Lluis de Turiellos

Y un poeta orixinal, que ye una categoría a parte que dexa güelga propia nel camín de les lletres, que yá ye abondo. (Munches gracies, Lluis)

jueves, 31 de diciembre de 2015

LES CAMPANAES


N’Antena 3, la Pedroche,
te desea bona nueche,
va cubrir les campanaes,
pa toles mios amistaes.

Tamién lu fairá Solera,
que va a tar a la so vera.

Asina, dende Madrid,
onde güei tol mundiu berra,
t’encamienta sías feliz,
el to amigu Pindesierra

y qu’entames un bon añu,
cola muyer o l'apañu.

miércoles, 30 de diciembre de 2015

¡NUESOS MEYORES DESEOS DENDE BURGOS!


          Como nesti fin d’añu nun pudimos averanos a Asturies, viniéramos a Burgos, que cuasi que queda a metá camín, al envís de trabucar la señardá. En resultes, quiero felicitavos l’añu qu’entra dende la so mesma puerta de Brandenburgos y amestavos otra ocurrencia…


     Quixera camentar a tolos amigos esti caberu día del añu que nun tien sentíu nun esfrutar d’estes fiestes porque nos falte un ser queríu. Voi desplicame: esi familiar o ser queríu bien seguru que te quería tanto como tu* a él, ¿nun ye asina? Pos bien, esi ser queríu se pondría murniu si vos viera con tristura, yá qu'a él-y prestaría que tuvierais contentos siempres, ¡ta perclaru! Entós, ¿a que coime esperáis pa camudar esa cara y somorguiar na folixa, magar que seya namái que por afalagar al ausente, arriendes d'a los que se caltienen a to vera?

     D'acordies con ello, aporfio en deseavos unes prestoses fiestes y un granible añu qu’entra, refugando esi sentimientu.

*tu, nun lleva tilde n’asturianu.

Cuentu per Navidá


     Toles díes, nesti Madrid —antoxana del Cielu— asoceden milagros. Dellos surafricanos que piden pa xintar nes puertes del hiper son quien a fumar, falar pel móvil y chumar un bote de lu que-yos pete. Na cola de Cáritas hai “caraduritas” que nel intre yá nun precisen l’alimentu qu’acarreten y lu vienden nos rastros. Hai unes selmanes, enantes de carecer la cafiante ciática, aportaben los fechos sobro naturales dende mui bien ceo: magar que yo camino apriesa, fui adelantáu por un tríu d’enmuletaos que nun sofitaben pa nada na so muleta. De la que-yos algamé, cuando pararon, glayaben a otros paisanos de so que caleyaben pela cera d’enfrente pa dempués dir asitiase caún onde tuviera axustáu. Pero nun ye sólo en Madrid, en toa España anecien los milagros: el gordu de la llotería de Navidá tocó a dalgún chalaneru que dicíen que nun tenía pa comer, anque sí pa mercar el décimu. En Grau me contaron qu'un de los veceros de los servicios sociales fuma davezu Winston que-y encarga a la fía. Mentanto, los fatos que trabayen inoraos dolce hores al día en oficines y despachos siguen siendo fatos y nun reciben aides nin de les inspeiciones.

martes, 29 de diciembre de 2015

¡ESTO NUN YE UN ASESINATU!



     Esto nun ye un asesinatu porque'l Derechu lu escribieron simios más o menos evolucionaos pa llexislase puramente ente ellos. Ye por ello que'l Derechu, sía alministrativu, civil, penal, constitucional, públicu, comunal, priváu o romanu nun ye más qu'un derechu humanu que práuticamente inora a les otres especies. Dende'l puntu de vista d'una seleición natural con un orixe común, los caballos xamuscaos: herbívoros, mansos ya inocentes, tendríen más derechu a vivir que les besties bípedes, repunantes y culpables que prendieron fueu. Los que s'autodenominen animaos lu guisan y se lu comen tou, tratando de llantar el fundamentalismu de les sos idees fasta al so mesmu próximu, anque'l so envís acarrete una más que probable estinción. Algamáramos una situación na que nes ciudaes yá hai xente qu'apenes salen de la so casa porque tarrecen al malfechor. ¿Qué considerancia van esperar el restu de los seres vivos d'esos magüetos que nun respeten nin al so propiu vecín, al qu'afiten nun inevitable desaniciu? D’otra miente, si daquién tratara de vengar a los benditos amburaos, la llei qu'impunxera la mesma triba a que pertenecen estos asesinos-y xulgaría nun reblagu.  Al aviesu, una cosa ye la "llei" y otra, la Xusticia.

