tornamos a Granada. L’Alhambra s’allugaba nel mesmu llugar. El sol asoleyaba aínda más castrón y la calor arroxaba en resultancia. Cuasi tolos comercios se calteníen zarraos la fin de selmana y la xente colara pa les sableres. Nun fui a atopar nin al mio propiu hermanu nin col gabitu de San Antón. Remanecíen los ministros que s’atropaben na solombra los parques o pediguñando peles cais cada venti metros. Nos contaos chigres abiertos s’apeguñaben los veceros. Si acaso tomes daqué, tienes qu’azorronar la pinta foriatu col envís de nun pagar tamién la consumición del vecín. Por mor de la mio condición, ta perclaru que fartéme de pataques a lo probe. La casualidá quixo que l’aparcamientu llamárase San Llázaru y foi’l casu que nos mangaron 8,80 euros por dalgo más de tres hores, lu que−yos permite mercar otra plaza en menos d’un añu, ¡un verdaderu choyu! Pente los churros −d’igual miente− s’aldovinaba dalgún clavu, pero a lo cabero tuvimos la suerte de nun crucianos con Xosé María’l Tempranín.

Nin me queda la pallabra

Si perdí la vida, el tiempu, tolo

que tiré, como un aniellu, a l'agua,

somorguiando con él tan tontorolo

si perdí la voz en carba que nun nagua,

la mio pallabra escalabra.

Si carecí la sede, la fame, tolo

que yera mio y resultó ser nada,

si segué solombres en silenciu, solo,

collechando soledá d’una llapada,

la pallabra yá nun llabra.

Si abrí los llabios para ver la cara

pura y tarrecible de la mio tierra,

si quixi sonrir y la sorrisa afara,

si soi carne de cañón en cualquier guerra,

la pallabra ye macabra.

Si estudié tamién nel Cardenal Cisneros

y la clas nun m’aportaba más que murnia,

fueron abril y mayu otros febreros

nos qu’anoché’l bachiller tollu de turnia

na pallabra que pastió dalguna cabra.