El delegáu

     Llegara l’asoria del desiertu y la Villa y Corte algamara los 44 graos. Si cavilgabes un plizcu nun salíes, asina qu’ensin lu pensar dos vegaes colé güei pal monte de la faza oeste de Madrid acarretando’l pan qu’atropara mientres la selmana pal mio amigu’l burru que nun yera, que yá vos presenté’l xueves pasáu. Foi’l casu que llegara al xaratal onde vieno al mio alcuentru hai siete díes ya’l pollín nun taba; sicasí, como tolos burros preparaos tienen representante, el de so s’averó al mio llau pa facese cargu del almuerzu que foi mazcayando de la mio mano con abondo procuru. Pa la vuesa conocencia, equí asoleyo una semeya del delegáu pa que toos sepáis que caretu gasta.

Pol reparador

    A Xovín yá−y dicía’l so maestru cuando rapacín que tenía madera. El docente atolenara acordies por culpa que’l so pá siempres fora carpinteru ya él mesmu finara trabayando colos de la forestal. Tan apuráu andaba Xovín cola so xera que nun−y quedó tiempu nin pa cortexar; sicasí, yá cumplíos los 50 conociera una moza venti años más nueva que yera ebanista y que ría de les sos engurries. Foi’l casu que por deformación profesional mercara reparador pa la madera y bebiólu d’un solu tragu. Anguaño, hai tres selmanes que se caltién ingresáu nel llaboratoriu de calidá del IKEA.

"NAUSEA"

Furaquen el banduyu de les vaques pa que seyan más granibles… (Semeya de la Sesta)

Lo que refuga Sartre, lo que produz la estomagada, son los homes que namái cumplen una rutina ya anecien en desendolcar ensin más cavilgar les sos llabores, xente qu'al esforciase por demostrar la so esistencia escaecen lo qu'ésta pue significar en realidá y l'azorronen con apariencies, busca d'una hipotética superioridá ya actos discutiblemente heroicos. 

Lo qu’a min me repuna nun son los homes que trabayen como máquines, nin los qu’escaecen lo que pue significar una vida a la que pueque nun s'atope esplicación y nin siquier los que namás esmolecen por aparentar. A min, la xente que realmente me fadia ye aquella a la que nun−y val con esplotar al restu de los seres vivos sinón qu’arriendes los tienen que torturar. Sí, a min lo que bramente me chinga ye esa gandayada humana mísere. Esos degorrios d’esti paraísu que caldía camudamos en infiernu que se dediquen a condergar inocentes. ¡MALDITOS SEYAN!

El burru que nun yera

Yera un burru que nun yera

y mil que nun siendo son,

namái quiero a la mio vera

al que pastia en pradascón.

Platero bien podía ser,

pero enxamás Rocinante;

porque se dexa querer,

seique nunca repunante.

Cuando llego pel camín,

cuerre aína al barganal,

esti célebre pollín

que m’aventa cualquier mal

aportáu de la ciudá

con pan duru na mochila,

que m’agradez de verdá

con blincos en retafila.

Al marchar dambos sentimos

que s’alloña un bon collaciu,

mientres reclama más mimos,

voime diendo mui despacio.

Otru día traerá’l tren

al so amigu col tarucu,

nesi tiempu que va y vien,

apaecerá de sutrucu.

Por partida doble

     Aquel vieyu contable, de la que llegaba la nueche, siempres finaba apigazando sobro los asientos qu'afayaba perriba la so mesa. A causa d’ello, peles mañanes espertábase abondo bien descansáu yá que reposaba por partida doble.

Baxa

     Dime de baxa d’una compañía telefónica qu’amuesa un nome con entamu mui sonoru porque m’anduvieron chingando mientres quince años. Nos postreros meses−yos tuvi alvirtiendo abondes vegaes de que nun me xubieran un solo céntimu’l so paquete yá que nun taba dispuestu a pagar más pol so pésimu serviciu. Foi’l casu que nin siquiera se molestaron en retrucame. Dempués, cargáronme’l siguiente recibu con un incrementu d’al rodiu del 40 %. Coles mesmes, pedí’l treslláu de portabilidá a otra compañía ya aína apaecieron aneciando colos correos y llamaes. A lo cabero, espétenme que m’ufierten fasta 200 euros p’atender la penalización de la compañía nueva ya arriendes me van baxar la cuota a la tercera parte por un periodu d’un añu. Darréu m’entruguen que si me decato de la montonera perres que voi aforrar. De secute−yos alderico que sí, pero que yá diera la mio pallabra al otru provisor ya eso bien seguru que nun lu van a garrar  Vdes.