     —Dicen que los del PACMA garraron la semeya d’otra quema; sicasí, los animales que morrieron nestes d’agora son hermanos (iguales).






 
 
 

lunes, 28 de diciembre de 2015

TOCA CARECER

(Foto, Atalayanocturna)
 
¿De qué va valir mañana,
esa lluvia pasaxera?,
¿o la próxima selmana,
cuando anecien na so xera,
 
de la que torne la seca,
de la que’l criminal prenda,
al qu’anda como una teca,
alloriáu per cualquier sienda?
 
¿De qué sirvirá a lu muertu?,
¿a la viesca qu’amburara?
Yá nun tien igua l’entuertu,
magar que’l monte quemara.
 
Toca carecer agora,
por culpa d’un centenar,
va ensuchar fasta la ñora,
nin la murnia va verdiar.
 
Namái guañarán escayos,
nel Paraísu’l Bardial,
por culpa dellos babayos,
que-y fixeron tantu mal.
 
Quexarán de que nun llueve,
de qu’afueguen de calor,
qué mal degorriu los lleve,
llantaron ascua y mugor.
 
Atizaron al raigañu
y al vuesu mesmo destín,
sufriremos toos el dañu
pol tarrecible malín.
 
Desaniciaron la vida,
col so espantible egoísmu,
frayando bien la firida
del que vive del turismu.
 
Por ello encamientu amigu:
andechái ,dái parte a gritos,
que nun queden sin castigu,
los pirómanos malditos.
 

domingo, 27 de diciembre de 2015

Una cafiante verdá.

 
 

     Camienten qu'ensin viesca nun hai “iniciación”. Ensin plantes tampoco habrá osíxenu. Ensin osíxenu nun seremos quien a respirar. Los fueumentalistes desanicien la viesca, amburando, amás d’animales,  árboles y plantes. Entamen el desaniciu y l’afuegu ensin que seyan prindaos y castigaos acordies a la so fechoría. Tamos dexando que nos afueguen. Mentanto, los mesmos que nun tomen midíes exemplares y anden aguardando a que la lluvia amenorgue la traxedia quieren siguir vendiendo como Paraísu Natural esta llaceria que yá nun tien torna atrás. D’otra miente, nun ye de xusticia tener tolerancia cola intolerancia. Nun ye de xusticia que nel futuru vaya siguir morriendo xente por culpa, direuta o indireutamente, d’esta xentecaya egoísta. ¡Nun escaezas que si nun-yos denuncies te conviertes nel so cómpliz!




 


sábado, 26 de diciembre de 2015

L'infiernu

(Semeya de X. Arrojo)
   
      Abúltaseme que ye un avisu: la quema nun fina y aporfien les nubes arroxando como enxamás s’acolumbraren. El cielu espeya’l fueu qu'anecia y arreniega de los degorrios que camuden el Paraísu en Infiernu. El finxu d’esi cielu antemana un cambéu climáticu que nos emponen los malditos que llueu reburdiaran de la calor y de que nun llueve. ¡Qué la maldición de Gaia, la biosfera a la que pertenecen y a la qu’amburen, caiga sobre ellos! La so escomunal llaceria yá nun tien igua y toos vamos carecer les consecuencies que bien ceo van resultar al aviesu de como cavilgaben.

 

jueves, 24 de diciembre de 2015

Les caberes fiestes

(La prima de riesgu / Semeya, Vicen)
 
Anecia la Navidá,
la Navidá de retayos,
de fame y calamidá,
y de perda de trabayos.
 
Naide monta’l nacimientu,
tan los pastores nel paru,
namái que l'ayuntamientu,
el del IBI del descaru.
 
Tenéi cuidáu colos reis,
que vienen colos sos xenros,
y con toles de les lleis,
en afalagos bien tienros.
 
D’apertar tanto los tornos
y pela xubía inxente.
a la lluz de los adornos,
va folixar muncha xente,
 
La cena de Nuechebona,
cuento que será de nuños
y de xaracos con trona,
con trona de bien de fuños.
 
Quiciás nel real mensaxe
colen dalguna milonga,
cuando falla l’engranaxe,
se furrula a la perllonga.
 
Al que mercó llotería,
cola última prindada,
si-y cayó’l gordu esi día,
cuasi nun va a cobrar nada.
 
Pa torgar les nueses penes,
van desaniciar les fiestes,
al tayu  coles cadenes,
ensin turrón y ensin cestes.
 
Eso va ser d’equí a un añu,
¡felicidá nes caberes!,
deséante ensin engañu,
les llingües de sacaveres.
 
Nun val que te pongas viesgu,
nin que cante Niti Colsa
que xube la prima riesgu
y ta baxando la bolsa.
 
Esfruta de la folixa,
aprovez el 2015,
que si aporfien cola sisa,
pue qu’el 16 enruince.
 
 
                    Aclaración: comer nuños y xaracos ye como nun comer nada.Comer nuños (y xaracos), fam. nun comer nada. Comer nuños (y xaracos), fam. nun comer nada. Comer nuños (y xaracos), fam. nun comer nada.

miércoles, 23 de diciembre de 2015

¡Felices fiestes y salú a esgaya, collacios!


       Anguaño, dempués d’un llustru d’averame al so conceyu, faltaré a Grau per Navidá. Nun voi ser quien a caleyar na soledá de les sos places de la que la xente cene en Nuechebona o españe d’allegría a la fin d’añu. Nin siquier a echar la parrafada cada mañana con Carmen, la candial panadera, nin en resultancia a repetir alcuentru con Alicina y Arnesto o cola esclusiva Ninfa d’esa villa. Tampoco voi dir con Xuan y Alvira a restolar colos Aguilandeiros de San Xuan de Villapañada’l día 27 nin a tomar el vermú con Yoli.  Naide ye a faer lu qu'ún quier cuando daqué se traviesa pel camín. “Querer ye poder” nun ye más qu’una fras tan guapa como retórica. La circunstancia orteguiana nos condiciona’l día a día; sicasí, nun se pue torgar nin el procuru nin la propia fantasía y pue que dalgunu de los mios amigos estreme la mio solombra pente’l borrín nes orielles del Cubia. Si asina-y asocediera, que nun dulde en saludame, magar seya malapenes una pantasma alloriada por culpa les maldites quemes qu’arroxaron la nuesa bendita Tierra. D’otra miente, que pescude l’osu enredador de los aguilandeiros que si vuelve a asustar a Alvira-y voi cutir la pelleya pal añu qu’entra. 

      ¡Felices fiestes y salú a esgaya, collacios!

Malditos II

(Semeya, LNE)
 
Q.e.p.d… 
 

     Antayeri, pensando nes víctimes d’hai unos años en Guadalaxara, entamara a escribir esto: “Va tener que morrer daquién pa que tomen midíes d’una puñetera vez…”; magar que nun quixi llantalu nel Feisbuc. Güei desgraciadamente asocedió y el presidente del Principáu, el conseyeru de Presidencia y el direutor de Xusticia treslladáronse a la faza del accidente y bien seguru qu’esto  va a camudar; sicasí, ¿onde taben fasta agora? ¿Nun-ys valió la llaceria del branu, de la que yá amburaron cases, p’albidrar qu’esto tenía qu’aportar dalguna vegada? ¿Nun se decataron de los riesgos que se cuerren p’apagar una quema nel monte? Esos montes hai que caltenelos curiosos pa nun dar pie a qu’aticen los pirómanos, a los que pa nada defendo. Vós, los malditos, teníeis les manes emporcaes de sangre animal, cazumbre vexetal, desgracia de la tierra, murnia de toos y endagora, por aneciar na fechoría, tamién de sangre humano. ¡Malditos seyáis, malditos!
 
 


lunes, 21 de diciembre de 2015

¡MALDITOS!