Plastificaos

Tábemos controlaos, numberaos, fumigaos ya agora, plastificaos.

https://cnnespanol.cnn.com/2019/06/05/si-bebes-agua-embotellada-podrias-duplicar-la-cantidad-de-microplastico-que-ingieres-segun-estudio/

Dicen que tienes velenu na piel

y que tas fecha de plásticu fino.

Dicen que tienes un tautu divino

y quien te toca se vuelve fardel.

Y si esta nueche quies dir a baillar

vete poniendo‘l disfraz depuradora,

pero tendrás que peñerar en media hora

porque si non nun te paso a filtriar.

Pero de mano quies dir a cenar

y m’espetes que te lleve a un sitio caru,

que vas vistir de pexiglás ensin reparu, 

porque si non nos van a retayar.

Crees que yes una bruxa ya avezada

y lo que pasa ye que tas intoxicada;

y eso que dices que yá nun papas nada,

pero me dicen por ahí: "Que sí, que sí,

que sí, que vas plastificada per ehí.

Dicen que tienes velenu na piel

y que tas fecha de plásticu fino.

Dicen que tienes un tautu divino

y quien te toca se vuelve fardel.

Dices que yo no soi’l to home ideal,

mientres que forres tresparente una revista

y yo m’entrugo si tendrás dalguna pista

o dalguna foto en botella de cristal.

Casualidá

     Acabo de contestar a un comentariu de la mio mui estimada hermanina con una frase que finaba con “cantar, soñar ya rir”, por esti mesmu orde. Ye’l casu que, per casualidá, alcuéntrome con qu’esa secuencia tamién la emplegara Cyrano de Bergerac, ta perclaru qu’ensin posibilidá de que me la copiara.

     Pero “cantar… soñar… rir…” vivir… tar solu…

ser llibre, tener el güeyu abiertu, la voz que cimble,

llantame por sombreru l'universu,

por un sí o por un non,

bateme, o faer un versu…

Refugar con valor la gloria y la fortuna,

viaxar cola imaxinación ¡a la lluna!

Namái al que val reconoce-y los méritos,

nun pagar enxamás por favores pretéritos.

Arrenunciar pa siempres a cadenes y protocolos.

Posiblemente nun esnalar mui altu, pero solu.

Si vienes a la mio vera

Si m’alcuentres pel camín,

nun dexes de saludame,

ando a llombu del maxín,

soi poeta muertu fame.

Acarreto mil poemes

ya achiperres na mochila,

rinse davezu les femes,

atropo iviernos en fila.

Escapo de la ciudá,

voi refugando la bulla,

per onde’l silenciu va,

préstame dir a garulla.

Nel monte siempre m’afayo,

carezo de la qu’ambura,

nun me pincha nin l’escayu,

respiro y como verdura.

Aforfugo pela napia,

nun atopo solución

cola sal de mar de Tapia

o la mesma de Xixón.

Charro abondo col paisanu,

col paisanu de raigañu,

paezme un vezu mui sanu,

como apigazar n’escañu.

Nunca me fadiara’l rozu,

pero sí’l tantarantán,

magar que yá nun soi mozu,

correspuendo si me dan.

Si vienes a la mio vera,

esguilaremos suañando

pente la fueya la llera,

la cordelera o’l pandu.

Ayudes y mapes

     Fino de tornar de la Conseyería de Tresportes y Vivienda de la Comunidá de Madrid onde fui a mercar unos mapes pa ser a atopar caminos pel monte y nun terminar escayáu pente los bardayos. Al entrar, a manzorga, escuclo cuatro funcionarios tres d'un mostrador que miren pa min. A lo fonderu, otros tantos dende dientro d'una cuerra estampen pegatos nel arca a los que lleguen. A mandrecha, vixilantes y la Benemérita. Per delantre, un home ya una muyer entruguen a los que pasen: ¿P'ayudes?, ¿p'ayudes?... Llega'l mio turnu ya anecien conmigo: ¿Vien vusté p'ayudes? De secute-yos alderico: ¡Sandiez!, a min enxamás diéronme ayudes. Valme abondo bien con que nun metan la mano na caxa de les contributives y nos dexen cobrar aquello a lo que tenemos derechu polo que cotizamos (tol funcionariáu que folgaba en silenciu echa la risada como si dixera daqué graciosu).