     Asturies, la tierra madre que nos da vida y abellugu, ambura. Hailos que, cuando-ys cafien los bardayos, prenden fueu al monte, a la vallina, a la casa’l vecín y a la viesca d’esta tierra que ye de toos. Sí, hailos que de la tienen una cuestión fadien a tola población. Nestos díes quemaron vivos a millones d’animales y plantas, arriendes de chafar el mou de vida de miles de paisanos que viven del turismu. Nesta dómina de satélites espaciales, l’alministración asturiana pue que, dempués d’autorizar el furar per tol occidente a la gueta l’oru, crea que nun tien autoridá moral pa prindar al que comete un delitu ecolóxicu y de resultes-y salga de baldre. Foi’l casu que se vía venir yá dende enantes del branu y naide fixo nada. Agora, quiciabes lu más conveniente seya camudar d’eslogan a “Asturies infiernu artificial” p’alvertir de lu asocedíu y de la presencia d’estos degorrios que cuando garren el retiru colen pales villes.

     La Tierra ye de tolos seres vivos y estos necesiten el ser de la Tierra pa poder vivir. Na Tierra hai sitios guapos y menos guapos. Na Tierra hai seres más llistos y otros menos llistos. Tolos requexos de la Tierra tienen el so aquel. Tolos seres vivos de la Tierra merecen un respetu y cada vegada qu’ún enfocique porque nun-y presta daqué nun pue esfardanar lu que ye de toos, por mor de que sinón finaría’l mundiu en dos díes.


     Ayeri, tuviera 17 hores nuna mesa eleutoral y torné pa casa baldáu, más que pol llabor desendolcáu pol culpa’l dolor de tiesta que garré penando per aciu del más de centenar de quemes qu’atizaren los malditos. Andaba alloriáu por nun poder averame a Asturies nestes fiestes navidiegues; sicasí, agora, tanto me da. Cavilgué que bien podría cruciame con dalgún d’estos degorrios desalmaos qu’arroxaron la mio mesma alma y namái me caltuvi n’ayén, pescudando qu’esta llaceria yá nun tien igua. ¡Malditos, seyáis, malditos!

viernes, 18 de diciembre de 2015

Edith Piaf

 


     Esta entrada foi allugada nesti blogue nel entamu del día 19 de payares de 2015, non nel 18, ensin saber qu’esti mesmu día se cumplía'l centenariu cabal del nacimientu d’Edith Piaf. ¿Foi casualidá?

     "Ayeri finaba de llantar un recursu pataletu escontra’l so desdexamientu nun muérganu oficial, cuando decidí convidar la mio murnia nuna franquicia bocaos que llevantaba los sos párpagos de fierro abatible.  Somorguiéme na so soledá ensin veceros al empar que nos sones  de L’hymne  à l’amour d'Edith Piaf que sonaba al altu la lleva. Asegúrovos que nun fui a decatame de quien me sirviera'l café puro arroxando qu’encomendé. De la que’l fumu esguilaba pela sala atopéme ximelgando con él al ritmu de les notes d’aquel cantar tan melgueru. Espeyáu nuna bola d’adornu de Navidá que colingaba del techu, el rostru de la inmortal afamada me sonría paeciendo animame a tirar p'alantre. Salí del comerciu cuasi qu’esnalando, al tiempu qu’alvertía que cualquier instante máxicu pue camudar la to vida".

¡CALLA!


       Chivaron-y a la muyer nel ambulatoriu que refugué la receta d’otra caxa d’indiciones pa solliviar la ciática qu’anecia en cafiar, y viniera riñendo. Callé por culpa de que sofitar el mio envís diba a ser un falar por nun callar. Callé porque enantes nun se podía falar d’unes cuestiones y agora nun se pue falar d’otres. Esos 35 años nos que te chapaben cuasi qu’un terciu de lu que ganabes pa de vieyu nun tener que pagar les melecines (dicíen). Güei, too quedara nuna tarrecible trola y la metá de lu que me receten yá nun lu pasa esi seguru qu’anda dando bocanaes por mor de qu’impunxeron dar cobertoria a mediu mundiu. A toa esa xente que ye quien a trabayar equí por causa que nel so país ganaba entá menos y qu’arriquez aínda más al que-y contrata por nin siquier la metá, mentanto dambos aporten malapenes una miseria a esa Seguridá Social que los paisanos endrecharon dende peronia. Esa Seguridá Social que tamién tien qu’asistir a los que vienen de veceros de los Servicios Sociales. Asina que: paga o carez, caleya o arrevienta y, arriendes, calla, que reburdiar ta mal vistu y de resultes te puen sotripar los qu’enxamás cotizaron.

martes, 15 de diciembre de 2015

CAMBÉU

(Cartelu esclaratoriu na casa’l guarda)

 
     Tres les eleiciones municipales de mayu, camudaron los cabezaleros de la casa conceyu. Colaron los de la doble “P” y entraron los que dicíen poder con una sola. Darréu entamaron les obres nel parque insinia del distritu. Compunxeron mediu parque ya esfardanaron l’otru mediu. Mentanto, la povisa, los bárganos, les carriles y los zarros torgaron a toos del so esfrute y naide sabe cuando va finar la llaceria. Los vieyos riñen ente ellos y s’echen en cara lu que faen y lu que nun faen los partíos a los que voten los otros. A min, dempués de tantu desatín atropáu, yá me da igual que me muerda un perru qu’una perra.

 

 


sábado, 12 de diciembre de 2015

Pa un alderique a Benedetti



Los qu’enxamás aporten nada,
los desagradecíos y dellos escritores
 reburdien de la clas media esclavizada
 que-yos da de comer
y merca los sos llibros.
Esa clas media, señor Benedetti:
medio rica,
medio culta,
s’abluga nesa faza medio grande
ente lu que cree ser y lu que ye,
pero dende'l mediu nunca mira mal
nin a los prietos,
nin a los ricos,
nin a los sabios,
nin a los llocos,
nin a los probes,
porque sólo dende'l mediu
nun s’acolumbra a la virola
y sí, dende los cabos.
Nun escucha a Hitler
nin siente al Che
yá que nun-y presten los estremos
nin la llaceria
y depriende cola historia.
Metanes de la nada tamos toos:
toos medio duldamos,
toos cavilgamos adulces
y nós nun salimos a la cai
a causa de que si saliéramos
too camudaría,
ensin solombres,
yá que somos mayoría
y nun diben a esistir
nin tiranos nin vividores.
La clas media
siempres se decata
de que ye peón,
magar que ye quien a desendolcar
cola so xera.
D’esa miente, medio xeitosa,
llanta’l costazu dafechu
nel mediu del que comen otros
a los que nun algama
nin a esclavizar
nin a folgar.
Por munchu qu'usté critique
nun-y val el so alderique.
Que si malu ye reprender al que calla,
ye entá peor refunfuñar del que trabaya.
Ye una tema que rique más respetu,
yá que de munchu mecer escosa’l tetu.

martes, 8 de diciembre de 2015

ENTE UNOS YA OTROS

 

      N’avientu de 2012, la tasa añal del Índiz de Precios de Consumu s’asitió nel 2,9 % y la xubida d’actualización de les pensiones afitáronla nel 1 %. Soraya nun dixo ayeri la verdá cuando espetó que'l PP nunca conxelara les pensiones, yá que nesta vegada nun sólo les conxelaren, sinón qu'amás les amenorgaron. El desconocimientu de los candidatos de los otros partíos refugó la oportuna rempuesta.

domingo, 6 de diciembre de 2015

Mal de güeyu

 

Escribo dende la ciática
que me detién y tortura,
en mancadura iniciática,
mentanto la nalga ambura.
 
A un tiempu'l todiellu espeta,
al par, la mesma caniella.
La rodía nun respeta,
l’aporfiadora restiella.
 
Que me baxa pela zanca,
dende’l mediu del cadril,
me fraya’l procuru y manca,
y me pon el xeitu a mil.
 
Y pa cuelmu de los males,
duel entá más cuando m’echo,
axorizo de costales,
de velea ando al acecho.
 
Y asina van dos selmanes,
paez una maldición,
pa nada val que t'afanes,
nin sollivia la indición,
 
nin el fervinchu nin l’untu,
nin frega, fríu o calor,
tienes que fadiar y puntu,
y esmolecer de dolor.
 
Rindiendo de tar sentáu,
siquier aguantes argutu,
arrevientes de valtáu,
titiritiando ensin cutu.
 
Magar de naide reniego,
ye mal de güeyu, de xuru,
ruégovos anque zuniego
m’apurráis un esconxuru.

viernes, 4 de diciembre de 2015

Eleiciones




Señores políticos: Nun prometan nada y digan lu que van cumplir.


Señores periodistes: Cuenten namái la noticia, que nós yá la interpretaremos.


Señores votantes: Nun hai un políticu que lu faiga too bien, magar que dalgún seya quien a facelu too mal.


Señores del Gobiernu d’Asturies: Yá hai munchos años que’l so partíu nos espetara que diben a desaniciar les tases de l'autovía del Güerna. D’otra miente, tol nuesu occidente nun ye un prau de so pa qu'autoricen a furar a los del oru y dempués a agafar onde-ys pete.


Señores del Gobiernu Central: ¿Qué dura más: la obra la Variante Payares o'l cuentu La bona pipa?


Señores collacios: Respetái'l mou de pensar de los amigos, yá que cuasi tol mundiu cavilga que quien nun piensa como él ta trabucáu. Amás, el falar con daquién que nun piensa como ún ye más arriquecedor.

lunes, 30 de noviembre de 2015

Nel cumpleaños



     Ayeri foi’l 60 cumpleaños del mio hermanu pequeñu. Dímos-y una sorpresa una montonera familiares y amigos que-y aguardábamos al belume y dafurto nuna sala de renta. Quedara bramente ablucáu pola impresión y darréu lu festexamos toos a mamplén. De reflundiu, proyeutaron una riestra de semeyes de familia y nel intre la mio vida paeció trescurrir nun tris pela pantalla, de manera tala qu'al finar nun fui quien a tornar dafechu a la realidá. La tema fíxome cavilgar sobro la condición de la nuesa esistencia. El tiempu, cuando yá pasa, nun caltién más qu’alcordances. De neños, espurre a la perllonga. De mozos, trescurre adulces. Cuando somos paisanos se desendolca aína y, a lo cabero, finamos nun reblagu ente murnies. Abandoné la folixa col envís de camudar pa siempres no que me tocara vivir. Sí, con esi mesmu procuru qu’acarretamos de la que venimos d'un entierru y qu’inxente escaecemos.


viernes, 27 de noviembre de 2015

INOCENTES



L’aición de gracies cotiza güei a 6 pavos tres la llaceria de los Estaos Xuníos…


jueves, 26 de noviembre de 2015

Alderique na NE

 
   
     ¡Tamos aviaos! Abúltaseme qu’ésta ye la única rexón o país del mundiu onde ún nun pue falar o escribir na so llingua llariega ensin que te riñan los de siempres…

     P’Aureliu, el que reburdiara en LNE güei sobro la clas de “bable” qu’escribo y que nun entendía’l so güelu. Ye que nel intre desaniciaron la noticia del nuevu retrasu n’apertura del “fondu de sacu” de Lleón onde taben llantaos los comentarios.

“¡Miániques, Aureliu! Esta seición ye de trenes, asina que trabucasti l’alderique. Yo escribo n'asturianu normativu y tamién lu faigo n’occidental. Equí lu fixi nel primer d’ellos, esceuto los apóstrofos que me los camudaron por signos d’entruga. Iguar un normativu foi necesariu tamién col castellán. Si a ti o al to güelu nun vos presta’l nuesu, podéis encomenda-y a l’Academia de la Llingua les correiciones que vos pete. Pa preguntar con más procuru sobro la verdá yo t'encamiento El criteriu, de Balmes, y p’ameyorar el to chapurriáu (la to mestura nun ta bien escrita, nin en castellán nin en asturianu) vas tener que tornar a la escuela.
 
     Perdona que nun te retruque si anecies en tarrecer, ye por culpa de que nun me dedico a perder el tiempu en amarraces”.

martes, 24 de noviembre de 2015

El belén

 

Armóse gordo’l belén
a un mes de la Navidá,
de mazar, ruempe l’abén,
fechu una calamidá.
 
N’oriente nun queden reis,
¿quién apurrirá l’inciensu?,
burros y bues, los que veis,
los romanos, col so censu.
 
Les estrelles tintiniando,
corderos escabezaos,
los cielos se van nublando,
los pastores, en fregaos.
 
El castiellu lu españaron,
el ríu, contamináu,
los coríos esnalaron,
anda San Xosé frayáu.
 
Magar nun hai llavanderes,
abonden los “caganer”,
col asuntu les señeres,
la metá quieren francer.
 
El champán tien sabor murniu,
burbuya ensin allegría,
el gaiteru anda de turniu,
nun toca la llotería.
 
Torna Herodes y Nerón,
al cucar la cosa qu'arde.
Dívos comiendo’l turrón,
por si dempués ye mui tarde.